Maatiyoosi 10 - Kafa Linguistics Project

Bi Wochemmi Mishiraachechinaꞌon Yesuusi Kaaco

¹ Yesuusi aaraa gutte bi dabbeenaꞌon bi waan ceeggiꞌi, yinneenaꞌon asheenaꞌo toommoochee boonoshi yookkemmoyich, biiyetinaꞌo bullinoo boonoshi wodiyemmoyich ukkirittinoon boonoshich immiye.

² Hini are aaraa gutte mishiraachechinaꞌochi shigo, batti batt Pheexiroosi getteebeeti Simooni, bi manoo Indiriyaasi, Zebidiyoosi bushiisheenaꞌo Yaaqobinaa Yowannisina,

³ Filipphoosi, Baritelemoosi, Toomaasi, gabiyee guudo Maatiyoosi, Ilfiyoosichi bushoo Yaaqobi, Taadiyoosi,

⁴ bi aagetoyich qanaateebeeti Simooni, Yesuusin beshiiꞌi immiti Asqorootechi Yihudi, eboshine.

Aaraa Gutte Mishiraachechinaꞌon Yesuusi Wocho

⁵ Arooba Yesuusi hini are aaraa gutteenaꞌon wochehe; ishichiinoo boonoshich gettiye: “Aageteenaꞌo showee gommona hammaahote; Shamaari katemoochoo giyaahote.

⁶ Tunebaani bago aalloommon aalleti Israꞌeeleenaꞌo waan hambote.

⁷ Hamibee, ‘Shimaajji taatittine ittoshi kellooch shaggetine’ getote.

⁸ Biiyetinaꞌon wodiibote; qititinaꞌon tiijjibote; qeddee shaddee biiyechinaꞌon wodiibote; yinnoon asheenaꞌo toommoochee yoohote. Gatiyaalloon Yeer waanee deqqito ittoshine; ebich ittoshiyoo gatiyaalloon asheenaꞌoyich imbote.

⁹ Ittoshi burooch aachoon, birewoon woyee gooshoon yechaahote.

¹⁰ Gommoyich shohee kojjoon woyee ittoshi tahetoyee bare tahoon woyee caammoon woyee gumboon yechaahote. Ebiyoo shuunecho biin shuuniito waanee shohoon maamo qaawiibeeto bi tunetoyichiye.

¹¹ “Ittoshi giyimmi katemooch tuneba gafooch arooch beeti asheenaꞌon ‘Noon iibbiyemmi gaawe asho aabine?’ getiree echebote. Aroochee ittoshi kechimmi wottoon are kexooch kotebote.

¹² Are kexooch ittoshi giyigaata, diggoo getote.

¹³ Kechi doono ittoshin bi iibbiigaata, ittoshi diggiyoo biich shage; iibbiyoo bi qayigaata, ittoshi diggiyoo biich shaggaaye.

¹⁴ Ittoshin iibbiyaano woyee ittoshi qaaroon waayeyaano koniyoona bi beegaata, are kexon woyee are katemoon gawukkiree keyibee ittoshi baateexi quttoon tebbebote.

¹⁵ Iberoon ittoshich gettoye: Nallaa gallooba are katemeexi asheenaꞌoyee Sodoomi katemeexi asheenaꞌonaa Gomoori katemeexi asheenaꞌonoyich gaawiye” iye.

Mishiraachechinaꞌo Duꞌeechon Yesuusi Geto

¹⁶ Daakkiꞌi Yesuusi ishichiye: “Ellebote, bagoochoommon okereenaꞌo daggooch ittoshin wochemmo taane. Ebich dingeroochoommon accecho, uggechoommon duuroo tunebote.

¹⁷ Tunebaani nallechinaꞌoyich ittoshin beshiiree immemminaꞌone; Ayihudeenaꞌo kiceebeeti kexoochaa arengoona xooppemmo ittoshine; ebich ashi waanee ittoshi qelloon quyebote!

¹⁸ Ta naboyich iraasheenaꞌonaa taateenaꞌonochi aafooch ittoshin neechemminaꞌone; ebi bi tunemmo boonoshinaa Aageteenaꞌonoyich miixoo ittoshi tunemmoyichiye.

¹⁹ Asheenaꞌo ittoshin beshii imiyooba ‘Aabichiree gettehone?’ woyee ‘Ama gettehone?’ getiree xuuxeyaahote; areegaata ittoshi gettemmon Yeeri ittoshich immemmone.

²⁰ Ittoshina tuneree gettemmo ittoshi Nihoo Yeerichi Ayaanoani ittoshi toonoone.

²¹ “Arooba manoo bi manoon, nihoo bi bushoon wuxemmoyich beshiiree immemmone; wotta bushiisheenaꞌo boonoshi niheenaꞌonaa indeenaꞌonochi toommooch tiyiree wuxiyemminaꞌone.

²² Asheenaꞌo bulli ta naboyich ittoshin shixxemminaꞌone; tunetaa ciirooch beddaahaa manjiꞌi kupphemmo wodemmone.

²³ Arooba ikke katemoochaa ittoshin boonoshi duꞌiigaata, bare katemooch maxxebote. Iberoon ittoshich gettoye: Ashi Bushoo waammi wottoon Israꞌeelee showeexi katemoo bulliich bedaachemmo ittoshine.

²⁴ “Dabbito biin dabbiitoyee, guuno bi doonoyee beshaanoone.

²⁵ Dabbito biin dabbiitochoommon, guuno bi doonochoommon tuno biich beddiye. Kechi doonon ‘Beelzebuli’ boonoshi itoyee, bi kechi ashoon am shaahoon beshiiree getteeheete” iye.

Yeerin Shato

²⁶ “Illa asheenaꞌon shattaahote; qereeto bulli gaxxeyoo, aacheeto bulliyoo aricho echeyaani mooyone.

²⁷ Qeroochaa ta gettaa beeton bullich xalla kichiree getote; shaashikkoona ittoshi waayeton asheenaꞌo bullich cookiree getote.

²⁸ Meenon wuxoyee damba kashoon wuxoo hakkaaneenaꞌon shattaahote. Tunetaa meenonaa kashoonon shiweree qaaqqoona aalliyoon hakkii beeton shatote.

²⁹ Gutte gaashikafeenaꞌo ikke duudena kechee beetaacheete? Tunebaani ittoshi Nihoo daaggaanoon boonoshi daggoochee ikkeyona qitaachemmine.

³⁰ Ittoshi qelli eexo bulliyona haddeetone.

³¹ Illa shattaahote! Meeti gaashikafeenaꞌoyee beshoo ittoshine” iye.

Yesuusichon Ashi Aafoochaa Miixo

³² “Ashi aafoochaa taacho bi tunoon miixeebeeto bullich ta wotta shimaayooch beeti ta Nihoo aafoochaa taachone getiree miixemmo taane.

³³ Ashi aafoochaa taacho bi tunoon nookkemmo bullin ta wotta shimaayooch beeti ta Nihoo aafoochaa ‘Taacho toonoone’ getiree nookkemmo taane” iye.

Yesuusichi Naboona Asheenaꞌo Shaco

³⁴ “Ta waato, showee toommooch diggoon deeboyich ittoshich shaahaaye; ta waato ginoonalli diggoon deeboyich toonoone.

³⁵ Bushoon nihoona, busheen indeena, amaateen naamecheena tookki kaariyoyich waato taane.

³⁶ Ashich bi hajjee kechi asheenaꞌo etto tunemminaꞌone.

³⁷ “Tayee beshiiꞌi bi nihoon woyee bi indeen shunniibeeto taacho tunoon hakkaache; ebiyoommon tayee beshiiꞌi bi bushoon woyee bi busheen shunniibeeto taacho tunoon hakkaache.

³⁸ Bi masqaloon shaaggiꞌi taan dabbaani asho koniyoona taacho tunoon hakkaache.

³⁹ Bi kasheen wodiyoyich qaawiibeeto muccemmone; tunebaani bi kasheen taacha iꞌi mucceebeeto, danemmone” iye.

Yesuusichi Asheenaꞌon Shunnii Beetinaꞌoyich Yeeri Wojjoo

⁴⁰ “Ittoshin shunniibeeto taan shunnii beetone; taanoo shunniibeeto taan deejjiti Yeerin shunnii beetone.

⁴¹ Keemechon, keemecho bi tunetoyich shunniibeeto, keemechona tookki tate wojjoon danemmone; cadiqoon, cadiqo bi tunetoyich shunniibeeto, cadiqoona tookki tate wojjoon danemmone.

⁴² Koniyoona hini gishiisheenaꞌoochee ikkoo ta dabboo bi tunetoyich gare aaconona immiibeeto, iberoon ittoshich gettoye, wojjoon mucceyaachemmone” iye.