Maatiyoosi 5 - Kafa Linguistics Project

Geppee Toommoochaa Yesuusi Asheenaꞌoyich Dojjoo

¹ Yesuusi dofee asheenaꞌon beeggiꞌi geppooch kechii kotehe. Arooba bi dabbeenaꞌo bi waan giddeheete.

² Ishichiꞌi boonoshinaa bare asheenaꞌonoyich dojjiye.

Diireechon Yesuusi Dojjoo

³ “Ayaanoona girechinaꞌo diireetinaꞌone; shimaajji taatittine boonoshichine.

⁴ Tuummii beetinaꞌo diireetinaꞌone; Yeeri boonoshin goggiyemmone.

⁵ Gaꞌi deꞌeenaꞌo diireetinaꞌone; showoon woraashemminaꞌne.

⁶ Yeeri aafooch cadiqoon tunoyich, oogichii qaatii beetinaꞌo diireetinaꞌone; Yeeri boonoshi qaatiton ceechemmone.

⁷ Ariqqee beetinaꞌo diireetinaꞌone; Yeeri boonoshich ariqqemmone.

⁸ Mulli xalleenaꞌo diireetinaꞌone; Yeerin boonoshi aafoona beeggemminaꞌone.

⁹ Shunii beetinaꞌo diireetinaꞌone; ‘Yeerichi bushiisheenaꞌone’ getaa ceekkemminaꞌone.

¹⁰ Cadiqe shuunoon boonoshi shuunetoyich duꞌee beetinaꞌo diireetinaꞌone; shimaajji taatittine boonoshichine.

¹¹ “Ta naboyich ittoshin boonoshi naageteenoo, boonoshi duꞌiiteenoo, gonde mooyon ittoshi toommooch koottiꞌi boonoshi yibbaateteenoo diireeto ittoshine.

¹² Yeeri ooge wojjoon shimaayoochaa ittoshich immemmo bi tunetoyich, emiribote; emiroona wucwucote. Ittoshiyee aaf beeti keemechinaꞌon ebiyoommon duꞌiitinaꞌone” iye.

Kiihonaa Bekkoonochi Shaahiyoo

¹³ “Showee toommooch beeti asheenaꞌo bullich ittoshi kiihoommo ittoshine. Tunebaani kiiho noocon bi qayigaata, amoona noociyeheete? Maaxooch kichi boonoshi dufaa, baatoona neecheyehalli, gubbich amoonolla gaacaache.

¹⁴ “Alemoyich bekko ittoshine. Geppee toommooch beeti katemoo aashoon hakkaache.

¹⁵ Wotta ceechoon ceechiꞌi bi toommooch gafetoon guuppemmo koniyoona aalloone; tunebaani kechi daggooch beetinaꞌo bullich bi bekkemmoyich, bekkooch kotiiheete.

¹⁶ Ebiyoommon asheenaꞌo ittoshi deꞌe shuunoon beegiree shimaayooch beeti ittoshi Nihoo Yeerin boonoshi galletemmoyich, bekkoochoommon asho bullich bekkebote” iye.

Muusichi Sheereechon Yesuusi Dojjoo

¹⁷ Wotta Yesuusi ishichiye: “Ta waato Muusichi Sheeroonaa keemechinaꞌo dojjiti mooyonon echiyoyich ittoshich shaahaaye; ceechiyalli echiyoyich waataano taane.

¹⁸ Iberoon ittoshich gettoye: Showoonaa shimaayoona beshemmi wottoon Muusichi Sheeroo bulli ceenaanoon nappeyoommi mooyiyolla showooch hollaachemmine.

¹⁹ Illa Yeeri tuniibote iꞌi bi gettiti hini sheereenaꞌoochee ikke giishecheyichona ‘Deꞌa getaache’ ii bareenaꞌonoo ‘Deꞌa gettaahote’ iꞌi dojjiibeeti asho koniyoona shimaajji taatittineechaa bulliyee desho tunemmone; tunetaa deꞌa ii beetonaa bareenaꞌon ‘Deꞌa getote’ iꞌi dojjii beetona koniyoona shimaajji taatittineechaa oogo tunemmone.

²⁰ Andoo ellebote! Ittoshi cadiqittino Muusichi Sheeree dojjechinaꞌonaa Fariseenaꞌonochi cadiqittinoyee beshoo bi qayigaata, shimaajji taatittineech ciroona giyaachemmo ittoshine” iye.

Kaareechon Yesuusi Dojjoo

²¹ “Ebiyee aaf beeti no qaabbechinaꞌoyich ‘Ashoon wuxiyaahine; wuxito bulli toommooch nalloo kindemmone’ getteeton waayeto ittoshine.

²² Tunebaani and ta waanee waayebote! Bi manoon kaareebeeto bulli nallee gabberooch giddemmone; bi manoon ‘Ulloocho!’ iꞌi naaggimmo bulli nallee iitee aafoochaa bi toommooch nalleyemmone; ‘Mullaalli ongoocho!’ iꞌi naaggimmo bulli ‘Shiweree qaaqqooch duppebe’ getaa bi toommooch nalleyemmone.

²³ “Illa ne deejjoon deejjee gudee toommooch Yeerich giddiyoyich qanniibee, ne manoo neenna ayiniti mooyo beemon ne gabigaata,

²⁴ are deejjee gudee aafooch deejjoon gediichi shiichi hamiree biinna tookki shunebe; ebiyee gubb wotteree ne deejjoon Yeerich giddiibe.

²⁵ “Ne kaarecho ukkiroo waan neen bi daamigaata, kaateree gommoochaa shunebe. Ebi tuno qayigaata, ukkiroyich neen beshii immemmone; ukkiroo bi ginee naayoyich immemmone; ginee naayo cuyee kexooch neen giijjemmone.

²⁶ Iberoon neech gettoye: Ciireexi duudenona ne qoccemmi wottoon ciroona aroochee keyaachemmo neene” iye.

Shunee Mamichon Yesuusi Dojjoo

²⁷ Daakkiꞌi Yesuusi ishichiye: “ ‘Shunoon maayaahine’ getteeton waayeto ittoshine.

²⁸ Tunebaani and ta waanee waayebote! Maacheen ciinniꞌi qaatito bulli bi mulloona biinna tookkii shunoon maatone.

²⁹ Ebich ne qanne aafo axaaxoo ne shuunemmoyich naboo bi tunegaata, kichiree dufe. Ne ashittino bulli shiweree qaaqqooch bi duppeyoyee ne ashittinoochee ikkoo shappi gaata gaawiye.

³⁰ Ne qanne kishoo axaaxoo ne shuunemmoyich naboo bi tunegaata, kuxiree dufe. Ne ashittino bulli shiweree qaaqqooch duppeyoyee ne ashittinoochee ikkoo shappi gaata gaawiye” iye.

Mecheen Gawukkeechon Yesuusi Dojjoo

³¹ “ ‘Bi mecheen gawukkiibeeto bulli bi gawukkee koorichoon biich imbe’ getteetone.

³² Tunebaani and ta waanee waayebote! Shunimaaye tuneyaani bi mecheen gawukkiibeeto bulli shunimaaye bi tunemmoyich tuniitone; gawukkeetinoo shaaggiibeeto shunoon maatone” iye.

Wogeechon Yesuusi Dojjoo

³³ “Wotta ebiyee aaf beeti no qaabbechinaꞌoyich ‘Wogaꞌa Yeerich ne mookketon ceechiballi shappiiyaahine’ getteeton waayeto ittoshine.

³⁴ Tunebaani and ta waanee waayebote! Ne mookkoon wogoona cir mookkeyaahine. Shimaayoona getiree wogeyaahine; Yeerichi taatittinee xaaꞌoone.

³⁵ Showoona getiree wogeyaahine; Yeerichi baatoo neexxiibeeti xaaꞌoone. Yerusaalemina getiree wogeyaahine; bulliyee beshe Taatoo Yeerichi katemoone.

³⁶ Ne qelloona wogeyaahine; ikke eexin naccee woyee aaꞌi tuniyoon hakkaachine.

³⁷ Tunebaani tunemmon tunebe, tuneyaachemmon tuneyaache gete. Ebiyee baroon ne yibbaategaata, aroo gondoochi nihoo waaneeniye” iye.

Nichee Kicheechon Yesuusi Dojjoo

³⁸ Yesuusi daakkiꞌi ishichiye: “ ‘Koniyoona bare ashi aafoon bi dookkigaata, bi aafo dooge; ebiyoommon ashi gashoon bi tiishigaata, bi gasho tiishebe’ getteeton waayeto ittoshine.

³⁹ Tunebaani and ta waanee waayebote! Ittoshi toommooch gondoon shuuneebeeto toommooch nichoon kichiyaahote. Tunebaani ne qanne gaakkoon tappemmoyich yoochoon bajjaahine.

⁴⁰ Wotta ukkiroo toommooch neen taggeꞌi, ‘Ne kootoon taach imbe’ immoyich ne kutoon daakkiree imbe.

⁴¹ Wotta ginechinaꞌo daggoochee ikkoo ‘Ikke kiilo meetiree wottoon ta qiicoon shaage’ iꞌi neen bi yeshigaata, hachee ikkoon daakkiree hambe.

⁴² Neen qollee beetoyich imbe; ne waanee eretteya qaawii beetoyich bajjaahine” iye.

Bi Shixechon Shunnichon Yesuusi Dojjoo

⁴³ “ ‘Neenoommi ne manoon shune; ne ettoon shixe’ getteeton waayeto ittoshine.

^44-45 Tunebaani and ta waanee waayebote! Yeeri bi halliti aabeen deꞌeenaꞌonaa gondeenaꞌonoyich kichii beetone; kaameenaꞌonaa xummeenaꞌonoyich tachiꞌi amiyon dichii beetone. Illa shimaayooch beeti ittoshi Nihooyich bushiishoo ittoshi tunemmoyich, ittoshi shixechinaꞌon shunote; ittoshin duꞌii beetinaꞌoyich corootibote.

⁴⁶ Ittoshin shunnii beetinaꞌon baach ittoshi shunigaata, Yeer waanee amee wojjoon danehote? Gabiyee guudeenaꞌo ebin tuniyaacheete?

⁴⁷ Ittoshi maneenaꞌon baach diggiibeeto ittoshi tunegaata, bareenaꞌoyee amoona beshehote? Yeerich qeyaaneenaꞌolla ebin tunii beetinaꞌone.

⁴⁸ Illa shimaayeexi ittoshi Nihoo Yeeri deꞌo bi tunetoommon, ittoshiyoo wotta deꞌoon tunebote” iye.