Maariqoosi 15 - Kafa Linguistics Project

Phelaaxoosi Aafooch Yesuusi Neexo

¹ Dechara maaddoona qeeshee ukkireenaꞌo, showee geeneenaꞌonaa Muusichi Sheeree dojjechinaꞌona, Ayihudee nallechinaꞌo bullina tookkii boonoshi echeetoyee gubb, Yesuusin cuchiiꞌi daammii Phelaaxoosich beshiiꞌi immiyeete.

² Phelaaxoosi Yesuusin “Ne Ayihudeenaꞌo taatoo neene?” iꞌi echehe. Yesuusi wochiꞌi, “Newolla gettaa beetine” iye.

³ Arooba qeeshee ukkireenaꞌo bi toommooch taggoon yaaqqiyeete.

⁴ Phelaaxoosi wotta guttinnoon Yesuusin “Noonoo wochaachemmo neene? Ambiche taggoon ne toommooch boonoshi yaaqqii beeto gaata waayeyaachine?” iꞌi echehe.

⁵ Tunebaani Phelaaxoosi worganemmi wottoon Yesuusi minnakanna getaanoon qajjiye.

Qitee Nalloo Yesuusi Toommooch Nalleyoo

⁶ Phelaaxoosi nati natona hini baaree aabooba cucheꞌi beetinaꞌo daggoochee asheenaꞌo biishe iꞌi boonoshi qollemmi ikke uroon biichii beetone.

⁷ Arooba showee toommooch gino tiijjii ashoon wuxiꞌi cucheti, hukkechinaꞌo daggoochee tuneti, Barbaani getteebeeti uro cuyee kexooch beetone.

⁸ Dofee asheenaꞌo Phelaaxoosi waan giddeꞌi doyeetoommon boonoshich bi tuniyemmoyich biin qolleheete.

⁹ Phelaaxoosi wochiꞌi asheenaꞌon “Ayihudeenaꞌo taatoon ta biishon shunniyote?” iꞌi echehe.

¹⁰ Bi ishichito, qeeshee ukkireenaꞌo biin beshii boonoshi immito qanaateꞌi bi tunoon ariibeeto bi tunetoyichiye.

¹¹ Tunebaani qeeshee ukkireenaꞌo “ ‘Yesuusin toonoone; Barbaanin nooch biishe’ getiree qollebote” iꞌi asheenaꞌon kocciyeete.

¹² Ebich Phelaaxoosi wochinnoon “Hini ‘Ayihudeenaꞌo taatoo’ ittoshi ii beeton aabichibote?” iꞌi echehe.

¹³ Asheenaꞌo wochiꞌi, “Yoode!” iꞌi cookeeheete.

¹⁴ Phelaaxoosiyoo, “Amoyichiye? Bi gondochi amoone?” iꞌi echehe. Tunetaa boonoshi wochiꞌi, “Yoode!” iꞌi caagee cangecheheete.

¹⁵ Ebich Phelaaxoosi asheenaꞌon emirikkoyicha iꞌi Barbaanin biichiichii Yesuusin arengoona bi xoobbiitoyee gubb, bi yooddeyemmoyich beshii immiye.

Yesuusin Ginechinaꞌo Coono

¹⁶ Arooba ginee naayinaꞌo Firatoriyoo getteebeeti iraashoochi kibbooch daammiꞌi echeti boonoshi guuphinaꞌo bullin ikkooch ceeggii kiciyeete.

¹⁷ Yesuusich damere tahoon tajjiyeete; taatee malletoon tuneti gubbichoon angixoochee gengiꞌinoo bi qellooch ukiiheete.

¹⁸ Aroochee “Ayihudeenaꞌo taatoocho, ne taatittino manjibe” iibee mooꞌee diggiyoon diggiiheete.

¹⁹ Wotta bi qelloon shimeree gumboona xoobbiyeete; cudonoo bi toommooch cuddiyeete; wotta guteneꞌi goyinneheete.

²⁰ Eechiꞌi boonoshi coonetoyee gubb, boonoshi tajjiti damere tahoon shoottiichii, biichon tajjiꞌi yoodoyich daammiyeete.

Yesuusi Yooddeyoo

²¹ Hammii boonoshi beetaa, Iskindiroosinaa Rofoosinochi nihoo Qerenechi Simooni goyechi gafoochee waa beshee bi beetaa daneꞌi, “Masqaloon shaage” iꞌi yechiyeete.

²² Aroochee Golgooti getteebeeti xaꞌooch Yesuusin daammiyeete; Golgooti geto “Qellee Koofee Xaaꞌoo” getone.

²³ Arooch shaggiiꞌi hareboo bacceeti woyinee uyoon uye iꞌi biich immiyeete; tunebaani uyaanoon qajjiye.

²⁴ Aroochee masqalee toommooch biin yooddiyeete; bi tahoonoo boonoshi ikkikkoyich shaggemmon ariyoyich ixoon kuxxiꞌi qoodeeheete.

²⁵ Boonoshi yooddito maaddee keejje saatoochiye.

²⁶ Boonoshi taggee malletoo tuneti “Ayihudeenaꞌochi Taatoo” ii beeton kooritinaꞌone.

²⁷ Wotta biinna tookkii gutte bokkeenaꞌon ikkoon bi qanne badd, ikkoonoo bi yooche badd yooddiyeete.

²⁸ [Arooba Yaafe Macaafooch “Sheeroon shaaddetinaꞌona tookkii haddeehe” getaa kooreeto ceenniye.]

²⁹ Aroona besheebeeti gommechinaꞌo boonoshi qelloon shuurikkiibee naageheete. “Eeh, yaafee kexon happiichi wochiree keejje qemona haggeshocho!

³⁰ Eke masqalee toommoochee kindiree ne qelloon wodibe” iyeete.

³¹ Wotta qeeshee ukkireenaꞌonaa Muusichi Sheeree dojjechinaꞌona cooneebee boonoshinaa boonoshina ishichiyeete: “Bareenaꞌon wodiito bi qelloon wodiyoo mawiihe!

³² Beegiree no iberiyemmoyich Israꞌeelee taatoo Kiristoosi eke and masqaloochee kindibe” iyeete. Arooba biinna tookkii yooddeti bokkeenaꞌo wotta biin naaggiyeete.

Yesuusi Qitoo

³³ Haree shiritte saatoochee tiijjiꞌi yiixiye saato beddimmi wottoon showoo bulli manderehe.

³⁴ Yiixiye saato ceenaa, Yesuusi “Eloohe, Eloohe! Lamaa sabaqitaani?” iꞌi bi qaaroon oogichiꞌi cookiye. Ishi geto “Ta Nuggishoocho, ta Nuggishoocho! Amoyich taan qajjenne?” getone.

³⁵ Areegaata arooch neexee beetinaꞌoochee ikkikkeenaꞌo waayeꞌi, “Ebiyoche, Eliyaasin ceeggii beete!” iyeete.

³⁶ Bekkech are asheenaꞌo daggoochee ikkoo woccii hammii, kiikkere woyinee uyee daggooch isponjoon hacciꞌi deebii, “Eke qayote; Eliyaasi waaree biin bi kindiyemmo gaata beegone” iibee shimeree gumboona bi noonooch giddiiꞌi uchiye.

³⁷ Yesuusi oogichiꞌi bi cookitoyee gubb, bi kasho abbetehe.

³⁸ Arooba yaafee kexooch tippeeti maccillaatoo dambee tiijjiꞌi desh beddaahaa gutte badd kappheeꞌi keexee kechiye.

³⁹ Areegaata masqalee ciinooch neexeꞌi beeti balle ginee iraashoo Yesuusi aabichii [cookiꞌi] bi kasho abbeteto gaata beeggiꞌi, “Iberoon hini uro Yeerichi Bushoone” iye.

^40-41 Wotta ikkikke genneenaꞌo wokkii neexeechii ciinnii beeheete. Yesuusi Galiilee showooch bi beehooba boonoshi daggooch biin dabbii deggii gaacheebeeti Magidalechi Maariyami, Yaaqobi giishonaa Yoosinochi indee Maariyaminaa Soloomina eboshi beetinaꞌone. Biinna tookkii Yerusaalem kechiti meeti bare genneenaꞌo beetinaꞌone.

Yesuusi Duukko

⁴² Aroochee womikkoo wotteꞌi shambetoo gimooch giddehe. Ayihudeenaꞌochi Qanniyee aabo bi tunetoyich,

⁴³ Ayihudeenaꞌo oogiibeeti nallecho tuneti Arimaatechi Yooseefi waahe. Biyoo wotta woyemmi Yeerichi taatittineen quyeebeeti uroone. Aroo aafoon kuppheꞌi Phelaaxoosi aafooch giddeꞌi, “Yesuusichi cahoon taach imbe” iꞌi qollehe.

⁴⁴ Phelaaxoosi “Yesuusi aabi goora kaatee qitiye?” iꞌi worganehe. Ebich masqalee ciinooch neexeti balle ginee iraashoon ceekkiiꞌi, “Yesuusichi kasho kechii yagite?” iꞌi echehe.

⁴⁵ Hini are balle ginee iraashoo waanee Yesuusi qitoon xiishii manjiiꞌi tiyii Yooseefich daaggiye.

⁴⁶ Aroochee Yooseefi andire kaafenoon kemeꞌi, Yesuusichi cahoon masqaloochee kindii kaappiye. Xaqqee guudoochee gooshee shuuneeti oppooch daammii duukkiye. Wotta ooge xaqqoon gederikkiꞌi are oppee kelloon hicciye.

⁴⁷ Arooba Magidalechi Maariyaminaa Yoosichi indee Maariyamina Yesuusi aabiich bi duukketo gaata ciinnii beeheete.