Maatiyoosi 22 - Kafa Linguistics Project

Gaaree Shaahiyoo

¹ Daakkiꞌi Yesuusi bare shaahiyoona boonoshich gettiye; ishichiinoo iye:

² “Shimaajji taatittine ebiyoommine: Ikke taatoo bi bushoochi gaaroyich gifiroon qanniihe.

³ Gaarooch ceekkeetinaꞌon boonoshi kicemmoyich bi wochee bushiisheenaꞌon boonoshi waan daachiihe; tunetaa ceekketi asheenaꞌo womon shunaaneenaꞌone.

⁴ “Taatoo bare wocheyechinaꞌon wochinnoon wochehe; ishichiinoo iye: ‘Ceekkeeti gaarechinaꞌo waan hamiree, “Ebiyoche, gaaree maayoon qanniito taane; maaꞌeenaꞌonaa gubbeneenaꞌona basheetinaꞌone; mooyo bulli gawaateetone; ebich gaarooch wobote” getote’ iye.

⁵ “Hammii boonoshi getaa, ceekkeetinaꞌo gaaroon qallayiꞌi ikkoo bi goyooch, baroo bi giixooch hammiye.

⁶ Echeenaꞌo wocheetinaꞌon yechiꞌi boonoshi kashoon yulliiheete; wuxiinoo iyeete.

⁷ Taatoo ebin waayeꞌi oogichii kaarehe; bi naayinaꞌon daachiiꞌi are wuxitinaꞌon wuxiihe; boonoshi katemoonoo michiihe.

⁸ “Ebiyee gubb, taatoo bare wocheyechinaꞌoyich ishichiye: ‘Gaaree gifiroo qannitone; tunetaa ceekkeetinaꞌo bedditinaꞌo tuneyaaneenaꞌone.

⁹ Illa keejje kaattooch keyiree ittoshi danemmi asho bullin gaaree kexooch ceegote’ iye.

¹⁰ Ebina are wocheyechinaꞌo gommooch kechiꞌi boonoshi daneto bullin, gondeenaꞌonoo, deꞌeenaꞌonoo kiciyeete; gaaree kexooch gaarechinaꞌo ceenniyeete.

¹¹ “Tunebaani taatoo ceekkeeti asheenaꞌon beegga gaaree kexooch giyiꞌi, asheenaꞌo daggooch gaaree tahoon taheyaani ikke uroon beeggiye.

¹² Biich ishichiye: ‘Ta xiboocho, gaaree tahoon taheyaanoon aabichaꞌa gaaree kexooch giyenne?’ iye. Uroo cikkii qajjiye.

¹³ “Arooba taatoo bi naayinaꞌon ‘Hini uroon bi kishoonaa bi baatoonon cuyiree maach manderooch kichi dufote. Aroochaa eefonaa gashee qaayona tunemmone’ iye.

¹⁴ “Ceekkeetinaꞌo meetinaꞌone; tunetaa kaachetinaꞌo giishecheenaꞌone” iye.

Qesaarich Qaraxee Qoco

¹⁵ Ebiyee gubb, Fariseenaꞌo hammiꞌi, “Aabichiree hini Yesuusin bi yibbaatoon muriciibona?” iꞌi echeeheete.

¹⁶ Boonoshi dabbeenaꞌon Heroodisi asheenaꞌona tookkii Yesuusin boonoshi echemmoyich daachiiheete. Boonoshiyoo hammiꞌi, “Dojjechocho, ibere moochecho ne tunoon, ibere mooyona Yeerichi gommichon ne dojjoon ariibeeto noone. Ashoon giisho, oogoo getaachine; ebich konicholla beshii shappii dabiyaachine.

¹⁷ Illa and amoon gabaa beetine? Eke nooch gete: Qesaarich qaraxee qocon Muusichi Sheeroo daaggitee, daaggaache?” iꞌi echeheete.

¹⁸ Yesuusiyoo boonoshi gonde gaboon ariiꞌi, “Hini ittoshi maacoon xalloo shaahii beetinaꞌote, amoyich taan muriciiya qaawii beetote?

¹⁹ Eke taach qaraxo qocheebeeti gijjoon bekkiibote” iye. Boonoshiyoo ikke diinaaroon biich deebiꞌi bekkiiheete.

²⁰ Biyoo “Hini gijjee toommooch beeti malletoonaa kooreeti shigoona konichone?” iꞌi echehe.

²¹ Boonoshiyoo “Qesaarichone” iyeete. Yesuusiyoo “Ishigaata, Qesaarichon Qesaarich, Yeerichonoo Yeerich imbote” iye.

²² Boonoshiyoo ebin waayeꞌi worganeebee qajjii hammiyeete.

Qitoyee Gubb Shaago Woyee Shaakkeyoo Aallo Bi Tuno

²³ Ebi arooba “Qititinaꞌo tiyaachemminaꞌone” ii beeti Saduuqeenaꞌo daggoochee ikkikkeenaꞌo Yesuus waan waaꞌi ishichii echeheete:

²⁴ “Dojjechocho, Muusi ‘Ikke uro mecheen shaaggiꞌi bushoon shiyaanoon bi qitigaata, bi manoo are ureen woraashiree bi manoyich bushoon keribe’ itone.

²⁵ Illa shabaatte maneenaꞌo noonna tookkii beetaa, boonoshi daggoochee qaabboo mecheen shaaggiꞌi bushoon shiyaanoon qitiye. Ebina bi hilloo are ureen woraashiye.

²⁶ Ebiyoommon wotta guttinnoo, keejjinnoo, shabaattinnooch beddaahaa bulli are ureen woraashiꞌi bushoon shiyaanoon qitii ciireheete.

²⁷ Ciiroochaa ure qitiyane.

²⁸ Illa hini shabaatteenaꞌo are ureen shaaggitinaꞌone. Ebich qititinaꞌo tiyiyooba mechee bi tunemmo konichiye?” iꞌi echeheete.

²⁹ Yesuusi wochiꞌi ishichiye: “Yaafe Macaafo gettii beetonaa Yeerichi giidoonon ittoshi tuushitoyich muricciyote.

³⁰ Qititinaꞌo tiyiyooba, boonoshi tunemmo, shimaajji maraakeenaꞌoommonalli shaagaacheete; shaakkeyaacheete.

³¹ Wotta qititinaꞌo timichon Yeeri ittoshich gettiton cir shemmeyaachote?

³² Ebiyoo ‘Ta Abrahamichi Nuggishoo, Yisaaqichi Nuggishoo, Yaaqobichi Nuggishoo taane’ ii beetone. Illa kashechinaꞌochi Nuggishoani qititinaꞌochi Nuggishoo toonoone” iye.

³³ Dofee asheenaꞌo ebin waayeꞌi bi yibbaatoon worganeheete.

Bulliyee Beshe Sheeroo

³⁴ Aree hillooch Yesuusi Saduuqeenaꞌon wochemmi noonee bi mucciyoon Fariseenaꞌo waayeꞌi ikkooch kiceeꞌi bi waan waaheete.

³⁵ Boonoshi daggoochee ikke Muusichi Sheeree dojjecho Yesuusin muriciiya qaawiꞌi,

³⁶ “Dojjechocho, sheeroo bulliichee besho aabine?” iꞌi echehe.

³⁷ Yesuusiyoo wochiꞌi ishichiye: “ ‘Ne Nuggishoo Doono Yeerin ceeni ne mulloona, ceeni ne kashoona, ceeni ne shalligoona shune’ ii beetone.

³⁸ Qaabboonaa inde sheeroona ebine.

³⁹ Ebin shaahiibeeti guttinnee sheeroo ‘Neenoommi ne manoon neenna tachiree shune’ ii beetone.

⁴⁰ Muusichi Sheeroonaa keemechinaꞌona dojjito bulli hini gutte sheereenaꞌona tuggeetone” iye.

Kiristoosichon Yesuusi Echo

⁴¹ Fariseenaꞌo kiceeꞌi boonoshi beetaa, Yesuusi ishichiꞌi boonoshin echehe:

⁴² “Kiristoosichon amoon gabii beetote? Bi konichi bushoone?” iꞌi echehe. Boonoshi wochiꞌi, “Daawitichi bushoone” iꞌi wochiyeete.

⁴³ Yesuusiyoo “Ishigaata, Daawiti Yaafe Ayaano biich shalligichaa, ‘Doono’ iꞌi aakkiya ceeggiye? Daawiti ishichiꞌi gettitone:

⁴⁴ ‘Doono Yeeriyoo ta Doonon, “Ne etteenaꞌon ne baatee dechiich ta dichimmi wottoon ta qannooch kotebe” itone’ iye.

⁴⁵ “Illa Daawiti biin ‘Doono’ itone. Ishigaata, aabichiree bi bushoo tunehe?” iye.

⁴⁶ Arooba ikke qaaroonona wochoyich hakkito koniyoona aalloone. Aroobee aaboochee tiijjiꞌi Yesuusin echoyich aafoon kuppheto koniyoona aalloone.