Maariqoosi 6 - Kafa Linguistics Project

Yesuusin Naazireetechinaꞌo Qayo

¹ Ebiyee gubb, Yesuusi aroochee kechiꞌi bi dicciti showooch hammiye; bi dabbeenaꞌo wotta biinna tookkii hammiyeete.

² Shambetoo shagaa, Yesuusi boonoshi kiceebeeti kexooch giyiꞌi asheenaꞌon dojjooch giyiye. Bi dojjiton meeti asheenaꞌo waayeꞌi worganeebee, “Hini uro ebi mooyon amoochee danehe? Biich icheeti ariyoo amoommone? Beeggaa no ariyaani gaakkechi shuunoon aabichiꞌiniye bi shuuneebeeto?

³ Hini uro anaaxoo toone? Maariyamichi bushoo toone? Bi maneenaꞌo Yaaqobi, Yoosi, Yihudinaa Simoonina tooneenaꞌone? Wotta bi maache maneenaꞌo noonna tookkii beetinaꞌo tooneenaꞌone?” iꞌi hoxeheete.

⁴ Yesuusi boonoshich “Keemechon bi shiijjee katemeexi asheenaꞌo, bi xibeenaꞌonaa bi kechi asheenaꞌonoyee beshetaa bareenaꞌo oogiyaanoon qayaacheete” iye.

⁵ Are xaaꞌooch giisheche biiyechinaꞌochi toommooch bi kishoon kotii wodiyoyee damba amee gaakkechi shuunoonolla tuniyoyich cir hakkaanoone.

⁶ Bi toommooch mulloon tooꞌiyoo boonoshi qajjitoyich worganehe. Ebiyee gubb, Yesuusi gafee toommona guuddiꞌi asheenaꞌoyich dojjii beehe.

Aaraa Gutte Mishiraachechinaꞌon Yesuusi Wocho

⁷ Yesuusi aaraa gutte bi dabbeenaꞌon bi waan ceeggiꞌi gutti gutteree boonoshi hammemmoyich wochehe; yinneenaꞌon ashi toommoochee boonoshi yookkemmoyichoo ukkirittinoon boonoshich immiye.

⁸ Boonohichoo ishichiye, “Gommooch ittoshi keyigaata, gumboyee damba shoho tuneba shohee kojjoon woyee gijjee kolloon yechaahote.

⁹ Tunebaani ittoshi baatooch caammoon gedote. Wotta gutte tahoon taheyaahote.

¹⁰ Amee xaaꞌoochona shaggiꞌi ashi kexooch ittoshi giyigaata, are xaaꞌoon gawukkiꞌi ittoshi hammimmi wottoon are kexooch kotebote.

¹¹ Ittoshin iibbiyoo qajjiꞌi, ‘Ittoshi gettii beeton waayeyaache’ ii beeti xaaꞌeexi asheenaꞌoyich, boonoshi toommooch miixoo bi tunemmoyich gommooch keyiree ittoshi baateexi quttoon tebbeechi aroochee keyote” iye.

¹² Boonoshiyoo hammiꞌi, axaaxee gommoochee Yeer waan boonoshi wottemmoyich asheenaꞌoyich gettiyeete.

¹³ Meeti yinneenaꞌon asheenaꞌo toommoochee yookkiyeete. Meeti biiyechinaꞌon zayitoon huuttiibee wodiiheete.

Aacona Afaallechi Yowannisi Qitoo

¹⁴ Yesuusichi shigo bulli xaaꞌooch gaminnii bi arichetoyich, taatoo Heroodisi waayehe. Ikkikke asheenaꞌo “Hini Aacona Afaallechi Yowannisine; ebiyoommi gaakkechi mooyon tuniyoo bi hakkito, qitoochee tiyiꞌiniye” iyeete.

¹⁵ Bare asheenaꞌo Eliyaasine iyeete. Bareenaꞌo wotta “Hini keemechone; wonnee keemechinaꞌoommi ikke keemechone” iyeete.

¹⁶ Tunebaani Heroodisi ebin waayeꞌi, “Aroo bi qettoon ta kuchiiti Yowannisine; aroo qitoochee tyitone” iye.

^17-18 Heroodisi bi ishichiti naboo ebine: Heroodisi bi manoo Filipphoosi mechee Heroodiyaadin bi shaaggitoyich, Yowannisi tiyiꞌi biich “ ‘Ne manoochi mecheen shaage’ iꞌi Muusichi Sheeroo daaggaanoone” ii beehe. Ebi bi mechechi naboyich Heroodisi “Yowannisin yeshi cuyote” iꞌi bi ginee naayinaꞌo daggoochee wochehe. Boonoshiyoo hammiꞌi yechii cuyee kexooch geddiyeete.

¹⁹ Heroodiyaadiyoo Yowannisich qummaꞌa bi wuxeyemmi gommon qaawaa beehan; tunetaa hakkaaneene.

²⁰ Ebiyoo Heroodisi Yowannisi cadiqoonaa yaafoona bi tunoon bi ariitoyich, biin shattiꞌi quyii bi beetoyichiye. Heroodisi Yowannisi getaa emiriibee waayee beehe; tunetaa bi waayeti mooyona oogichii gaabbii beehe.

²¹ Ebiyee gubb, Heroodisi bi shiijjee aabee baarooba bi mikkirechinaꞌonaa bi ginee iraasheenaꞌonon, Galiilee showeexi ogoogeenaꞌonoo gifiroon ceeggiye. Gifiree bi ceego Heroodiyaadich gommon qechiye.

²² Arooba Heroodiyaadichi bushee gifiree kexooch giyaa duubon duubbaꞌa Heroodisinaa biinna tookkii kotetinaꞌonon emirikkiyan. Taatoo tiyiꞌi busheen “Ne qaawiton ta waanee qollebe.

²³ Ta taatittinee qatolla bi tunetaa, ne qollemmon neech immemmo taane” iꞌi wogehe.

²⁴ Ebich bushee kexoochee kechaꞌa hammaa bi indeech “Taatoon amoon qollebote?” iyaꞌa echahan. Indeyoo “ ‘Aacona Afaallechi Yowannisi qelloon taach imbe’ getiree qollebe” iyan.

²⁵ Bekkech bushee afaafinoona taatoo waan giyaꞌa taatoon “Aacona Afaallechi Yowannisi qelloon gafetoona and taach ne immemmoyich qaawaabeeti taane” iyan.

²⁶ Arooba taatoo oogichii ayiniye; tunetaa bi wogeti wogoonaa biinna tookkii koteti iibbeenaꞌonoyicha iꞌi busheyich bi heciyoon shaddoo shunaanoone.

²⁷ Bekkech bi ginechinaꞌo daggoochee ikkoon ceeggiꞌi, Yowannisi qelloon bi deebemmoyich gettiye; uroo cuyee kexooch hammii Yowannisi qettoon kuxxiꞌi,

²⁸ bi qelloon gafetoona deebii busheyich immiye. Busheyoo daammaa bi indeech immahan.

²⁹ Ishin waayeti Yowannisi dabbeenaꞌo hammii bi dubenoon deebiꞌi duukkiyeete.

Uuche Humeenaꞌoyich Yesuusi Maanjoo

³⁰ Ebiyee gubb, mishiraachechinaꞌo boonoshi hammitoochee wotteꞌi ikkooch Yesuus waan giddeꞌi, boonoshi shuunetonaa boonoshi dojjito bullinon biich gettiyeete.

³¹ Biyoo “Barahooch ittoshi ikkeeto waaree giishechoon kote kashebote” iye. Bi ishichiti naboo, dofee asho boonoshi waan hammii waa bi beetoyich maayoonolla boonoshi maayemmi saatoon boonoshi muccetoyichiye.

³² Ebich Yesuusinaa bi dabbeenaꞌona giishi markabeech kechii koteꞌi barahooch hammiyeete.

³³ Tunebaani boonoshi hammii beetaa, meeti asheenaꞌo beeggiꞌi boonoshin ariiheete. Ebich katemee toommo bulliichee baharee gashoon baatoona woceebee, boonoshiyee shiichiꞌi hammii boonoshi kindemmi xaaꞌooch shaggiyeete.

³⁴ Yesuusi markabeechee kindiibee dofee asheenaꞌon beeggiꞌi, qiddaalli bagoommo boonoshi tunetoyich bi maacoona micciꞌi ayiniye. Boonoshichoo meeti mooyon dojjooch giyiye.

³⁵ Aroochee showoo beshee womikkoo wottetaa, Yesuusichi dabbeenaꞌo bi waan giddeꞌi, “No beeto, gafoo aalli xaaꞌoone; andoo showoo xumetone.

³⁶ Asheenaꞌo hini guudeexi goyechi gafooch hamiree maayoon boonoshi qellich boonoshi kememmoyich diggiiree daachiibe” iyeete.

³⁷ Tunetaa Yesuusi wochiꞌi, “Ittoshi maanjibote” iye. “Ishigaata, hamiree gutte balle diinaaroona koshon boonoshich kemebona?” iꞌi echeheete.

³⁸ “Ittoshich ambiche kosho beete? Eke hami beegote” iye. Boonoshiyoo hammii beeggiꞌi, “Uuche xekee koshonaa gutte haashoona beete” iyeete.

³⁹ Ebiyee gubb, Yesuusi bi dabbeenaꞌo asheenaꞌon qoodi qoodiree mocee toommooch boonoshi kotiyemmoyich gettiye.

⁴⁰ Arooba asheenaꞌo balli balloonaa aachi aachoona tuneꞌi yaaroona koteheete.

⁴¹ Aree hillooch Yesuusi uuche xekee koshonaa gutte haashoonon tiijjii yechiꞌi shimaajj ciinniichii Yeerin galletehe. Koshon tiichiꞌi bi dabbeenaꞌoyich “Ebin asheenaꞌoyich qoomebote” iꞌi immiye; haashoonoo qoodiꞌi bullich immiye.

⁴² Boonoshiyoo daammiꞌi qoometaa, bulliyoo maaꞌi michiyeete.

⁴³ Bi dabbeenaꞌo aaraa gutte ogooge mokkee ceeni, echeti koshonaa haashoonochi ooyoon tiijjiyeete.

⁴⁴ Koshon maatinaꞌo daggoochee anaaminaꞌo baach uuche humeenaꞌone.

Baharee Aachi Toommona Yesuusi Shaꞌo

⁴⁵ Ebiyee gubb, Yesuusi bi dabbeenaꞌon “Hini asheenaꞌon diggiiꞌa ta deennemmi wottoon, giishi markabeech keyiree beqach Beetisayida tayee shiichiree beshebote” iye.

⁴⁶ Biyoo asheenaꞌon diggii deenniichii corootiya geppooch kechiye.

⁴⁷ Xum bi dabbeenaꞌo markabeena baharee gutte daggooch boonoshi beetaa, Yesuusi bi ikkeeto showooch beehe.

⁴⁸ Arooba boonoshi toommooch yongo daappitoyich markabee boojjetoona yoppeebee xuuxeheete. Yesuusi boonoshi xuuxoon beeggiꞌi, qaabbe baakkee kuuhooch baharee toommona shaꞌeebee boonoshi waan waahe; waaꞌi boonoshiyee aaf besheya iye.

^49-50 Tunetaa baharee toommona shaꞌeebee bi womon boonoshi bulli beeggiꞌi, yoogoone iꞌi keqqii cookiyeete. Biyoo bekkech boonoshich “Kupphebote! Taane, shattaahote” iye.

⁵¹ Aree hillooch boonoshi waan markabeech kechiye. Bekkech yongo shashewimiye. Bi dabbeenaꞌo ebina oogichii worganeheete.

⁵² Ebiyoo boonoshi mullo muumetaa, Yesuusi giisheche koshon asheenaꞌoyich bi abbetiyoon boonoshi mullooch kotiyaaneenaꞌo boonoshi tunetoyichiye.

Biiyechinaꞌon Genshareexaa Yesuusi Wodiyoo

⁵³ Yesuusinaa bi dabbeenaꞌona baharoon kimmiꞌi Genshareexee showooch shaggiyeete; markabeen aachi gashooch neechiyeete.

⁵⁴ Markabeechee boonoshi kindiyaa, bekkech asheenaꞌo Yesuusin ariiꞌi,

⁵⁵ are showee guudo bulliich wocee hammii, “Yesuusi beete” getteeti xaaꞌooch biiyechinaꞌon shaaꞌoona shaageꞌi deebiyeete.

⁵⁶ Gafooch, katemoonaa bi guudoona beeti goyechi gafoonooch, Yesuusi hammimmi xaaꞌoo bulliich, asheenaꞌo biiyechinaꞌon gabiyee godooch kichiꞌi kotiichii, are biiyechinaꞌo bi qoreddee caappoonolla boonoshi yechemmoyich qolleheete. Yechitinaꞌo bulli wodiyeete.