Maatiyoosi 11 - Kafa Linguistics Project

Aacona Afaallechi Yowannisi Wocheyechinaꞌon Daachiyoo

¹ Yesuusi ebin aaraa gutte bi dabbeenaꞌoyich gettiꞌi bi ciichitoyee gubb, dojjoonaa Yeerichi qaaroon getonoyich aree guudoona beeti katemeenaꞌooch hammiye.

² Yowannisi cuyee kexooch beebee Kiristoosichi shuunoon waayehe; ebich bi dabbeenaꞌon Yesuus waan wochee daachiihe.

³ Wocheetinaꞌoo bi waan hammiꞌi, “ ‘Woyemmone’ getteeti Kiristoosi neenee, baroon quyebona?” iꞌi echeheete.

⁴ Yesuusi wochiꞌi ishichiye: “Hamiree ittoshi waayeton, ittoshi beeggitonoo Yowannisich getote.

⁵ Aaf doogeenaꞌo ciinnii beetinaꞌone; baata yesheenaꞌo shaꞌee beetinaꞌone; qeddee shaddee biiyoona biiyetinaꞌo wodii beetinaꞌone; ulleenaꞌo waayee beetinaꞌone; qititinaꞌo tiyii beetinaꞌone; girechinaꞌoyichoo Yeerichi mishiraachee qaaro gettee beetone.

⁶ Ta mooyona axiraacheyaano bulli diireetone” iye.

⁷ Yowannis waanee wocheetinaꞌo wotteꞌi boonoshi hammii beetaa, Yesuusi Yowannisi mooyon dofee asheenaꞌoyich getooch giyiye; boonoshichoo ishichiye: “Amoon beegga barahooch hammiyote? Yongoona koho shuuroommon shuuriibeeti ashoon beegga hammiyotee,

⁸ woyee amoon beegga hammiyote? Deꞌe tahoon taheti uroon beegga hammiyote? Deꞌe tahoon taheti asho taateenaꞌo kexoochiye bi beeto.

⁹ Woyee amoon beegga hammiyote? Keemechoniye? Eeha, ittoshich gettoye, keemechoyee beshooniye.

¹⁰ ‘Yeeriyoo, “Ne gommon qaxxemmi ta wocheyechon neyee shiichiree daachiyemmo taane” itone’ getaa kooreeto ebine.

¹¹ Iberoon ittoshich gettoye: Showee toommooch shiijjetinaꞌo daggoochee Aacona Afaallechi Yowannisiyee beshe asho daneyaanoone; tunebaani shimaajji taatittineechaa bulliyee desho tuneto biyee beshemmone.

¹² Aacona Afaallechi Yowannisi yemeenoochee tiijjiꞌi hanaach beddaahaa boggechinaꞌo giidechi koyoona shimaajji taatittineen kochitinaꞌone; biin bogga tiyitinaꞌone.

¹³ Keemechinaꞌonaa Muusichi Sheeroona Yowannisi yemeenooch beddaahaa keemoon keemmii beeheete.

¹⁴ Illa boonoshi gettiton deꞌoyich ittoshi shunigaata, are ‘Woyemmone’ getteeti Eliyaasi, ebiyoche, Yowannisine.

¹⁵ Illa waayeebeeti waajjecho waayebe.

¹⁶ “Tunebaani hini yemeenooch beeti asheenaꞌon amoona shaahiyehote? Gabiyee godooch koteebeeti bushiisheenaꞌoniye boonoshi shaahiibeeto; boonoshinaa boonoshina ceegeebee,

¹⁷ ‘Emiree shumburoon ittoshich huggehone; tunetaa ittoshi duubaachote; muushenee shooshoon shooshehone; tunetaa ittoshi eefeyaachote’ ii beeti bushiishoomminaꞌone.

¹⁸ Yowannisi maataanoon, uyaanoon bi waataa, boonoshi ‘Hini yinnechone’ iyeete.

¹⁹ Ashi Bushoo maabee, uchiibee bi waataa, boonoshi ‘Hini maayoonaa uyoonochi buujjoone; wotta gabiyee guudeenaꞌonaa axaaxechinaꞌonochi shunechone’ iyeete. Tunetaa shalligoo tate bi shuunoona arichehe” iye.

Keejje Katemeenaꞌo Ittibateyoo

²⁰ Arooba Yesuusi meeti gaakkechi shuunoon bi bekkiiti katemeenaꞌo axaaxee gommoochee Yeer waan wottoon boonoshi qajjitoyich, oogichii boonoshin ittibatehe; boonoshichoo ishichiye:

²¹ “Koraziine, neech woowo! Beetisayide, neech woowo! Ittoshich bekketi gaakkechi shuunoo Xiroosinaa Sidooninoyich bi bekketo gaata, wonna dookoon tahe tulloon boonoshi toommooch shahiree, axaaxee gommoochee Yeer waan wotteshinaꞌone.

²² Tunebaani ittoshich gettoye: Nallaa gallooba ittoshiyee Xiroosinaa Sidooninoyich naxo kettemmone.

²³ Hini Qifirinaahe! Shimaayooch beddaahaa ciixenne? Tunebaani kindiiree Siꞌoolooch duppeyemmi neene. Ne daggooch bekketi gaakkechi shuunoo Sodoomi daggooch bi bekketo gaata, hanaach beddaahaa are katemee beeyeshine.

²⁴ Tunebaani neech gettoye: Nallaa gallooba neyee Sodoomich naxo kettemmone” iye.

Maraatetinaꞌon Yesuusi Kashiyoo

²⁵ Arooba Yesuusi ishichiye: “Showoonaa shimaayoonochi Doono tuneti ta Nihoocho, ebin ariyechinaꞌonaa shalligechinaꞌona ariyaachemmoyich ne aachitoyich, gaggereenaꞌoomminaꞌoyichoo ne bekkiitoyich neen galletehoye.

²⁶ Iberoone, ta Nihoocho; ebin tuniyoyich gaaweti ne daaggoo tunetone” iye.

²⁷ Wotta Yesuusi asheenaꞌoyich, “Ta Nihoo bulli mooyon taach immitone. Nihoo Yeeriyee damba Yeerichi Bushoo taan ariibeeto aalloone; Yeerichi Bushoo tayee besh, wotta Yeerichi Bushoo ta biich bekkiiya ta daaggiti ashoyee beshetaa, Nihoo Yeerin ariibeeto aalloone.

²⁸ “Hini maraatetinaꞌonaa shaago maggetinaꞌonote, ta waan wobote; tawoo ittoshin kashiyemmo taane.

²⁹ Tawoo gaꞌi deꞌoonaa ta qelloon giishii beetona ta tunetoyich, ta waanjeen shaagote; ta waaneenoo doyibote. Arooba ittoshi kashe kashemmine.

³⁰ Ittoshi toommooch ta haxxemmi waanjee gaꞌi deꞌeene; ittoshich ta shaakkiyemmi shaageyoo ketteene” iye.