Maatiyoosi 6 - Kafa Linguistics Project

Iriteeti Asheenaꞌon Gaacheechon Yesuusi Dojjoo

¹ “Yeerich ittoshi shuuneebeeti deꞌe shuunoon ashi beꞌenoyich ittoshi shuuneyaachemmoyich, ittoshi qelloon ariibote! Shimaayooch beeti ittoshi Nihoo Yeer waanee wojjoon cir daneyaachemmo ittoshine.

² “Ebich iriteeti ashich ne immaa beegaata, boonoshi maacoon xalloo shaahii beetinaꞌon shaahiyaahine. Boonoshiyoo ashi waanee galletee danoyich Ayihudeenaꞌo kiceebeeti kexonaa gommonoochaa iriteetinaꞌoyich immii beetinaꞌone. Iberoon ittoshich gettoye: Areenaꞌo ashi waanee galletoon danetinaꞌone; Yeer waanee amoonolla daneyaachemminaꞌone.

³ Tunetaa iriteeti ashich ne immaa beegaata, ne katinooch beeti asholla beeggaaye.

⁴ Aachiree imbe; arooba aashoona ne tunii beeton beeggiibeeti ne Nihoo Yeeri neech wojjemmone” iye.

Corooteechon Yesuusi Dojjoo

⁵ “Ittoshi corootii beegaata, boonoshi maacoon xalloo shaahiibeeti asheenaꞌochoommon tuneyaahote. Boonoshiyoo ‘Asheenaꞌo noon beegeete’ iꞌi Ayihudeenaꞌo kiceebeeti kexonaa gommi keejje kaattoonooch neexeechii corootoon shunnii beetinaꞌone. Iberoon ittoshich gettoye: Areenaꞌo boonoshi shuunoon deqqitinaꞌone.

⁶ Tunetaa ne corootii beegaata, ne gatooch giyiree ne gifoon hiciichi bekkeyaani ne Nihoo Yeerich corootibe. Arooba aashoona ne tunii beeton beeggiibeeti ne Nihoo Yeeri neech wojjemmone.

⁷ Aageteenaꞌo boonoshi yibbaatee genjoona Yeeri waayeebeeto boonoshich shaahii beetone. Tunetaa ittoshi corootii beegaata, boonoshichoommon aafaalli yibbaatoon yibbaateyaahote.

⁸ Ittoshi Nihoo Yeeri ittoshi qolleyaan beetaa, ittoshich qaawii beeton arii beetone; ebich ittoshi boonoshin shaahiyaahote.

⁹ “Illa ittoshi ishichi corootibote: ‘Shimaayooch beeti no Nihoocho, yaafe ne shigo oogebe.

¹⁰ Ne taatittino bulli toommooch bede; shimaayooch beetinaꞌo ne getoon boonoshi waayoommon, ebiyoommon showooch beetinaꞌo waayebeete.

¹¹ Heeyi koshon hanaach nooch imbe.

¹² No wotta noon xuqqitinaꞌon no maaroommon, no gondoon nooch maaribe.

¹³ Gondoochi nihoo kishoochee noon quyeballi, bi dachooch noon geddaahine. [Taatittino, giidoo, oogee yiiroo bulli yemeenoon neechone. Ameena.’]

¹⁴ “Ebiyoommon asheenaꞌochi xuꞌoon ittoshi maarigaata, shimaayeexi ittoshi Nihoo Yeeri ittoshi gondoon maaremmone.

¹⁵ Tunebaani ittoshin xuqqitinaꞌon ittoshi maaroo qayigaata, ittoshi Nihoo Yeeri ittoshi gondoon maaraachemmone” iye.

Coomeechon Yesuusi Dojjoo

¹⁶ Daakkiꞌi Yesuusi ishichiye: “Ittoshi coomii beegaata, boonoshi maacoon xalloo shaahiibeeti asheenaꞌochoommon muusheneyaahote. Boonoshiyoo coomecho boonoshi tunoon asheenaꞌo beeggemmoyich boonoshi achoon shiimeyaaneenaꞌone. Iberoon ittoshich gettoye: Boonoshi shuunoon deqqitinaꞌone.

^17-18 Tunetaa ne coomii beegaata, coomecho ne tuno aricheyaachemmoyich ne aafoon machebe; ne qellooch huutebe. Arooba bekkeyaani ne Nihoo Yeeri ikkeeto baach arii beetone; ebich aashoona ne tunii beeton beeggiibeeti ne Nihoo Yeeri neech wojjemmone” iye.

Gijjoon Shimaayooch Kotiyeechon Yesuusi Dojjoo

¹⁹ Daakkiꞌi Yesuusi ishichiye: “Piloonaa osheroona aalliyemmi, gaayeenaꞌo iiyiree gaajjemmi showee toommooch ittoshi gijjoon kiciyaahote.

²⁰ Tunebaani piloonaa osheroona aalliyaachemmooch, gaayeenaꞌo iiyiree gaayaachemmi shimaajji kexooch ittoshi gijjoon kicibote.

²¹ Ne gijjoo beetooch ne mullo tunemmone” iye.

Ashittinee Ceecheechon Yesuusi Dojjoo

²² Daakkiꞌi ishichiye: “Ashittinee ceechoo geto aafoone. Illa ne aafo iiwoo tunegaata, ne ashittino bulli biremmone.

²³ Tunetaa ne aafo biiyegaata, ne ashittino bulli manderemmone. Illa ne waan beeti ashittinee ceechoo tahigaata, manderochi am shaahe magge manderoo tunehe?” iye.

Yeerinaa Gijjoonoyich Hajjeyeechon Yesuusi Dojjoo

²⁴ “Wotta gutte doonoyich hajjeyoon hakkemmo koniyoona aalloone. Ikkoon bi shunigaata, baroon shixxemmone; woyee ikkoon bi oogiigaata baroon hoxemmone. Ebich gijjoyich hajjeebeeti asho Yeerich hajjeyoon, wotta Yeerich hajjeebeeti asho gijjoyich hajjeyoon hakkaache.

²⁵ “Ebich ittoshich gettoye; ‘Amoon maayehone? Amoon uchehone? Amoon tahehone?’ getiree ittoshich qaawiibeeti mooyoyich xuuxeyaahote. Kasho maayoyee, ashittinoo tahoyee beshaache?

²⁶ Eke shimaajji kafeenaꞌon ciinote. Shoohaacheete, qecaacheete, gotooch gedaacheete. Tunetaa shimaayeexi ittoshi Nihoo Yeeri boonoshich maanjii beetone. Ittoshi boonoshiyee oogichii beshaachote?

²⁷ Ittoshi daggoochee xuuxeree bi neexooch ikke hiroon daakkoon hakkemmo konine?

²⁸ “Tahoyich aakkiya xuuxee beetote? Eke gaddeexi mocee bungeenaꞌo aabichiꞌi boonoshi dicciibeeto gaata, manjiiree ciinote. Yulleyaacheete, huuttoon yokkeyaacheete.

²⁹ Tunetaa ittoshich gettoye: Taatoo Solomooniyolla ebi wodde bi oogee daggooch ikke mocee bungeechoommon taheyaanoone.

³⁰ Illa hanaach bekkeꞌi tiyii yaach qaaqqee gudooch dufaa micciibeeti gaddeexi mocoon Yeeri eechii tajjiibeeto bi tunegaata, hini Yeeri toommooch mulloon tooꞌiyaaneenaꞌote! Ittoshin aabichiree beshoon tajjoo qajjehe?

³¹ Ebich ‘Amoon maayehone? Amoon uchehone? Amoon tahehone?’ getiree xuuxeyaahote.

³² Eboshi bullin Aageteenaꞌo qaawii beetinaꞌone. Ebi bulli ittoshich qaawiibeeto bi tunoon shimaayeexi ittoshi Nihoo Yeeri arii beetone.

³³ Tunebaani shiichi Yeerichi taatittineen, bi cadiqoonoo qaawibote. Arooba ebi bullin bi ittoshich daakkemmone.

³⁴ Illa, yaach ittoshi toommooch woyemmi xuuxoyich yaach xuuxemmo ittoshine; ebich yaachich xuuxeyaahote. Hanaachi xuuxo hanaachich beddiye” iye.