Maatiyoosi 13 - Kafa Linguistics Project

Yaree Shookkechochi Shaahiyoo

¹ Arooba Yesuusi kexoochee kechii hammiꞌi baharee gashooch kotehe.

² Biyoo dofee asheenaꞌo bi waan kiceetoyich, baharee toommooch beeti giishi markabeech kechiꞌi kotehe. Asheenaꞌo bulli baharee gashooch beeti showooch neexeheete.

³ Asheenaꞌoyich meeti mooyon shaahiyoona gettiye. Gettiibeenoo ishichiye: “Ellebote, yaree shookkecho bi yaroon shookka kechiye.

⁴ Shookkii bi beetaa, ikkikkoo gommi gashooch holliye. Aroon kafeenaꞌo waa macii maaheete.

⁵ Baroo maacaa xaqqechi showooch holliye. Showoo giishetoyich kaatee collehe;

⁶ tunetaa aabe michimmona shoolliye; cammon awuro bi qajjitoyich, shuuqqiye.

⁷ Baroo wotta angichi xuppo beetooch holliye; are angichi xuppoo naaxii kechiꞌi maahe.

⁸ Baroo wotta qeemi showooch holliꞌi collehe; diccii kechiꞌinoo aafehe; ikkoo balle aafoon, ikkoo shiche aafoon, ikkoo shaashe aafoon aafehe.

⁹ Waayeebeeti waajjecho waayebe” iye.

Bi Dabbeenaꞌo Echeton Yesuusi Wochoo

¹⁰ Ebiyee gubb, bi dabbeenaꞌo Yesuus waan giddeꞌi, “Amoyichiye asheenaꞌoyich shaahiyoona ne gettaabeeto?” iꞌi echeheete.

¹¹ Yesuusi wochiꞌi ishichiye: “Yeeri shimaajji taatittinee maacee mooyon ittoshich arichiitone; tunetaa bareenaꞌoyich arichiyaanoone.

¹² Beetoyich daakkaa ichemmone; biichoo woddemmone. Tunetaa amolla aallo waanee biich beeti giishechewolla tiijjeyemmine.

¹³ Ebich ciinniibee beego boonoshi qajjitoyich, waayeebee ello boonoshi qajjitoyich, shalligoonoo boonoshi qajjitoyich shaahiyoona boonoshich arichiihoye.

¹⁴ Isiyaasi ishichitone: ‘Hini asheenaꞌo waayoon waayee beeteete; shalligaacheete. Ciinon ciinnii beeteete; beegaacheete.

¹⁵ Boonoshi aafoona boonoshi ciinaachemmoyich, boonoshi waamona boonoshi waayeyaachemmoyich, boonoshi mulloona boonoshi shalligaachemmoyich, ta waan boonoshi wottetaa boonoshin ta wodiyaachemmoyich, boonoshi mulloon muumiitinaꞌone; boonoshi waamon ulliitinaꞌone; boonoshi aafoonoo oppetinaꞌone’ iꞌi bi keemmiti keemo boonoshi toommooch ceennitone.

¹⁶ “Tunetaa ittoshi aafo ciinnii bi beetoyich, ittoshi waamoo waayee bi beetoyich, diireeto ittoshine.

¹⁷ Iberoon ittoshich gettoye: Meeti keemechinaꞌonaa cadiqeenaꞌona ittoshi beeggii beeton beegoyich qaatitinaꞌone; tunebaani beegaaneenaꞌone; ittoshi waayee beetonoo waayoyich qaatitinaꞌone; tunebaani waayeyaaneenaꞌone” iye.

Yaree Shookkechochi Shaahiyoon Biichiꞌi Yesuusi Geto

¹⁸ Yesuusi daakkiꞌi ishichiye: “Yaree shookkechochi shaahiyoo amo gaata waayebote.

¹⁹ Yeerichi taatittinee qaaroon waayeꞌi shalligaano bulli toommooch gondoochi nihoo woyemmone; boonoshi mullooch shookketi qaaroon maciree daammemmone; eboshi gommi gashooch holliti yaroomminaꞌone.

²⁰ Wotta maacaa xaqqo beeti showooch holliti yaroon shaahii beetinaꞌo, Yeerichi qaaroon waayeꞌi bekkech emiroona deqqii beetinaꞌone.

²¹ Tunetaa cammon yeshaaneenaꞌo boonoshi tunetoyich yagaachemminaꞌone; Yeerichi qaaree naboona iritoo woyee duꞌo waahooba bekkech giinnii dihechinaꞌone.

²² Ebiyoommon angichi xuppo beeti showooch holliti yaroon shaahii beetinaꞌo, Yeerichi qaaroon boonoshi waayetaa, hini showeexi beemon gaboonaa gijjee shaawona dacheyoona boonoshi mullooch naaxiꞌi boonoshi waayeti qaaroon maa beetone; ebichi naboona aafeyaanoon dobberee echemminaꞌone.

²³ Qeemi showooch holliti yaroon shaahii beetinaꞌo, Yeerichi qaaroon waayeꞌi shalligii beetinaꞌone. Boonoshiyoo aafoon aafemminaꞌone; ikkoo balle aafoon, ikkoo shiche aafoon, ikkoo shaashe aafoon aafemmone” iye.

Dadaddee Shaahiyoo

²⁴ Yesuusi bare shaahiyoon ishichiꞌi boonoshich gettiye: “Shimaajji taatittine ebiyoommine: Ikke uro bi goyooch deꞌe yaroon shookkiye.

²⁵ Tunebaani asho bulli tokketeechaa, uroochi shixecho waaꞌi teepphee daggooch dadaddoon shookkiichii hammiye.

²⁶ Teepphoo collee diccii bi aafehaa, dadaddoo wotta bekkehe.

²⁷ “Goyee doonochi shuunechinaꞌo waaꞌi, ‘Doonocho! Deꞌe yaroon shoohaano neene? Dadaddochi amoochee waahe?’ iꞌi echeheete.

²⁸ “Biyoo wochiꞌi, ‘Shixechone shookkito’ iye. “Bi shuunechinaꞌoo ‘And hamiree waaxi no bayon qaawii beetine?’ iyeete.

²⁹ “Tunetaa teepphee doono wochiꞌi, ‘Dadaddoon waaxi ittoshi beetaa teepphoo tookki waaxemmone; qayote.

³⁰ Dadaddoo teepphoona tookki kashe; qecci goorooba qeccechinaꞌon “Dadaddoon shiichiree macibote; qiriree qaaqqoona michibote; teepphoon wotta ta gotooch gedote” gettemmo taane’ iꞌi gettiye” iye.

Shanaafee Aafee Shaahiyoo

³¹ Wotta Yesuusi bare shaahiyoon boonoshich gettiye: “Shimaajji taatittine ebiyoommine: Asho bi goyooch shanaafee aafeen shookkiye.

³² Hini shanaafee aafe bare maayi yaroo bulliyee giishecheene; tunebaani shookkaꞌa collaa bi diccehooba daaddeexi maayeenaꞌoyee besheene. Shimaajji kafeenaꞌo waaꞌi bi atooch kotoon boonoshi hakkimmi wottoon ooge mixo tunemmine” iye.

Bukee Shittee Shaahiyoo

³³ Yesuusi daakkiꞌi bare shaahiyoon gettiye; ishichiye: “Shimaajji taatittine ikke ure bukoo tiyimmi wottoon daammaa keejje qunnee buddinoona tookkaa xiriqqaꞌa bi kotiiti bukee shittoommine” iye.

³⁴ Yesuusi dofee asheenaꞌoyich ebi bullin shaahiyoona gettiye; mooyon shaahiyaalloon getaanoone.

³⁵ Ebi bi tuneti naboo, “Shaahiyoona gettemmo taane; Yeeri alemoon bi hallitoochee tiijjiꞌi aacheeti mooyon gaxxemmo taane” iꞌi keemecho gettito ceennemmoyichiye.

Dadaddee Shaahiyoon Yesuusi Biichii Geto

³⁶ Arooba Yesuusi asheenaꞌon qajjiꞌi kexooch giyiye. Bi dabbeenaꞌo bi waan giddeꞌi, “Budeexi dadaddee shaahiyoon kaachiree nooch gete” iyeete.

³⁷ Biyoo wochiꞌi ishichiye: “Deꞌe yaroon shookkito Ashi Bushoone;

³⁸ budoo alemoone. Deꞌe yaroo Yeerichi taatittinee bushiisheenaꞌone; dadaddoo gondoochi nihoo bushiisheenaꞌone.

³⁹ Shixecho tuneꞌi dadaddoon shookkito daabiloosine; qeco yemeenee ciiroone; qeccechinaꞌoo Yeerichi maraakeenaꞌone.

⁴⁰ “Illa dadaddo macaa qaaqqoona bi micoommon, yemeenee ciirooba ebiyoommon tunemmone.

⁴¹ Ashi Bushoo bi maraakeenaꞌon deejjemmone; asheenaꞌoyich xugo tunee beetinaꞌonaa hukkoon shuunee beetinaꞌo bullinon bi taatittinee daggoochee macemminaꞌone;

⁴² qaaqqee sheellooch duppemminaꞌone; aroochaa eefonaa gashee qaayona tunemmone.

⁴³ Arooba cadiqeenaꞌo boonoshi Nihoo Yeerichi taatittineechaa aabeechoommon aaxxemminaꞌone. Illa waayeebeeti waajjecho waayebe” iye.

Aaxxe Mooyinaꞌochi Shaahiyoo

⁴⁴ “Wotta shimaajji taatittine ebiyoommine: Ikke uro goyee daggooch aacheeti aaxxe qiicoon danehe. Daneꞌi arooch wochii aachiye. Oogeton emiriibee hammii biich beeto bullin kemmiꞌi are goyoon kemehe.

⁴⁵ “Wotta shimaajji taatittine ebiyoommine: Ikke giixecho macecikkiti inqoon kemeya iꞌi qaawiye.

⁴⁶ Aaxxe gatiyoo kichiibeeti ikke inqoon bi danehooba hammiꞌi biich beeto bullin kemmiꞌi hini are inqoon kemehe” iye.

Haashee Dabbee Shaahiyoo

⁴⁷ “Wotta shimaajji taatittine ebiyoommine: Haashe yesheenaꞌo boonoshi dabboon baharooch dufaa, dabboo haashee yaroo bulliichee yechiye.

⁴⁸ Haashoo dabbooch ceennimmona, boonoshiyoo aacoochee geechii kichiyeete; showooch koteꞌi deꞌi deꞌoon guubooch macii kiciyeete; gondi gondoon kichiꞌi duppiyeete.

⁴⁹ Yemeenee ciirooba ebiyoommon tunemmone; Yeerichi maraakeenaꞌo waaree cadiqeenaꞌo daggoochee gondeenaꞌon qephi kichemminaꞌone;

⁵⁰ qaaqqee sheellooch duppemminaꞌone; aroochaa eefonaa gashee qaayona tunemmone” iye.

Geene Mooyonaa Andire Mooyona

⁵¹ Yesuusi bi dabbeenaꞌon “Ebi bulli ittoshi mullooch giyite?” iꞌi echehe. Boonoshiyoo “Eeha giyitone” iyeete.

⁵² Biyoo “Illa shimaajji taatittineecha ta dabboo tuneti sheeree dojjecho bulli, bi kiciti qiicoochee andire mooyonaa geene mooyonon kichiibeeti doonoommone” iye.

Yesuusin Naazireetechinaꞌo Qayo

⁵³ Yesuusi hini shaahiyeenaꞌon gettii bi ciichitoyee gubb, aroochee tiyiꞌi hammiye.

⁵⁴ Bi dicciti showooch waaꞌi asheenaꞌo worganemmi wottoon Ayihudeenaꞌo kiceebeeti kexoochaa asheenaꞌoyich dojjiye. Boonoshiyoo ishichiyeete: “Hini uro ebi ariyoonaa gaakkechi shuunee shuunoonon amoochee danehe?

⁵⁵ Hini uro anaaxoochi bushoo toone? Bi indee Maariyami tooneene? Bi maneenaꞌo Yaaqobi, Yooseefi, Simooninaa Yihudina tooneenaꞌone?

⁵⁶ Bi maache maneenaꞌo bulli noonna tookkii beetinaꞌo tooneeta? Ishigaata, eboshi bullin amoochee danehe?” iyeete.

⁵⁷ Hini mooyo boonoshich xugo tunehe. Tunebaani Yesuusi “Keemechon bi shiijjee showeexi asheenaꞌonaa bi kechi asheenaꞌonoyee beshetaa bareenaꞌo oogiyaanoon qayaacheete” iye.

⁵⁸ Bi toommooch mulloon tooꞌiyoo boonoshi qajjitoyich, arooch wodde gaakkechi mooyon shuuneyaanoone.