Mikiyaasi 2 - Kafa Linguistics Project

Girechon Xuqqii Beetinaꞌochi Toommooch Kindemmi Naxo

¹ Gondoon shuunoyich kichii kindiibee, tokketaalli aafoona qeyii beetinaꞌoyich woowo! Hakkoo boonoshich bi beetoyich, ebi aroon showoo harimmona tuniiheete.

² Ashi budon boonoshi qaatigaata, boggii deqqiyeete; ashi kexon boonoshi qaawigaata, boonoshicho tuniiheete. Ashi yaaphoon, bi kechi asheenaꞌonoo boggii daammiyeete.

³ Illa ebich Doono Yeeri ishichiye: “Muricon ittoshi hakkaani gonde mooyon ittoshi toommooch deeba ii beeto taane. Ebi aabo kupphe aabo bi tunetoyich, aafichoommon geecoona shaꞌeyaachemmo ittoshine.

⁴ Ebiyooba asheenaꞌo ittoshin coonemminaꞌone; cooqqiribee ishichi shoosheminaꞌone: ‘Ciroona aalleto noone; no asheenaꞌo showoo qoodeetone; Doono Yeeri no showoon no kishoochee deqqiꞌi, noon keccitinaꞌoyich beshii immitone’ gettemminaꞌone” iye.

⁵ Illa ebich, showoo Doono Yeerichi asheenaꞌoyich beshiitaa bi ichehooba, ittoshi shiijjeroyich tunemmi qoodoo amolla daneyaachemmone.

⁶ Asheenaꞌo taach ishichiyeete: “Nooch keemmaahine; ebi mooyichon nooch keemmaahine; Yeeri noon giishiyaachemmone.

⁷ Israꞌeeleenaꞌo uppetinaꞌo neech shaahii beeteete? Doono Yeeri haaꞌiyecho toone? Iberoochaa ebi mooyon tuniyehe? Kaamoo tuneti ashich, bi yibbaateebeeto gaawe mooyon toone?” iyeete.

⁸ Doono Yeeri boonoshich ishichiye: “Ta asheenaꞌo toommooch etto tuneꞌi tiyito ittoshine. Ginoochee wotteꞌi, keqqaalloon boonoshi kexooch hammiibeeti asheenaꞌochi tahoon boonoshi toommoochee shoottito ittoshine.

⁹ Ta asheenaꞌochi maacheenaꞌon boonoshi shuni kexinaꞌoochee yookkii kichiyote. Boonoshi bushiisheenaꞌo toommoochee ta oogee yiiroo bulli yemeenoon bi tiyemmoyich tuniihote.

¹⁰ Hini, ittoshi kashemmi xaaꞌoo toonoone; hiniichee tiyi hambote. Ittoshi axaaxoo hini xaaꞌoon bi eeꞌitoyich, hini xaaꞌoo aallemmone.

¹¹ “Kootoonaa dachechona tuneti asho waaꞌi, ‘Woyinoonaa mashiibeeti uyoona showoochee ittoshich xuupphemmone’ iꞌi bi keemigaata, hini asheenaꞌo shunniibeeti keemecho tunemmo biine.

¹² “Curo tunee echeti Israꞌeeleenaꞌote, bago bi dogooch, bageenaꞌoo gaddooch kiceyoommon ittoshin ikkooch kicemmo taane. Ittoshi showooch wochinnoon asho ceennemmone” iye.

¹³ Tiichiꞌi gommon kichecho boonoshi aafooch shiichiree boonoshi keccetoochee boonoshin yaabi kichemmone. Boonoshiyoo katemee kelloon tiishi besheree keyi hammemminaꞌone. Boonoshi Taatoo tuneti Doono Yeeri boonoshi aafooch shiichiree boonoshin yaabemmone.