Maatiyoosi 15 - Kafa Linguistics Project

Qaabbechinaꞌochi Doyoo

¹ Arooba ikkikke Fariseenaꞌonaa Muusichi Sheeree dojjechinaꞌona Yerusaalemee waa Yesuus waan giddeꞌi,

² “Ne dabbeenaꞌo no qaabbechinaꞌochi doyoon amoyichiye boonoshi shaaddeebeeto? Maayoon mamoyich boonoshi giddee beegaata, no doyoochoommon boonoshi kishoon macheyaacheete” iꞌi echeheete.

³ Yesuusi wochiꞌi ishichiye: “Ittoshiyochi ittoshi doyoocha iꞌi amoyichiye Yeerichi sheeroon ittoshi shaaddeebeeto?

⁴ Yeeri ‘Ne indeenaa ne nihoonon oogiibe’ wotta ‘Bi indeen woyee bi nihoon naaggimmoo qitibe’ itone.

⁵ Tunetaa ittoshi ‘Ikke uro bi nihoon woyee bi indeen “Ittoshich ta immemmon Yeerich kichito taane; Yeerich yaafeetone” ii beeto bulli,

⁶ bi nihoonaa bi indeenon dego qaawiyaache’ ii beeto ittoshine. Ittoshi doyoocha iꞌi Yeerichi qaaroon biichito ittoshine.

^7-9 Hini ittoshi maacoon xalloo shaahii beetinaꞌote! Isiyaasi ittoshichon ishichitone: ‘Hini asheenaꞌo boonoshi noonoona taan oogii beetinaꞌone; tunetaa boonoshi mullo ta waanee oogeton wohone; ashi doyoon Yeerichi qaaro tuniiꞌi dojjiibee, duuboon taach goyinneheete’ iꞌi bi keemmito iberooniye” iye.

Ashoon Eeꞌiibeeti Mooyo

¹⁰ Aroochee wotta Yesuusi dofee asheenaꞌon bi waan ceeggiꞌi, “Ta getaa waayebote! Shalligibote!

¹¹ Ashoon eeꞌiibeeto kookkoona giyiibeeti maayo toonoone; tunetaa ashoon eeꞌiibeeto ashi noonoochee kechiibeeti mooyone” iye.

¹² Arooba bi dabbeenaꞌo Yesuus waan giddeꞌi, “Fariseenaꞌoyich hini boonoshi waayeti qaaro xugo bi tunoon ariitine?” iyeete.

¹³ Tunetaa bi wochiꞌi, “Shimaajji ta Nihoo Yeeri bechaano bulli waaxemmone.

¹⁴ Boonoshin qayote; aaf doogoon yaabiibeeti aaf doogeenaꞌone; aaf doogo aaf doogoon bi yaabigaata, gutteenaꞌo yesheree oppooch dihemminaꞌone” iye.

¹⁵ Pheexiroosi tiyiꞌi, “Ashoon eeꞌiibeeti mooyoyich ne getteti shaahiyoon kaachiree nooch gete” iye.

¹⁶ Ebich Yesuusi bi dabbeenaꞌoyich ishichiye: “Andoo ittoshi mullooch giyaache? Shalligaachote?

¹⁷ Kookkoona giyiibeeto bulli maacooch giyiꞌi maach keyon ariyaachote?

¹⁸ Tunetaa noonoochee kechiibeeto, mulloocheeniye bi kechiibeeto; ashoon eeꞌiibeeto aroone.

¹⁹ Mulloochee kechii beetinaꞌo, gonde shalligoo, wuxoo, shunee mamo, yahoo, gaayo, kootee miixo, oono eboshine.

²⁰ Ashoon eeꞌiibeeto ebiyalli, Ayihudeenaꞌochi doyoommona kishoon macheyaanoon mamo toonoone” iye.

Kanaanee Showeexi Ureechi Busheen Yesuusi Wodiyoo

²¹ Yesuusi aroochee tiyiꞌi Xiroosinaa Sidooninochi gaꞌooch beeti showooch hammiye.

²² Bekkech are showooch beeti Kanaanee ure waaꞌa, “Ta Doonocho! Daawiti Bushoocho! Taach ariqqebe! Ta busheen giidechi maach biiyo yechitone” iyaꞌa cookaabee qollahan.

²³ Tunetaa Yesuusi amoonolla getaanoone. Bi dabbeenaꞌo bi waan giddeꞌi, “Hini ure cookaabee noon dabbaa beetine; daachiibe; hambuye” iꞌi qolleheete.

²⁴ Yesuusiyoo wochiꞌi, “Bago aalloommon aalleti Israꞌeeleenaꞌo ikkeetoyichiye wochetaa ta waato” iye.

²⁵ Tunetaa ure waaꞌa, “Ta Doonocho, taan gaachebe” iibee goyinnehan.

²⁶ Yesuusi wochiꞌi, “Bushiisheenaꞌochi maayoon tiijjiꞌi kunaaneenaꞌoyich dufo tato toonoone” iye.

²⁷ Ure wochaꞌa, “Ishi iberoone, ta Doonocho! Tunebaani kunaaneenaꞌolla boonoshi doonochi madoochee oojjiti ooyoon macii maa beetinaꞌone” iyan.

²⁸ Arooba Yesuusi ureyich wochiꞌi, “Haane, ta toommooch mulloon ne tooꞌiyoo oogeti mooyone. Ebich ne qaawitoommon neech tunebe” iye. Arooba bi bushee bekkech wodiyan.

Meeti Asheenaꞌon Yesuusi Wodiyoo

²⁹ Yesuusi aroochee tiyiꞌi Galiilee baharee gashooch hammiye. Arooch beeti geppoochoo kechiꞌi kotehe.

³⁰ Dofee asheenaꞌo baata yesheenaꞌon, dureenaꞌon, aaf doogeenaꞌon, noona miimeenaꞌon, meeti biiyechi bareenaꞌonoo bi waan deebiyeete; Yesuusichi baatooch kotiiheete; biyoo boonoshin wodiihe.

³¹ Ebich dofee asheenaꞌo noona miimeenaꞌo yibbaatetaa, dureenaꞌo wodaa, baata yesheenaꞌo shaꞌetaa, aaf doogeenaꞌo ciinaa beeggiꞌi worganeheete; Israꞌeelichi Nuggishoon galleteheete.

Awudde Humeenaꞌoyich Yesuusi Maanjoo

³² Ebiyee gubb Yesuusi bi dabbeenaꞌon bi waan ceeggiꞌi, “Hini asheenaꞌo taanna tookkii boonoshi koteto, hanaach keejje qemone. Boonoshi maayemmo aalletoyich, taan oogichii ayinikkitone. Gommoochaa maraateree boonoshi dihaachemmoyich, abete kashoona boonoshin daachiyoon shunaache” iye.

³³ Bi dabbeenaꞌo wochiꞌi, “Hini shaahe asheenaꞌon michiyemmi koshon hini gafoo aalli xaaꞌoochee amoochee danehone?” iyeete.

³⁴ Yesuusi “Ambiche kosho ittoshich beete?” iꞌi echehe. Boonoshi wochiꞌi, “Shabaatte xekee koshonaa giisheche gishiishi haashoona beete” iyeete.

³⁵ Aree hillooch Yesuusi asheenaꞌon kotebote iye.

³⁶ Shabaatte xekee koshonaa haashoonon yechiꞌi Yeerin galletehe. Tiichiꞌi bi dabbeenaꞌoyich immiye. Bi dabbeenaꞌoo asheenaꞌoyich giddiiꞌi qoomeheete.

³⁷ Asheenaꞌo bulliyoo maaꞌi michiyeete. Aroyee gubb bi dabbeenaꞌo echeti ooyoon shabaatte mokkee ceenon tiijjiyeete.

³⁸ Arooba maati doonjeenaꞌo, genneenaꞌonaa bushiisheenaꞌona giyaanoon awudde humeenaꞌone.

³⁹ Yesuusi asheenaꞌo bullin diggiiꞌi bi daachiitoyee gubb, giishi markabeena Magidanee showooch hammiye.