Maatiyoosi 28 - Kafa Linguistics Project

Qitoochee Yesuusi Timo

¹ Shambetoo beshetoyee gubb, shabaattee batti batti aaboobee maaddoona, haree gaargaarooch, Magidalechi Maariyaminaa bare Maariyamina oppoon beegga maasho beetooch hammiyeete.

² Diqqoona oogeti showee qewo tunehe; Doonochi maraakoo shimaayoochee kindii xaqqoon maashee oppee kelloochee gederikkiꞌi aree toommooch kotehe.

³ Maraakoochi aafo xeeyoochoommon phaqqiibeeto, bi taheti tahoo kecho naccoommon naccoone.

⁴ Maashee oppoon quyeebeeti ginechinaꞌo maraakoon beeggiꞌi oogichii boonoshi keqqitoyich qeweheete; qititi ashoonoo shaahiyeete.

⁵ Hini are maraakoo genneenaꞌoyich ishichiye: “Haanoshite, shattaahote. Yoodaa qititi Yesuusin ittoshi qaawoon ariibeeto taane.

⁶ Bi noonoona bi gettitoommon tiyitone! Hiniich aalloone; bi cahoo qeyiti xaaꞌoo ebiyoche waaree beegote.

⁷ Andoo kaate hiniichee hamiree, ‘Qitoochee tiyitone; ebiyoche, Galiila ittoshiyee shiichiree hammemmone; aroochaa biin beeggemmo ittoshine’ getiree bi dabbeenaꞌoyich getote; ta waato ebin gettane” iye.

⁸ Genneenaꞌoo boonoshi shattitaa, oogichii emiriibee afaafinoona oppee xaaꞌoochee tiyiꞌi Yesuusi dabbeenaꞌoyich getta woceheete.

⁹ Wocona hammii boonoshi beetaa, diqqoona Yesuusi boonoshina daneꞌi boonoshin diggiihe. Boonoshiyoo giddee bi baatoon yechiꞌi biich goyinneheete.

¹⁰ Aroochee Yesuusi “Shattaahote! Hamiree ta maneenaꞌo Galiila boonoshi beshemmoyich getote. Aroochaa taan beeggemminaꞌone” iye.

¹¹ Genneenaꞌo hamooch boonoshi beetaa, oppoon quyeebeeti ginechinaꞌo daggoochee ikkikkeenaꞌo katemooch hammiꞌi tuneto bullin qeeshee ukkireenaꞌoyich gettiyeete.

¹² Qeeshee ukkireenaꞌoo showee geeneenaꞌona tookkii kicee echeeꞌi, ginee naayinaꞌoyich wodde gijjoon immiꞌi,

¹³ “ ‘Tokketooch no beetaa, bi dabbeenaꞌo xumoona waaꞌi gaajjii daammiyeete’ getote.

¹⁴ Ishi iraashoo Phelaaxoosich waayee gaata, gondo ittoshicho tunee qayon no gettemmo noone; ittoshi toommooch iritoo waataachemmoyich tuniyemmo noone” iyeete.

¹⁵ Ginechinaꞌoo gijjoon deqqiꞌi boonoshich getteetoommon tuniiheete. Ebiyoo Ayihudeenaꞌo waan hanaach beddaahaa yibbaatee beetone.

Aaraa Ikke Bi Dabbeenaꞌoyich Yesuusi Bekko

¹⁶ Ebiyee gubb, aaraa ikke Yesuusichi dabbeenaꞌo bi gettiti Galiilee showooch beeti geppooch hammiyeete.

¹⁷ Aroochaa biin beeggiꞌi goyinneheete; tunebaani boonoshi daggoochee ikkikkeenaꞌo shaammiyeete.

¹⁸ Yesuusi boonoshi waan giddeꞌi boonoshich ishichii gettiye: “Showoonaa shimaayoonooch beeti ukkirittino bulli taach ichetone.

^19-20 Illa tiyiree hambote; aageteenaꞌo bulliich beetinaꞌon Nihoo Yeeri, Bushoo Yeerinaa Yaafe Ayaanoonochi shigoona aacona afaalloonaa tuniibote iyaꞌa ittoshich ta getteto bullin boonoshich dojjoona ta dabbeenaꞌon tuniibote. Illa yemeenee ciirooch beddaahaa bulli aaboon ta ittoshina tookkaa beeto taane” iye.