Maariqoosi 8 - Kafa Linguistics Project

Awudde Humeenaꞌoyich Yesuusi Maanjoo

¹ Arooba wochinnoon dofee asheenaꞌo kiceeheete. Boonoshi maayemmo aalletoyich Yesuusi bi dabbeenaꞌon ceeggiꞌi,

² “Hini asheenaꞌo taanna tookkii boonoshi koteto hanaach keejje qemone. Boonoshi maayemmo aalletoyich taan oogichii ayinikkitone.

³ Ebiyee wotta boonoshi daggoochee ikkikkeenaꞌo wohoocheeniye boonoshi waato. And abete kashoona boonoshin kexooch ta daachiigaata, gommoochaa maraate dihemminaꞌone” iye.

⁴ Bi dabbeenaꞌo tiyiꞌi, “ No beeti showoo gafoo aalli barahoone; ishigaata, hini asheenaꞌoyich beddemmi maayoon amoochee deebiree maanjoon hakkehone?” iyeete.

⁵ Yesuusi “Ambiche kosho ittoshich beete?” iꞌi echehe. Boonoshi wochiꞌi, “Shabaatte xekee kosho beete” iyeete.

⁶ Aree hillooch Yesuusi asheenaꞌon “Showooch kotebote” iꞌi gettiye. Shabaatte xekee koshon tiijjiꞌi Yeerin galletehe. Tiichiꞌi, “Asheenaꞌoyich qoomebote” iꞌi bi dabbeenaꞌoyich immiye. Bi dabbeenaꞌo asheenaꞌoyich giddii qoomeheete.

⁷ Wotta giisheche gishiishi haashoo boonoshich beehe; Yesuusi are haashoon tiijjiꞌi Yeerin galletehe. Bi dabbeenaꞌonoo “Hini haashoon wotta asheenaꞌoyich qoomebote” iꞌi gettiye.

⁸ Asheenaꞌoo maaꞌi michiyeete. Aroyee gubb bi dabbeenaꞌo shabaatte mokkee ceeni echeti ooyoon tiijjiyeete.

⁹ Arooba maati asheenaꞌo awudde hum bedeenaꞌone. Yesuusi asheenaꞌon diggiiꞌi bi deennitoyee gubb,

¹⁰ bekkech bi dabbeenaꞌona tookkii giishi markabeech kechii koteꞌi Dalmanutee showooch hammiye.

¹¹ Aroochee Fariseenaꞌo Yesuus waan waaꞌi biinna tookkii taggooch giyiyeete. Biin muriciiya iꞌi, “Shimaayoochee malletoon nooch bekkiibe” iyeete.

¹² Ebich Yesuusi bi maacoona ayiniꞌi tiyii, “Hini shiijjeroo malletoon beegoyich bi qaawiibeeto amoyichiye? Iberoon ittoshich gettoye: Hini shiijjeroyich amee malletolla icheyaachemmone” iye.

¹³ Ebiyee gubb, boonoshi waanee qajjii wotteꞌi giishi markabeena baharoyee beqach kimmiye.

Fariseenaꞌonaa Heroodisinochi Bukee Shittoo

¹⁴ Arooba Yesuusichi dabbeenaꞌo bedditi shohoon yeshaanoon batteheete. Markabee daggooch ikke xekee koshoyee damba baroo amolla aalloone.

¹⁵ Yesuusi boonoshin, “Fariseenaꞌonaa Heroodisinochi bukee shittoochee ittoshi qelloon quyebote” iye.

¹⁶ Bi dabbeenaꞌo ishin waayeꞌi boonoshinaa boonoshina “Kosho nooch aalletoyich shaahiye, bi gettiibeeto” ii yibbaateheete.

¹⁷ Ebich Yesuusi boonoshi gaboon ariiꞌi ishichiye: “Ittoshi ‘Kosho nooch aalletoyichiye’ iꞌi amoyichiye ittoshi yibbaateebeeto? And beddaahaa shalligaachote? Ittoshi mullooch giyaache? Ittoshi mullo xaqqoone?

¹⁸ Aafecho ittoshi toone? Ciinaachote? Waajjecho ittoshi toone? Waayeyaachote? Ittoshi mullooch tipphimaache?

¹⁹ Uuche xekee koshon uuche hume ashich tiichaa ta qoodiyooba, echeti ooyoon ambiche mokkee ceenoniye ittoshi tiijjito?” iye. Boonoshiyoo wochiꞌi, “Aaraa gutte mokkee ceenoniye no tiijjito” iyeete.

²⁰ “Wotta shabaatte xekee koshon awudde humeenaꞌoyich tiichaa ta qoodiyooba echeti ooyoon ambiche mokkee ceenoniye ittoshi tiijjito?” iye. Boonoshiyoo “Shabaatte mokkee ceenoniye no tiijjito” iyeete.

²¹ Arooba Yesuusi “Ishigaata, batt ittoshi mullooch giyaache?” iye.

Aaf Dooge Uroon Yesuusi Wodiyoo

²² Ebiyee gubb, Yesuusinaa bi dabbeenaꞌona Beetisayida shaggiyeete; asheenaꞌoo aaf doogoon bi waan deebiꞌi, “Ne kishoon hini aaf doogoo toommooch kotiibe” iꞌi qolleheete.

²³ Ebich Yesuusi aaf doogoo kishoon yechiꞌi yaabiibee gafoyee maach kichiye. Cudon kushitee (kuujjii) uroo toommooch bi kishoon kotiichii, “Neech bekkeebeeti mooyo beete?” iꞌi echehe.

²⁴ Aaf doogo kaameꞌi, “Asheenaꞌochi shaꞌo taach bekkee beetone; tunetaa mixoniye taach boonoshi shaahiibeeto” iye.

²⁵ Ebiyee gubb, Yesuusi guttinnoon wotta uroo aafooch bi kishoon kotiihe. Bekkech aaf doogo manjiiꞌi ciinniye. Wodiꞌinoo bulli mooyon xalliiꞌi ciinniye.

²⁶ Arooba Yesuusi uroon “Ne kexooch hamballi, gafooch giyaahine” iye.

Yesuusichon Pheexiroosi Gettiti Mooyo

²⁷ Wotta Yesuusinaa bi dabbeenaꞌona Filipphoosi Qesaariyi gaꞌooch beeti gafeenaꞌooch hamma tiyiyeete. Hammiibee gommoochaa bi dabbeenaꞌon “Asheenaꞌo taan konine ii beeteete?” iꞌi echehe.

²⁸ Bi dabbeenaꞌo wochiꞌi, “ikkikkeenaꞌo ‘Hini Aacona Afaallechi Yowannisine’, echeenaꞌo ‘Eliyaasine’, echeenaꞌoo wotta ‘Wonna Yeerichi qaaroon keemmii beetinaꞌo daggoochee ikkoone’ ii beetinaꞌone” iyeete.

²⁹ Wotta Yesuusi “Ittoshiyochi, taan konine ii beetote?” iꞌi echehe. Pheexiroosi tiyiꞌi, “Ne Kiristoosi neene” iꞌi wochiye.

³⁰ Yesuusiyoo bi dabbeenaꞌoyich “Ta koni ta gaata konichona gettaahote” iye.

Bi Qitemmon Shiichii Yesuusi Geto

³¹ Ebiyee gubb, Yesuusi bi dabbeenaꞌoyich ishichiꞌi dojjooch giyiye: “Ashi Bushoo wodde xuuxoon beego biich echeyaani mooyone. Geeneenaꞌonaa qeeshee ukkireenaꞌona, Muusichi Sheeree dojjechinaꞌoo biin shixxemminaꞌone; wuxiishoo gettemminaꞌone. Keejje qemooba qitoochee tiyemmone” iye.

³² Ishin xalla kichii boonoshich gettiye. Pheexiroosi Yesuusin ikke badd wochiꞌi, noggee kaarehe.

³³ Tunebaani Yesuusi eche bi dabbeenaꞌo waan guuddii ciinniibee, Pheexiroosin, “Hini Sheexaanoocho, ta waanee wohe! Ashichonalli Yeerichon gabaachine” iꞌi noggehe.

^34-35 Ebiyee gubb, Yesuusi dofee asheenaꞌon bi dabbeenaꞌona tookkii ceeggiꞌi ishichiye: “Bi kasheen wodiyoyich qaawiibeeto bulli muccemmone; tunebaani taannaa ta mishiraachee qaaroonoyicha iꞌi bi kasheen mucceebeeto bulli danemmone. Taan dabboon shunniibeeto koniyoona bi tunegaata, bi qelloon nookkebe; bi masqaloon shaagiree taan dabbibe.

³⁶ Wotta asho showee toommooch beeto bullin biicho tuniichii bi kasheen bi muccegaata, amoon biich hallehe?

³⁷ Asho bi kasheen wochiꞌi danoyich amoon qoco hakkehe?

³⁸ Illa Ashi Bushoo ta wotta ta Nihoochi oogee yiiroona yaafe maraakeenaꞌona tookkaa ta waahooba, hini yahechonaa axaaxoona tuneti shiijjeroo daggooch taannaa ta qaaroonoyich yeellemmo bullina yeellemmo taane” iye.