Maatiyoosi 7 - Kafa Linguistics Project

Bareenaꞌo Toommooch Nalleechon Yesuusi Dojjoo

^1-2 Wotta Yesuusi ishichiye: “Ashi gondoon ne haddii beetoommon Yeeri ne gondoon haddemmone; ashich ne qeellaa beetoommon Yeeri wochiree neech qeellemmone. Ebich Yeeri ne gondoon bi haddaachemmoyich, ashi gondoon haddiyaahine.

³ “Ne aafooch giyiti xuggoon shalligaanoon amoyich ne manoo aafooch giyeti giisheche guudeen ciinnaa beetine?

⁴ Wotta ne aafooch giyiti xuggoo beetaa, aabichaꞌa ne manoon ‘Eke ne aafeexi guudeen kichibona’ inne?

⁵ Hini ne maacoon xalloo shaahiibeeti uroocho, shiichiree ne aafeexi xuggoon kichibe. Ebiyee gubb ne manoo aafeexi guudeen kichoyich manjiiree ciinnemmo neene.

⁶ “Shiixxi wotteree ittoshin boonoshi shacaachemmoyich, yaafeeton kunaaneenaꞌoyich immaahote. Wotta gudininaꞌo boonoshi baatoona boonoshi neexaachemmoyich, ittoshi inqoon boonoshi aafooch duppaahote” iye.

Yeerin Qolleechon Yesuusi Dojjoo

⁷ “Yeerin qollebote; ittoshich immemmone. Yeer waanee qaawibote; danemmo ittoshine. Bi kelloonoo qofote; ittoshich qechemmone.

⁸ Yeeri biin qolleebeeto bullich immemmone; qaawiibeeto bulliyoo bi waanee danemmone; bi kelloon qoppiibeeto bullichoo qechemmone.

⁹ “Ittoshi daggoochee nihoo tuneechi koshon bi bushoo qolletaa, xaqqoon tiijjiree immehe?

¹⁰ Haashoonoo bi qolletaa, dingeroon immehe?

¹¹ Gondo ittoshi tunetaanoona ittoshi bushiisheenaꞌoyich deꞌe mooyon imon ariibeeto ittoshine. Illa shimaayooch beeti ittoshi Nihoo Yeeri biin qollee beetinaꞌoyich deꞌe mooyon am shaahoon beshaa beshiiree immehe!

¹² Ebich ‘Asho taach tuniibe’ iꞌi ittoshi shunniibeeto bullin, ittoshiyoo wotta ebiyoommon bare ashich tuniibote. Ebin tuniyoona Muusichi Sheeroonaa keemechinaꞌona dojjiton ceechemmo ittoshine” iye.

Xebbe Kellee Shaahiyoon Yesuusi Geto

¹³ Yesuusi daakkiꞌi ishichiye: “Xebbe kelloona gibote; aallooch daammiibeeti kello gamino, gommoo naqqoone; are kelloona giyiibeeti asheenaꞌo meetinaꞌone.

¹⁴ Tunetaa bulli yemeenee kashooch bechiibeeti kello xebboo, gommoo geppoone. Are gommon danee beetinaꞌo giishecheenaꞌone” iye.

Koote Keemechinaꞌochon Yesuusi Dojjoo

¹⁵ “Koote keemechinaꞌo waanee ittoshi qelloon quyebote. Bagoochoommon duuroo shaahibee ittoshi waan woyemminaꞌone; tunebaani boonoshi mullo kuxxii maabeeti okeroommone.

¹⁶ Boonoshin ittoshi ariyemmo boonoshi shuunoonane. Ebiyoommon asheenaꞌo angixoochee woyinee aafoon, guccinoochee balaasee michi aafoon maceheete?

¹⁷ Ebiyoo deꞌe mixo bulli deꞌe aafoon aafehe; gonde mixo gonde aafoon aafehe.

¹⁸ Deꞌe mixo gonde aafoon aafo, gonde mixo deꞌe aafoon aafo hakkaache.

¹⁹ Deꞌe aafoon aafeyaani mixo bullin kuxxii qaaqqooch duppiyeete.

²⁰ Ebich koote keemechinaꞌon ittoshi ariyemmo boonoshi shuunoonane” iye.

Nallaa Galleechon Yesuusi Dojjoo

²¹ “Shimaayooch beeti ta Nihoochi daaggoon ceechii beetoani, baad taan ‘Ta Doonocho, ta Doonocho!’ ii beeto bulli shimaajji taatittineech giyemmo toonoone.

²² Nallaa gallooba meetinaꞌo taan ‘Ta Doonocho, ta Doonocho! Ne shigoona keemoon keemaano noone? Ne shigoona yinnoon ashi toommoochee yoohaano noone? Ne shigoona wodde gaakkechi mooyon shuuneyaano noone?’ gettemminaꞌone.

²³ Arooba ‘Hini hukkechinaꞌote, ta waanee wohote. Ittoshin cir ariyaano taane’ getiree boonoshich xalla gettemmo taane” iye.

Kechi Haggichi Shaahiyoon Yesuusi Geto

²⁴ “Illa hini ta qaaroon waayeꞌi ceechiibeeto bulli, bi kexon manje xaqqee nashee toommooch haggiti mullechi uroommone.

²⁵ Amiyo kindiye; ambamboo tiyiye; yongo yongehe; are kexon xuqqiye. Tunetaa manje xaqqee nashee toommooch bi hakketoyich, dihaanoone.

²⁶ Wotta hini ta qaaroon waayeꞌi ceechaano bulli, bi kexon qacee toommooch haggiti mullaalli uroommone.

²⁷ Amiyo kindiye; ambamboo tiyiye; yongo yongehe; are kexon xuqqiye; bekkech are kexo gugummii dihiye” iye.

²⁸ Yesuusi hini yibbaatoon yibbaateꞌi bi ciichimmona, asheenaꞌo bi dojjiti doyoona worganeheete.

²⁹ Boonoshich bi dojjito sheeroon immiibeeti taatoochoommonalli, Muusichi Sheeree dojjechinaꞌo dojjii beetoommon toonoone.