Maatiyoosi 20 - Kafa Linguistics Project

Woyinee Doononaa Shuunechinaꞌonochi Shaahiyoo

¹ Wotta Yesuusi ishichiye: “Shimaajji taatittine ebiyoommine: Ikke woyinee doono bi woyinee goyee daggooch gijjoo qocee shuunemmi shuunechinaꞌon qaawooch maaddiꞌi kechiye.

² Shuunechinaꞌon daneꞌi, ikke diinaaree shumaayoon imma echee kuxxiꞌi boonoshin bi goyo beetooch daachiihe.

³ “Guttinnoon keejje saatooch kechiꞌi shuunaalli asheenaꞌo gabiyee godooch neexee beetinaꞌon beeggiye.

⁴ Areenaꞌonoo ‘Ittoshi wotta ta woyinee goyo beetooch hamiree shuunebote; ittoshi qoodee shumaayoon ittoshich immemmo taane’ iye.

⁵ Boonoshiyoo goyee xaaꞌooch hammiyeete. “Wotta shiritte saatoonaa yiixiye saatoonooch kechiꞌi ebiyoommon tuniihe.

⁶ Andoo wochiꞌi aaraa ikke saatooch kechiꞌi gabiyee godooch neexeebeeti bare shuunaalleenaꞌon daneꞌi, ‘Shuunoon biichiꞌi heeyi xumoon hiniich amooniye ittoshi hallii beeto?’ iye.

⁷ “Boonoshiyoo wochiꞌi, ‘Noon shuuniyemmon muccaꞌaaniye no neexaabeeto’ iyeete. “Biyoo ‘Ishigaata, ittoshiyoo wotta ta woyinee goyee xaaꞌooch hamiree shuunebote’ iye.

⁸ “Showoo xumetaa woyinee doono bi ukkiriiton ‘Shuunechinaꞌon ceegiree ciirooch waatinaꞌoochee tiijjiree shiichii waatinaꞌooch beddaahaa boonoshi shumaayoon imbe’ iye.

⁹ “Aroochee aaraa ikke saatooch waatinaꞌo giddeꞌi boonoshi qelli qelloona ikke diinaaroon deqqiyeete.

¹⁰ Ebich shiichhii waatinaꞌo ‘Beshoon deqqemmo noone’ iꞌi gabiyeete; tunebaani eboshiyoo boonoshi qelli qelloona ikke diinaaroon deqqiyeete

^11-12 Boonoshi deqqitoyee gubb ‘Hini gubb waatinaꞌo ikke saato baach shuuneheete; no heeyi xumoon aabee sheelloona miccaabee maraataa heecheti noonna deebaa tachinne?’ iꞌi woyinee doono toommooch guruuxeeheete.

¹³ “Woyinee doono wochiꞌi boonoshi daggoochee ikkoyich ishichiye: ‘Ta xiboocho, neen xuꞌaano taane. No yibbaateto, ikke diinaaroona toone?

¹⁴ Ne qoodoon deꞌiree hambe; neech ta immetoommon gubb waatoyich imon qaawiibeeto taane.

¹⁵ Ta gijjoona ta shunnemmon shuuno hakkaachehote? Woyee deꞌe asho ta tunetoyich qanaataa beetine?’ iye.

¹⁶ “Ebiyoommon gubbetinaꞌo getteetinaꞌo shiichemminaꞌone; shiichitinaꞌo getteetinaꞌo gubbemminaꞌone” iye.

Bi Qitemmon Keejjinnoon Yesuusi Geto

¹⁷ Ebiyee gubb, Yesuusi Yerusaalem hamma kechiye; hammiibee gommoochaa aaraa gutte bi dabbeenaꞌon baach ikke badd wochiꞌi ishichiye:

¹⁸ “Ebiyoche, and Yerusaalem hammaabeeto noone. Aroochaa Ashi Bushoon qeeshee ukkireenaꞌonaa Muusichi Sheeree dojjechinaꞌonoyich beshiiree immemminaꞌone. Boonoshiyoo qitibe getiree bi toommooch nallemminaꞌone.

¹⁹ Aagetee asheenaꞌoyichoo beshiiree immemminaꞌone; boonoshiyoo biin coonemminaꞌone; arengoonoo xoobbemminaꞌone; aroyee gubb yooddemminaꞌone. Tunetaa keejje qemooba qitoochee tiyemmone” iye.

Yaaqobinaa Yowannisinochi Indee Qolleti Qollo

²⁰ Arooba Zebidiyoosi mechee bi bushiisheenaꞌona tookkaa Yesuus waan giddaꞌa ikke mooyon biich bi tuniyemmoyich goyinnaa qollahan.

²¹ Biyoo “Amoon qaawinne?” iye. Ureyoo “Hini gutte ta bushiisheenaꞌo, ne taatehooba ikkoo ne qanne badd, ikkoo ne yooche badd kotebeete” iyan.

²² Tunetaa Yesuusi wochiꞌi, “Ittoshi qollemmon ariyaachote. Ta uchemmi xuuxee xoofoochee uyon hakkehote?” iye. Boonoshiyoo wochiꞌi, “Eeha hakkemmo noone” iyeete.

²³ Yesuusi wotta “Ta uchemmi xoofoochee uchemmo ittoshine. Tunebaani ta qannoonaa ta yoochoonooch ittoshi kotemmoyich immemmo ta toonoone. Ebi are xaaꞌeenaꞌon ta Nihoo qanniiree bi immemmo, bi kaacciti asheenaꞌoyichiye” iye.

²⁴ Aree hillooch eche aashire bi dabbeenaꞌo waayeꞌi gutte maneenaꞌon kaareheete.

²⁵ Tunetaa Yesuusi boonoshi bullin bi waan ceeggiꞌi ishichiye: “Aagetee taateenaꞌo showoo bulli toommooch taateꞌi areexi asho bullin boonoshi hajjoon ariibeeto ittoshine; wotta eboshi bulli toommooch beeti iraasheenaꞌo doono tunoon tuushaachote.

²⁶ Tunetaa ittoshi daggooch ebiyoommon tunaaye. Ittoshi daggoochee koniyoona ‘Oogoo tunebona’ ito, wochee bushoochoommon ittoshich shuunebe.

²⁷ Wotta ittoshi daggoochee koniyoona ukkirebona ito, shiichiree guunochoommon ittoshich shuunebe.

²⁸ Ashi Busholla wocheyoonaa bi kashoon meetinaꞌochi keroyich deejjoonoyich waahalli, boonoshi biich wocheebeete iꞌi waataanoone” iye.

Aaf Dooge Gutte Asheenaꞌon Yesuusi Wodiyoo

²⁹ Ebiyee gubb, Yesuusinaa bi dabbeenaꞌona Yaarikee kechii hammii beetaa, dofee asheenaꞌo Yesuusin dabbiyeete.

³⁰ Arooba aaf dooge gutte asheenaꞌo gommi gashooch koteebee Yesuusi aroona beshoon waayeꞌi, “No Doonocho! Daawiti Bushoocho! Nooch ariqqebe!” iꞌi cookiyeete.

³¹ Arooba dofee asheenaꞌo cikkibote iꞌi boonoshin noggeheete. Tunebaani “No Doonocho! Daawiti Bushoocho! Nooch ariqqebe!” iibee beshoon cookiyeete.

³² Areegaata Yesuusi neexeechii ceeggiꞌi, “Ittoshich amoon ta tuniyooniye ittoshi qaawiibeeto?” iꞌi echehe.

³³ “No Doonocho, no aafoon ne ciichiyemmoyichiye” iyeete.

³⁴ Yesuusi ariqqeꞌi boonoshi aafoon bi kishoona yechiye. Boonoshi aafo bekkech ciinniye; aroochee Yesuusin dabbiyeete.