Mikiyaasi 1 - Kafa Linguistics Project

¹ Yihudee taateenaꞌo, eboshiyoo Yotaami, Akaazinaa Hiziqiyaasinochi taatee yemeenooba, Moresheti gafee asho tuneti Mikiyaasich waati Doono Yeerichi qaaro, Shamaarinaa Yerusaalemichonon bi beeggiti yaaꞌoo:

Shamaarinaa Yerusaalemina Tiishemminaꞌo Tuno

² Haanoshite, aageteenaꞌote, ebin waayebote! Showoonaa bi daggooch beetinaꞌonote, ebin ellebote! Yeeri yaafe bi kexooch beechii, Nuggishoo Doono Yeeri ittoshi toommooch miixee beetone.

³ Illa ebiyoche, Doono Yeeri bi beeyi xaaꞌoochee waa beetone; kindiree guudi toommona shaaddemmone.

⁴ Gippoo qaaqqoona wocoommon, guudinaꞌo bi baataa woccemminaꞌone; aaco geppoochee dugilla wocoommon, dugilla wociree bambooch giyemminaꞌone.

⁵ Ebi bullichi naboo, Israꞌeeleenaꞌo shuuneti axaaxoonaa hukkoonane. Israꞌeeleenaꞌo shuuneti hukkoyich echeyemmo konine? Shamaari katemoo toone? Yihudee asheenaꞌo shahalloyich goyinnoona axaaxoon boonoshi shuunemmoyich tuniito konine? Yerusaalem toone?

⁶ Ebich Doono Yeeri ishichiye: “Shamaarin xalle gaddooch beeti xaqqee gutoon tuniyemmo taane; woyino becheebeeti xaaꞌoon tunemmone. Bi xaqqeenaꞌon bambooch gederikkemmo taane; dechi bi hecoonoo happemmo taane.

⁷ Bi shahalleenaꞌo tiisheree buricemminaꞌone. Bi yaafee kechi yahechinaꞌoyich qocheti qiiceenaꞌo bulli qaaqqoona michaa aallemminaꞌone. Shahalleenaꞌochi misileenaꞌo bullin aalliyemmo taane. Shamaaree asheenaꞌo ebi misileenaꞌo bullin boonoshi kicito yahechinaꞌoyich qocoo qocenane; boonoshi etteenaꞌo keci daamiree yahechinaꞌoyich bi qocceyemmoyich tuniyemminaꞌone” iye.

⁸ Ebich shooshaa eeppaabeeto taane; ta muushenetoyich shokke qeddoon, baade baatoonoo tuneto taane. Waangoochoommon, yuyechoommonoo eeppaabeeto taane.

⁹ Shamaari wodaachemmi mayon mayetone; Yihudee showoo ebiyoommon mayeree xuuxemmone. Ta asheenaꞌo beeyi xaaꞌoo tuneti, Yerusaalem beddaahaa bedditone.

Yerusaalemin Kocha Ginee Naayinaꞌo Katino

¹⁰ Ebi no toommooch shaggiibeeti mooyon Gaat beeti no etteenaꞌoyich gettaahote; ciroona caage eeppaahote! Beet Leꞌafira beeti asheenaꞌote, buttooch gederebote;

¹¹ Shafiir beeti asheenaꞌo shokke qeddoon tune yeellebee kecaa hammemminaꞌone. Tsanaan beeti asheenaꞌo katemoyee maach keyon hakkaachemminaꞌone. Beet Etseli katemoo eeppi toommooch bi beetoyich, ittoshi dege wodemmi xaaꞌoo arooch daneyaachemmone.

¹² Doono Yeeri gonde mooyon Yerusaalemi kellooch beddaahaa bi deebitoyich, Maarooti gafee asheenaꞌo kashe wotteya maaceree beetinaꞌone.

¹³ Lakishi katemee asheenaꞌote, ittoshi gaarinaꞌochi haresheenaꞌon xandibote! Israꞌeeleenaꞌo shuunetoommi gondoon shuuneto ittoshine; Yerusaalemi asheenaꞌo shuunemmoyichoo tuniito ittoshine.

¹⁴ Yihudee asheenaꞌote, illa Moreshet Gaati asheenaꞌoyich magaayoon imi daachiibote. Akiziibi katemee asheenaꞌo Israꞌeelee taateenaꞌo gibenetoommon tuneyaaneenaꞌone.

¹⁵ Mareshi katemee asheenaꞌote, Doono Yeeri ittoshi showoon koyi yechemmi ettoyich ittoshin beshiiree immemmone. Aricheti Israꞌeeleenaꞌo tuneti iraasheenaꞌo Adulaami beeti xaqqee gofooch hamiree aashemminaꞌone.

¹⁶ Yihudee asheenaꞌote, ittoshi bushiisheenaꞌo kecceyemminaꞌo boonoshi tunetoyich, ebi ittoshi shuni bushiisheenaꞌoyich eefoyich ittoshi qelloon maachebote; xooroochoommon ittoshi qelloon hulloo tuniibote!