Maariqoosi 16 - Kafa Linguistics Project

Qitoochee Yesuusi Timo

¹ Shambetoo beshetoyee gubb Magidalechi Maariyami, Yaaqobichi indee Maariyaminaa Soloomina tuneꞌi Yesuusichi cahoon huutta cinnechi shittoon kemeheete.

² Shabaattee batti batti aaboobee maaddee yaaꞌoona, oppo beetooch hammiibee,

³ “Oppee kellee noonooch beeti ooge xaqqoon konine nooch gederikkemmo?” iꞌi yibbaateebee shaggiyeete.

⁴ Kaamee ciinniꞌi, oppee kellee noonooch beeti ooge xaqqo aroochee ikke badd gedereton beeggiyeete.

⁵ Shaggii, oppee daggooch giyii ciinniꞌi, nacce tahoon taheti ikke gurimaashoo are oppee gaꞌooch qanne badd koteꞌi beeton beeggii keqqiyeete.

⁶ Tunetaa aroo “Keqqiyaahote! Ittoshi qaawiibeeto yoodaa qititi Naazireetechi Yesuusiniye. Aroo hiniich aalloone; tiyitone! Bi cahoo qeyiti xaaꞌoo ebiyoche.

⁷ Andoo tunetaa hamiree bi dabbeenaꞌonoyich, Pheexiroosichoo ‘Ittoshich bi gettitoommon Galiila ittoshiyee shiichiree hammemmone; aroochaa beeggemmo ittoshine’ getote” iye.

⁸ Maacheenaꞌo keqqoona qeweebee maashoochee kechiꞌi woceheete. Boonoshi shattitoyich, konichona getaaneenaꞌone. [

Magidalechi Maariyamich Yesuusi Bekko

⁹ Shabaattee batti batt aaboobee maaddoona Yesuusi qitoochee bi tiyitoyee gubb, shiichii shabaatte yinneenaꞌon bi toommoochee bi yookkiti Magidalechi Maariyamich bekkehe.

¹⁰ Areyoo hammaꞌa eeppii muusheneꞌi beeti bi dabbeenaꞌoyich gettahan.

¹¹ Yesuusi qitoochee tiyiꞌi kashoona bi beemon, biichoo bi bekkoon ure waanee boonoshi waayetaa, iberiyaaneenaꞌone.

Gutte Bi Dabbeenaꞌoyich Yesuusi Bekko

¹² Ebiyee gubb, Yesuusi goyechi gafooch gommona hammiibeeti gutte bi dabbeenaꞌoyich bare malletoona bekkehe.

¹³ Boonoshiyoo wotteꞌi bare bi dabbeenaꞌoyich gettiyeete. Hini areenaꞌon wotta iberiyaaneenaꞌone.

Aaraa Ikke Bi Dabbeenaꞌoyich Yesuusi Bekko

¹⁴ Ebiyee gubb, maayoon maaya madooch boonoshi beetaa, Yesuusi aaraa ikke bi dabbeenaꞌoyich bekkehe. Qitoochee bi tiyitoyee gubb boonoshi aafoona beeggiti asheenaꞌo boonoshich gettiton iberiyee qayona boonoshi mullo muumetoyich, boonoshin noggehe.

¹⁵ Daakkiꞌi ishichiye: “Showee toommo bulliich hambote; ta mishiraachoon halleeto bullich getote.

¹⁶ Mulloon ta toommooch tooꞌiiꞌi aacona afaalleemmo wodemmone; tunebaani tooꞌiyaano toommooch nalleyemmone.

¹⁷ Mulloon tooꞌii beetinaꞌo ebi malletoon tuniyemminaꞌone: Ta shigoona asheenaꞌo toommoochee yinneenaꞌon yookkemminaꞌone; andire noonoona yibbaatemminaꞌone;

¹⁸ dingereenaꞌon boonoshi yeshigaata woyee wuxiibeeti xuppattoon boonoshi uyigaata, boonoshin amolla hallaachemmone; biiyechinaꞌochi toommooch boonoshi kishoon boonoshi kotiimmona biiyechinaꞌo wodemminaꞌone” iye.

Shimaajj Yesuusi Keyo

¹⁹ Doono Yesuusi ishin bi dabbeenaꞌoyich bi gettitoyee gubb, shimaajj kechiꞌi Yeerichi qannooch kotehe.

²⁰ Boonoshiyoo kechii bulli xaaꞌooch hammiꞌi Yesuusichi wochoon gettiyeete. Hammii boonoshi beetaa, Doono boonoshin gaachee beehe; bi immiibeeti malletoona boonoshi gettiibeeti qaaroon manjii beehe.]