Maatiyoosi 21 - Kafa Linguistics Project

Yesuusi Oogoona Yerusaalem Gimo

¹ Ebiyee gubb, Yesuusinaa bi dabbeenaꞌona Yerusaalem katinniꞌi, Zayitee Michi guudooch beeti Beetifaagi katemooch shaggiyeete. Arooba Yesuusi bi dabbeenaꞌoochee gutteenaꞌon ishichiꞌi wochehe:

² “Ittoshi aaf beeti gafooch hambote. Arooch tipheeꞌa beeti kureenaa biinna tookkii beeti bi bushoonon danemmo ittoshine; areenaꞌon biishiree taach deebote.

³ Asho koniyoona tiyiꞌi ittoshin ikke mooyon bi getigaata, ‘Doonoyich qaaweetinaꞌone’ getote. Bekkech areenaꞌon ittoshich gawukkemmone” iye.

^4-5 Ebi bi tuneto, “Tsiyooni asheenaꞌoyich ‘ittoshi taatoo gaꞌi deꞌo tuneꞌi kureen yebbee, kureechi bushoon yebbee, ebiyoche, ittoshi waan waa beetone’ getote” getaa keemechona getteeto bi ceennemmoyichiye.

⁶ Aroochee gutte bi dabbeenaꞌo hammiꞌi Yesuusi gettitoommon tuniiheete;

⁷ kureenaa bi bushoonon bi waan deebiyeete. Deebiꞌi boonoshi tahoon kureenaꞌo toommooch boonoshi yaggaa, Yesuusi yebbehe.

⁸ Arooba asheenaꞌoochee dofeenaꞌo boonoshi tahoon gommooch yaggiyeete; bareenaꞌo wotta michi waamon kuxxii kuxxiꞌi gommooch yaggiyeete.

⁹ Aaf shiichii beetinaꞌonaa gubb dabbii beetinaꞌona, “Hosaana! Daawitichi Bushoyich oogo tunebe! Doonochi shigoona waabeeto diireebe! Hosaana! Shimaajji shimaayooch beeti Yeeri galleteebe!” iibee cookeeheete.

¹⁰ Aroochee Yesuusi Yerusaalem bi shaggimmona katemeexi asheenaꞌo bulli “Ebi konine?” iꞌi shuuriyeete.

¹¹ Dofee asheenaꞌoo “Hini Galiilee showooch beeti Naazireeti katemoochee waati keemechi Yesuusine” iyeete.

Giixechinaꞌon Yaafee Kexoochee Yesuusi Kichoo

¹² Ebiyee gubb, Yesuusi yaafee kexooch giyiye. Giyiꞌi, arooch gabiyoo geddii kemmii kemeebeeti asheenaꞌo bullin gashee kichiye. Boonoshin kichiibee gijjoon shaddii beetinaꞌochi madelloon, uggoon kemmiibeeti asheenaꞌochi gabberoonoo yangiye.

¹³ Wotta asheenaꞌoyich “Yeeri ‘Ta kexo corootee kexone getteyemmone’ iꞌi bi gettito Yaafe Macaafooch kooreetone; tunebaani ittoshi bokkeenaꞌochi gofoon tuniito ittoshine” iye.

¹⁴ Yesuusi yaafee kexooch bi beetaa, aaf doogeenaꞌonaa baata yesheenaꞌona bi waan waataa, boonoshin wodiihe.

¹⁵ Tunebaani qeeshee ukkireenaꞌonaa Muusichi Sheeree dojjechinaꞌona Yesuusi tuniiti worganikkiti mooyonaa yaafee kexoochaa “Hosaana! Daawitichi Bushoyich oogo tunebe” iibee cookiibeeti bushiisheenaꞌonon beeggiꞌi ippeheete.

¹⁶ Ebich Yesuusin “Hini bushiisheenaꞌo gettiibeeti mooyo neech waayee beete?” iyeete. Yesuusiyoo wochiꞌi, “Waayaabeeto taane; ‘Yeero, gaggereenaꞌonaa xammii beetinaꞌonochi noonoochee, galletoon ne qellich qanniitine’ ii beeti qaaroon cir shemmeyaachote?” iye.

¹⁷ Ebiyee gubb, boonoshin qajjii Yerusaalemee tiyiꞌi Bitaaniya kechii hammiꞌi arooch qeyiye.

Balaasee Mixin Yesuusi Ufo

¹⁸ Dechara maaddoona Yesuusi Yerusaalem wotteꞌi hammiibee shaacehe.

¹⁹ Gommi gashooch ikke balaasee mixin beeggiꞌi bi waan hammiye; tunebaani waamoyee damba aafoon cir daneyaanoone. Ebich balaasee mixin “Guttinnoon aafoon aafaaye” iꞌi uppiye. Are balaaseyoo bekkech shoolliyan.

²⁰ Bi dabbeenaꞌo ebin beeggiꞌi, “Hini balaasee mixi aabichaꞌa kaataa shoolliyane?” iꞌi worganeheete.

²¹ Yesuusiyoo wochiꞌi, “Iberoon ittoshich gettoye: Mulloon Yeeri toommooch ittoshi tooꞌiigaata, wotta mulloonoo guttiyoo ittoshi qayigaata, balaasee mixin ta tuniito ikkeeto tuneyaanoon, hini geppoonolla ‘Hiniichee waaxeree baharooch awureebe’ ittoshi getigaata, tunemmone.

²² Yeeri toommooch ittoshi mulloon tooꞌiyoona biin ittoshi qollemmo bullin danemmo ittoshine” iye.

Yesuusi Echeyoo

²³ Ebiyee gubb, Yesuusi yaafee kexooch giyiꞌi dojjii bi beetaa, qeeshee ukkireenaꞌonaa showee geeneenaꞌona bi waan giddeꞌi, “Hini mooyinaꞌon ne tuniibeeto, amee ukkirittinoon danaꞌaaniye? Hini mooyinaꞌon ne tuniyemmoyich konine neen wocheto?” iꞌi echeheete.

²⁴ Yesuusi wochiꞌi boonoshich ishichiye: “Ta wotta ittoshin ikke mooyon echebona; ittoshi wochigaata, ta wotta hini mooyinaꞌon amee ukkirittinoona ta tuniyaabeeto gaata ittoshich gettemmo taane.

²⁵ Yowannisin ‘Aacona afaallibe’ iꞌi wocheto konine? Yeerinee, ashoone?” iye. Arooba boonoshinaa boonoshina echeeꞌi, “Yeerine no getigaata, ‘Ishigaata, bi gettiton amoyich iberiyaachote?’ getiree echemmone.

²⁶ Tunetaa ashoone no getigaata, Yowannisin asheenaꞌo bulli ‘Keemechone’ iꞌi boonoshi gabii beetoyich asheenaꞌon shattehone” iyeete.

²⁷ Ebich wochiꞌi Yesuusich “No ariyaano noone” iyeete. Yesuusiyoo wochiꞌi, “Wotta amee ukkirittinoona hini mooyinaꞌon ta tuniyaabeeto gaata ittoshich getaache” iye.

Gutte Bushiisheenaꞌochi Shaahiyoo

²⁸ Yesuusi daakkiꞌi ishichiye: “Ittoshich amoon shaahii beete? Gutte bushiishechi ikke uro beehe. Boonoshiichee ikkoo waan giddeꞌi, ‘Ta bushoochoo, hanaach ta woyinee goyooch hamiree shuunebe’ iye.

²⁹ “Are bushoo wochiꞌi, ‘Ta hamaache’ iꞌi qajjiye. Tunetaa gubb ‘Ta nihoochi wochoon amoyichiye ta qajjeto?’ iꞌi shuunoyich hammiye.

³⁰ “Wotta guttinnee bi bushoo waan hammiꞌi aroonoo wochehe. Biyoo wochiꞌi ‘Deꞌa ta nihoocho’ iye; tunebaani hamaanoone.

³¹ “Gutteenaꞌoochee bi nihoochi wochoon waayeto aabine?” iye. Boonoshiyoo wochiꞌi, “Shiichii bi wochetone” iyeete. Boonoshich Yesuusi ishichiye: “Iberoon ittoshich gettoye: Gabiyee guudeenaꞌonaa yahechinaꞌona Yeerichi taatittineech ittoshiyee shiichiree giyemminaꞌone.

³² Yowannisi cadiqittinee gommichon bekkiiya ittoshi waan bi waataa, bi yibbaatoon iberiyaano ittoshine; tunetaa gabiyee guudeenaꞌonaa yahechinaꞌona iberiitinaꞌone. Ittoshi ebin beeggiꞌinolla, axaaxee gommoochee wotteꞌi bi yibbaatoon iberiyaano ittoshine” iye.

Woyinee Quyechinaꞌochi Shaahiyoo

³³ Wotta Yesuusi ishichiye: “Bare shaahiyoon waayebote: Bi showooch woyinoon bechiti ikke uro beehe. Bi guudoon xaqqoona uxerehe; wotta woyinee hiicci oppoon iijjiye; dilaaloon shuunehe. Aree hillooch uchi shiimemmi quyechinaꞌoyich quyiichii, bare showooch hammiye.

³⁴ Ebiyee gubb, woyinee aafee gooroo waataa, ‘Woyinee aafoon quyechinaꞌo waanee qoodeeree ta qoodoon deebote’ iꞌi bi guuninaꞌon quyechinaꞌo waan wochehe.

³⁵ “Are wocheeti bi guuninaꞌon quyechinaꞌo yechiꞌi ikkoon xoobbiyeete; ikkoonoo wuxiyeete; baroon xaqqoona xoobbiyeete.

³⁶ Woyinee doono wotta aafichinaꞌoyee beshe bare guuninaꞌon quyechinaꞌo waan daakkiꞌi wochehe. Boonoshiyoo aafichoommon boonoshi toommooch tuniiheete.

³⁷ Ciiroochaa woyinee doono ‘Ta bushoon oogiyemminaꞌone’ iꞌi bi bushoon boonoshi waan wochehe.

³⁸ “Tunetaa quyechinaꞌo ebi bushoon beeggiꞌi boonoshinaa boonoshina ‘Bi woraasho hinine. Ittoshi waataa wuxibone. Hini bi irsitoon deꞌone’ iyeete.

³⁹ Ebina bushoon yechii, woyinee goyoyee maach kichiꞌi wuxiyeete.

⁴⁰ “Illa woyinee goyee doono wotta waaree hini quyechinaꞌo toommooch amoon hallehe?” iye.

⁴¹ Boonoshiyoo wochiꞌi, “Hini gonde asheenaꞌon guuri ciichemmone; woyinee aafoonoo bi goori gooroona biich deebemmi bare quyechinaꞌoyich immemmone” iyeete.

⁴² Yesuusi boonoshich ishichiye: “ ‘Gimbenyeenaꞌo hoxee duppiti xaqqo, aroo kexon deggii neechiti giimbee guummon tunetone. Ebinoo Doono Yeeri tuniitone; hini mooyo no beeggich worganikkito tunetone’ ii beeton Yaafe Macaafoochee cir shemmeyaachote?

⁴³ “Ebich ittoshich gettoye: Yeerichi taatittine ittoshi kishoochee tiijjaa bi aafoon aafeebeeti maccoyich icheyemmine.

⁴⁴ [Hini xaqqee toommooch dihimmo buricemmone; tunetaa hini xaqqo bi toommooch dihimmo bulli yiikkeyemmone]” iye.

⁴⁵ Qeeshee ukkireenaꞌonaa Fariseenaꞌona hini shaahiyeenaꞌon waayeꞌi boonoshin bi geton shalligiyeete.

⁴⁶ Ebich Yesuusin yecha qaawiyeete; tunetaa dofee asheenaꞌo Yesuusin “Keemechone” iꞌi boonoshi gabii beetoyich boonoshin shattiyeete.