Mikiyaasi 4 - Kafa Linguistics Project

Diggittinoona Ceenniti Doono Yeerichi Taatittinee Womo

¹ Ciiree yemeenooba, Doono Yeerichi yaafee kexo beeti guudo, guudinaꞌo bulliyee beshiree bekkemmone; geppeenaꞌo toommooch qaalli bekkemmone; aageteenaꞌoo arooch orihe woyemminaꞌone.

² Meeti aageteenaꞌo waaree ishichemminaꞌone: “Sheeroo Tsiyoonee, Yeerichi qaaroo Yerusaalemee bi kechii beetoyich, ittoshi waataa damba Doono Yeerichi guudooch, Yaaqobichi Nuggishoo yaafee kexooch hambone. Biyoo, bi gommon nooch dojjemmone; nowoo, bi bekkiiti boochoona hammemmo noone” gettemminaꞌone.

³ Biyoo meeti aageteenaꞌo daggooch nalliree, katinoonaa wohonooch beeti, giidechi taatee showeenaꞌo daggooch beeti kaaroon, aalliyemmone; boonoshiyoo, boonoshi goraadoon maaneshooch, boonoshi ginoonoo magaadooch wochiree qiccemminaꞌone. Ikke aagetoo bi goraadoon tiijjiree bare aagetoona koyeyaachemmone; aroyee gubb, ginee koyoon doyaachemminaꞌone.

⁴ Asho bi ikkikkoona, bi woyinee qombee yiirooch, bi balaasee michi xepphoochoo kotemmone; biin keqqichemmo koniyoona aalloone. Beshe Mawe Doono Yeeri ebin gibenikkitone.

⁵ Aageteenaꞌo bulli boonoshi ikkikkoona boonoshi nuggisheenaꞌoyich goyinne maddemminaꞌone; tunebaani no, no Nuggishoo Doono Yeerich bulli yemeenoon goyinne maddemmo noone.

Kecoochee Israꞌeeleenaꞌo Wotto

⁶ Doono Yeeri ishichiye: “Ebi arooba, baata sheqqeenaꞌonaa kecceree boonoshi hammemmoyich ta tuniitaa duꞌetinaꞌonon kicemmo taane.

⁷ Baata sheqeenaꞌon curo tuneꞌi echetinaꞌo, xukkeꞌi bare showooch hammitinaꞌonoo aricheti aagetoo tuniyemmo taane. Aroobee aaboochee tiijjiree bulli yemeenoon, Tsiyooni guudi toommoochaa boonoshi toommooch taatemmo taane” iye.

⁸ Qiddoo dilaaloochaa bi bagoon quyoommon Yeeri bi asheenaꞌon quyeebeeti Yerusaaleme! Wonnee ne oogo neech wottemmone; wochinnoon inde katemoon tunemmi neene.

⁹ Ebi shaahoon oogichii ne cookiibeeto amoyichiye? Maaxoo manjeti ureechoommon gaashillaa ne beeto amoyichiye? Taatoo neech aalle? Ne mikkirechinaꞌo qititeete?

¹⁰ Yerusaalemi asheenaꞌote, maaxoo manjeti ureechoommon gaashiribee maacerebote; katemoochee keyiree xalle gaddooch kotemmo ittoshine; Baabloonee showooch hammemmo ittoshine. Tunebaani Doono Yeeri aroochaa ittoshi etteenaꞌo kishoochee ittoshin shiwe wodiyemmone.

¹¹ And illa, meeti aageteenaꞌo ittoshin kocha kiceetinaꞌone. Boonoshiyoo “Yerusaalemi eeꞌebuye; happaa bi aalloon no aafoona beeggemmo noone” ii beetinaꞌone.

¹² Tunebaani Doono Yeerichi gaboo amo gaata, ariyaaneenaꞌone; bi yamoonoo shalligaaneenaꞌone. Ebiyoo maayoon bucha buchi xaaꞌooch kicoommon boonoshin bi kicooniye.

¹³ Doono Yeeri ishichiye: “Yerusaalemi asheenaꞌote, tiyiree ittoshi etteenaꞌon maayo bushoommon bushote! Bi qaro xuuroo, bi shanekkoo gooshoo tuneti gattoochoommon ittoshin kupphiyemmo taane; meeti aageteenaꞌon yiikkemmo ittoshine; ashoon xuꞌona boonoshi kiciti boonoshi gaannoon showoo bullichi Doono tuneti Doono Yeeri taach giddiyemmo ittoshine” iye.