Milikiyaasi 1 - Kafa Linguistics Project

¹ Keemechi Milikiyaasina Israꞌeeleenaꞌoyich Doono Yeeri gettiti wocho ebine:

Israꞌeeleenaꞌon Doono Yeeri Shuno

² Doono Yeeri bi asheenaꞌoyich ishichiye: “Ta ittoshin shunnaabeeto taane” iye. Tunebaani boonoshi “Noon ne shuno aaye?” iyeete. Doono Yeeri ishichiꞌi wochiye: “Esayi Yaaqobichi manoo toone? Tunebaani Yaaqobin shunnaachaa,

³ Esayin shixxoye. Geppe bi showeenaꞌon barahoo tuniihoye; bi hajjoonoo barahee boqqelleenaꞌoyich beshiyaa immehoye” iye.

⁴ Edoomee asheenaꞌo diqqich “No katemeenaꞌo boonoshi happeetaanona wochi shuunemmo noone” gettemminaꞌone. Tunebaani Beshe Mawe Doono Yeeri ishichiye: “Shuunemminaꞌone; tunebaani ta happemmo taane. Asheenaꞌo boonoshi showoon ‘Xuꞌee showoo’ boonoshinoo ‘Doono Yeeri bulli yemeenoon kaareti asheenaꞌo’ gettemminaꞌone” iye.

⁵ Ebinoo Israꞌeeleenaꞌo boonoshi aafoona beeggemminaꞌone. Boonoshiyoo “Israꞌeelee showoyee maachaanolla Doono Yeeri giidechone” gettemminaꞌone.

Qeesheenaꞌo Kaareyoo

⁶ Beshe Mawe Doono Yeeri ishichiye: “Ta shigoon giishiibeeti qeesheenaꞌote, bushoo bi nihoon, guuno bi doonon oogii beetone. Ta, ittoshi nihoo taane; ishigaata amoyich taan oogiyaachote? Ta ittoshi doono taane; ishigaata amoyich taach shataachote? “Tunebaani ittoshi ‘Aabichaꞌa ne shigoon giishiihone?’ iyote.

⁷ “Ta shigoon ittoshi giishiito, deejjee gudooch eeꞌe maayoon giddiyoonane. ‘Ne shigoon no eeꞌiito amoonane?’ ii echehote; ‘Doono Yeerichi madoo hoxeetone’ ittoshi getonane.

⁸ Wolle gijjoon deejjoo ittoshi giddiyoo ebi tatoone? Baata sheqqe gijjoonaa biiyechi gijjoonon deejjoo ittoshi giddiyoo ebi tatoone? Ebin ittoshi ukkiroyich ittoshi giddiitaa, iberoochaa emiroona deꞌiree ittoshin galletehe?” iye Beshe Mawe Doono Yeeri.

⁹ “Qeesheenaꞌote, ebiyoommi wojjoon Yeerich giddiichi, eke ittoshich bi ariqqemmoyich qollebote. Ebi wojjoon ittoshi kishoochee deꞌiree ittoshi qolloon waayemmo ittoshich shaahii beete?” iye Beshe Mawe Doono Yeeri.

¹⁰ “Ta deejjee gudooch duube qaaqqoon ittoshi shoohaachemmoyich yaafee kechi shaaqqoon hiccemmi asho ittoshi daggoocheenoo daneba! Ittoshina emiraano taane; deejjoonoo ittoshi kishoochee deꞌaachemmo taane” iye Beshe Mawe Doono Yeeri.

¹¹ “Aabi keyoochee aabi gimooch beddaahaa beeti aageteenaꞌo ta shigoon oogii beetinaꞌone. Bulli xaaꞌoochaa ta shigoyich ixaanoon shookkiibee xalle deejjoon taach giddii beetinaꞌone. Boonoshi bulliyoo ta shigoon oogii beetinaꞌone” iye Beshe Mawe Doono Yeeri.

¹² “Tunebaani ittoshi ‘Doono Yeerichi madoo eeꞌoone; bi maayo hoxeetone’ getona ta shigoon kettiihote.

¹³ ‘Ebi shewiiti mooyone’ iibee hoxehote. Bogaa waaton, baata sheqqe gijjoonaa biiyechi gijjoonon deejjoo tuniiꞌi giddiihote. Iberoochaa ebin ittoshi kishoochee deqqehote?” iye Beshe Mawe Doono Yeeri.

¹⁴ Beshe Mawe Doono Yeeri ishichiye: “Ta, ooge Taatoo taane; ta shigoo aageteenaꞌo daggooch shatteetone. Taach giddiiya bi mookketi bagee baaddoo bi gijjee daggooch beetaa, dawushoona shappe quumechon taach deejjoon giddiimmo uppeton tunebe” iye.