Maariqoosi 3 - Kafa Linguistics Project

Kishoo Qometi Uroon Yesuusi Wodiyoo

¹ Wochiꞌi Yesuusi Ayihudeenaꞌo kiceebeeti kexooch giyiye. Aroochoo bi kishoo qometi uro beehe.

² Arooch beeti asheenaꞌo “Eke shambetooba bi wodiigaata beegone” iꞌi Yesuusin taggoyich quyee beeheete.

³ Yesuusiyoo bi kishoo qometi uroon, “Tiyi hini gutte daggooch neexebe” iye.

⁴ Wotta asheenaꞌon “Muusichi Sheeroo shambetooba deꞌe shuunooniyee gonde shuunoon daaggiye? Kashee wodiyooniyee aalliyooniye?” iꞌi echehe; tunebaani boonoshi noonoo wochaanoon cikkii qajjiyeete.

⁵ Yesuusi boonoshi mullo muumetoyich oogichii ayiniꞌi bi guudoona beetinaꞌon kaaree aafoona ciinniye. Uroonoo “Ne kishoon yaggibe” iye. Biyoo yaggiye; bi kishoo wotteꞌi iiwehe.

⁶ Arooba Fariseenaꞌo bekkech Ayihudeenaꞌo kiceebeeti kexoochee kechiꞌi, “Aabichiree biin wuxibona?” iꞌi Heroodisichi asheenaꞌona tookkii echeeheete.

Yesuusin Dofee Asheenaꞌo Dabboo

^7-8 Ebiyee gubb, Yesuusi tiyiꞌi bi dabbeenaꞌona tookkii baharo beetooch hammiye. Galiilee waati dofee asheenaꞌo biin dabbiyeete; wotta dofee asheenaꞌo bi tuniiti mooyon waayeꞌi, Yihudee, Yerusaalemee, Edomiyaasee, Yoordaanoosi aachee beqachee, Xiroosinaa Sidooninoochee bi waan waaheete.

^9-10 Yesuusi meeti asheenaꞌon bi wodiitoyich biiyechinaꞌo bulli bi achooch boonoshi kishoon bechiya qaawiꞌi bi toommooch boonoshi xuꞌeetoyich, bi dabbeenaꞌon “Asheenaꞌo meetinaꞌone; ebich taan boonoshi xuꞌaachemmoyich giishi markabeen taach giddiibote” iꞌi gettiye.

¹¹ Wotta yinneenaꞌo biin ciinniꞌi bi aafooch guufeechii, “Ne Yeerichi Bushoo neene!” iibee cookiyeete.

¹² Yesuusiyoo “Koni ta gaata gettaahote; ittoshi qelloon ariibote” iye.

Aaraa Gutte Bi Dabbeenaꞌon Yesuusi Kaaco

¹³ Aroyee gubb Yesuusi geppooch kechiꞌi bi qaawitinaꞌon bi waan ceeggiye; boonoshiyoo bi waan hammiyeete.

^14-15 Aaraa gutte asheenaꞌon kaacciye. [Boonoshinoo “Mishiraachechinaꞌo” iꞌi shigiihe.] Bi kaaccito, “Taanna tookki beebeete; wotta mishiraachee qaaroon boonoshi bechemmonaa yinnoon ashi toommoochee boonoshi yookkemmonoyich ukkirittinoon imiree wochebona” iꞌiniye.

¹⁶ [Kaacheti aaraa gutte asheenaꞌo] Pheexiroosi iꞌi bi shigiiti Simooni,

¹⁷ “Baarinegeesi woyee Xeeyee Bushiishoo” iꞌi bi shigiiti Zebidiyoosi bushiisheenaꞌo Yaaqobinaa Yowannisina,

¹⁸ Indiriyaasi, Filipphoosi, Baritelemoosi, Maatiyoosi, Toomaasi, Ilfiyoosichi bushoo Yaaqobi, Taadiyoosi, bi aagetoyich qanaateebeeti Simooni,

¹⁹ wotta Yesuusin beshiiꞌi immiti Asqorootechi Yihudi eboshine.

Yesuusinaa Beelzebulina

²⁰ Aroyee gubb Yesuusi kexooch giyiye. Biinnaa bi dabbeenaꞌona maayoon boonoshi maayemmi saatoon boonoshi muccemmi wottoon dofee asheenaꞌo ceenniꞌi iritiiheete.

²¹ Yesuusichi xibeenaꞌo ishin waayeꞌi, “Bi mullo shaddeetone” iꞌi biin yeshoyich waaheete.

²² Wotta Yerusaalemee waati Muusichi Sheeree dojjechinaꞌo “Yinnee taatoo Beelzebuli bi toommooch beetone. Ebiyee yinnee taatoochi giidoonane yinnoon asheenaꞌo toommoochee bi yookkiibeeto” iyeete.

²³ Ebich Yesuusi boonoshin bi waan ceeggiꞌi shaahiyoona ishichiye: “Sheexaanoo Sheexaanoon aabichiꞌi yoohon hakkehe?

²⁴ Ikke taatoochi showee daggooch beeti asheenaꞌo boonoshinaa boonoshina kaareꞌi boonoshi shacegaata, are taatittinee neexoon hakkaachane.

²⁵ Wotta ikke kechi asheenaꞌo boonoshinaa boonoshina kaareꞌi boonoshi shacegaata, are kexo neexoon hakkaache.

²⁶ Ebiyoommon Sheexaanoo bi taatittinee toommooch ginoon tiijjiꞌi biichinaꞌon bi shaci gaata, bi taatittineechee kindishalli bi gettemmo bi taatittine neexoon hakkaachane.

²⁷ Wotta ikke giidechi uroo kexon tiichii giyiꞌi shiichii biin cuyaanoon bi gijjoon daamon hakkemmi asho koniyoona aalloone. Bi cuchitoyee gubb bi gijjoo bullin daammiye.

²⁸ Iberoon ittoshich gettoye: Asheenaꞌo shuuneebeeti axaaxoonaa boonoshi naageebeeti naago bullina maareyemmone.

²⁹ Tunebaani Yaafe Ayaanoon naaggii beeto bulli, bulli yemeenee axaaxee hiishoo bi toommooch tunehalli, ciroona maaroon daneyaachemmone” iye.

³⁰ Yesuusi ishichiꞌi bi gettiti naboo, “Yinno bi toommooch beetone” iꞌi boonoshi gettitoyichiye.

Yesuusichi Indeenaa Bi Maneenaꞌona

³¹ Aroyee gubb Yesuusichi indeenaa bi maneenaꞌona waaꞌi maaxooch neexeechii biin wochiiheete.

³² Arooba dofee asheenaꞌo biin giichii guuddiꞌi kotee beeheete. Boonoshi daggoochee ikkikkeenaꞌo “Ne indeenaa ne maneenaꞌona maaxooch neexeechii neenna daneya qaawii beetinaꞌone” iyeete.

³³ Biyoo wochiꞌi, “Ta indee aabine? Ta maneenaꞌochi aaboshine?” iꞌi echehe.

³⁴ Biin giichiꞌi kotee beetinaꞌon ciinnii kochii bekkiibee, “Ta indeenaa ta maneenaꞌona eboshine.

³⁵ Taach manoo, maneenaa indeena Yeerichi daaggoon ceechii beetinaꞌo bulline” iye.