Maariqoosi 4 - Kafa Linguistics Project

Yaree Shaahiyoo

¹ Bare aaboon wotta Yesuusi baharee gashoochaa dojjooch giyiye. Arooba dofee asheenaꞌo bi waan boonoshi kiceetoyich, baharee toommooch beeti giishi markabeech kechiꞌi kotehe. Baharee gashooch beeti showooch tuneꞌi waayeebeeti asheenaꞌo bullich

² meeti mooyon shaahiyoona dojjiye. Arichiibee ishichiye:

³ “Ellebote, ikke yaree shookkecho shookka kechiye.

⁴ Shookkii bi beetaa, ikkikkoo gommi gashooch holliye; aroon kafeenaꞌo waa maciꞌi maaheete.

⁵ Baroo maacaa xaqqechi showooch holliye; showoo giishetoyich kaatee collehe.

⁶ Tunetaa aabo michimmona shoolliye; cammon awuro bi qajjitoyich shuuqqiye.

⁷ Baroo wotta angichi xuppo beeti showooch holliye; are angichi xuppoo naaxii kechiꞌi maahe; aafeyaanoonoo dobbehe.

⁸ Baroo wotta qeemi showooch holliꞌi collehe; diccii kechiꞌinoo, ikkoo shaashe aafoon, ikkoo shiche aafoon, ikkoo balle aafoon aafehe” iye.

⁹ Ciiroochaa Yesuusi boonoshich “Waayeebeeti waajjecho waayebe” iye.

Bi Dabbeenaꞌo Echeton Yesuusi Wochoo

¹⁰ Yesuusi asheenaꞌo waanee barimmona aaraa gutte bi dabbeenaꞌonaa bi guudoona beeti bare asheenaꞌona ebi shaahiyeechon biin echeheete.

^11-12 Yesuusiyoo boonoshich ishichiye: “Yeeri bi taatittinee maacee mooyon ittoshich arichiitone; tunetaa bareenaꞌoyich bulli mooyo shaahiyoona bi getteebeeto, ‘Ciinibee boonoshi beegaachemmoyich, waayebee boonoshi shalligaachemmoyich, Yeer waan boonoshi wotteyaachemmoyich, boonoshi axaaxoo bi maareyaachemmoyichiye’” iye.

Yaree Shookkechochi Shaahiyoon Biichiꞌi Yesuusi Geto

¹³ Yesuusi daakkiꞌi ishichiye: “Hini shaahiyoo ittoshi mullooch giyaache? Ishigaata, bare shaahiyoon aabichiree ariyehote?

¹⁴ Yaree shookkecho Yeerichi qaaroon shookkiye.

¹⁵ Shookkii bi beetaa, gommi gashooch holliti yaroon shaahii beetinaꞌo Yeerichi qaaroon boonoshi waayemmona, bekkech Sheexaanoo waaꞌi hini are boonoshi waayeti qaaroon boonoshi mulloochee maciꞌi daammiibeeti asheenaꞌone.

¹⁶ Wotta maacaa xaqqechi showooch holliti yaroon shaahii beetinaꞌo Yeerichi qaaroon waayeꞌi emiriibee bekkech iberiitinaꞌone.

¹⁷ Tunetaa cammon yeshaaneenaꞌo boonoshi tunetoyich yagaachemminaꞌone; Yeerichi qaaree naboona iritoo woyee duꞌo waahooba bekkech giinnii dihechinaꞌone.

¹⁸ Ebiyoommon wotta angichi xuppo beeti showooch holliti yaroon shaahii beetinaꞌo Yeerichi qaaroon boonoshi waayetaa,

¹⁹ hini showeexi beemon gaboo, gijjee shaawona dacheyoonaa baribare mooyon dakoona boonoshi mullooch naaxiꞌi boonoshi waayeti qaaroon maahe. Ebichi naboona aafeyaanoon dobbeꞌi echeheete.

²⁰ Ebiyoommon wotta qeemi showooch shookketi yaroon shaahii beetinaꞌo Yeerichi qaaroon waayee iberiitinaꞌone. Boonoshiyoo aafoon aafeheete; ikkoo shaashe aafoon, ikkoo shiche aafoon, ikkoo balle aafoon aafehe” iye.

Gafetoona Guuppeeti Ceechoo

²¹ Wotta Yesuusi boonoshich ishichiye: “Asho ceechoon bi ceechiibeeto, gafetoon bi toommooch guufoyich woyee qeechi dambooch kotiyoyichiye? Bekkooch kotiiya toone?

²² Aacheeto bulli xalla keyo, qereeto bulliyoo gaxxeyoo echeyaani mooyone.

²³ Illa waayeebeeti waajjecho koniyoona waayebe” iye.

²⁴ Wotta Yesuusi boonoshich ishichiye: “Elleree waayebote; ashich ittoshi qeellee (shafirii) beetoommon Yeeri wochiree ittoshich qeellemmone; beshoon daakkiree ittoshich immemmone.

²⁵ Beetoyich daakkaa ichemmone. Tunetaa amolla aallo waanee biich beeti giishechewolla tiijjeyemmine” iye.

Colleꞌi Dicciibeeti Yaree Shaahiyoo

²⁶ Yesuusi daakkiꞌi ishichiye: “Yeerichi taatittine bi goyooch yaroon shookkiti ashoon shaaheene.

²⁷ Uro xumetaa tokketehe; haraa tiyiye. Cir ariyaan bi beetaa, bi shookkiti yaroo colleꞌi dicciye.

²⁸ Showee colliiꞌa shiichii colloon, gubb shehoon, shehee hillooch moochoon immahan.

²⁹ Daꞌaa bi shuuꞌi gaata, qecoyich bi bedditoyich magaadoon yechiꞌi qecciye” iye.

Shanaafee Aafee Shaahiyoo

³⁰ Aroyee gubb Yesuusi ishichiye: “Yeerichi taatittine am shaaheene getona? Woyee amee shaahiyoona bekkiibona?

³¹ Shanaafee aafeyoommine. Areyoo showee toommooch bi shookkaa beehooba, bare maayi yaroo bulliyee giishecheene.

³² Tunebaani shookkaꞌa collaa bi diccehooba daaddeexi maayeenaꞌo bulliyee besheene. Shimaajji kafeenaꞌo waaꞌi bi atooch kotee bi yiirooch kashoon boonoshi hakkimmi wottoon ogooge atoon atahane” iye.

³³ Yesuusi asheenaꞌo xiishii waayoon boonoshi hakkimmi wottoon eboshiyoommi meeti shaahiyeenaꞌona Yeerichi qaaroon gettii beehe.

³⁴ Ikke mooyonona shaahiyaalloon getaanoone. Biinnaa bi dabbeenaꞌona ikkeeto tunehooba, shaahiyeenaꞌo bullin boonoshich biichiꞌi gettii beehe.

Aachi Aayo Shashewimo

³⁵ Arooba xum Yesuusi bi dabbeenaꞌoyich “Baharee beqach kimbone” iye.

³⁶ Asheenaꞌo waanee bariiꞌi Yesuusin bi koteti markabeena daammiyeete. Bare markabeenaꞌo wotta tookkii beetinaꞌone.

³⁷ Hammii boonoshi beetaa, giidechi yubee yongo bi tiyitoyich markabeech aaco ceenn beddimmi wottoon aachi aayo markabeen yexxiye.

³⁸ Arooba Yesuusi markabee gubbi ciireexi duꞌooch qoyoon qoyeꞌi tokketeton bi dabbeenaꞌo tiijjiꞌi, “Dojjechocho, baharoona no manjeyo neen ayinikkaache?” iyeete.

³⁹ Yesuusi tiyiꞌi yongoon noggehe; baharoonoo “Cikkibe; shuuraaye” iye. Yongoo bekkech neexehe; bulli mooyoo shashewimiye.

⁴⁰ Ebiyee gubb, Yesuusi bi dabbeenaꞌon “Amoyichiye eechiꞌi ittoshi shattiibeeto? Yeerin gibeneyaachote?” iye.

⁴¹ Arooba bi dabbeenaꞌo oogichii shattiꞌi boonoshinaa boonoshina “Yongoonaa baharoona biich deꞌa ii beeti hini am shaahe ashoone?” iyeete.