Maatiyoosi 2 - Kafa Linguistics Project

Xojjenee Hiddechinaꞌo Aabi-keyo Waanee Womo

¹ Heroodisi Yihudee showooch taateꞌi bi beetaa, are showooch beeti Beetilehemi katemooch Yesuusi shiijjehe. Arooba xojjenee hiddechinaꞌo aabi-keyoochee Yerusaalem waaꞌi,

² “Katinoon shiijjeti Ayihudeenaꞌochi taatoo aabiichiye? Bi xojjenoon aabi-keyoochaa beeggaꞌa, biich goyinneya waato noone” iyeete.

³ Taatoo Heroodisi ishin waayeꞌi keqqiye; wotta Yerusaalem beetinaꞌo bulliyoo keqqiyeete.

⁴ Aroochee Heroodisi qeeshee ukkireenaꞌonaa Muusichi Sheeree dojjechinaꞌonon kiciꞌi, “ ‘Kiristoosi shiijjemmone’ getteeto, aabiichiye?” iꞌi echehe.

^5-6 Boonoshiyoo ishichiyeete: “Yihudee showooch beeti Beetilehemiye; ‘Hini Yihudee showooch beeti Beetilehemi asheenaꞌote, ta macceenaꞌo tuneti Israꞌeeleenaꞌon quyemmi woraaferashoo ittoshi daggoochee kechemmone; ebich Yihudee showooch beeti katemeenaꞌoyee ittoshi katemoo cir shappaachemmone’ iꞌi Yeeri gettiton keemecho kooritone” iyeete.

⁷ Ebiyee gubb, Heroodisi xojjenee hiddechinaꞌon aashoona ceekkiiꞌi xojjeno bekketi aaboon boonoshi waanee manjii echee waayehe.

⁸ Aroochee boonoshin Beetilehem ishichiꞌi daachiihe: “Hamiree bushoo beeti xaaꞌoon nibboona qaawibote; ittoshi danegaata, waaree taach getote; tawoo hamiree biich goyinnemmo taane” iye.

^9-10 Boonoshiyoo ishin taatoo waanee boonoshi waayetoyee gubb, tiyiꞌi hammiyeete. Aabi-keyoochaa boonoshi beeggiti xojjenoon wochinnoon beeggiꞌi oogichii emiriyeete; boonoshich bekkeebee gaggeroo beeti xaaꞌooch waa bi neexemmi wottoon boonoshin yaabii beehe.

¹¹ Are kexooch giyiꞌi bi indee Maariyamina tookkii beeti gaggere bushoon beeggiyeete. Yittiꞌinoo biich goyinneheete; boonoshi saaxenoon qechiꞌi aachoon, ixaanoonaa hareboonon kichii immiyeete.

¹² Ebiyee gubb, Yeeri gumona “Wotteree Heroodis waan hammaahote” iꞌi bi gettitoyich, bare gommona boonoshi showooch wotteꞌi hammiyeete.

Gibitsee Showooch Maxxo

¹³ Xojjenee hiddechinaꞌo hammitoyee gubb, Doonochi maraakoo gumona daneꞌi, Yooseefin “Heroodisi hini gaggere bushoon wuxiyoyich qaawii beetone; ebich tiyiree gaggeroonaa bi indeenon yeshiree, Gibits maxxebe; neech ta gettemmi wottoon, arooch kotebe” iye.

¹⁴ Ebina Yooseefi tiyii gaggeroonaa bi indeenon yechiꞌi, xumoona Gibits maxxehe;

¹⁵ Heroodisi qitimmi wottoon arooch kotehe. Ebi tuneto, Doono keemechochi noonoona, “Ta Bushoon Gibitsee ceeggoye” iꞌi bi gettito ceennemmoyichiye.

Taatoo Heroodisi Gaggereenaꞌon Wuxiyoo

¹⁶ Heroodisi xojjenee hiddechinaꞌo biin dawushoon ariiꞌi oogichii kaarehe; xojjenee hiddechinaꞌon manjii bi echee waayeti aaboon shalligiꞌi, bi ginechinaꞌon daachii Beetilehemi katemoonaa bi katinoonooch shiijjeti gutte natonaa gutte natoyee deshina tuneti gaggere anaami bushiisheenaꞌon wuxiihe.

^17-18 Arooba Yeerichi keemechi Erimiyaasina, “Eefonaa wodde bunnee qaaroona Raami katemooch waayeehe; Raaheeli bi bushiishoyich eeppahane; bi bushiisheenaꞌo qititoyich, goggoon hakkaaneene” ii bi gettito ceenniye.

Gibitsee Showoochee Wotto

¹⁹ Heroodisi qititoyee gubb, Doonochi maraakoo Gibitsaa gumona Yooseefina daneꞌi,

²⁰ “Bushoon wuxiya qaawitinaꞌo qititinaꞌone. Tibe, bushoonaa bi indeenon yeshiree Israꞌeelee showooch wotteree hambe” iye.

²¹ Ebich Yooseefi tiyii bushoonaa bi indeenon yechiꞌi Israꞌeelee showooch wottee hammiye.

²² Arikaliyoosi bi nihoo Heroodisichi keroon Yihudee showooch bi taatoon waayeꞌi, arooch hamon shattiye. “Yihudee showooch hammaahine” immi gumon beeggiꞌi Galiilee showooch hammii,

²³ Naazireeti katemooch kotehe. Ebich Yeerichi keemechinaꞌona “Kiristoosi Naazireetecho getteyemmone” iꞌi bi gettito ceenniye.