Maariqoosi 14 - Kafa Linguistics Project

Yesuusi Wuxeyemmi Gommon Ayihudeenaꞌo Qaawoo

¹ Beshee Baaroonaa Shittoo Giyaani Kochi Baaroonon boonoshi baaremmi aabo katinniꞌi gutte qemo echehe. Qeeshee ukkireenaꞌonaa Muusichi Sheeree dojjechinaꞌona Yesuusin maroona yeshiree boonoshi wuxemmi gommon qaawiyeete.

² Tunetaa “Hini baaree aaboona tunaaye; asheenaꞌo kaaroon tiijjemminaꞌone” iyeete.

Ikke Ure Shittoon Yesuusichi Toommooch Ukkoo

³ Arooba Yesuusi Bitaaniya, qeddee shaddee biiyoona biiyeꞌi woditi Simooni kexooch beehe. Are kexoochee maayo giddetaa madee toommooch bi beetaa, ikke ure alibaxiroosi firiqaadee ceeni, aaxxe gatiyechi, gaawe cinnechi naaridoosi shittoon yechaꞌa waahan. Waa firiqaadoon tiichaꞌa are shittoon Yesuusichi shimbooch ukkiyan.

⁴ Arooch beeti asheenaꞌo daggoochee ikkikkeenaꞌo ippeꞌi, “Hini shittoon cikkii bi duubiibeeto amoyichiye?

⁵ Ebi shitto keejje balle diinaaroyee beshe gatiyoona kemaa girechinaꞌoyich amoyich icheyaache?” iꞌi boonoshinaa boonoshina yibbaateheete; ureenoo kaareheete.

⁶ Tunetaa Yesuusi ishichiye: “Qayote! Hini ureen amoyich iritii beetote? Biyoo taach deꞌe shuunoon shuunetine.

⁷ Girechinaꞌo bulli aaboon ittoshina tookkiiniye boonoshi beeto; ittoshi qaawimmi aaboon aatolla boonoshin gaachoon hakkiyote. Tunebaani ta bulli aaboon ittoshina tookki beetaachemmo taane.

⁸ Hini ure bi hakkee wottoon taach shuunetine; duukkeyaan ta beetaa shiichaꞌa ta ashittinoon huuttetine.

⁹ Iberoon ittoshich gettoye: Asheenaꞌo hini mishiraachoon boonoshi gettimmi showee toommo aabiichona, biin shalligoyich aree shuuneton wotta gettemminaꞌone” iye.

Yesuusin Beshiiꞌi Imoyich Yihudi Koceyoo

¹⁰ Ebiyee gubb, aaraa gutte bi dabbeenaꞌo daggoochee ikkoo Asqorootechi Yihudi Yesuusin beshiiꞌi imoyich, qeeshee ukkireenaꞌo waan hammiye.

¹¹ Boonoshiyoo ishin waayeꞌi emiriibee, “Nooch beshii ne imigaata, gijjoon neech immemmo noone” iꞌi gibenikkiyeete. Yihudiyoo “Yesuusin aabichiree beshii imbote?” iibee beshiiree bi immemmi holloon qaawii beehe.

Baaree Maayoon Bi Dabbeenaꞌona Tookkii Yesuusi Mamo

¹² Beshee Baaree bagoon boonoshi guuriibeeti Shittoo Giyaani Kochi Baaree batti batti aabooba, bi dabbeenaꞌo Yesuusin “Beshee Baaree maayoon ne maayemmoyich aabiich hamiree qanniibona?” iꞌi echeheete.

¹³ Arooba Yesuusi bi dabbeenaꞌo daggoochee gutteenaꞌon ishichiꞌi wochehe: “Katemooch hambote; hamiree aachi qondoon shaaggiti uroon danemmo ittoshine; biin dabbi hambote.

¹⁴ Bi giyimmi kexooch giyiree kechi doonon ‘Dojjecho “Ta dabbeenaꞌona tookki Beshee Baaree maayoon ta maayemmi iibbee kexo aabiichiye?” itone’ getote.

¹⁵ Biyoo kechi toommeexi kexooch keyiree yaggaa qanniti gamini xaaꞌoon ittoshich bekkiyemmone. Aroochaanoo nooch qanniibote” iye.

¹⁶ Gutte bi dabbeenaꞌo kechiꞌi katemooch hammiyeete. Yesuusi gettitoommon bullin daneꞌi Beshee Baaree maayoon arooch qanniiheete.

¹⁷ Aroobee xum aaraa gutte bi dabbeenaꞌona tookkii Yesuusi arooch waahe.

¹⁸ Ikkoochoo koteꞌi maayo giddetaa maa boonoshi beetaa Yesuusi ishichiye: “Iberoon ittoshich gettoye, ittoshi daggoochee ikkoo taan beshiiree immemmone; biyoo and taanna tookkii maa beetone” iye.

¹⁹ Boonoshiyoo ebi mooyona ayiniꞌi boonoshi qelli qelloona “Ta tunehote?” iꞌi Yesuusin echooch giyiyeete.

²⁰ Yesuusi wochiꞌi, “Hini aaraa guttoo ittoshi daggoochee ikkoo taanna tookkii ikke shaatooch dukkee beetone taan beshiiree immemmo.

²¹ Ashi Bushoo biicho bi kooreetoommon qitemmone; tunebaani Ashi Bushoon beshiiree immemmi are uroyich woowo! Are uro shiijjeyaanoon bi dooggito gaata biich gaawiye” iye.

Yesuusichi Meenonaa Damoonochi Shalligichoo

²² Boonoshi maa beetaa, Yesuusi koshon tiijjiꞌi Yeerin galletehe; tiichiꞌi bi dabbeenaꞌoyich immiibee, “Haꞌote; hini ta meenone” iye.

²³ Wotta woyinee uyo yechiti xoofoon tiijjii Yeerin galleteꞌi boonoshich immiye. Boonoshi bulliyoo are xoofoochee uchiyeete.

²⁴ Biyoo “Hini meetinaꞌoyich ufemmi ta damoo Yeeri neechemmi [andire] wogee malletoone.

²⁵ Iberoon ittoshich gettoye: Yeerichi taatittineechaa andiroon ta uchemmi aabee wottoon ebiyee damba hini woyinee uyoochee uyaachemmo taane” iye.

²⁶ Boonoshiyoo Yeerich shoddoon boonoshi shoddetoyee gubb tiyiꞌi, Zayitee Michi guudooch hammiyeete.

Pheexiroosi Biin Nookkemmo Tunoon Yesuusi Geto

²⁷ Arooba Yesuusi bi dabbeenaꞌoyich ishichiye: “ ‘Yeeri “Qiddoon xoobbemmo taane; bageenaꞌoo shacemminaꞌone” iꞌi gettitone’ getaa Yaafe Macaafooch kooreetone. Ebich [hanaach xum] ittoshi bulli taan qajjemmo ittoshine.

²⁸ Tunebaani qitoochee ta tiyetoyee gubb, ittoshiyee shiichiree Galiila hammemmo taane” iye.

²⁹ Arooba Pheexiroosi tiyiꞌi, “Bareenaꞌo bulli neen boonoshi qayi gaatoona, ta neen cir qayaache” iye.

³⁰ Yesuusi “Iberoon neech gettoye: Hanaach xum baakkoo guttaa kuukkaahaa, keejje wottoon taan nookkemmo neene” iye.

³¹ Pheexiroosi wochiꞌi, “Qitolla bi tunegaata, neenna tookki qitehani cir neen nookkeyaache” iꞌi kupphiiꞌi gettiye. Bareenaꞌo bulliyoo ebiyoommon gettiyeete.

Getesemaanaa Yesuusi Corootoo

³² Yesuusi bi dabbeenaꞌona tookkii Getesemaani getteebeeti xaaꞌooch hammiye. Yesuusi boonoshin “Ta okk ebiich hamiree corootibona; ittoshi hiniich kotebote” iye.

³³ Pheexiroosin, Yaaqobinaa Yowannisinon dabbiiꞌi hammiye. Bi kasho keyaano giyaano yullehe.

³⁴ Boonoshin “Ta kashe ayinoona xuuxaꞌa kech beddetine. Hiniich beebote; tokketaayi kuppheree quyebote” iye.

³⁵ Boonoshi aafoochee giishechoon wokkiꞌi hammiye. Showooch baroona guufeechii, tunesho gaata, hini saatooch tunemmi mooyo echemmoyich corootiye.

³⁶ Ishichiye: “Taabbo, ta Nihoocho! Bulli neech hakkeehe. Hini xuuxee xoofoon ta waanee wokkiibe. Tunetaa ne daaggoo tunebaani, ta daaggoo tunaaye” iye.

³⁷ Aroochee keejje bi dabbeenaꞌo waan wotteꞌi bi waahaa, tokketeꞌi beetinaꞌon danehe. Pheexiroosinoo “Simoono, tokketenne? Ikke saatoonona kupphaꞌa quyoon hakkaachine?” iye.

³⁸ Daakkiꞌi, “Gondoochi nihoo dawushooch ittoshi giyaachemmoyich kuppheree quyebote; corootibote. Asho bi mulloona deꞌoon shuunoyich gabii beetone; tunetaa meenoyich yiingoo aalloone” iye.

³⁹ Wotta hammiꞌi shiichii bi corootitoommon daakkiꞌi corootiye.

⁴⁰ Guttinnoon wotteꞌi bi waahaa, geepphirona daadeeꞌi tokketee boonoshi beetaa danehe. Boonoshiyoo areegaata boonoshi gettemmon mucceheete.

⁴¹ Daakkii keejjinnoon wottee waaꞌi, “Andoo batt tokketee kasheꞌiniye ittoshi beeto? Beddiye! Saato bedditone. And Ashi Bushoon axaaxechinaꞌo kishooch beshiiree immemminaꞌone.

⁴² Tibote, hambone! Andoo taan beshiiree immemmo shaggitone!” iye.

Yesuusi Yecheyoo

⁴³ Yesuusi ishin yibbaatee bi beetaa, bekkech aaraa gutteexi ikkoo Yihudi shaggiye. Biinna tookkii dofee asheenaꞌo goraadoonaa yeelloonon yechiꞌi waaheete. Boonoshiyoo qeeshee ukkireenaꞌo, Muusichi Sheeree dojjechinaꞌonaa geeneenaꞌona waanee wochetaa waatinaꞌone.

⁴⁴ Yesuusin beshii immiti Yihudi, “Diggiiree ta shummemmo aroone; aroon manjii yeshiree daambote” iꞌi shiichii malletoon boonoshich immitone.

⁴⁵ Yihudi shaggii bekkech Yesuus waan giddeꞌi, “Dojjechocho!” iꞌi shummiye.

⁴⁶ Asheenaꞌoo Yesuusin yechiyeete.

⁴⁷ Tunetaa arooch neexeꞌi beetinaꞌo daggoochee ikkoo goraadoon kaaccii daachiiꞌi qeeshee guudoochi guuno waamon karii kindiihe.

⁴⁸ Yesuusi boonoshich ishichiye: “Bokkoon yeshoommon taan yecha goraadoonaa yeelloonon yechiꞌi waahote?

⁴⁹ Yaafee kexooch bulli aaboon dojjaabee ittoshina tookkaa ta beehooba taan yeshaano ittoshine. Tunebaani ebi tuneto, Yaafe Macaafooch kooreeti mooyo bi ceennemmoyichiye” iye.

⁵⁰ Arooba bi dabbeenaꞌo bulli biin duppiichii aalleheete.

⁵¹ Areegaata naxaloon baach gammenneti ikke gurimaashoo Yesuusin dabbii bi beetaa, asheenaꞌo biin yechiyeete.

⁵² Boonoshi yechimmona, naxaloon shoottii duppiichii shokkaachoon muricciye.

Ayihudee Nallechinaꞌo Aafooch Yesuusi Neexo

⁵³ Aroochee Yesuusin qeeshee guudo waan daammiyeete. Qeeshee ukkireenaꞌo, geeneenaꞌonaa Muusichi Sheeree dojjechinaꞌona bulli arooch kiceeheete.

⁵⁴ Arooba Pheexiroosi qeeshee guudoochi kibbooch beddaahaa wokkiibee Yesuusin dabbiye. Hammii uxeree maac giyii kellechinaꞌona tookkii koteꞌi qaaqqoon kachii beehe.

⁵⁵ Arooba qeeshee ukkireenaꞌonaa kaacheti Ayihudee nallechinaꞌo bullina Yesuusin wuxiiya bi toommooch miixemmon qaawiyeete; tunetaa daneyaaneenaꞌone.

⁵⁶ Ebiyoo meetinaꞌo bi toommooch boonoshi miixeti mooyo kooto bi tunetoyichiye. Boonoshi miixeti miixee qaaro ikkotteyaanoone.

⁵⁷ Ikkikkeenaꞌo tiyii kootoon ishichiꞌi miixeheete:

⁵⁸ “ ‘Ta hini ashi kishoona hakketi yaafee kexon happiichi ashi kishoona hakkeyaani bare yaafee kexon keejje qemona haggemmo taane’ iꞌi bi getaa waayeto noone” iyeete.

⁵⁹ Tunetaa boonoshi qaaro ikkotteyaanoone.

⁶⁰ Aree hillooch qeeshee guudo boonoshi daggoochee tiyii neexeꞌi Yesuusin “Ebi ne toommooch miixee beetinaꞌoyich noonoo wochaachemmo neene?” iꞌi echehe.

⁶¹ Tunetaa Yesuusi cikkii qajjiye; minnakanna getaanoone. Wotta wochiꞌi qeeshee guudo “Galleteeti Yeerichi Bushoo Kiristoosi neene?” iꞌi echehe.

⁶² Yesuusi wochiꞌi, “Eeha, taane. Ashi Bushoo Giidechi Yeerichi qanne badd bi kotetaa, wotta shimaajji qubee daggoona bi waataa beeggemmo ittoshine” iye.

⁶³ Arooba qeeshee guudo bi tahoon keexxiꞌi, “Ebiyee damba amee miixoo qaawiihe?

⁶⁴ Bi naagoon gaata, waayeto ittoshine. Illa ittoshich amo shaahii beete?” iye. Boonoshi bulliyoo “Qita beddiye” iꞌi nalliyeete.

⁶⁵ Boonoshi daggoochee ikkikkeenaꞌo bi toommooch cuddiyeete; bi aafoon kaappiichii xoobbiibee, “Konine neen xoobbito? Eke keemecho ne gaata gete” iyeete. Aree hillooch kellechinaꞌo tappeebee daammiyeete.

Pheexiroosi Yesuusin Nookko

⁶⁶ Areegaata Pheexiroosi kibbee maac deshi baata bi beetaa, qeeshee guudoochi shaajjeteenaꞌo daggoochee ikkee bi beetooch waahan.

⁶⁷ Pheexiroosi qaaqqoon kachii bi beetaa beeggaꞌa, giddaa manjii ciinnahan. Biyoo “Ne Naazireetechi Yesuusina tookkii beeto neene” iyan.

⁶⁸ Tunetaa Pheexiroosi wochiꞌi, “Ne gettaa beeton ariyaache; ne yibbaatoo taach giyaache” iꞌi nookkehe. Ishichiꞌi tiyii kellooch kechiye [baakkoo kuukkiye].

⁶⁹ Wotta hini are shaajjetee Pheexiroosin ciinnaꞌa arooch neexee beetinaꞌoyich “Hini uro boonoshi daggeexone” iyaꞌa daakkaa gettahan.

⁷⁰ Tunetaa Pheexiroosi andoo wotta nookkehe. Giishechoon yiccimiꞌi arooch neexee beetinaꞌo wochinnoon Pheexiroosin “Halla ne Galiilee asho neene. Iberoon boonoshi daggeexo neene” iyeete.

⁷¹ Tunetaa Pheexiroosi “Hini ittoshi gettiibeeti uroon ariyaano taane” iꞌi bi kashoon uppii wogehe.

⁷² Bekkech guttinnoon baakkoo kuukkiye. Pheexiroosi “Baakkoo guttaa kuukkaahaa keejje wottoon taan nookkemmo neene” Yesuusi iti qaaroon gabiꞌi tiittee eeppiye.