Maatiyoosi 16 - Kafa Linguistics Project

Malletoon Bi Bekkiyemmoyich Yesuusi Echeyoo

¹ Ebiyee gubb, Fariseenaꞌonaa Saduuqeenaꞌonoochee ikkikkeenaꞌo Yesuusin muriciiya ii bi waan giddeꞌi, “Eke shimaayoochee malletoon nooch bekkiibe” iꞌi echeheete.

² Tunetaa Yesuusi wochiꞌi ishichiye: “Xum womikka ‘Shimaayoo ceelletone; amiyo dihaachemmone’ iyote;

³ haree maaddoona ‘Shimaayoo ceellee qubetone; hanaach amiyo dihemmone’ iyote. Shimaayoon ciinniꞌi tunemmi mooyon ariyoon hakkiyote; tunebaani yemeenee malletoon beeggiꞌi tunemmi mooyon ariyoon hakkaachote?

⁴ Hini gondoonaa yahechona tuneti shiijjeroo malletoon beegoyich qaawii beetone; tunetaa Yoonaasichi malletoyee besh bare malletoo biich icheyaachemmone” iye. Bi ishichitoyee gubb arooch boonoshin duppiichii bare xaaꞌooch hammiye.

Fariseenaꞌonaa Saduuqeenaꞌonochi Bukee Shittoo

⁵ Yesuusichi dabbeenaꞌo baharoyee beqach boonoshi kimiyooba shohoon yeshaanoon batteheete.

⁶ Yesuusi boonoshin “Fariseenaꞌonaa Saduuqeenaꞌonochi bukee shittoochee ittoshi qelloon quyebote” iye.

⁷ Aroochee boonoshinaa boonoshina “Koshon yeshaano no qajjetoyich shaahiye bi gettiibeeto” iꞌi yibbaateheete.

⁸ Yesuusi boonoshi gaboon ariiꞌi ishichiye: “Hini, ta toommooch mulloon tooꞌiyaaneenaꞌote, ‘Kosho nooch aalletoyich shaahiye’ iꞌi amoyichiye ittoshi yibbaateebeeto?

⁹ And beddaahaa ittoshi mullooch giyaache? Uuche xekee koshon uuche hume ashich tiichaa ta qoodiyooba, echeti ambiche mokkoon ittoshi tiijjito gaata shalligaachote?

¹⁰ Wotta shabaatte xekee koshon awudde humeenaꞌoyich tiichaa ta qoodiyooba, echeti ambiche mokkoon ittoshi tiijjito gaata shalligaachote?

¹¹ ‘Fariseenaꞌonaa Saduuqeenaꞌonochi bukee shittoochee ittoshi qelloon quyebote’ iyaꞌa ta getteto kochichon toonoone. Ebin aabichiꞌi shalligaachote?” iye.

¹² Arooba Yesuusi gettito, Fariseenaꞌonaa Saduuqeenaꞌonochi doyoonalli, “Kochi bukee shittoochee ittoshi qelloon quyebote” iꞌi bi getti qayo batt boonoshi mullooch giyiye.

Yesuusi Echeton Pheexiroosi Wochoo

¹³ Yesuusi Filipphoosi Qesaariyi katemee gaꞌooch beeti showooch shaggiꞌi tiyii bi dabbeenaꞌon “Asheenaꞌo Ashi Bushoon konine ii beeteete?” iꞌi echehe.

¹⁴ Boonoshiyoo “Ikkikkeenaꞌo ‘Hini Aacona Afaallechi Yowannisine’, echeenaꞌo ‘Eliyaasine’, echeenaꞌo wotta ‘Erimiyaasine woyee wonna Yeerichi qaaroon keemmii beetinaꞌoochee ikkoone’ ii beetinaꞌone” iyeete.

¹⁵ Biyoo “Ittoshiyochi taan konine ii beetote?” iye.

¹⁶ Simoon Pheexiroosi tiyiꞌi, “Ne Kiristoosi, beeyechi Yeerichi Bushoo neene” iye.

¹⁷ Yesuusiyoo wochiꞌi ishichiye: “Yoonichi bushoo Simoono, ebin neech bekkiito shimaayooch beeti ta Nihoani asho toonoone; ebich diireeto neene.

¹⁸ Tawoo neech gettoye, ne shigo Pheexiroosine; hini xaqqee toommooch ta kittinnee guuphon neechemmo taane; qitee giidolla bi tunetaa, ebi aroon kochii wochoon hakkaachemmone.

¹⁹ Shimaajji taatittinee kellee qulfoon neech immemmo taane; showoochaa ne cucheti mooyo bulli shimaayoochaa cucheeto tunemmone; showoochaa ne biicheti mooyo bulli shimaayoochaa biicheto tunemmone” iye.

²⁰ Arooba bi dabbeenaꞌoyich “Ta Kiristoosi ta tunoon konichona gettaahote” iꞌi gettiye.

Bi Qitemmon Shiichii Yesuusi Geto

²¹ Aroobee aabooba Yesuusi bi dabbeenaꞌoyich ishichiꞌi getooch giyiye: “Yerusaalem hamo taach qaawiihe; aroochaa showee geeneenaꞌo, qeeshee ukkireenaꞌonaa Muusichi Sheeree dojjechinaꞌonochi kishoochee wodde xuuxoon beeggemmo taane; taan wuxemminaꞌone. Tunebaani keejje qemooba qitoochee tiyemmo taane” iye.

²² Arooba Pheexiroosi Yesuusin ikke badd wochiꞌi, “Ebi ne waanee wohe! Cir ne toommooch shaggaaye!” iꞌi noggee kaarehe.

²³ Tunetaa bekkech Yesuusi guuddii wotteꞌi Pheexiroosin “Hini Sheexaanoocho, ta waanee wohe! Taach xugo tuneto neene. Ashichonalli Yeerichon gabaachine” iye.

^24-25 Arooba wotta Yesuusi daakkiꞌi bi dabbeenaꞌoyich ishichiye: “Bi kasheen wodiyoyich qaawiibeeto bulli muccemmone; tunebaani taacha iꞌi bi kasheen mucceebeeto bulli danemmone. Taan dabboon shunniibeeto koniyoona bi tunegaata, bi qelloon nookkebe; bi masqaloon shaagiree taan dabbibe.

²⁶ Wotta asho showee toommooch beeto bullin biicho tuniichii bi kasheen bi muccegaata, amoon biich hallehe? Asho bi kasheen wochiꞌi danoyich amoon qoco hakkehe?

²⁷ Ashi Bushoo bi Nihoochi oogee yiiroona bi maraakeenaꞌona tookki katinoon woyemmone; arooba bullich bi shuuni shuunoommon immemmone.

²⁸ Iberoon ittoshich gettoye: Hiniich neexee beetinaꞌoochee ikkikkeenaꞌo Ashi Bushoo taateꞌi bi waataa boonoshi beegimmi wottoon, qitaachemminaꞌo beetinaꞌone” iye.