Maatiyoosi 9 - Kafa Linguistics Project

Bi Ashittino Qititi Uroon Yesuusi Wodiyoo

¹ Ebiyee gubb, Yesuusi giishi markabeech giyii baharoon kimmiꞌi bi beeyi xaaꞌoo tuneti katemooch wottee waahe.

² Arooba bi ashittino qititi ikke uroon shaaꞌoona shaaggiꞌi bi waan deebiyeete. Yesuusiyoo bi toommooch mulloon boonoshi tooꞌiyoon beeggiꞌi, bi ashittino qititi uroon “Ta bushoochoo, kupphebe; ne axaaxoo maareetone” iye.

³ Areegaata Muusichi Sheeree dojjechinaꞌo daggoochee ikkikkeenaꞌo boonoshi mulloona “Ebi Yeerin naagone” iyeete.

⁴ Yesuusiyoo boonoshi shalligoon ariiꞌi ishichiye: “Ittoshi mulloona gonde mooyon amoyich gabiyote?

⁵ ‘Ne axaaxoo maareetone’ getonaa ‘Tiyiree hambe’ getonoochee kettoo aabine?

⁶ Tunetaa Ashi Bushoo hini showee toommoochaa ashi axaaxoon maaroyich hakkoo biich beemon ittoshi ariyemmoyich” iꞌi bi ashittino qititi uroon “Hini uroocho, and tiyi ne shaaꞌoon shaagiree ne kexooch hambe” iye.

⁷ Bi ashittino qititi uroo bekkech tiyiꞌi bi kexooch hammiye.

⁸ Dofee asheenaꞌo ebin beeggiꞌi shattiyeete; ebiyoommi doonjittinoon ashich bi immitoyich Yeerin oogiiheete.

Maatiyoosin Yesuusi Ceego

⁹ Yesuusi aroochee besheꞌi hammiibee Maatiyoosi getteebeeti ikke uro qaraxo kucheebeeti gabberooch kotee bi beetaa ciinniꞌi, “Taan dabbibe” iye. Aroo tiyiꞌi biin dabbiye.

¹⁰ Aroyee gubb, Yesuusi Maatiyoosi kexooch giyiꞌi maayo giddetaa madee toommooch bi beetaa, meeti gabiyee guudeenaꞌonaa axaaxechinaꞌona waaꞌi Yesuusinaa bi dabbeenaꞌona tookkii maa beeheete.

¹¹ Ikkikke Fariseenaꞌo ebin beeggiꞌi bi dabbeenaꞌon “Ittoshi dojjecho gabiyee guudeenaꞌonaa axaaxechinaꞌona tookkii ikkooch bi maabeeto amoyichiye?” iꞌi echeheete.

¹² Yesuusi ishin waayeꞌi ishichiye: “Biiyechinaꞌoyichalli wodeenaꞌoyich aakumo qaawiyaache.

¹³ Hambote, Yeeri ‘Deejjoyee ariqqoon shunnoye’ bi ito ama geto gaata ariibote. Axaaxechinaꞌonalli cadiqeenaꞌon ceegoyich waataano taane” iye.

Coomeechon Yesuusi Dojjoo

¹⁴ Arooba Yowannisi dabbeenaꞌo Yesuus waan waaꞌi, “Noonnaa Fariseenaꞌona [meeti areddoon] coomaabeeto noone; tunetaa ne dabbeenaꞌo amoyich coomaacheete?” iꞌi echeheete.

¹⁵ Yesuusiyoo ishichiꞌi wochiye: “Woꞌee keno boonoshina tookkii beetaa, miyaateenaꞌo muusheneheete? Tunebaani woꞌee keno boonoshi waanee baremmi aabo woyemmone; arooba coomemminaꞌone.

¹⁶ “Ebiyoo geene tahooch andire xefoon xefeebeeto aalloone; bi xefegaata, andire xefo geenoon kushi yeshiree beshoon keexxemmone.

¹⁷ Ebiyee wotta geene mollexxooch gaare woyinee uyoon kotiyaacheete. Boonoshi kotiigaata, mollexxoon gaakkemmone; uyo ufemmone; mollexxoo duubemmone. Tunebaani gaare woyinee uyoon andire mollexxooch kotiiheete; gutteenaꞌoo duubeyaanoon beeyemminaꞌone” iye.

Qititi Busheenaa Biiyeti Ureenon Yesuusi Wodiyoo

¹⁸ Yesuusi ishichiꞌi gettii bi beetaa, ikke ukkiroo waaꞌi, “Ta bushee and qititine; tunebaani waaree ne kishoon bi toommooch kotiibe; bi kashoo wottemmone” ii qolleꞌi goyinnehe.

¹⁹ Yesuusiyoo tiyiꞌi bi dabbeenaꞌona tookkii uroon dabbiꞌi hammiye.

²⁰ Hammii boonoshi beetaa, aaraa gutte naton damoo ufeebeeti ure Yesuusichi gubbaa hammaꞌa bi qoreddee caappoon yechahan.

²¹ Eechii bi ito, bi mulloona “Bi qoreddoon baach ta yeshigaata, wodemmi taane” iyaꞌa bi gibenetoyichiye.

²² Yesuusiyoo guuddii wottee ciinniꞌi tiyii, “Ta busheene, kupphebe! Ta toommooch ne mulloon ne tooꞌiyoo neen wodiitone” iye. Ureyoo bekkech wodiyan.

²³ Yesuusi ukkiroo kexooch shaggiꞌi, eeppi tiimboon huggechinaꞌonaa cangecheebeeti asheenaꞌonon beeggiꞌi,

²⁴ “Bushee tokketaanalli bi ito, qitaaneene. Eke kexoochee keyote” iye. Asheenaꞌo oogichii biin cooneebee miiceheete.

²⁵ Asheenaꞌo kechitoyee gubb, bushee qeyaabeeti gatooch giyiꞌi bushee kishoona yechiye; busheyoo bekkech motekkimaa tiyahan.

²⁶ Hini mooyo are showoo bulliich waayeehe.

Aaf Dooge Gutte Asheenaꞌon Yesuusi Wodiyoo

²⁷ Yesuusi aroochee tiyiꞌi bi hammii beetaa, aaf dooge gutte asheenaꞌo “Daawiti Bushoocho! Nooch ariqqebe” iꞌi cookiibee biin dabbiyeete.

²⁸ Yesuusi kexooch bi giyitoyee gubb are aaf doogeenaꞌo bi waan giddeheete. Yesuusiyoo “Ittoshi aafoon wodiyee ta hakkoon iberiihote?” iꞌi echehe. “Eeha, no Doonocho!” iꞌi wochiyeete.

²⁹ Arooba Yesuusi “Mulloon ta toommooch ittoshi tooꞌitoommon ittoshich tunebe” iꞌi boonoshi aafoon yechiye.

³⁰ Boonoshi aafoo qecheetaa ciinniyeete. Yesuusi “Konicholla gettaahote” iꞌi manjiiꞌi gettiye.

³¹ Tunetaa boonoshi kechiꞌi are showoo bulliich woriyeete.

Noona Miimoon Yesuusi Wodiyoo

³² Hini are boonoshi aafo woditi asheenaꞌo hammii boonoshi beetaa, asheenaꞌo yinno bi toommooch beeti ikke noona miime uroon Yesuus waan deebiyeete.

³³ Yinnoon bi yookkitoyee gubb noona miimo yibbaatehe. Asheenaꞌo bulli “Ebiyoommi mooyon Israꞌeelee showoochee beeggaa ariyaano noone” iibee worganeheete.

³⁴ Tunetaa Fariseenaꞌo “Yinnee taatoochi giidoonane yinnoon asheenaꞌo toommoochee bi yookkiibeeto” iyeete.

Asheenaꞌoyich Yesuusi Ariqqo

³⁵ Ebiyee gubb, Yesuusi Ayihudeenaꞌo kiceebeeti kexoochaa dojjiibee, Yeerichi taatittinee mishiraachee qaaroon gettiibee, asheenaꞌo toommooch beeti biiyo bullin wodiibee, katemoonaa gafoo bullinooch guuddii beehe.

³⁶ Dofee asheenaꞌo qiddaalli bagoochoommon dego mucceꞌi boonoshi iriteyoon beeggiꞌi bi maacoona miccii ayiniye.

³⁷ Arooba bi dabbeenaꞌon “Qecceyemmi maayo woddoone; tunebaani qeccii kicechinaꞌo giishecheenaꞌone.

³⁸ Illa maayi Doono qecceyemmi maayo beeti budooch qeciree kicemminaꞌon bi daachiyemmoyich corootibote” iye.