Mikiyaasi 7 - Kafa Linguistics Project

Israꞌeeleenaꞌo Shuuneti Gonde Shuunoo

¹ Manjeebeeti michi aafo macaa tiyaa, woyinee aafoo buttetaa ciyaa bi maayemmon mucceti ashoommon ta tunetoyich, taach woowo! Manjeyemmi woyinee yuunjoo aalloone; ta shunnaabeeti, qaabbe balaasee michi aafoo macaa ciyitone.

² Yeer asho showee toommooch aalletone; ashi daggoochoo kaamoo tuneti asho aalloone. Asho bulli ashi damoon ukkoyich ottii quyee beetone; bi manoon dabboona dabbe yecha ii beetone.

³ Boonoshi kishoo gonde mooyon tuniyoon doyitone; ukkireenaꞌonaa nallechinaꞌona xuccoon maaheete; gijjechi asheenaꞌo boonoshi qaawiton gettii waayiiheete; ebina ikkotteꞌi koceeheete.

⁴ Boonoshi daggoochee gaaweto getteeto guccinoommone; beshe deꞌo getteetoo angichi tushoommone. Quyechinaꞌo tuneti keemechinaꞌona boonoshich bi gettitoommon Yeeri ebi asheenaꞌon bi naxemmi aabo shaggitone. Andolla shaammii beetinaꞌone.

⁵ Ne giyoon gibeneyaahine; ne nuuchoonoo gibeneyaahine. Ne sheenooch qeyaabeeti ne mecheyichona diqqoona yibbaateyaahine.

⁶ Ebi arooba anaami bushiisheenaꞌo boonoshi niheenaꞌon qallayemminaꞌone; maache bushiisheenaꞌo boonoshi indeenaꞌo toommooch, naamecheenaꞌoo boonoshi amaateenaꞌo toommooch tiyemminaꞌone. Ashich etto tunemminaꞌo bi hajjee kechi asheenaꞌone.

⁷ Tunebaani ta, Doono Yeerin gibenemmo taane; taan wodiyechi Yeerin quye beeyemmo taane. Ta Nuggishoo ta qolloon waayemmone.

Doono Yeeri Bi Asheenaꞌon Wodiyemmo Tuno

⁸ Ta ettoocho, taanna emiriyaahine! Ta dihitaanona tiyemmo taane; manderooch ta kotetaanona Doono Yeeri taach bekkoon bekkiyemmone.

⁹ Doono Yeerin xuqqeto taane; ta mooyon bi taggemmi wottoon, nalloon taach bi kichimmi wottoonoo Doono Yeeri kaaroon haaꞌiyemmo taane. Biyoo bekkooch taan kichemmone; bi wodiyoonoo beeggemmo taane.

¹⁰ “Ne Nuggishoo Doono Yeeri aaye?” iti ta etteenaꞌoo beeggemminaꞌone; oogichishoo yeellemminaꞌone. Gommeexi dengo koteeyoommon boonoshi kotee beetaa, tawoo ta aafoona beeggemmo taane.

¹¹ Yerusaalemi asheenaꞌote, ittoshi katemee xaqqee uxeroon ittoshi uxeremmi yemeeno woyemmone. Ebi arooba ittoshi showoo gaminnemmone.

¹² Ittoshi asheenaꞌoo Asooree showoochee, Gibitsee, Efiraaxisee aachi guudoona beeti showoochee, wohi showooch beeti bahareenaꞌonaa guudinaꞌonoochee ittoshi waan woyemminaꞌone.

¹³ Tunebaani arooch beeti asheenaꞌochi gonde shuunoochee tiyitona showoo ashaalli xafo tunemmone.

Doono Yeeri Bi Asheenaꞌoyich Ariqqo

¹⁴ Doono Yeero, boonoshi ikkeeto kubbi daggooch koteti, bechee mixinaꞌo daggooch beeti ne asheenaꞌon, qiddoo bi gumboona bi gijjoon quyoommon, ne hajjee asheenaꞌon quyebe; wonnee yemeenooch bi tunetoommon, gaaweto tuneti Bashaanee showoonaa Gilaadee showoonooch hamiree boonoshi beeyemmoyich tuniibe.

¹⁵ Gibitsee noon ne kichiyooba ne tuniitoommon, worganikkiti mooyon nooch bekkiibe.

¹⁶ Aagetee asheenaꞌo giidechinaꞌo boonoshi tunetaanoona ebin beegiree yeellemminaꞌone. Boonoshi noonoon uppemminaꞌone; boonoshi waamonoo oppemminaꞌone.

¹⁷ Dingeroochoommon, showoona yuummiibeeti mooyinaꞌochoommonoo buttoon baaxxemminaꞌone. Qewebee boonoshi mishigoochee keyi woyemminaꞌone. Shatona no Nuggishoo Doono Yeeri ne waan wottemminaꞌone; neenoo shati beeyemminaꞌone.

¹⁸ Curo tuneꞌi echeti bi asheenaꞌochi axaaxoon maariibeeti, boonoshi xuqqiti xuꞌoonoo shaaddeebeeti, neenoommi Nuggishoo halla konine? Shoodecho ne tunetoyich, ne kaaroon bulli yemeenoon yagiyaachine.

¹⁹ Wochinnoon nooch ariqqehine; no xuꞌoon ne baatee dechiich neexxehine; no axaaxoonoo baharee dechi duchooch duppehine.

²⁰ Wonnee yemeenooch no qaabbechinaꞌoyich wogaꞌa ne gibenikkitoommon, ne gibeneyoonaa kuxeyaani ne shunoonon Abrahaminaa Yaaqobinochi shiijjeroo tuneti nooch bekkiibeeto neene.