Maariqoosi 12 - Kafa Linguistics Project

Woyinee Quyechinaꞌochi Shaahiyoo

¹ Daakkiꞌi Yesuusi shaahiyoona ishichiꞌi getooch giyiye: “Ikke uro woyinee aafoon aafeebeeti meeti woyinoon bechiye; bi guudoon xaqqoona uxerehe; woyinee hiicci oppoon iijjiye; dilaaloon shuunehe. Aroochee shiimemmi quyechinaꞌoyich quyiichii bare showooch hammiye.

² Woyinee aafee gooroo shagaa, ‘Woyinee aafoon qoodeeree ta qoodoon deebe’ iꞌi ikke bi guunon woyinee quyechinaꞌo waan wochehe.

³ Boonoshiyoo are bi guunon yechii xoobbiꞌi shokke kishoon wochii daachiiheete.

⁴ Daakkiꞌi bare guunon boonoshi waan bi wochetaa, boonoshiyoo bi qelloon xaqqoona yexxii gaakkiꞌi coonee wochiyeete.

⁵ Wotta baroon wochehe. Boonoshiyoo wuxiyeete. Bi wocheti bare meetinaꞌo daggoochee ikkikkeenaꞌon xoobbiyeete; bareenaꞌonoo wuxiyeete.

⁶ “Ebiyee gubb, woyinee doonoyich ikke bi shuni bushoo ikkeeto echehe. Ciiroochaa ‘Ta bushoon oogiyemminaꞌone’ iꞌi bi bushoon boonoshi waan wochehe.

⁷ “Tunebaani are woyinee quyechinaꞌo boonoshinaa boonoshina ‘Bi woraasho hinine. Ittoshi waataa wuxibone. Hini bi iristo noocho tunemmone’ iyeete.

⁸ Ebina bushoon yechiꞌi wuxiyeete; woyinee uxeree maach bi dubenoon kichii duppiyeete.

⁹ “Arooba woyinee doono aabichehe? Bi hajjee baatoona woyinee quyechinaꞌo waan hamiree boonoshin aalliyemmone. Woyinee goyoonoo bare quyechinaꞌoyich immemmone.

^10-11 “Illa ‘Gimbenyeenaꞌo hoxee duppiti xaqqo, aroo kexon deggii neechiibeeti giimbee guummon tunetone. Ebinoo Doono Yeeri tuniitone; hini mooyo no beeggich worganikkito tunetone’ ii beeton Yaafe Macaafoochee shemmeyaachote?” iye.

¹² Ayihudee iraasheenaꞌo ebi shaahiyoona bi gettiibeeto boonoshin bi tunoon ariiꞌi Yesuusin yecha qaawiyeete; tunebaani asheenaꞌon shattiꞌi qajjii hammiyeete.

Qesaarich Qaraxee Qoco

¹³ Ebiyee gubb, Yesuusichi noonoochee muricoon boonoshi danemmoyich, Fariseenaꞌonaa Heroodisinochi asheenaꞌona daggoochee ikkikkeenaꞌon bi waan wocheheete.

¹⁴ Wocheetinaꞌo waaꞌi Yesuusin “Dojjechocho, ashoon giisho oogoo getaanoon iberoon Yeerichi gommon dojjaabeeto neene. Ebich ibere moochecho, konichona beshii shappii dabiyaano ne tunoon ariibeeto noone. Illa Qesaarich qaraxee qocon Muusichi Sheeroo daaggiibeetee, daaggaache? Qaraxoon qoconaa woyee qoccaayona?” iꞌi echeheete.

¹⁵ Tunetaa Yesuusi boonoshi noonee noocon ariiꞌi, “Amoyich taan muriciiya qaawii beetote? Eke ikke diinaaroon taach deebi bekkiibote” iye.

¹⁶ Boonoshiyoo deebii biich boonoshi bekkiitaa, “Hini gijjee toommooch beeti malletoonaa kooreeti shigoona konichone?” iꞌi echehe. Boonoshiyoo “Qesaarichone” iꞌi wochiyeete.

¹⁷ Yesuusi wochiꞌi, “Ishigaata, Qesaarichon Qesaarich, Yeerichon Yeerich imbote” iye. Boonoshiyoo bi yibbaateti mooyon worganeheete.

Qitoyee Gubb Shaago Woyee Shaakkeyoo Aallo Bi Tuno

¹⁸ Wotta “Qititinaꞌo tiyaachemminaꞌone” ii beeti Saduuqeenaꞌo daggoochee ikkikkeenaꞌo Yesuus waan waaꞌi ishichii echeheete:

¹⁹ “Dojjechocho, Muusi ‘Ikke uro mecheen shaaggiꞌi bushoon shiyaanoon bi qitigaata, bi manoo are ureen shaagiree qititi bi manoyich bushoon keribe’ iꞌi Sheeree Macaafoochaa nooch kooritone.

²⁰ Ebiyoommon shabaatte maneenaꞌo beeheete; boonoshi daggoochee qaabboo mecheen shaaggiꞌi bushoon shiyaanoon qitiye.

²¹ Ebina bi hilloo woraashiꞌi wotta shiyaanoon qitiye. Bi keejjinnoo woraashiye; biyoo ebiyoommon qitiye.

²² Shabaattee ciireexooch beddaahaa bulli ureen woraashiꞌi bushoon shiyaanoon qitii ciireheete. Bulliyee gubb ure wotta qitiyan.

²³ Illa hini shabaatteenaꞌo are ureen shaaggitinaꞌone. Ebich qititinaꞌo tiyiyooba ebi ure mechee bi tunemmo aabichiye?” iꞌi echeheete.

²⁴ Yesuusi wochiꞌi ishichiye: “Yaafe Macaafo gettii beetonaa Yeerichi giidoonon ittoshi tuushitoyich muricciyote.

²⁵ Qititinaꞌo tiyiyooba, boonoshi tunemmo shimaajji maraakeenaꞌoommonalli shaagaacheete; shaakkeyaacheete.

²⁶ Qititinaꞌochi timon, Yeeri tushee qaaqqee daggoochaa Muusich amoon bi gettito gaata, Muusi kooriti macaafoochee shemmeyaachote? Ebiyoo ‘Ta Abrahamichi Nuggishoo, Yisaaqichi Nuggishoo, Yaaqobichi Nuggishoo taane’ ii beetone.

²⁷ Illa kashechinaꞌochi Nuggishoani qititinaꞌochi Nuggishoo toonoone. Ebich ittoshi oogichii muriccitote” iye.

Bulliyee Beshe Sheeroo

²⁸ Muusichi Sheeree dojjechinaꞌo daggoochee ikkoo giddee, Saduuqeenaꞌo gajjitee beeton waayeꞌi, Yesuusiyoo gaawichii boonoshich bi wochoon beeggiꞌi, Yesuusin “Sheeroo bulliichee beshe sheeroo aabine?” iꞌi echehe.

²⁹ Yesuusi wochiꞌi ishichiye: “Bulliyee beshe sheeroo ‘Israꞌeeleenaꞌote, waayebote! Yeeri no Nuggishoo ikke Nuggishoone.

³⁰ Newoo ne Nuggishoo Doono Yeerin ceeni ne mulloona, ceeni ne kashoona, ceeni ne shalligoona, ceeni ne giidoonoo shune’ ii beetone.

³¹ Guttinnee sheeroo ‘Neenoommi ne manoon neenna tachiree shune’ ii beetone. Hini gutteenaꞌoyee beshe bare sheeroo aalloone” iye.

³² Hini are sheeree dojjecho Yesuusich ishichiye: “Tatoone, Dojjechocho! ‘Yeeri ikkoone; biyee damba baroo aalloone’ iyaꞌa ne getteto iberoone.

³³ Ebich asho ceeni bi mulloona, ceeni bi shalligoona, ceeni bi giidoona Yeerin shunonaa biinoommi bi manoon biinna tachiꞌi shunona micciibeeti deejjoonaa meeti bare deejjeenaꞌo bullinon Yeerich deejjoyee beshoone” iye.

³⁴ Yesuusiyoo uro shalligiꞌi wochoon beeggiꞌi, “Ne, Yeerichi taatittinee daggoochee wokketo toono neene” iye. Ebiyee gubb, Yesuusin echoyich aafoon kuppheto koniyoona aalloone.

Muusichi Sheeree Dojjechinaꞌon Yesuusi Echo

³⁵ Yesuusi yaafee kexoochaa dojjiibee ishichiꞌi echehe: “Muusichi Sheeree dojjechinaꞌo ‘Kiristoosi Daawitichi bushoone’ iꞌi amoyichiye boonoshi gettiibeeto?

³⁶ Daawiti bi qelloona Yaafe Ayaano biich shalligichaa, ‘Doono Yeeriyoo ta Doonon, “Ne etteenaꞌon ne baatee dechiich ta dichimmi wottoon ta qannooch kotebe” itone’ iye.

³⁷ Illa Daawiti biin ‘Doono’ itone. Ishigaata, aabichiree Daawitichi bushoo tunehe?” iye. Ebin dofee asheenaꞌo bi waanee emiroona waayeheete.

Muusichi Sheeree Dojjechinaꞌo Waanee Bi Qelloon Quyo

^38-39 Wotta Yesuusi dojjiibee ishichiye: “Genje tahoon taheꞌi guudon, gabiyee godoochaa ‘Showooch qebona’ ii beeti diggiyoon, Ayihudeenaꞌo kiceebeeti kexoochaa genje gabberoon, gifiree kexoochaanoo oogee xaaꞌoon qaawiibeeti Muusichi Sheeree dojjechinaꞌo waanee ittoshi qelloon quyebote.

⁴⁰ Xuume maacheenaꞌo kexon tiichiibee cadiqo shaahi bekkeya iꞌi corootoon geechii genjii beetinaꞌone. Eboshi toommooch Yeeri beshe shattii giiriiti nalloon kindiyemmone” iye.

Ikke Girechi Xuumee Immeti Gijjoo

⁴¹ Yesuusi yaafee kechi daggooch gijjoo kiceebeeti qiicee aafooch koteechii, asheenaꞌo qiicee daggooch gijjoon boonoshi duppii beetaa ciinnii beehe. Meeti gaannechinaꞌo woddoon duppiyeete.

⁴² Arooba ikke girechi xuume ure waaꞌa gutte duuden duppahan.

⁴³ Aroochee Yesuusi bi dabbeenaꞌon ceeggiꞌi ishichiye: “Iberoon ittoshich gettoye, hini qiicee daggooch gijjoon duppiti meeti asheenaꞌo bulliyee hini girechi xuume ureene beshoon duppeti.

⁴⁴ Bareenaꞌo boonoshich beddiꞌi echeti gijjoocheeniye deebii boonoshi duppito; tunebaani hini ure girechi bi tunetaanoona maaree bi qeyemmon echiyaanoon biich beeti bullinoo duppetine” iye.