Maariqoosi 11 - Kafa Linguistics Project

Oogoona Yesuusi Yerusaalem Gimo

¹ Yesuusinaa bi dabbeenaꞌona Yerusaalem katinniꞌi, Zayitee Michi guudooch beeti Beetifaaginaa Bitaaniyinooch shaggiyeete. Aroochee Yesuusi bi dabbeenaꞌo daggoochee gutteenaꞌon ishichiꞌi wochehe:

² “Ittoshiyoo aaf beeti gafooch hambote; hami shagiree, batt koniyoona yebbeyaani kuree bushoo tippeeꞌi beeton danemmo ittoshine; aroon biishiree deebote.

³ Asho koniyoona tiyiꞌi ittoshin ‘Amoyichiye ittoshi biichii beeto?’ iꞌi bi echegaata, ‘Doonoyich bi qaaweetoyichiye. “Kaate wochiree deejjemmo taane” itone’ getote” iye.

⁴ Boonoshiyoo hammiꞌi gommi gashooch, kechi kellooch tippeeꞌi beeti kuree bushoon danee biichii boonoshi beetaa,

⁵ arooch neexeebeeti asheenaꞌo daggoochee ikkikkeenaꞌo “Kuree bushoon amoyichiye ittoshi biichii beeto?” iꞌi echeheete.

⁶ Boonoshiyoo wochiꞌi Yesuusi gettiton asheenaꞌoyich gettiyeete; asheenaꞌoo cikkii qajjiyeete.

⁷ Aroochee bi dabbeenaꞌo kuree bushoon Yesuus waan deebiyeete. Deebiꞌi bi toommooch boonoshi tahoon boonoshi gedaa, Yesuusi yebbehe.

⁸ Arooba meeti asheenaꞌo boonoshi tahoon gommooch yaggiyeete. Bareenaꞌo wotta goyee daggeexi michi waamon kuxxii gommooch yaggiyeete.

⁹ Aaf shiichii beetinaꞌonaa gubb dabbii beetinaꞌona yubbeebee, “Hosaana! Doonochi shigoona waabeeto diireebe!

¹⁰ Woyemmi no nihoo Daawitichi taatittine diireebuye! Hosaana! Shimaajji shimaayooch beeti Yeeri galleteebe!” iibee cookeeheete.

¹¹ Yesuusi Yerusaalem shaggiꞌi yaafee kexooch giyiye. Bulli mooyon guuddii bi beeggitoyee gubb showoo xumetaa aaraa gutte bi dabbeenaꞌona tookkii kechiꞌi Bitaaniya hammiye.

Balaasee Mixin Yesuusi Ufo

¹² Aroobee dechara Bitaaniyee boonoshi wottee beetaa, Yesuusin shaacoo yechiye.

¹³ Ebich waajjechi balaasee mixin wohoochaa ciinniꞌi, “Diqqich bi aafeto gaata” iꞌi are mixi beetooch hammiye. Giddee bi ciinnimmona, balaasee aafee gooroo tuno bi qajjitoyich waamoani aafo aallehe.

¹⁴ Ebich balaasee mixin “Guttinnoon ne waanee aafo daneree manjeyaaye” iye. Ishichii bi geton bi dabbeenaꞌo waayeheete.

Giixechinaꞌon Yaafee Kexoochee Yesuusi Kichoo

¹⁵ Yesuusinaa bi dabbeenaꞌona Yerusaalem shaggiyeete. Aroochee Yesuusi yaafee kexooch giyiꞌi gabiyoo geddii kemmii kemeebeeti asheenaꞌo bullin gashee kichiye. Gijjoon shaddii beetinaꞌochi madelloon, uggoon kemmiibeeti asheenaꞌochi gabberoonoo yangiye.

¹⁶ Wotta yaafee kechi godoona koniyoona qiicoon shaagiree bi besheyaachemmoyich bajjiye.

¹⁷ Aree hillooch ishichiꞌi dojjiye: “Yeeri ‘Ta kexo “Aageteenaꞌo bullichi corootee kexo” getteyemmone’ iꞌi bi gettito Yaafe Macaafooch kooreyaanoone? Tunebaani ittoshi bokkeenaꞌochi gofoon tuniito ittoshine” iye.

¹⁸ Qeeshee ukkireenaꞌonaa Muusichi Sheeree dojjechinaꞌona ishin waayeꞌi, “Hini uroon aabichiree wuxibona?” iꞌi gommon qaawiyeete. Ebiyoo asheenaꞌo bulli Yesuusi dojjiti doyoona worganetoyich biin shattiꞌiniye.

¹⁹ Arooba showoo xumetaa, Yesuusinaa bi dabbeenaꞌona are katemoochee kechiyeete.

Shuuqqeti Balaasee Michi Mooyo

²⁰ 1 Dechara maaddoona gommona boonoshi beshee beetaa, balaasee mixi waamoochee tiijjaꞌa cammooch beddaahaa shuuqqaꞌa beetin beeggiyeete.

²¹ Pheexiroosi shalligiꞌi Yesuusin “Dojjechocho, beeggetine? Ne uppeti balaasee mixi shuuqqetiyoche!” iye.

²² Yesuusiyoo wochiꞌi ishichiye: “Ittoshi mulloon Yeeri toommooch tooꞌiibote.

²³ Iberoon ittoshich gettoye: Asho koniyoona mulloon guttiyaanoon bi gettimmi mooyon Yeeri tuniyemmoyich iberiiꞌi, hini geppoon ‘Waaxeree baharee gejjooch awureebe’ bi getigaata, tunemmone.

²⁴ Ebich corootoona amee mooyonona ittoshi qolleton Yeer waanee ittoshi daneto tunoon iberiibote; ittoshich tunemmone.

²⁵ Wotta corootiya ittoshi neexehooba, shimaayooch beeti ittoshi Nihoo ittoshi axaaxoon bi maaremmoyich, ittoshi shuuteti asho bullin maaribote.

²⁶ [Tunebaani bareenaꞌochi xuꞌoon ittoshi maaroo qayigaata, shimaayooch beeti ittoshi Nihoo ittoshi axaaxoon maaraachemmone]” iye.

Yesuusi Echeyoo

²⁷ Ebiyee gubb, Yesuusinaa bi dabbeenaꞌona Yerusaalem wotteꞌi waaheete. Aree hillooch Yesuusi yaafee kexooch giyii guuddii bi beetaa, qeeshee ukkireenaꞌo, Muusichi Sheeree dojjechinaꞌonaa geeneenaꞌona bi waan giddeꞌi,

²⁸ “Hini mooyinaꞌon ne tuniibeeto, amoochee ukkirittinoon danaꞌaaniye? Woyee hini mooyinaꞌon ne tuniyemmoyich konine neen wocheto?” iꞌi echeheete.

²⁹ Yesuusi wochiꞌi boonoshich ishichiye: “Ikke mooyon ittoshin echebone; ittoshiyoo wochigaata, ta hini mooyinaꞌon amoochee ukkirittinoon danaꞌa ta tuniyaabeeto gaata ittoshich gettemmo taane.

³⁰ Yowannisin ‘Aacona afaallibe’ iꞌi wocheto konine? Yeerinee, ashoone? Eke taach wochibote” iye.

³¹ Arooba boonoshinaa boonoshina “Ama getona?” iꞌi echeeheete. “Yeerine no getigaata, ‘Ishigaata, bi gettiton amoyich iberiyaachote?’ getiree noon echemmone.

³² Ashoone no getigaatoche?” iyeete. Ishichi boonoshi getaachemmoyich, Yowannisin asheenaꞌo bulli “Iberoon keemechone” iꞌi boonoshi gabii beetoyich asheenaꞌon shattiyeete.

³³ Ebich wochiꞌi Yesuusich “No ariyaano noone” iyeete. Yesuusi wochiꞌi, “Wotta amoochee ukkirittinoon danaꞌa hini mooyinaꞌon ta tuniyaabeeto gaata ittoshich getaache” iye.