Maatiyoosi 12 - Kafa Linguistics Project

Ayihudeenaꞌochi Shambeteechon Fariseenaꞌo Echo

¹ Ebiyee gubb, Yesuusi shambetee aabooba teepphee goyee daggoona beshehe. Arooba bi dabbeenaꞌo shaaceꞌi teepphee moochoon kuxxii maaheete.

² Kuxxii boonoshi maa beetaa, Fariseenaꞌo beeggiꞌi Yesuusin “Ebiyoche, shambetee aabooba Muusichi Sheeroo bajjiton ne dabbeenaꞌo tunii beetinaꞌone” iyeete.

³ Yesuusi boonoshich ishichiye: “Daawitinaa biinna tookkii beetinaꞌona boonoshi shaacehooba Daawiti tuniiton shemmeyaachote?

⁴ Yeerichi kexooch giyiꞌi qeesheenaꞌoyichalli boonoshich daaggeyaani yaaree koshon biinnaa biinna tookkii beetinaꞌona maatinaꞌone.

⁵ Qeesheenaꞌo yaafee kexooch shambetee aaboon boonoshi quyo qajjitaa, axaaxoo boonoshich tunee qayon Muusichi Sheeroochee shemmeyaachote?

⁶ Tunebaani ittoshich gettoye: Yaafee kexoyee besho hiniich beetone.

⁷ Wotta Yeeri ‘Deejjoyee ariqqoon shunnoye’ bi ito ama geto gaata bi tunoon ittoshi ariito gaata, axaaxoon shuuneyaaneenaꞌo toommooch nallaachesho ittoshine.

⁸ Ashi Bushoo shambetoyich Doonone” iye.

Kishoo Qometi Uroon Yesuusi Wodiyoo

⁹ Yesuusi aroochee besheꞌi Ayihudeenaꞌo kiceebeeti kexooch giyiye.

¹⁰ Aroochoo bi kishoo qometi uro beehe. Arooch beetinaꞌo Yesuusin taggoyich qaawiꞌi, “Shambetooba biiyeton wodiyoon Muusichi Sheeroo daaggite?” iꞌi biin echeheete.

¹¹ Yesuusi wochiꞌi, “Ittoshi daggoochee bagechi asho, are bi bago shambetooba oppooch bi dihigaata, oppoochee geechi kichaachehe?

¹² Asho bagoyee am shaahoon beshoone! Ebich Muusichi Sheeroo shambetooba deꞌe shuunoon daaggiye” iye.

¹³ Ebiyee gubb, Yesuusi kishoo qometi uroon “Ne kishoon yaggibe” iye. Biyoo yaggiye; bekkech are qometi kishoo ohe kishoochoommon shaahiꞌi iiwoo tunehe.

¹⁴ Ebich arooch beeti Fariseenaꞌo kechiꞌi, “Hini Yesuusin aabichiree wuxibona?” iꞌi echeeheete.

Isiyaasichi Keemee Ceeno

¹⁵ Yesuusi boonoshi shalligoon ariiꞌi aroochee bare xaaꞌooch tiyii hammiye. Dofee asheenaꞌo biin dabbiꞌi hammiyeete; biiyechinaꞌo bullinoo wodiihe.

¹⁶ “Bareenaꞌoyich taachon gettaahote” iꞌi boonoshich gettiye.

¹⁷ Arooba Yeerichi keemechi Isiyaasichi noonoona ishichiꞌi bi gettito ceenniye:

¹⁸ “ ‘Ebiyoche, taach bi wocheyemmoyich ta kaacceti ta naayo, ta shunnaabeeto, taanoo emirikkito hinine. Ta Ayaanoon bi toommooch kotiyemmo taane; biyoo dayinnetoon Aageteenaꞌoyich gettemmone.

¹⁹ Gajjiteyaachemmone; woyee cookaachemmone; keejje kaattoochaa bi qaaroon kichi yibbaateyaachemmone;

²⁰ kopheeti shombeqoon tiishaachemmone; taha bedditi ceechoonoo takkaachemmone. Ebin bi tuniyemmo, dayinneto wudoon bi danemmoyich bi tuniimmi wottooniye.

²¹ Aageteenaꞌo biin gibenemminaꞌone’ iꞌi Yeeri gettitone” iye.

Yesuusinaa Beelzebulina

²² Ebiyee gubb, yinno bi toommooch beeti aaf dooge, noona miime uroon Yesuus waan deebiyeete. Yesuusi are uroon wodiihe; uroo ciinonaa yibbaatoonon hakkiye.

²³ Ebich asheenaꞌo bulli worganeꞌi, “Hini uro Daawitichi bushoo tunehe?” iyeete.

²⁴ Tunetaa Fariseenaꞌo ishin waayeꞌi, “Hini yinnee taatoo Beelzebulichi giidoonalli baroona yinnoon ashi toommoochee yoohaache” iyeete.

²⁵ Tunetaa Yesuusi boonoshi gaboon ariiꞌi boonoshich ishichiye: “Ikke taatee showooch beeti asheenaꞌo boonoshinaa boonoshina kaareꞌi shacegaata, are taatittine aallemmine. Wotta ikke katemooch woyee ikke kexooch beeti asheenaꞌo boonoshinaa boonoshina kaareꞌi shacegaata, are katemoo woyee are kexo neexeyaachemmone.

²⁶ Sheexaanoo Sheexaanoon asheenaꞌo toommoochee yookkiibeeto bi tunegaata, biinnaa biinna shacete getone. Illa bi taatittine aabichiree neexehane?

²⁷ Tawoo Beelzebulichi giidoona yinnoon asheenaꞌo toommoochee yookkaabeeto ta tunegaata, ittoshi bushiisheenaꞌo konichi giidoonane boonoshi yookkiibeeto? Ebich ittoshi bushiisheenaꞌo ittoshi toommooch nallemminaꞌone.

²⁸ Tunebaani ta Yeerichi Ayaanee giidoona yinnoon yookkaabeeto ta tunegaata, illa Yeerichi taatittine ittoshi waan shaggetine.

²⁹ “Wotta ikke uro shiichiꞌi giidechi uroon yechii cuyaanoon bi kexooch giyiꞌi bi gijjoon daamon aabichiree hakkehe? Kechi doonon yechii bi cuchitoyee gubb, bi gijjoo bullin daamon hakkemmone.

³⁰ “Taanna tookkii neexeyaano taan shixxii beetone; taanna tookkiinoo kicaano shaccii beetone.

³¹ Ebich ittoshich gettoye: Asheenaꞌo shuuneebeeti axaaxoonaa boonoshi naageebeeti naago bullina maareyemmone; tunebaani Yaafe Ayaanoon naaggii beeti asho maaroon daneyaachemmone.

³² Ashi Bushoo toommooch gondoon yibbaatee beeto bulli maareyemmone; tunebaani Yaafe Ayaano toommooch gondoon yibbaateebeeto bulli hini yemeenooch tunetaa woyemmi yemeenooch maaroon daneyaachemmone” iye.

Deꞌe Yibbaateechonaa Gonde Yibbaateechonon Yesuusi Dojjoo

³³ Daakkiꞌi Yesuusi ishichiye: “Mixo bulli bi aafoona bi arichee beetoyich, deꞌe aafoon danoyich, deꞌe mixo ittoshich beemo qaawiihe; tunebaani gonde mixo ittoshich bi beegaata, gonde aafoon danemmo ittoshine.

³⁴ Hini xekeree bushiisheenaꞌote, ittoshi gondo tuneechi tiyi aabichiree deꞌe yibbaatoon yibbaato hakkehote? Asho bi gettiibeeto bi mullooch ceenniti mooyoocheeniye.

³⁵ Deꞌe asho bi mullooch bi kotiiti deꞌe mooyoochee deꞌoon kichiye. Gonde asho bi mullooch bi kotiiti gonde mooyoochee gondoon kichiye.

³⁶ Ta ittoshich gettoye: Asheenaꞌo yibbaateebeeti duube mooyo bullich nallaa gallooba Yeerich wochemminaꞌone.

³⁷ Ne noonoochee kechiti deꞌe mooyona Yeeri neech deꞌoon nallemmone; woyee ne noonoochee kechiti gonde mooyona Yeeri neech gondoon nallemmone” iye.

Malletee Bekkiyoon Yesuusi Qayo

³⁸ Arooba Muusichi Sheeree dojjechinaꞌonaa Fariseenaꞌonochi daggoochee ikkikkeenaꞌo tiyiꞌi Yesuusin “Dojjechocho, malletoon ne waanee beegga qaawiibeeto noone” iyeete.

³⁹ Tunetaa bi wochiꞌi ishichiye: “Hini gondoonaa yahechona tuneti shiijjeroo malletoon beegoyich qaawii beetone; tunetaa keemechi Yoonaasichi malletoyee besh bare malletoo biich icheyaachemmone.

⁴⁰ Yoonaasi ooge haashee maacooch keejje areddoonaa keejje xumoonon bi kotetoommon, ebiyoommon Ashi Bushoo showee maacooch keejje areddoonaa keejje xumoonon kotemmone.

⁴¹ Nallaa gallooba Nanawi katemeexi asheenaꞌo neexeree hini yemeeneexi asheenaꞌon taggemminaꞌone; ebiyoo Yoonaasi Yeerichi wochoon bi getaa waayeꞌi axaaxee gommoochee Yeer waan boonoshi wottetoyichiye. Andoo Yoonaasiyee besho hiniich beetone.

⁴² Deshi-waanee waati taatee nallaa gallooba neexeree hini yemeeneexi asheenaꞌon taggemmine; ebiyoo Solomooni gettiibeeti shalligoon waayoyich showee tuggoochee bi waatoyichiye. Ebiyoche, Solomooniyee besho hiniich beetone” iye.

Yinno Wotteꞌi Womo

⁴³ Yesuusi aroochee daakkiꞌi ishichiye: “Yinno ashi toommoochee bi tiyitoyee gubb, bi kashemmi xaaꞌoon qaawiibee aachaalli showoona guuddiye; tunebaani daneyaanoon muccehe.

⁴⁴ Ebich ‘Ta kecheti kexooch wotteree hami gibona’ iꞌi wottee bi waahaa, are bi kechiti kexo qechoo tunee hidaa qanniꞌi beeton danehe.

⁴⁵ Aroyee gubb, hammiꞌi biyee gonde shabaatte bare yinneenaꞌon kicii dabbii deebiye; boonoshiyoo biinna tookkii arooch giyiꞌi koteheete; are uroyich aafichoyee andi beemo beshoon gondehe. Hini yemeenee gonde shiijjeroyich wotta ebiyoommon tunemmone” iye.

Yesuusichi Indeenaa Bi Maneenaꞌona

⁴⁶ Ebiyee gubb, Yesuusi dofee asheenaꞌoyich getooch bi beetaa, bi indeenaa bi maneenaꞌona biinna daneya qaawiꞌi maaxooch neexeheete.

⁴⁷ [Asheenaꞌo daggoochee ikkoo tiyiꞌi, “Ne indeenaa ne maneenaꞌona neenna daneya qaawiꞌi maaxooch neexee beeteete” iye.]

⁴⁸ Tunetaa Yesuusi biich gettiti uroyich wochiꞌi ishichiye: “Ta indee aabine? Ta maneenaꞌochi wotta aaboshine?” iye.

⁴⁹ Bi kishoona bi dabbeenaꞌon kochii bekkiibee, “Ta indeenaa ta maneenaꞌona eboshine.

⁵⁰ Shimaayooch beeti ta Nihoochi daaggoon ceechii beetinaꞌo bulli taach manoo, maneenaa indeenane” iye.