Maatiyoosi 26 - Kafa Linguistics Project

Yesuusi Wuxeyemmi Gommon Boonoshi Qaawoo

¹ Yesuusi hini mooyinaꞌo bullin gettii ciichiꞌi tiyii, bi dabbeenaꞌon

² “Gutte qemoyee gubb Beshee Baaroo bi tunoon ariibeeto ittoshine; Ashi Bushoon yooddiyoyich beshiiree immemminaꞌone” iye.

³ Arooba qeeshee ukkireenaꞌonaa showee geeneenaꞌona Qeyaafi getteebeeti qeeshee guudoochi kibbooch kiceeheete.

⁴ Yesuusin maroona yechiyoyich, wuxiyoyichoo echeeheete.

⁵ Tunetaa “Hini baaree aaboona tunaaye; asheenaꞌo kaaroon tiijjemminaꞌone” iyeete.

Ikke Ure Gaawe Shittoon Yesuusi Toommooch Ukkoo

⁶ Arooba Yesuusi Bitaaniya, qeddee shaddee biiyoona biiyeꞌi woditi Simooni kexooch beehe.

⁷ Are kexoochee biich maayo giddetaa madee toommooch bi beetaa, ikke ure alibaxiroosi firiqaadee ceeni, aaxxoo tuneti, gaawe cinnechi shittoon yechaꞌa bi waan waahan. Waa firiqaadoon tiichaꞌa are shittoon Yesuusichi shimbooch ukkiyan.

⁸ Bi dabbeenaꞌo ebin beeggiꞌi kaareheete: “Hini shittoon cikkaa bi duubiibeeto amoyichiye?

⁹ Ebi shitto aaxxe gatiyoona kemaa girechinaꞌoyich amoyich icheyaache?” iyeete.

¹⁰ Yesuusiyoo hini boonoshi yibbaatoon ariiꞌi boonoshich ishichiye: “Hini ureen amoyich iritii beetote? Biyoo taach deꞌe shuunoon shuunetine.

¹¹ Girechinaꞌo bulli aaboon ittoshina tookkiiniye boonoshi beeto; tunetaa ta bulli aaboon ittoshina tookki beetaachemmo taane.

¹² Hini ure ta duukkeyaan beetaa, shiichaꞌa ta ashittinoon hini shittoona huuttetine.

¹³ Andoo iberoon ittoshich gettoye: Asheenaꞌo hini mishiraachoon boonoshi gettimmi showee toommo aabiichona biin shalligoyich aree shuuneton wotta gettemminaꞌone” iye.

Yesuusin Beshiiꞌi Imoyich Yihudi Koceyoo

¹⁴ Ebiyee gubb, aaraa gutte bi dabbeenaꞌoochee ikkoo tuneti Asqorootechi Yihudi, qeeshee ukkireenaꞌo waan hammiꞌi,

¹⁵ “Yesuusin ittoshich ta beshii imigaata, taach amoon immehote?” iꞌi echehe. Boonoshiyoo shaashe xure birewoon biich immiyeete.

¹⁶ Aroobee saatoochee tiijjiꞌi “Yesuusin aabichiree beshii imbote?” iibee beshiiree bi immemmi holloon qaawii beehe.

Bi Dabbeenaꞌona Tookkii Yesuusi Gifiroon Mamo

¹⁷ Shittoo Giyaani Kochi Baaree batti batti aabooba bi dabbeenaꞌo Yesuus waan giddeꞌi, “Beshee Baaree maayoon ne maayemmoyich aabiich no qanniyoon shunnenne?” iꞌi echeheete.

¹⁸ Arooba Yesuusi “Katemooch hamiree ikkaati kexooch ‘Dojjecho “Ta taajjee aabo shaggitone; ta dabbeenaꞌona tookki ne kexoochaa Beshee Baaroon baaremmo taane” itone’ getote” iye.

¹⁹ Aroochee bi dabbeenaꞌo hammiꞌi Yesuusi gettiton tuniiheete; Beshee Baaree maayoonoo qanniiheete.

²⁰ Showoo xumetaa, Yesuusi aaraa gutte bi dabbeenaꞌona tookkii madoo giddetaa maaya kotehe.

²¹ Maa boonoshi beetaa, “Iberoon ittoshich gettoye: Ittoshi daggoochee ikkoo taan beshiiree immemmone” iye.

²² Ebi mooyona ayiniꞌi boonoshi qelli qelloona “Ta Doonocho, ta tunehote?” iꞌi Yesuusin echooch giyiyeete.

²³ Yesuusi wochiꞌi, “Taan beshiiree immemmo taanna tookkii ikke shaatooch dukkee beetone.

²⁴ Ashi Bushoo biicho bi kooreetoommon, qitemmone; tunebaani Ashi Bushoon beshiiree immemmi are uroyich woowo! Are uro shiijjeyaanoon bi dooggito gaata, biich gaawiye” iye.

²⁵ Beshii immemmi Yihudi wochiꞌi, “Dojjechocho, ta tunehote?” iꞌi echehe. Yesuusi wochiꞌi, “Ne noonoona gettetine” iye.

Yesuusichi Meenonaa Damoonochi Shalligichoo

²⁶ Aree hillooch boonoshi maa beetaa, Yesuusi koshon tiijjiꞌi Yeerin galletehe; tiichiꞌi bi dabbeenaꞌoyich immiibee, “Haꞌote, mamote; hini ta meenone” iye.

²⁷ Wotta woyinee uyo yechiti xoofoon tiijjii Yeerin galleteꞌi boonoshich immiye; boonoshichoo ishichiye: “Bulla ebiichee uyote;

²⁸ ebi meetinaꞌochi axaaxoon maaroyich ufemmi ta damoo Yeeri neechemmi wogee malletoone.

²⁹ Andoo ittoshich gettoye: Ta Nihoochi taatittineechaa ittoshina tookki hini woyinee aafoochee andiroon ta uchemmi aabee wottoon hini woyinee uyoochee guttinnoon uyaachemmo taane” iye.

³⁰ Boonoshiyoo Yeerichi shoddoon boonoshi shoddetoyee gubb tiyiꞌi, Zayitee Michi guudooch kechiꞌi hammiyeete.

Pheexiroosi Biin Nookkemmo Tunoon Yesuusi Geto

³¹ Arooba Yesuusi bi dabbeenaꞌoyich ishichiye: “ ‘Yeeri “Qiddoon xoobbemmo taane; bageenaꞌo shacemminaꞌone” iꞌi gettitone’ getaa kooreetone; ebich hanaach xum ittoshi bulli taan qajjemmo ittoshine.

³² Tunebaani qitoochee ta tiyetoyee gubb, ittoshiyee shiichiree Galiila hammemmo taane” iye.

³³ Arooba Pheexiroosi tiyiꞌi, “Bareenaꞌo bulli neen boonoshi qayi gaatoona, ta neen cir qayaache” iye.

³⁴ Yesuusi “Iberoon neech gettoye: Hanaach xum baakkoo kuukkaahaa, keejje wottoon taan nookkemmo neene” iye.

³⁵ Pheexiroosi wochiꞌi, “Qitolla bi tunegaata, neenna tookki qitehani cir neen nookkeyaache” iye. Echeti bi dabbeenaꞌo bulli ebiyoommon gettiyeete.

Getesemaanaa Yesuusi Corootoo

³⁶ Arooba Yesuusi bi dabbeenaꞌona tookkii Getesemaani getteebeeti xaaꞌooch hammiye. Yesuusi boonoshin “Ta okk ebiich hamiree corootibona; ittoshi hiniich beebote” iye.

³⁷ Pheexiroosinaa Zebidiyoosichi gutte bushiisheenaꞌonon dabbiiꞌi hammiye. Bi kasho keyaano giyaano yullehe.

³⁸ Boonoshin “Ta kashe ayinoona xuuxaꞌa kech beddetine. Hiniich beebote; tokketaayi kuppheree taanna tookki quyebote” iye.

³⁹ Boonoshi aafoochee giishechoon wokkiꞌi hammiye. Baroona guufeechii corootiibee, “Ta Nihoocho, tunesho gaata, hini xuuxee xoofoon ta waanee wokkiibe. Tunetaa ne daaggoo tunebaani, ta daaggoo tunaaye” iye.

⁴⁰ Aroochee keejje bi dabbeenaꞌo waan wotteꞌi bi waahaa, tokketeꞌi beetinaꞌon danehe. Pheexiroosinoo “Illa taanna tookkii ikke saatoonona tokketeyaanoon kuppheꞌi quyoon hakkaachote?

⁴¹ Gondoochi nihoo dawushooch ittoshi giyaachemmoyich, kuppheree quyebote; corootibote. Asho bi mulloona deꞌoon shuunoyich gabii beetone; tunetaa meenoyich yiingoo aalloone” iye.

⁴² Wotta guttinnoon hammiꞌi corootiibee, “Ta Nihoocho, hini xuuxee xoofoon uyo taach bi qaawiigaata, ne daaggoo tunebe” iye.

⁴³ Guttinnoon wotteꞌi bi waahaa, geepphirona daadeeꞌi tokketee boonoshi beetaa danehe.

⁴⁴ Wotta boonoshi waanee qajjii hammiꞌi, keejjinnoon wochiꞌi shiichii bi corootitoommon corootiye.

⁴⁵ Aroochee bi dabbeenaꞌo waan wottee waaꞌi, “Andoo batt tokketee kasheꞌiniye ittoshi beeto? And saato bedditone; Ashi Bushoon axaaxechinaꞌoyich beshiiree immemminaꞌone.

⁴⁶ Tibote, hambone! Andoo taan beshiiree immemmo shaggitone!” iye.

Yesuusi Yecheyoo

⁴⁷ Yesuusi ishin yibbaatee bi beetaa, bekkech aaraa gutteexi ikkoo Yihudi shaggiye. Biinna tookkii dofee asheenaꞌo goraadoonaa yeelloonon yechiꞌi waaheete. Boonoshiyoo qeeshee ukkireenaꞌonaa showee geeneenaꞌona waanee wochetaa waatinaꞌone.

⁴⁸ Yesuusin beshii immiti Yihudi, “Diggiiree ta shummemmo aroone; aroon yeshote” iꞌi shiichii malletoon boonoshich immitone.

⁴⁹ Yihudi bekkech Yesuus waan giddeꞌi, “Dojjechocho, diggoo neech tunebe” iꞌi shummiye.

⁵⁰ Yesuusiyoo “Ta xiboocho, amee mooyoyich waanne?” iye. Arooba Yihudi deebiti asheenaꞌo giddeꞌi Yesuusin yechiyeete.

⁵¹ Bekkech Yesuusina tookkii beetinaꞌo daggoochee ikkoo bi goraadoon kaaccii daachiiꞌi qeeshee guudoochi guuno waamon karii kindiihe.

⁵² Arooba Yesuusi biich ishichiye: “Goraadoon kaaccii beetinaꞌo bulli goraadoona qitemminaꞌone; ebich ne goraadoon bi gonenooch wochibe.

⁵³ Ebiyoommo gaata, ta Nihoon qollo taan mawemmo neech shaahii beete? Ta qolletaa, bekkech aaraa gutte Legiyoonee maraakeenaꞌoyee beshoon taach deejjeshone.

⁵⁴ Ishigaata, Yaafe Macaafoochaa ‘Ebi tunemmone’ getteeto aabichiree ceennehe?” iye.

⁵⁵ Arooba Yesuusi dofee asheenaꞌoyich “Bokkoon yeshoommon taan yecha goraadoonaa yeelloonon yechiꞌi waahote? Yaafee kexooch bulli aaboon kotaꞌa dojjaa ta beehooba, taan yeshaano ittoshine.

⁵⁶ Tunebaani ebi bulli bi tuneto, keemechinaꞌo kooriti Yaafe Macaafee qaaro bi ceennemmoyichiye” iye. Arooba bi dabbeenaꞌo bulli biin duppiichii aalleheete.

Ayihudee Nallechinaꞌo Aafooch Yesuusi Neexo

⁵⁷ Aroochee Yesuusin yechitinaꞌo Muusichi Sheeree dojjechinaꞌonaa showee geeneenaꞌona kiceeti qeeshee guudo Qeyaaf waan daammiyeete.

⁵⁸ Arooba Pheexiroosi qeeshee guudoochi kibbooch beddaahaa wokkiibee biin dabbiye. “Moochi tuggoon beegona” iꞌi uxeree maac giyiꞌi kellechinaꞌona tookkii kotehe.

⁵⁹ Arooba qeeshee ukkireenaꞌonaa kaacheti Ayihudee nallechinaꞌo bullina Yesuusin wuxiiya bi toommooch koote miixeenaꞌon qaawiyeete.

⁶⁰ Tunebaani meeti koote miixeenaꞌo giddetaanona, biin wuxiyemmi miixoon miixemminaꞌon daneyaaneenaꞌone. Ciiroochaa gutte miixeenaꞌo giddeꞌi,

⁶¹ “Hini uro ‘Yeerichi yaafee kexon happiichi keejje qemona baroon hagon hakkiyoye’ itone” iyeete.

⁶² Aree hillooch qeeshee guudo tiyiꞌi Yesuusin “Ebi ne toommooch miixee beetinaꞌoyich noonoo wochaachemmo neene?” iꞌi echehe.

⁶³ Tunetaa Yesuusi cikkii qajjiye. Wotta qeeshee guudo “Ne Yeerichi Bushoo Kiristoosi ne gaata, nooch ne gettemmoyich beeyechi Yeerina neen yecheto taane” iye.

⁶⁴ Yesuusi wochiꞌi, “Ne getteto neene; tunebaani ittoshich gettoye: Ebiyee damba Ashi Bushoo Giidechi Yeerichi qanne badd bi kotetaa, wotta shimaajji qubee toommoochoo koteree bi waataa beeggemmo ittoshine” iye.

⁶⁵ Arooba qeeshee guudo bi tahoon keexxiꞌi, “Yeerin naaggitone; ebiyee damba amee miixoo qaawiihe? Bi naagoon gaata waayeto ittoshine.

⁶⁶ Illa ittoshich amo shaahii beete?” iꞌi echehe. Boonoshiyoo “Qita beddiye” iꞌi wochiyeete.

⁶⁷ Arooba bi aafooch cuddiyeete; biinoo tukeheete; bareenaꞌo wotta tappeebee,

⁶⁸ “Kiristooso, neen tappeto konine? Eke keemecho ne gaata, nooch gete” iyeete.

Pheexiroosi Yesuusin Nookko

⁶⁹ Pheexiroosi kechi maach, kibbooch kotee bi beetaa, ikke shaajjetee bi waan giddaꞌa, “Ne wotta Galiilechi Yesuusina tookkaa beeto neene” iyan.

⁷⁰ Tunetaa Pheexiroosi wochiꞌi, “Ne gettaa beeton ariyaache” iꞌi bulli aafooch nookkehe.

⁷¹ Ishichiꞌi tiyii kecha kellooch bi hammimmona, bare shaajjetee ciinnaꞌa arooch beetinaꞌoyich “Hini uro Naazireetechi Yesuusina tookkii beetone” iyan.

⁷² Pheexiroosiyoo wogeebee, “Are uroon ariyaano taane” iꞌi guttinnoon nookkehe.

⁷³ Giishechoon yiccimiꞌi arooch neexee beetinaꞌo bi waan giddeꞌi, “Ne yibbaatoona arichaa beetine; iberoon ne boonoshi daggeexo neene” iyeete.

⁷⁴ Arooba Pheexiroosi “Are uroon ariyaano taane” iꞌi bi kashoon uppii wogehe. Bekkech baakkoo kuukkiye.

⁷⁵ Pheexiroosi “Baakkoo kuukkaahaa, keejje wottoon taan nookkemmo neene” Yesuusi iti qaaroon gabiꞌi maaxooch kechii tiittee eeppiye.