Maariqoosi 13 - Kafa Linguistics Project

Yaafee Kechi Happeyoon Yesuusi Geto

¹ Yesuusi yaafee kexoochee bi kechii beetaa, bi dabbeenaꞌo daggoochee ikkoo “Dojjechocho, hinin beeggenne? Hini xaqqeenaꞌonaa xaqqee kexinaꞌona am shaahoon ogoogeheete!” iye.

² Yesuusi wochiꞌi, “Hini ogooge xaqqee kexinaꞌon beeggaa beetine? Etto kishoona happeyaanoon xaqqo xaqqee toommooch keddeeree ebina beetaachemmoone” iye.

Yemeenee Ciiree Malletoo

³ Ebiyee gubb, Yesuusi Yeerichi yaafee kechi ciinooch beeti Zayitee Michi guudooch kotee bi beetaa, Pheexiroosi, Yaaqobi, Yowannisi, Indiriyaasi eboshi baach Yesuus waan giddeꞌi,

⁴ “Hini mooyo bi tunemmo aatane? Hini mooyo bulli ceenn bedon bekkiyemmi malletoo amoone? Eke nooch gete” iꞌi echeheete.

⁵ Yesuusi wochiꞌi ishichiye: “Koniyoona ittoshin muriciyaachemmoyich ittoshi qelloon quyebote.

⁶ Meetinaꞌo ‘Ta aroo taane’ getibee ta shigoona waaree meeti asheenaꞌon muriciyemminaꞌone.

⁷ Ginee koyoonaa ginee woroonon ittoshi waayehooba keqqiyaahote. Ebi tuno echeyaachemmone; tunebaani yemeenee ciiro bekkech tuneyaachemmone.

⁸ Arooba ikke aagetoo bare aagetoona, ikke showee taatoo bare showee taatoona koyemmone; baribare xaaꞌoochoo showee qewo tunemmone; shaacoo giyemmone. Eboshi bekkiibeeto batt maaxee xuuxee gimoniye.

⁹ “Illa ittoshi qelloon quyebote; nallechinaꞌoyich ittoshin beshiiree immemminaꞌone; Ayihudeenaꞌo kiceebeeti kexoochaa arengoona xooppemmo ittoshine; ta miixoo ittoshi tunemmoyich ta naboyich iraasheenaꞌonaa taateenaꞌonochi aafooch neexemmo ittoshine.

¹⁰ Shiichiree mishiraachee qaaro aageteenaꞌo bullich getteyoo qaawiihe.

¹¹ Wotta asheenaꞌo ittoshin beshii imiyooba, ‘Ama gettehone?’ getiree shiichi iriteyaahote. Tunebaani areegaata Yeeri ittoshich immimmi mooyon getote. Gettemmo Yaafe Ayaanoani ittoshi toonoone.

¹² “Arooba manoo bi manoon, nihoo bi bushoon wuxemmi asheenaꞌoyich beshiiree immemmone; wotta bushiisheenaꞌo boonoshi niheenaꞌonaa boonoshi indeenaꞌonochi toommooch tiyiree wuxiyemminaꞌone.

¹³ Asheenaꞌo bulli ta naboyich ittoshin shixxemminaꞌone; tunetaa ciirooch beddaahaa manjiꞌi kupphemmo wodemmone” iye.

Aalloon Deebemmi Eeꞌo

¹⁴ “Tunebaani [keemechi Daaneeli gettiti] aalloon deebemmi eeꞌo bi neex bedaani xaaꞌooch neexetaa, beeggemmo ittoshine. (Ebiyooba shemmecho shalligibe.) Arooba Yihudee showooch beetinaꞌo geppoo beetooch maxxebeete.

¹⁵ Kechi toommooch beeto ‘Kindiree kexooch beeti ta qiicoon deebona’ getiree giyaaye.

¹⁶ Wotta goyee toommooch beeto bi qoreddoon deeboyich gubb wottaaye.

¹⁷ Arooba yeqqefechinaꞌonaa bushoon xaachii beetinaꞌonoyich woowo!

¹⁸ Ebi bulli yooyooba bi tuneyaachemmoyich corootibote.

¹⁹ Arooba Yeeri showoonaa shimaayoonon hallitoochee tiijjiꞌi hanaach beddaahaa bekkeyaani, gubbichoo wotta bekkeyaachemmi xuuxo tunemmone.

²⁰ Doono ebi are aabeenaꞌon bi qamichaan gaata, koniyoona wodaacheshone; tunebaani bi kaacciti asheenaꞌoyicha iꞌi ebi are aabeenaꞌon qamichitone.

²¹ Arooba koniyoona ittoshich ‘Hini beege! Kiristoosi hiniich beetone’ woyee ‘Okk ebiich beetone’ bi getigaata, iberiyaahote.

²² ‘Taane Kiristoosi’, wotta ‘Taane keemecho’ getibee muriciyemminaꞌo tiyemminaꞌone. Boonoshiyoo ‘Nooch bi hakkeegaata Yeeri kaaccitinaꞌon muriciibone’ getibee malletoonaa gaakkechi shuunoonon shuunemminaꞌone.

²³ Illa bullin shiichaꞌa ittoshich getteto taane; ittoshi qelloon quyebote” iye.

Ashi Bushoochi Womo

²⁴ Wotta Yesuusi daakkiꞌi ishichiye: “Ebiyooba ebi are xuuxoyee gubb, ‘Aabe manderemmine; ageneyoo aaxxeyaachemmine;

²⁵ xojjeneenaꞌo shimaayoochee hollemminaꞌone; shimaajji giideenaꞌo shuuremminaꞌone.’

²⁶ “Arooba Ashi Bushoo ta wodde giidoonaa oogee yiiroona qubee daggoona ta waataa beeggemminaꞌone.

²⁷ Tawoo maraakeenaꞌon wochemmo taane; boonoshiyoo hamiree awudde kelloona showee tuggoochee, shimaayee tuggoocheenoo Yeeri kaaccitinaꞌon kicemminaꞌone” iye.

Balaasee Mixo Bekkiibeeti Mooyo

²⁸ “Wotta balaasee mixoochee malletoon beegote. Balaasee mixo quummiꞌi atee bi waajjegaata, arooba qaawoo womon ariibeeto ittoshine.

²⁹ Ebiyoommon wotta hini mooyinaꞌo tunoon ittoshi beegiyooba, Ashi Bushoochi womo katinniꞌi kellooch shaggito bi tunoon ariibote.

³⁰ Iberoon ittoshich gettoye: Hini mooyinaꞌo bulli tuneyaanoon hini shiijjeroo besheyaachemmone.

³¹ Showoonaa shimaayoona beshemmone; tunebaani ta qaaro besheyaachemmone” iye.

Are Aaboonaa Are Saatoonon Koniyoona Ariyee Qayo

³² “Tunetaa are aaboonaa are saatoonon Nihoo Yeeriyee damba ariibeeto aalloone. Shimaajji maraakeenaꞌo tunebeeta, Yeerichi Bushoo tuneba ariibeeto aalloone.

³³ Are aabo aata bi tunemmo gaata ariyaano ittoshine. Ebich qaalliree quyebote! [Corootibote!]

³⁴ Ebiyoo bi kexoochee kechiꞌi wohi gommon hammiibeeti uroommone. Aroo bi wochee bushiisheenaꞌoyich boonoshi qelli qelloona shuunoon qoodii immiichii wotta kellechon ‘Gaawichiree kelloon quyebe’ ii gettiichii hammiye.

^35-36 “Are kechi doono illa showoo xumeechaa tuneba xumee gutte qellimooch tuneba qaabbe baakkee kuuhooch tuneba haree gaargaarooch tuneba aata bi woyemmo gaata ariyaano ittoshine. Ebich diqqich tokketooch ittoshi beetaa, bi waataachemmoyich kuppheree quyebote.

³⁷ Ittoshich ta gettaa beetoommon bullich gettoye; kuppheree quyebote” iye.