Maariqoosi 5 - Kafa Linguistics Project

Yinno Bi Toommooch Beeti Uroon Yesuusi Wodiyoo

¹ Yesuusinaa bi dabbeenaꞌona baharoon kimmiꞌi beqach beeti Gergeseenee showooch shaggiyeete.

² Yesuusi giishi markabeechee bi kindimmona yinno bi toommooch beeti uro maasho beetoochee kechiꞌi bekkech biinna danehe.

³ Hini are uro bi beemo maashee daggoochiye. Sansalatoonolla cuchii neechon hakkiti asho arooba aalloone.

⁴ Meeti aaboon, bi kishoon sansalatoona, bi baatoonoo qoqqaannoona cuchee beehe; tunebaani sansalatoon kuxxii qoqqaannoonoo tiichii beehe; biin yechii neechoon hakkito koniyoona aalloone.

⁵ Areddoonaa xumoonon maashoonaa geppoonooch kechiichii bulli aaboon bunnee beehe; wotta bi ashittinoon xaqqoona qoopphii huccii beehe.

⁶ Hini are uro Yesuusin wohoochaa ciinniꞌi bi waan woccii hammii biich goyinnehe.

^7-8 Arooba Yesuusi “Hini yinnoocho, uro toommoochee tibe” iye. Ebich uro oogichii cookiꞌi, “Beshe Nuggishoo Yeerichi Bushoo Yesuuso, ta mooyooch neen amo geddiye? ‘Taan yulliyaahine’ iyaꞌa Yeerina neen yecheto taane” iye.

⁹ Arooba Yesuusi “Ne shigo konine?” iꞌi echehe. “Meeto no tunetoyich, ta shigo Legiyoono getteehe” iꞌi wochiye.

¹⁰ Wotta Yesuusin “Hini showoochee noon yookkaahine” iꞌi kupphii qollehe.

¹¹ Arooch beeti geppee gaꞌooch meeti gudichi goton qiddeenaꞌo qiddee maanjii beeheete.

¹² Ebich yinneenaꞌo Yesuusin “Hini are gudini toommooch hami no kotemmoyich daaggibe” iꞌi qolleheete.

¹³ Yesuusiyoo “Hamiree kotebote” iye. Bekkech yinneenaꞌo uro toommoochee tiyiꞌi are gudininaꞌo toommooch hammii koteheete. Aroochee gutte hum bede gudininaꞌo ikkotteꞌi giidechi qaaꞌooch guufeꞌi kindii baharee gejjoona manjeeheete.

¹⁴ Arooba gudichi qiddeenaꞌo wocona hammiꞌi ebin katemoonaa bi guudeexi goyechi gafoonooch gettiyeete. Ebich waayeti asheenaꞌo “Mooyo amo gaata beegone” iꞌi waaheete.

¹⁵ Yesuus waan shaggiꞌi, Legiyooni getteebeeti yinneenaꞌo yechiti uro wodiꞌi, bi tahoon tahee kotee beeton beeggiꞌi shattiyeete.

¹⁶ Shiichii boonoshi aafoona beeggiti asheenaꞌo yinneenaꞌo yechiti uroochi mooyonaa gudininaꞌonochi mooyonon boonoshich gettiyeete.

¹⁷ Arooba are showee asheenaꞌo Yesuusin “No showoochee keye” iꞌi qolleheete.

¹⁸ Ebich Yesuusi hamma iꞌi markabeech bi kechii beetaa, yinneenaꞌo gawukkiti uro “Neenna tookki hambona” iꞌi qollehe.

¹⁹ Tunebaani Yesuusi daaggaanoone; biyoo “Ne kexooch hamiree ne kechi asheenaꞌoyich Doono neech am shaahe ooge mooyon bi tuniyoonaa neech bi ariqqoonon gete” iye.

²⁰ Uroo hammiꞌi, Aashire Katemoo getteebeeti showooch guuddiibee Yesuusi am shaahe ooge mooyon biich bi tuniito gaata getooch giyiye; bi getaa waayeti asheenaꞌo bulli worganeheete.

Qititi Busheenaa Biiyeti Ureenon Yesuusi Wodiyoo

²¹ Aroochee Yesuusi giishi markabeena baharoyee beqach wotteꞌi bi kimmitoyee gubb dofee asheenaꞌo baharee gashooch bi waan kiceeheete.

²² Kiceeꞌi boonoshi beetaa, Ayihudeenaꞌo kiceebeeti kechi ukkireenaꞌo daggoochee ikkoo, Yaaroosi getteebeeto waahe. Waa Yesuusin ciinnii bi baatooch dihiꞌi,

²³ “Giishi ta busheechi kasho kech bedditone. Bi kasho wottetaa bi wodemmoyich waaree ne kishoon bi toommooch kotiibe” ii kupphiiꞌi qollehe.

²⁴ Yesuusiyoo uroona tookkii hammiye. Bi hammii beetaa, dofee asheenaꞌo bi guudoona xuꞌeebee tookkii hammii beeheete.

²⁵ Arooba are asheenaꞌo daggooch ceeni aaraa gutte naton damoo ufeebeeti ure beehan.

²⁶ Aroyee aaf meeti aakumeenaꞌo waan shaꞌaabee doojjaꞌa sheweetine; tunetaa bi gijjoo bullin shaccaa bi ciichitaa, bi biiyo beshiyalli ketteyaanoone.

^27-28 Aroochee Yesuusichi woroon waayaꞌa, “Bi qoreddoon baach ta yeshigaata, wodemmi taane” iyaꞌa bi gabitoyich asheenaꞌo daggoona hammaꞌa gubbaa Yesuusichi qoreddoon yechahan.

²⁹ Yesuusichi qoreddoon bi yechemmona, bekkech ufeebeeti bi damoo neexehe. Arooba biiyoochee bi wodoo biich arichehe.

³⁰ Bekkech Yesuusi biiyechon wodiyee giidoo bi achoochee bi keyon ariiꞌi asheenaꞌo waan guuddii wotteꞌi, “Ta qoreddoon yechito konine?” iye.

³¹ Bi dabbeenaꞌo wochiꞌi, “Dofee asheenaꞌo xuꞌeyoon beeggaabee, ‘Konine taan yechito?’ iyaꞌa echenne?” iyeete.

³² Tunetaa Yesuusi biin yechiton beegga gubb wotteꞌi ashoon ciinnii beehe.

³³ Areegaata ure woditi bi tunoon ariiꞌa shattaa qewaabee, waa bi baatooch dihaꞌa iberoo bullin gettahan.

³⁴ Yesuusi wochiꞌi, “Ta busheene, ta toommooch mulloon ne tooꞌiyoo neen wodiitone. Diggoona hambe; biiyaꞌa ne shooddoochee kashebe” iye.

³⁵ Yesuusi ebin getooch bi beetaa, Ayihudeenaꞌo kiceebeeti kechi ukkiroo kexoochee asheenaꞌo waaꞌi Yaaroosin “Ne bushee qititine. Amoyich Dojjechon iritii beetine?” iyeete.

³⁶ Tunebaani Yesuusi ishin waayeꞌi Ayihudeenaꞌo kiceebeeti kechi ukkiroon “Shattaahine, Yeerich baach kuxe” iye.

³⁷ Aree hillooch Yesuusi Pheexiroosi, gutte maneenaꞌo Yaaqobinaa Yowannisinoyee damba koniyoona biinna tookki hammemmoyich daaggaanoone.

³⁸ Aroochee Ayihudeenaꞌo kiceebeeti kechi ukkiroo kexooch shaggiꞌi asheenaꞌo caagoon, eefonaa bunnoonon boonoshi meechoon ciinniye.

³⁹ Kexooch giyiꞌi, “Hini caagoonaa eefona amoone? Bushee tokketaanalli bi ito, qitaaneene” iye.

⁴⁰ Tunebaani asheenaꞌo oogichii coonee miiceheete. Bullin “Kexoochee keyote” iꞌi bi kichitoyee gubb busheechi nihoon, indeenaa biinna tookkii hammiti bi dabbeenaꞌonon dabbiiꞌi bushee beeti gatooch giyiye.

⁴¹ Giyii bushee kishoona yechiꞌi, “Xaallita qumi” iye; ebiyoo “Hini busheene, tibe iibeeto taane” getone.

⁴² Busheyoo aaraa gutte nati busheene; ebich bekkech motekkimaa tiyaꞌa shaꞌahan. Arooba ebin beeggiti asheenaꞌo oogichii worganeheete.

⁴³ Yesuusi “Hini mooyon konichona gettaahote; ittoshi qelloon ariibote” iꞌi bi gettitoyee gubb, “Busheyich maayoon imbote” iye.