Maariqoosi 2 - Kafa Linguistics Project

Bi Ashittino Qititi Uroon Yesuusi Wodiyoo

¹ Giisheche aaboyee gubb Yesuusi Qifirinaahi katemooch wotteꞌi kexooch bi beemon asheenaꞌo waayeheete.

² Bekkech waa, kexonaa maaxonooch ceenniꞌi kiceeheete; Yeerichi qaaroon Yesuusi boonoshich gettiye.

³ Bi gettii beetaa, asheenaꞌo awudde asheenaꞌona shaaꞌeeti, bi ashittino qititi ikke uroon deebiyeete.

⁴ Kiceeti asheenaꞌo meettitoyich Yesuus waan shakkiyoyich gommon mucceheete. Ebich bi beeti kechi aafoon happiꞌi ashittino qititi uroon shaaꞌoona kindiiheete.

⁵ Yesuusiyoo bi toommooch mulloon boonoshi tooꞌiyoon beeggiꞌi, ashittino qititi uroon “Ta bushoocho, ne axaaxoo maareetone” iye.

⁶ Areegaata Muusichi Sheeree dojjechinaꞌo daggoochee ikkikkeenaꞌo arooch koteꞌi beeheete; boonoshiyoo boonoshi mulloona

⁷ “Hini uro amoyich ishichiꞌi gettiye? Ebi Yeerin naagone. Ikke Yeeriyee damba ashi axaaxoon maaroon hakkemmo konine?” iꞌi gabiyeete.

⁸ Boonoshi mulloona ishichii boonoshi gaboon bekkech Yesuusi bi mulloona ariiꞌi, “Ebin amoyich gabiyote?

⁹ Ashittino qititi uroon ‘Ne axaaxoo maareetone’ getonaa ‘Tiyi ne shaaꞌoon shaagiree hambe’ getonoochee kettoo aabine?

¹⁰ Tunetaa Ashi Bushoo hini showee toommoochaa axaaxoon maaroyich hakkoo biich beemon ittoshi ariyemmoyich” iꞌi,

¹¹ bi ashittino qititi uroon “Hini uroocho, and tiyi ne shaaꞌoon shaagiree ne kexooch hambe” iye.

¹² Ashittino qititi uro bekkech tiyii bi shaaꞌoon shaaggiꞌi asheenaꞌo beeggii beetaa, kexoochee kechiye. Ebich asheenaꞌo bulli worganeebee, “Ebiyoommi mooyon beeggaa ariyaano noone” iꞌi Yeerin oogiiheete.

Lewin Yesuusi Ceego

¹³ Wotta Yesuusi baharee gashooch hammiye. Dofee asheenaꞌo bi waan waataa dojjii beehe.

¹⁴ Aroochee aroona besheebee, qaraxo kucheebeeti gabberooch koteebeeti Ilfiyoosichi bushoo Lewin ciinniꞌi, “Taan dabbibe” iye. Aroo tiyiꞌi biin dabbiye.

¹⁵ Aroyee gubb Yesuusi Lewi kexoochaa maayoon maa bi beetaa, meeti gabiyee guudeenaꞌonaa axaaxechinaꞌona biinnaa bi dabbeenaꞌona tookkii maa beeheete; eboshi daggoochee biin dabbitinaꞌo meetinaꞌone.

¹⁶ Arooba Muusichi Sheeree dojjechinaꞌonaa Fariseenaꞌona Yesuusi gabiyee guudeenaꞌonaa axaaxechinaꞌona tookkii maa bi beetaa beeggiꞌi, bi dabbeenaꞌon “Gabiyee guudeenaꞌonaa axaaxechinaꞌona tookkii amoyichiye maa uchii bi beeto?” iꞌi echeheete.

¹⁷ Yesuusi ishin waayeꞌi, ishichiye: “Biiyechinaꞌoyichalli wodeenaꞌoyich aakumo qaawiyaache; axaaxechinaꞌonalli cadiqeenaꞌon ceegoyich waataano taane” iye.

Coomeechon Yesuusi Echeyoo

¹⁸ Arooba Yowannisi dabbeenaꞌonaa Fariseenaꞌona coomii beeheete. Asheenaꞌo waaꞌi Yesuusin “Yowannisi dabbeenaꞌonaa Fariseenaꞌochi dabbeenaꞌona coomii beetaa, ne dabbeenaꞌo amoyich coomaacheete?” iꞌi echeheete.

¹⁹ Yesuusiyoo ishichiꞌi wochiye: “Woꞌee keno boonoshina tookkiꞌi bi beetaa, miyaateenaꞌo coomeheete? Woꞌee keno boonoshina tookkii bi beetaa, coomoon hakkaacheete.

²⁰ Tunebaani woꞌee keno boonoshi waanee bi baremmi aabo woyemmone; are aabooba coomemminaꞌone.

²¹ “Ebiyee geene tahooch andire xefoon xefeebeeto aalloone; bi xefegaata, andire xefo geene tahoon kushi yeshiree beshoon keexxemmone.

²² Ebiyee wotta geene mollexxooch gaare woyinee uyoon kotiyemmi asho aalloone. Bi kotiigaata, are gaare woyinee uyo kashi gaata, mollexxoon gaakkemmone; uyoo ufemmone; mollexxoo duubemmone. Tunebaani gaare woyinee uyoon andire mollexxoochiye bi kotiibeeto” iye.

Ayihudeenaꞌochi Shambeteechon Yesuusi Echeyoo

²³ Ikke areddoon, shambetee aabooba Yesuusi moocheti teepphee daggoona beshee bi beetaa, bi dabbeenaꞌo hammiibee teepphee moochoon kuxxii beeheete.

²⁴ Fariseenaꞌo Yesuusin “Eke ebin ciine! Shambetoona Muusichi Sheeroo bajjiton amoyichiye boonoshi shuuneebeeto?” iꞌi echeheete.

²⁵ Yesuusiyoo “Daawitinaa biinna tookkii beetinaꞌona shaaceꞌi iriteetaa, Daawiti aabichii bi ito gaata shemmeyaachote?

²⁶ Abiyataari qeeshee guudo tuneꞌi bi beetaa, Daawiti Yeerichi kexooch giyiꞌi, qeesheenaꞌoyee damba bare asho maataachemmoyich Muusichi Sheeroo bajjiti yaaree koshon tiijjiꞌi maahe; biinna tookkii beetinaꞌoyichoo wotta aroochee immiye” iꞌi gettiye.

²⁷ Daakkiꞌi, “Yeeri ‘Shambetoo ashich qaawiihe’ iꞌi shambetoon bariihalli, ‘Asho shambetoyich hajjeebe’ iꞌi ashoon hallaanoone.

²⁸ Ebiyee Ashi Bushoo shambetoyichona Doonone” iye.