Maatiyoosi 14 - Kafa Linguistics Project

Aacona Afaallechi Yowannisi Qitoo

¹ Arooba Galiilee iraashoo Heroodisi Yesuusichi mooyon waayehe.

² Bi mikkirechinaꞌoyich “Hini Aacona Afaallechi Yowannisine; ebiyoommi gaakkechi mooyon tuniyoo bi hakkito, qitoochee tiyiꞌiniye” iye.

^3-4 Heroodisi bi ishichiti naboo ebine: Heroodisi bi manoo Filipphoosichi mechee Heroodiyaadin bi shaaggitoyich, Yowannisi tiyiꞌi biich “ ‘Ne manoochi mecheen shaage’ iꞌi Muusichi Sheeroo daaggaanoone” iye. Heroodisi ureechi naboyich “Yowannisin yeshi cuyote” iꞌi bi ginee naayinaꞌoochee wochehe. Boonoshiyoo hammiꞌi yechii cuyee kexooch cuchiyeete.

⁵ Heroodisi Yowannisin wuxiya qaawiye; tunetaa asheenaꞌo keemechon tuniiꞌi biin boonoshi ciinnii beetoyich boonoshin shattiye.

⁶ Tunebaani ebiyee gubb, Heroodisichi shiijjee aabee baarooba Heroodiyaadichi bushee iibbeenaꞌo aafooch giyaa duubbaꞌa Heroodisin emirikkiyan.

⁷ Ebich bi qollemmo amoonolla biich imma wogeꞌi gibenikkiye.

⁸ Busheyoo bi indeena koceeꞌa, “Aacona Afaallechi Yowannisichi qelloon gafetoona and taach imbe” iyan.

⁹ Arooba taatoo ayiniye; tunetaa bi wogeti wogoonaa biinna tookkii koteti iibbeenaꞌonoyicha iꞌi bi echeto biich icheyemmoyich gettiye.

¹⁰ Aroochee cuyee kexooch wochii, Yowannisi qettoon kuchiihe.

¹¹ Bi qelloonoo gafetoona deebii busheyich immiyeete. Busheyoo daammaa bi indeyich immahan.

¹² Yowannisi dabbeenaꞌo hammii bi dubenoon deebiꞌi duukkiyeete; aroochee waaꞌi Yesuusich gettiyeete.

Uuche Humeenaꞌoyich Yesuusi Maanjoo

¹³ Yesuusi ebin waayeꞌi, aroochee tiyii giishi markabeena ashaalli xaaꞌooch hammiye. Dofee asheenaꞌo ebin waayeꞌi katemoo bulliichee baatoona biin dabbiyeete.

¹⁴ Yesuusi markabeechee kindiibee dofee asheenaꞌon beeggiꞌi bi maacoona ayiniye. Boonoshi daggooch beeti biiyechinaꞌon wodiihe.

¹⁵ Aroochee showoo beshee womikkoo wottetaa, Yesuusichi dabbeenaꞌo bi waan giddeꞌi, “No beeto gafoo aalli xaaꞌoone; andoo showoo xumetone. Ebich hini dofee asheenaꞌon diggiiree daachiibe; gafoo beetooch hamiree maayoon boonoshi qellich kemebeete” iyeete.

¹⁶ Tunetaa Yesuusi wochiꞌi, “Hammaayeete; ittoshi maanjibote” iye.

¹⁷ Bi dabbeenaꞌoo “Hiniich nooch beeto uuche xekee koshonaa gutte haashoona baachiye” iyeete.

¹⁸ Biyoo “Eke aroon taach deebote” iye.

¹⁹ Asheenaꞌo bullin “Mocee toommooch kotebote” iye. Uuche xekee koshonaa gutte haashoonon tiijjii yechiꞌi, shimaajj ciinniichii Yeerin galletehe. Koshon tiichiꞌi bi dabbeenaꞌoyich immiye. Boonoshiyoo daammii asheenaꞌoyich qoomeheete.

²⁰ Bulliyoo maa michiyeete. Echeti kochi ooyoon bi dabbeenaꞌo aaraa gutte ogooge mokkoona ceechiꞌi tiijjiyeete.

²¹ Genneenaꞌonaa bushiisheenaꞌona haddeyaanoon koshon maatinaꞌoochee doonjeenaꞌo baach uuche hum bedeenaꞌone.

Baharee Aachi Toommona Yesuusi Shaꞌo

²² Yesuusi bi dabbeenaꞌoyich ishichiye: “Asheenaꞌon ta deennemmi wottoon markabeech giyiree beqach tayee shiichiree kimbote” iꞌi gettiye.

²³ Asheenaꞌo bullin bi deennitoyee gubb, corootiya bi ikkeeto geppooch kechiye. Bi ikkeeto arooch bi beetaa, showoo xumehe.

²⁴ Arooba markabe aroochee wokkahan; giidechi yongo markabeyee aafaa tiyaa, are markabeen aachi aayo tappehe.

²⁵ Qaabbe baakkee kuuhooch Yesuusi baharee toommona shaꞌeebee boonoshi waan waahe.

²⁶ Bi dabbeenaꞌo baharee toommona shaꞌeebee bi womon beeggiꞌi, yoogoone iꞌi keqqoona shatee cookiyeete.

²⁷ Bekkech Yesuusi boonoshich “Kupphebote! Taane, shattaahote” iye.

²⁸ Arooba Pheexiroosi tiyiꞌi, “Ta Doonocho, ne gaata, aachi toommona shaꞌeree ne waan ta woyemmoyich gete” iye.

²⁹ Yesuusiyoo “Wobe” iye. Pheexiroosi markabeechee kindiꞌi aachi toommona shaꞌeebee Yesuus waan hammiye.

³⁰ Tunebaani giidechi yongoon beeggiꞌi shattiye; aaco biin qooxximmona, “Ta Doonocho, taan wodiibe” iꞌi cookiye.

³¹ Bekkech Yesuusi bi kishoon yaggii yechiꞌi tiyii, “Hini, ta toommooch ne mulloon tooꞌiyaanoocho, ne mulloon amoyich guttiinne?” iye.

³² Gutteenaꞌoo markabee toommooch boonoshi kechimmona yongo qajjiye.

³³ Markabee toommooch beetinaꞌo “Iberoon Yeerichi Bushoo neene” iꞌi Yesuusich yittii goyinneheete.

Genshareexee Showooch Beeti Biiyechinaꞌon Yesuusi Wodiyoo

³⁴ Yesuusinaa bi dabbeenaꞌona baharoon kimmiꞌi Genshareexee showooch shaggiyeete.

³⁵ Are showooch beetinaꞌo Yesuusin ariiꞌi, aree guudooch beeti showooch wochii, biiyechinaꞌo Yesuus waan woyemmoyich tuniiꞌi,

³⁶ biiyechinaꞌo bi qoreddee caappoonolla boonoshi yechemmoyich qolleheete. Yechitinaꞌo bulli wodiyeete.