Maatiyoosi 4 - Kafa Linguistics Project

Daabiloosi Yesuusin Gondoon Shuuniiya Qiico

¹ Yesuusi aacona bi afaalleetoyee gubb, daabiloosi Yesuusin gondoon shuuniiya bi qiiccemmoyich, Yaafe Ayaano barahooch biin daammiye.

² Aroochaa aabbe areddoonaa aabbe xumoonon bi coomitoyee gubb shaacehe.

³ Arooba daabiloosi giddeꞌi, “Yeerichi Bushoo ne gaata, hini xaqqeenaꞌon ‘Koshon tunebote’ gete” iye.

⁴ Yesuusiyoo wochiꞌi, “ ‘Asho Yeerichi noonoochee kechiibeeti qaaro bullinalli, kosho ikkeetona kashoona beetaachemmone’ getaa Yaafe Macaafooch kooreetone” iye.

⁵ Ebiyee gubb, daabiloosi Yesuusin yaafe katemoo Yerusaalem daammii, yaafee kechi guummooch kichii neechiꞌi ishichiye:

⁶ “ ‘Yeeri neen boonoshi quyemmoyich bi maraakeenaꞌon ne waan deejjemmone; ne baatoonolla xaqqo bi yexaachemmoyich, boonoshi kishoona neen tiijjemminaꞌone’ getaa Yaafe Macaafooch kooreetone. Ebich Yeerichi Bushoo ne gaata, eke, hiniichee dugilla awureeree kindibe” iye.

⁷ Yesuusiyoo “Wotta ‘Asho bulli “Eke, Doono Yeeri taan bi wodiyoon beegona” getiree gondoon shuunaaye’ getaa Yaafe Macaafooch kooreetone” iye.

⁸ Aroochee daabiloosi Yesuusin genje guudi toommooch daammiye; alemooch beeti taatee showoo bullinaa boonoshi oogee yiiroonon bekkiiꞌi,

⁹ “Taach yittaꞌa ne goyinnegaata, eboshi bullin neech immemmo taane” iye.

¹⁰ Arooba Yesuusi daabiloosin “Hini Sheexaanoocho! Ta aafoochee wohe! ‘Doono Yeerich goyinnebe; biich baach maddebe’ getaa Yaafe Macaafooch kooreetone” iye.

¹¹ Areegaata daabiloosi Yesuusin qajjii hammiye. Aroochee maraakeenaꞌo giddeꞌi Yesuusin deggiyeete.

Yeerichi Mishiraachee Wochoon Yesuusi Geto

¹² Yesuusi Yowannisi yeshaa cucheyoon waayeꞌi Galiilee showooch tiyii hammiye.

¹³ Naazireeti katemoon qajjiꞌi Zebuloonee showoonaa Nifitaalee showee daggoonooch Galiilee baharee gashooch beeti Qifirinaahi katemooch hammii kotehe.

¹⁴ Ebi tuneto, Yeeri keemechi Isiyaasi noonoona gettito ceennemmoyichiye. Ebiyoo:

¹⁵ “Hini Zebuloonee showoonaa Nifitaalee showoonooch, baharee gashooch beeti showooch, Yoordaanoosi aachee beqach beeti showooch, wotta dofee Aageteenaꞌo beeti Galiila,

¹⁶ manderooch koteti ittoshi oogeti bekkoon beeggito ittoshine; qitee yiiroo beeti showooch koteti ittoshich bekko bekketone” ii beetone.

¹⁷ Aroobee yemeenoochee tiijjiꞌi Yesuusi “Shimaajji taatittinee ittoshi kellooch shaggetine; ebich axaaxee gommoochee Yeer waan wottebote” iibee getooch giyiye.

Haashe Yeshe Awudde Asheenaꞌon Yesuusi Ceego

¹⁸ Yesuusi Galiilee baharee gashoona besheebee gutte maneenaꞌo Pheexiroosi getteebeeti Simooninaa Indiriyaasinon ciinniye; boonoshi shuunoo haashee yesho bi tunetoyich dabboon baharooch duppii beeheete.

¹⁹ Biyoo “Ta hillooch wobote; haashoon ittoshi yeshoommon ashoon yeshiree ta waan ittoshi deebemmoyich tuniyemmo taane” iye.

²⁰ Boonoshiyoo bekkech dabboon duppiichii biin dabbiyeete.

²¹ Aroochee Yesuusi besheꞌi bareenaꞌo Zebidiyoosi bushiishoo tuneti gutte maneenaꞌo Yaaqobinaa Yowannisina boonoshi nihoo Zebidiyoosina tookkii giishi markabee toommoochaa dabboon boonoshi shippii beetaa ciinniye; boonoshinoo ceeggiye.

²² Boonoshiyoo bekkech giishi markabeen, wotta boonoshi nihoonoo arooch duppiichii Yesuusin dabbii hammiyeete.

Biiyetinaꞌon Yesuusi Wodiyoo

²³ Ebiyee gubb, Yesuusi Ayihudeenaꞌo kiceebeeti kexoochaa dojjiibee, Yeerichi taatittinee mishiraachee qaaroon gettiibee, biiyo bulliichee asheenaꞌon wodiibee, Galiilee showoo bullina guuddii beehe.

²⁴ Arooba bi mooyo Sooriyee showoo bulliich waayeehe. Ebich asheenaꞌo baribare biiyoonaa xuuxoona xuuxeꞌi beetinaꞌo bullin, yinno boonoshi toommooch beetinaꞌon, duppiibeeti biiyechinaꞌon, boonoshi ashittino qititinaꞌon eboshi bullin bi waan deebiyeete; boonoshinoo Yesuusi wodiihe.

²⁵ Arooba Galiilee, Aashire Katemoochee, Yerusaalemee, Yihudee, Yoordaanoosi aachee beqachee waati dofee asheenaꞌo biin dabbiyeete.