Mikiyaasi 5 - Kafa Linguistics Project

Iraashoo Beetilehemee Wommichon Keemmeti Keemo

¹ Hini ginee naayinaꞌochi katemoocho, ginee naayinaꞌon kicibe; giicheto noone. Israꞌeelee wulloochi gaakkoon gumboona xoobbii beetinaꞌone.

² Doono Yeeri ishichiye: “Beetilehem Efiraati katemeene, Yihudee showooch beeti gishiishi katemeenaꞌoochee ikke ne tunetaanoona, wonnee wonneecho, wohi yemeeneexo tuneti, Israꞌeelee showoon qeejjemmi woraaferashoo ne waanee taach kechemmone” iye.

³ Ebich, bi indee ebi bushoon bi shiyemmi wottoon, Doono Yeeri bi asheenaꞌon qajjemmone. Aroochee kecooch beeti bi asheenaꞌo wotteree boonoshi maneenaꞌona danemminaꞌone.

⁴ Biyoo qiddoo bi bagoon quyoommon, Doono Yeerichi giidoona, bi Nuggishoo Doono Yeerichi oogee yiiroona, bi asheenaꞌon quye qeejjemmone. Bi oogo showee toommo bulliich aricheto bi tunetoyich, bi asheenaꞌo keqqaalloon beeyemminaꞌone.

⁵ Boonoshich diggoon tuniyemmone. Asooreenaꞌo no showooch boonoshi shagigaata, no mishigoonoo tiichii boonoshi giyigaata, boonoshin kochemmi shabaatte qiddeenaꞌon, shimitte woraaferasheenaꞌonoo daachiyemmo noone.

⁶ Boonoshiyoo Namiroodichi showoo tuneti Asooree showoon koyi wochiree hajjemminaꞌone; Asooreenaꞌo no showoon koyigaata, no showee daarooch shagigaata, bi boonoshi waanee noon wodiyemminaꞌone.

⁷ Curo tuneꞌi echeti Israꞌeeleenaꞌo meeti aageteenaꞌo daggooch, dicciibeeti mocee toommooch Doono Yeer waanee kindiibeeti doshoommon (caagibanoommon), kucheebeeti amiyoommon tunemminaꞌone. Boonoshiyoo boonoshi gibenemmo Yeerinalli ashoon toonoone.

⁸ Aageteenaꞌo daggooch curo tuneꞌi echeti ebi Israꞌeeleenaꞌo, kubbi cooxinaꞌo daggooch giyiti daaheroommon, bageenaꞌo daggooch giyiꞌi neexxii yangixxiibeeti, bi kishoochee koniyoona dichoon hakkaani more daaheroommon tunemminaꞌone.

⁹ Israꞌeeleenaꞌote, ittoshi etteenaꞌo toommooch ittoshi mochoon tiijjemmo ittoshine; ittoshi etteenaꞌo bulliyoo aallemminaꞌone.

¹⁰ Doono Yeeri ishichiye: “Ebi arooba, ittoshi haresheenaꞌon ittoshi kishoochee tiijjemmo taane; ittoshi gaarinaꞌonoo aalliyemmo taane.

¹¹ Ittoshi showooch beeti katemeenaꞌo bullin aalliyemmo taane; ittoshi mishigoonoo happemmo taane;

¹² qaaxoon ittoshi waanee aalliyemmo taane; allaamoo ittoshi waan daneyaachemmone.

¹³ Qiicaa shuuneeti ittoshi shahalleenaꞌon, ittoshi goyinnee xaqqee giimboonoo aalliyemmo taane; ebiyee gubb, ittoshi kishoona ittoshi shuuneti mooyoyich goyinneyaachemmo ittoshine.

¹⁴ Asheeri misiloon ittoshi showoochee waaxi aalliyemmo taane; ittoshi katemeenaꞌonoo aalliyemmo taane.

¹⁵ Taach deꞌa gettemmon qajjiti aageteenaꞌo bulli toommoochoo ta kaaree shiixxoon kindiyoona nichoon kichemmo taane” iye.