Maatiyoosi 1 - Kafa Linguistics Project

Yesuusichi Shiijjee Yoodo

¹ Abrahamichi bushoonaa Daawitichi bushoona tuneti Yesuus Kiristoosichi shiijjee yoodo ebine:

² Abrahami Yisaaqin shiyihe; Yisaaqi Yaaqobin shiyihe; Yaaqobi Yihudinaa bi maneenaꞌonon shiyihe;

³ Yihudi Tamaar waanee Feretsinaa Zaarinon shiyihe; Feretsi Hetsiroonin shiyihe; Hetsirooni Araamin shiyihe;

⁴ Araami Aminadaabin shiyihe; Aminadaabi Nahishoonin shiyihe; Nahishooni Salimoonin shiyihe;

⁵ Salimooni Rahaab waanee Boꞌaazin shiyihe; Boꞌaazi Ruut waanee Obeedin shiyihe; Obeedi Iseyin shiyihe;

⁶ Iseyi taatoo Daawitin shiyihe. Taatoo Daawiti shiichiꞌi Uuriyi mechee tuneti waanee Solomoonin shiyihe;

⁷ Solomooni Roboꞌamin shiyihe; Roboꞌami Abiyin shiyihe; Abiyi Asaafin shiyihe;

⁸ Asaafi Yoshafaaxin shiyihe; Yoshafaaxi Yehoraamin shiyihe; Yehoraami Uziyaahin shiyihe;

⁹ Uziyaahi Yotaamin shiyihe; Yotaami Akaazin shiyihe; Akaazi Hiziqiyaasin shiyihe;

¹⁰ Hiziqiyaasi Minaasin shiyihe; Minaasi Amootsin shiyihe; Amootsi Yosiyaasin shiyihe.

¹¹ Yihudee macceenaꞌo Baabloonee showooch boonoshi kecaa hamiyooba, Yosiyaasi Yekoniyaasinaa bi maneenaꞌonon shiyihe.

¹² Yihudee macceenaꞌo Baabloonee showooch boonoshi keccetoyee gubb, Yekoniyaasi Shelateelin shiyihe; Shelateeli Zerubabeelin shiyihe;

¹³ Zerubabeeli Abiyoodin shiyihe; Abiyoodi Eliyaqimin shiyihe; Eliyaqimi Azoorin shiyihe;

¹⁴ Azoori Sadooqin shiyihe; Sadooqi Akiimin shiyihe; Akiimi Eliyaadin shiyihe;

¹⁵ Eliyaadi Elaazaarin shiyihe; Elazaari Mataanin shiyihe; Mataani Yaaqobin shiyihe;

¹⁶ Yaaqobi Yooseefin shiyihe; Yooseefi Kiristoosi getteebeeti Yesuusin shiyeti Maariyamin shaagga maakkiiti uroone.

¹⁷ Illa hini shiijjeroo bulli, Abrahamiichee Daawitiich beddaahaa, aaraa awudde shiijjeroone; Daawitiichee Yihudee macceenaꞌo Baabloonee showooch boonoshi kecceemmi wottoon, aaraa awudde shiijjeroone; Yihudee macceenaꞌo Baabloonee showooch kecetoochee Kiristoosichi shiijjooch beddaahaa, aaraa awudde shiijjeroone.

Yesuus Kiristoosi Shiijjo

¹⁸ Yesuus Kiristoosi shiijjo ebine: Bi indee Maariyami Yooseefich maakkeechaa shaakkeyaan beebee, Yaafe Ayaanoona yeqqefehan; bi yeqqefoo arichehe.

¹⁹ Biin maakkiiti Yooseefi cadiqe uro bi tunetoyich, Maariyaminoo ashi aafooch yeelliyoon qaawoo bi qajjitoyich, aashoona shaagoon echiiya gabiye.

²⁰ Yooseefi ebin gabii bi beetaa, Doonochi maraakoo gumona daneꞌi biich ishichiye: “Daawitichi bushoo Yooseefo, shaagga ne maakkiiti Maariyami yeqqefeto, Yaafe Ayaanoonane. Ebich shattaahine, shaage.

²¹ Anaami bushoon shiyemmine; aroo bi asheenaꞌon boonoshi axaaxoochee wodiyemmo bi tunetoyich, bi shigoon Yesuusi getiree shigiyemmo neene” iye.

^22-23 Ebi bulli tuneto, Doono keemechochi noonoona, “Ebiyoche, gidiidee yeqqefemmine; anaami bushoonoo shiyemmine; bi shigoo Amanuꞌeeli getaa ceekkemmone” bi ito ceennemmoyichiye. Amanuꞌeeli geto, “Yeeri noonna tookkiiniye” getone.

²⁴ Ebiyee gubb, Yooseefi tokketoochee tiyiꞌi, Doonochi maraakoo gettitoommon tuniihe; shaagga bi maakkiiti Maariyamin daammiye.

²⁵ Bi qaabbe bushoon bi shiyemmi wottoon, bi achooch shagaanoone. Yooseefiyoo shiijjeti bushoon Yesuusi iꞌi shigiihe.