Maatiyoosi 3 - Kafa Linguistics Project

Aacona Afaallechi Yowannisi Yeerichi Wochoon Geto

^1-2 Ebiyee gubb, Aacona Afaallechi Yowannisi Yihudee barahooch waaꞌi, “Shimaajji taatittine ittoshi kellooch shaggetine; ebich axaaxee gommoochee Yeer waan wottebote” iꞌi getooch giyiye.

³ Keemechi Isiyaasina: “ ‘Doonochi gommon qanniibote; bi woretoonoo kaachi qaxxebote’ iibee barahoochaa cookiibeeti ashi qaaro” getteeto hinine.

⁴ Yowannisi gaalechi eexoochee shippeti tahoon tahee beehe; wotta gooqqoochee shuuneeti shachoon cuyee beehe; bi maayoo gechoonaa bobbiyee eeyonane.

⁵ Arooba Yerusaaleminaa Yihudee showoonooch, Yoordaanoosi aachi guudoona beeti showoochoo beetinaꞌo bulli bi waan waa beeheete.

⁶ Boonoshi axaaxoon boonoshi aannaa, Yoordaanoosi aacoochaa boonoshin Yowannisi afaallii beehe.

⁷ Tunebaani Fariseenaꞌonaa Saduuqeenaꞌonochi daggoochee meeti asheenaꞌo aacona afaalleyoyich bi waan boonoshi womon Yowannisi beeggiꞌi, boonoshich ishichiye: “Hini xekerechi bushiisheenaꞌote! Yeer waanee kindemmi kaaree shiixxoochee ittoshi wokkemmoyich, konine ittoshich gettito?

⁸ Illa axaaxee gommoochee Yeer waan ittoshi wottoon bekkiibeeti shuunoon shuunebote.

⁹ Wotta ittoshinaa ittoshina ‘Abrahamichi bushiishoo noone’ getiree yebeneyaahote. Ittoshich gettoye: Hini xaqqeenaꞌoochee Yeeri Abrahamich bushiishoon halloon hakkiye.

¹⁰ Andoo asho gonde mixon cammona waaxxii bi aalliyoommon, Yeeri biich deꞌa getaaneenaꞌon waaxiree aalliiya qannitone. Illa asho deꞌe aafoon aafeyaani mixo bullin kuxxiꞌi qaaqqee daggooch bi dufoommon, Yeeriyoo boonoshin ebiyoommon duppemmone.

¹¹ “Tawoo axaaxee gommoochee Yeerichi gommooch ittoshi wottoon bekkiyoyich, ittoshin aacona afaalliibeeto taane; tunebaani bi caammoonolla shaagoyich ta bedaano ta hillooch waabeeto, tayee beshe kupphoone; aroo Yaafe Ayaanoonaa qaaqqoona ittoshin afaallemmone.

¹² Maayoon yooppiibeeti qiico bi kishoochiye; maayo bullin yooppiree xalliyemmone; are yooppaa xalleti teepphoon bi gotooch geddemmone; tunebaani maaxxoon tahaani qaaqqoona michemmone” iye.

Yowannisi Yesuusin Aacona Afaalloo

¹³ Arooba Yesuusi Yowannisina aacona afaalleyoyich, Galiilee showoochee Yoordaanoosi aacooch waahe.

¹⁴ Tunebaani Yowannisi “Neenna afaalleyoo taach qaawiihani, aabichaꞌa taanna afaalleya ta waan ne waanne?” iꞌi bajjiye.

¹⁵ Yesuusiyoo wochiꞌi, “And qajje gettaaye; ebin tuniyoona Yeeri aafooch kaamoo tuneto bullin shuuno nooch qaawiihe” iye. Arooba Yowannisi tunebe iye.

¹⁶ Yesuusi aacona bi afaalleetoyee gubb, bekkech aacoochee kechiye; areegaata shimaayoo [biichoo] qecheehe; aroochee Yeerichi Ayaano bi ashittinee halloo uggechoommon tuneꞌi, bi toommooch kindii kotoon beeggiye.

¹⁷ Wotta shimaayoochee “Biinna ta emiriti, ta shuni Bushoo hinine” ii beeti qaaro waayeehe.