Maariqoosi 7 - Kafa Linguistics Project

Ashi Doyoona Yeerichi Qaaroon Hoxeeto Tuniyoo

¹ Ikkikke Fariseenaꞌonaa Yerusaalemee waati Muusichi Sheeree dojjechinaꞌona Yesuus waan giddee kiceeꞌi boonoshi beetaa,

² Yesuusichi dabbeenaꞌo daggoochee ikkikkeenaꞌo eeꞌe kishoona, ebi geto aacona afaalleyaani kishoona maayoon boonoshi maa beetaa beeggiyeete.

³ Fariseenaꞌonaa bare Ayihudeenaꞌo bullina qaabbechinaꞌochi doyoon quyoyich eeꞌoochee xalloyich boonoshi kishoon aacona macheyaanoon maataacheete.

⁴ Gabiyoochee wotteꞌi Ayihudeenaꞌochi doyoochoommon macheyaanoon maataacheete. Wotta xoofoon, baaretoon, gafetoon, [qeenon] mayonaa eboshiyoommi meeti doyeenaꞌonon ceechii beetinaꞌone.

⁵ Ebich Fariseenaꞌonaa Muusichi Sheeree dojjechinaꞌona Yesuusin “Ne dabbeenaꞌo eeꞌe kishoona maayoon maabee, no qaabbechinaꞌochi doyoon boonoshi shaaddeebeeto amoyichiye?” iꞌi echeheete.

^6-7 Biyoo wochiꞌi ishichiye: “Isiyaasi hini maacoon xalloo shaahiibeeti ittoshichon, ‘Hini asheenaꞌo boonoshi noonoona taan oogii beetinaꞌone; tunetaa boonoshi mullo ta waanee oogeton wohone. Ashi doyoon Yeerichi qaaro tuniiꞌi dojjiibee, duuboon taach goyinneheete’ iꞌi bi kooritoommon bi keemmito iberooniye.

⁸ Ittoshi Yeerichi sheeroon qajjiichii ashi doyoon ceechii beetote” iye.

⁹ Daakkiꞌi ishichiye: “Ittoshi doyoon ceechoyich Yeerichi sheeroon qeexxee kiin bechaachote.

¹⁰ Muusi ‘Ne indeenaa ne nihoonon oogiibe’ wotta ‘Bi indeen woyee bi nihoon naaggimmoo qitibe’ itone.

¹¹ Tunetaa ittoshi ishichiyote: ‘Ikke uro bi nihoon woyee bi indeen “Ittoshich ta immemmon Yeerich kichito taane; Yeerich yaafeetone” bi getigaata,

¹² hini uro bi nihoonaa bi indeenon dego qaawiyaache’ ii beeto ittoshine.

¹³ Ebichi gommona ittoshi dojjiibeeti doyoona Yeerichi qaaroon hoxeeto tuniihote. Wotta ebiyoommi meeti mooyon tuniihote” iye.

Ashoon Eeꞌiibeeti Mooyo

¹⁴ Wotta Yesuusi dofee asheenaꞌon bi waan ceeggiꞌi, “Ittoshi bulli ta waanee waayebote! Shalligibote!

¹⁵ Ashoon eeꞌiibeeto ashi waanee kechiibeet mooyoani, ashi waan giyiibeeti ashoon eeꞌiibeeti mooyo cir aalloone.

¹⁶ [Illa waayeebeeti waajjecho koniyoona waayebe]” iye.

¹⁷ Aree hillooch Yesuusi asheenaꞌo waanee bariꞌi kexooch bi giyitoyee gubb, bi dabbeenaꞌo “Ebi shaahiyoo ama getone?” iꞌi echeheete.

¹⁸ Yesuusi wochiꞌi, “Wotta ittoshi mulloochoo giyaache? Manjeebeeti maayo ashoon eeꞌiiyee qayon ariyaachote?

¹⁹ Maayo ashi maacooch giyiꞌi maach keyoyee damba, ashi mullooch giyaache” iye. Ebina Yesuusi maayo bulli xalloo tunoon arichiihe.

²⁰ Wotta Yesuusi ishichiye: “Ashoon eeꞌiibeeto ashi mulloochee kechiibeeti mooyone.

²¹ Ashi mulloochee kechii beetinaꞌo, gonde gaboo, yahoo, gaayo, wuxoo,

²² shunee mamo, hiriggoo, gondo, dawushoo, yeelliibeeti kaayo, qanaato, oono, geecoo, shalligee shappoo, eboshine.

²³ Ebi gondo bulli ashi mulloochee kechiꞌi ashoon eeꞌiihe” iye.

Yesuusi Wodiyecho Tunoon Ikke Ure Iberiyoo

²⁴ Yesuusi aroochee tiyiꞌi Xiroosi katemee gaꞌooch beeti showooch hammii ikke kexooch giyiye. Arooch bi beemon asho koniyoona ariyemmoyich shunaanoone; tunetaa aashoon hakkaanoone.

²⁵ Bekkech yinno giisheche bi bushee toommooch beeti ure Yesuusichon waayaꞌa waa bi baatooch dihiyan.

²⁶ Biyoo Sooriyee showooch beeti Finqechee, Giriikee noonoon yibbaataabeeti ureene. Areyoo Yesuusin “Ta bushee toommoochee yinnoon yoohe” iyaꞌa qollahan.

²⁷ Tunetaa Yesuusi wochiꞌi, “Bushiisheenaꞌochi maayoon tiijjiꞌi kunaaneenaꞌoyich dufo tato toonoone; bushiisheenaꞌo shiichiree maa miyiichibeete” iye.

²⁸ Ure wochaꞌa, “Ishi iberoone, ta Doonocho, tunetaa kunaaneenaꞌolla bushiisheenaꞌo maabeeti madee baatooch oojjiti ooyoon maciꞌi maa beetinaꞌone” iyan.

²⁹ Yesuusi ureyich “Ne getteto tatoone. Ebich wotteree ne kexooch hambe. Yinno ne bushee toommoochee tiyitone” iye.

³⁰ Bi kexooch hammaꞌa bi bushee toommoochee yinno tiyiichaa qeenooch qeyaꞌa beetin danehan.

Waamo Ullee Heciyoo Tippeti Uroon Yesuusi Wodiyoo

³¹ Wotta Yesuusi Xiroosee showoochee kechii Sidoonee showoona besheꞌi, Aashire Katemoona Galiilee baharooch waahe.

³² Arooba asheenaꞌo bi waamo ullee bi heciyoo tippeti ikke uroon arooch Yesuus waan deebiꞌi, “Ne kishoon hini uroochi toommooch kotiibe” iꞌi qolleheete.

³³ Yesuusi uroon dofee asheenaꞌo daggoochee ikke badd kichiꞌi bi kishee yapheroon uroochi waamooch giijjiye. Wotta cudon kushitee (kuujjii) bi heciyoon shafehe.

³⁴ Kaama shimaajj ciinnii kachiꞌi, “Eftaaha” iye. Ishi geto, qecheebe getone.

³⁵ Uroochi waamo bekkech qecheeꞌi waayehe; bi eciyoo biicheꞌi xallii yibbaatehe.

³⁶ Ebiyee gubb, Yesuusi are xaaꞌooch beeti asheenaꞌoyich “Konichona qaareyaahote” iꞌi gettiye. Tunetaa boonoshich qaareyaahote bi itoyee beshoon woriyeete.

³⁷ Ishin waayeti asheenaꞌo oogichii worganeꞌi, “Bullin gaawichitone; ulleenaꞌo waayemmoyich, heciya tippeenaꞌo yibbaatemmoyich tunii beetone” iyeete.