Maatiyoosi 19 - Kafa Linguistics Project

Mecheen Gawukkeechon Yesuusi Dojjoo

¹ Yesuusi ebin gettii bi ciichitoyee gubb, Galiilee showoochee tiyiꞌi Yoordaanoosi aachee beqach beeti Yihudee showooch hammiye.

² Dofee asheenaꞌo biin dabbiyeete; aroochaa biiyetinaꞌon wodiihe.

³ Arooba ikkikke Fariseenaꞌo Yesuus waan giddee biin muriciiya qaawiꞌi, “Asho tunemmi mooyona bi mecheen bi gawukkemmoyich Muusichi Sheeroo daaggite?” iꞌi echeheete.

⁴ Yesuusi wochiꞌi ishichiye: “Yeeri shiichiꞌi ashoon anaamonaa maacheenon tuniiꞌi halliye.

⁵ Ishichiinoo iye: ‘Asho bi nihoonaa bi indeenon qayiichi bi mecheena tookki ikkoo tunemmone; gutteenaꞌoo ikke meeno tunemminaꞌone’ ii beeti qaaroon shemmeyaachote?

⁶ Ebich are aaboochee tiijjiꞌi ikkeenaꞌoani gubbich gutteenaꞌo tooneenaꞌone. Illa Yeeri xaaqqiton, asho bariyaaye” iye.

⁷ Fariseenaꞌo wochiꞌi, “Ishigaata, Muusi ‘Bi gawukkeyoon miixeebeeti koorichoon koori imiree gawukkibe’ iꞌi amoyich gettiye?” iyeete.

⁸ Yesuusi wochiꞌi ishichiye: “Muusi mecheen ittoshi gawukkemmoyich bi daaggito ittoshi mullee muumoon beeggiꞌinalli wonna ebi aalloone.

⁹ Tunebaani ta iberoon ittoshich gettoye: Shunimaaye tuneyaani bi mecheen gawukkiꞌi bareen shaaggiibeeto bulli shunoon maatone” iye.

¹⁰ Bi dabbeenaꞌo “Mecheenaa kenoonochi mooyo ebi tunegaata, shaagi qayo gaawiye” iyeete.

¹¹ Yesuusi wochiꞌi, “Ebi mooyo Yeeri immitinaꞌoyichani bullich toonoone.

¹² Bi indee maacoochee guruusho tuneꞌi shiijjeto beetone; ashoona nasheeto beetone; shimaajji taatittineyicha iꞌi shaagon qajjitinaꞌo beetinaꞌone. Ebich ebiyoommon tunoon hakkimmoyich tunebe” iye.

Gishiishi Bushiisheenaꞌon Yesuusi Diiroo

¹³ Arooba asheenaꞌo, Yesuusi bi kishoon boonoshi toommooch kotiiree boonoshich bi corootemmoyich gishiishi bushiisheenaꞌon bi waan deebiyeete; tunetaa bi dabbeenaꞌo bushiisheenaꞌon deebiti asheenaꞌon noggeheete.

¹⁴ Tunebaani Yesuusi bi dabbeenaꞌon “Qayote! Shimaajji taatittine tunemmo eboshiyoominaꞌoyichiye; ebich gishiishi bushiisheenaꞌo ta waan wobeete; bajjaahote” iye.

¹⁵ Bi kishoon boonoshi toommooch bi kotiitoyee gubb aroochee tiyiꞌi hammiye.

Gaannechon Iritiibeeti Mooyo

¹⁶ Ikke areddoon ikke uro Yesuus waan giddeꞌi, “Dojjechocho, bulli yemeenee kashoon ta danemmoyich amee deꞌe shuunoon shuunebote?” iꞌi echehe.

¹⁷ Yesuusi wochiꞌi, “Deꞌe mooyichon amoyich taan echaa beetine? Deꞌo tuneto ikkeeti Yeeri baachiye. Bulli yemeenee kashoon danoon ne qaawigaata, Muusichi Sheeroo gettiton ceechibe” iye.

¹⁸ Uroo wochiꞌi, “Bi gettitoochee aabiniye?” iye. Yesuusi wochiꞌi, “ ‘Ashoon wuxiyaahine; shunoon maayaahine; gaajjaahine; kootoon miixeyaahine;

¹⁹ ne nihoonaa ne indeenon oogiibe; neenoommi ne manoon neenna tachiree shune’ ii beetoniye” iye.

²⁰ Gurimaashoo wochiꞌi, “Ebi bullin ceechito taane. Ebiyee baroo ta shappiiti mooyo amoone?” iye.

²¹ Yesuusi “Deꞌoon tuno ne shunigaata, hamiree neech beeto bullin kemiree iriteetinaꞌoyich imbe. Neech shimaajji kexooch kiceeree beeyemmone. Aroyee gubb waaree taan dabbibe” iye.

²² Tunetaa are gurimaashoo wodde gijjoo biich beeto bi tunetoyich, ebin waayeꞌi tiyii ayiniibee wotteꞌi hammiye.

²³ Aree hillooch Yesuusi bi dabbeenaꞌoyich ishichiye: “Iberoon ittoshich gettoye: Gaannechoyich shimaajji taatittineech gimo am shaahe maggoone!

²⁴ Wochinnoon ittoshich gettoye: Gaaleyich nappee aahoona besho maggoone; tunebaani gaannechi uroyich Yeerichi taatittineech gimo ebiyee beshoon maggoone” iye.

²⁵ Bi dabbeenaꞌo ishin waayeꞌi oogichii worganeebee, “Ishigaata, konine wodoon hakkemmo?” iyeete.

²⁶ Yesuusi boonoshin ciinniꞌi, “Asho hini mooyon tuniyoo hakkaache; tunebaani Yeeri bulli mooyon tuniyoyich hakkechone” iye.

²⁷ Arooba Pheexiroosi wochiꞌi, “Ebiyoche, bullin qajjaꞌa neen dabbito noone. Ishigaata, no danemmo amooniye?” iye.

²⁸ Yesuusiyoo boonoshich wochiꞌi ishichiye: “Iberoon ittoshich gettoye: Bulli mooyo andiremmi yemeenooba Ashi Bushoo oogee yiiree taatee qeenooch bi kotehooba, taan dabbiibeeti ittoshi wotta aaraa gutte taatee qeenooch koteree aaraa gutte Israꞌeelee yoodeenaꞌo toommooch nallemmo ittoshine.

²⁹ Taacha iꞌi bi kexon woyee bi anaami maneenaꞌon woyee bi maache maneenaꞌon woyee bi indeen woyee bi nihoon woyee bi bushiishoon woyee bi gochiibeeti showoon qajjito bulli, eboshi bullin balle kishoon daakkaa danemmone; wotta bulli yemeenee kashoon danemmone.

³⁰ Tunebaani shiichitinaꞌo getteeti meetinaꞌo gubbemminaꞌone; gubbetinaꞌo getteeti meetinaꞌo shiichemminaꞌone” iye.