Maatiyoosi 24 - Kafa Linguistics Project

Yaafee Kechi Happeyeechon Yesuusi Geto

¹ Ebiyee gubb, Yesuusi yaafee kexoochee kechiꞌi hammii bi beetaa, bi dabbeenaꞌo yaafee kechi xaqqee kexon biich bekkiyoyich bi waan giddeheete.

² Tunetaa biyoo wochiꞌi, “Eboshi bullin beeggii beetote? Iberoon ittoshich gettoye: Hini xaqqeenaꞌo happeyaanoon xaqqo xaqqee toommooch keddeeree ebina beetaachemminaꞌone” iye.

Yemeenee Ciiree Malleteechon Yesuusi Geto

³ Wotta Yesuusi Zayitee Michi guudi toommooch kotee bi beetaa, bi dabbeenaꞌo boonoshi ikkeeto bi waan giddeꞌi, “Eke nooch gete: Hini mooyo bi tunemmo aatane? Ne womonaa yemeenee ciiroonon bekkiyemmi malletoo amoone?” iꞌi echeheete.

⁴ Yesuusi wochiꞌi boonoshich ishichiye: “Asho koniyoona ittoshin bi muriciyaachemmoyich, ittoshi qelloon quyebote.

⁵ Meetinaꞌo ‘Taane Kiristoosi’ getibee ta shigoona waaree meeti asheenaꞌon muriciyemminaꞌone.

⁶ Ginee koyoonaa ginee woroonon waayemmo ittoshine; tunetaa keqqiyaahote. Ebi tuno echeyaachemmone. Tunebaani yemeenee ciiro battiye.

⁷ Arooba ikke aageteexi asho bare aageteexi ashoona, ikke showeexi taatoo bare showeexi taatoona koyemmone; baribare xaaꞌoochoo shaacoo giyemmone; showee qewo tunemmone.

⁸ Ebi bulli bi bekkiibeeto, batt maaxee xuuxee gimoniye.

⁹ “Arooba ittoshin xuuxiyemminaꞌoyich beshiiree immemminaꞌone; wuxemminaꞌone; ta naboyich aageteenaꞌo bulli ittoshin shixxemminaꞌone.

¹⁰ Arooba meetinaꞌo taan qajjemminaꞌone; boonoshinaa boonoshina ikkoo ikkoon beshiiree immemmone; boonoshinaa boonoshina shixeyemminaꞌone.

¹¹ Meeti koote keemechinaꞌo tiyemminaꞌone; meetinaꞌonoo muriciyemminaꞌone.

¹² Axaaxoo woddetaa, meeti asheenaꞌochi shuno aqqemmone.

¹³ Tunetaa ciirooch beddaahaa manjiꞌi kupphemmo wodemmone.

¹⁴ Ashi yaroo bullich miixoo bi tunemmoyich hini Yeerichi taatittinee mishiraachee qaaro showee toommo bulliich getteyemmone; arooba yemeenee ciiro woyemmone” iye.

Aalloon Deebemmi Eeꞌeechon Yesuusi Geto

¹⁵ Yesuusi daakkiꞌi ishichiye: “Illa keemechi Daaneeli gettiti aalloon deebemmi eeꞌo Yaafe Xaaꞌooch bi neexetaa beeggemmo ittoshine. (Ebiyooba shemmecho shalligibe.)

¹⁶ Arooba Yihudee showooch beetinaꞌo geppoo beetooch maxxebeete.

¹⁷ Kechi toommooch beeto ‘Kindiree kexooch beeti ta qiicoon deebona’ getiree giyaaye.

¹⁸ Goyee toommooch beeto ‘Ta qoreddoon deebona’ getiree gubb wottaaye.

¹⁹ Arooba yeqqefechinaꞌonaa bushoon xaachii beetinaꞌonoyich woowo!

²⁰ Tunebaani ittoshi gooyo yooyooba woyee shambetooba bi tuneyaachemmoyich corootibote.

²¹ Arooba Yeeri alemoon hallitoochee tiijjiꞌi hanaach beddaahaa bekkeyaani, gubbich wotta bekkeyaachemmi giidechi xuuxo tunemmone.

²² Ebi aabeenaꞌo qaminaan gaata, koniyoona wodoon hakkaacheshone; tunebaani kaachetinaꞌoyicha getaa ebi are aabeenaꞌo qaminnitinaꞌone.

²³ Arooba koniyoona ittoshich ‘Hini beege! Kiristoosi hiniich beetone’ woyee ‘Okk ebiich beetone’ bi getigaata, iberiyaahote.

²⁴ ‘Taane Kiristoosi’, wotta ‘Taane keemecho’ getibee muriciyemminaꞌo tiyemminaꞌone. Boonoshiyoo ‘Nooch bi hakkeegaata Yeeri kaaccitinaꞌon muriciibone’ getibee worganikkiti malletoonaa gaakkechi shuunoonon shuunemminaꞌone.

²⁵ Illa ittoshich ishichiꞌa getteto taane.

²⁶ “Illa arooba ‘Ebiyoche, barahoochiye’ boonoshi getigaata, kechaahote. ‘Ebiyoche, kechi gatoochiye’ boonoshi getigaata, iberiyaahote.

²⁷ Xeeyo aabi-keyoochee xeejjiꞌi aabi-gimooch beddaahaa phaqqii bi bekkoommon, Ashi Bushoo womo ebiyoommon tunemmone.

²⁸ Dubeno beetooch aakkeenaꞌo kiceyemminaꞌone” iye.

Ashi Bushoo Womichon Yesuusi Geto

²⁹ Wotta Yesuusi ishichiye: “Ebiyooba ebi are xuuxoyee gubb, ‘Aabe bekkech manderemmine; ageneyoo aaxxeyaachemmine; xojjeneenaꞌo shimaayoochee hollemminaꞌone; shimaajji giideenaꞌo shuuremminaꞌone.’

³⁰ “Arooba Ashi Bushoo malletoo shimaayoochaa bekkemmone; arooba showooch beeti ashi yareenaꞌo bulli ‘Woowo!’ gettemminaꞌone. Ashi Bushoo giidoonaa oogee yiiroona shimaajji quboona waataa beeggemminaꞌone.

³¹ Arooba ooge tiree qaaroona maraakeenaꞌon wochemmone. Boonoshiyoo hamiree awudde kelloona aabi-keyoochee aabi-gimooch, showee tuggooch beddaahaa Yeeri kaaccitinaꞌon kicemminaꞌone” iye.

Balaasee Mixo Bekkiyemmi Malletoo

³² “Wotta balaasee mixoochee malletoon beegote. Balaasee mixo quummiꞌi atee bi waajjegaata, arooba qaawoo womon ariibeeto ittoshine.

³³ Ebiyoommon wotta hini mooyinaꞌo tunoon ittoshi beegiyooba Ashi Bushoo womo katinniꞌi kellooch shaggito bi tunoon ariibote.

³⁴ Iberoon ittoshich gettoye: Hini mooyinaꞌo bulli tuneyaanoon hini shiijjeroo besheyaachemmone.

³⁵ Showoonaa shimaayoona beshemmone; tunebaani ta qaaro besheyaachemmone” iye.

Are Aaboonaa Are Saatoonon Koniyoona Ariyee Qayo

³⁶ Wotta Yesuusi ishichiye: “Tunetaa are aaboonaa are saatoonon Nihoo Yeeriyee damba koniyoona ariibeeto aalloone. Shimaajji maraakeenaꞌo tunebeeta, Yeerichi Busholla tuneba ariibeeto aalloone.

³⁷ Wonnee Noohi yemeenooba bi tunoommon, Ashi Bushoo womo ebiyoommon tunemmone.

³⁸ Arooba aalliyee aacoyee aaf Noohi markabooch bi giyimmi aabee wottoon asheenaꞌo maa uchiibee, shaaggii shaakkiibee beeheete.

³⁹ Aalliyee aaco waaꞌi asho bullin hidiꞌi bi aalliimmi wottoon boonoshi ariyee qayoommon, Ashi Bushoo womo wotta ebiyoommon tunemmone.

⁴⁰ Arooba gutte asheenaꞌo goyooch beeyemminaꞌone; ikkoo yeshaa hammemmone; ikkoo echemmone.

⁴¹ Gutte maacheenaꞌo xaqqoon yiikke beeyemminaꞌone; ikkee yeshaa hammemmine; ikkeyoo echemmine.

⁴² “Illa ittoshi Doono amee aabooba bi woyemmo gaata ariyaachote. Ebich qaalliree quyebote.

⁴³ Tunebaani ebin ariibote: Kechi doono gaayo xumee ambiche saatooch bi woyemmo gaata ariyaanoone; bi ariito gaata, qaalliree quyeshone; bi kexonoo gaayoona iichiyaacheshone.

⁴⁴ Ebich ittoshi wotta qanniree beebote. Ashi Bushoo ittoshi shalligaani saatooch woyemmone” iye.

Gibeneeti Wochee Bushoo Tuno

⁴⁵ “Illa maayoon boonoshich qaawiimmi saatoona bi immemmoyich bi doono bi kechi asheenaꞌo toommooch bi ukkiriiti gibeneeti mullechi wochee bushoo konine?

⁴⁶ Bi doono waahaa, bi shuunee toommooch beebee danemmi are wochee bushoo diireetone.

⁴⁷ Iberoon ittoshich gettoye: Biich beeto bulli toommooch ukkiriyemmone.

⁴⁸ Tunetaa are gonde wochee bushoo ‘Ta doono kaate wotteyaachemmone; yagemmone’ ii bi mulloona gabiꞌi,

⁴⁹ biinoommi wochee bushiisheenaꞌon yexooch, mashechinaꞌona tookkii uchii mamooch bi giyigaata,

⁵⁰ bi doono bi gabaani aabooba, bi ariyaani saatooch woyemmone.

⁵¹ Biin yeshiree gutte beera gaakkemmone; bi ixoonoo kaamoo shaahiibeeti xummeenaꞌochi ixooch haddemmone. Aroochaa eefonaa gashee qaayona tunemmone” iye.