Maariqoosi 10 - Kafa Linguistics Project

Mechee Gawukkeechon Yesuusi Dojjoo

¹ Yesuusi aroochee tiyii Yihudee showooch shaggiꞌi, wotta aroochee Yoordaanoosi aachee beqach hammiye. Wochinnoon meeti asheenaꞌo bi waan kiceemmona aafichoommon boonoshich dojjii beehe.

² Fariseenaꞌo daggoochee ikkikkeenaꞌo Yesuusin muriciyoyich bi waan giddeꞌi, “Muusichi Sheeroo asho bi mecheen bi gawukkemmoyich daaggite?” iꞌi echeheete.

³ Yesuusi wochiꞌi ishichiye: “Muusi hini mooyon ama iꞌi ittoshich gettite?” iye.

⁴ Boonoshiyoo “ ‘Bi gawukkeyoon miixeebeeti koorichoon koori imiree gawukkibe’ iꞌi daaggitone” iyeete.

⁵ Yesuusi wochiꞌi ishichiye: “Muusi ittoshi mullee muumoon beeggiꞌi hini sheeroon kooritone.

⁶ Tunebaani Yeeri shiichiꞌi showoonaa shimaayoonon bi halliyooba, ashoon anaamonaa maacheenon tuniiꞌi halliye.

⁷ ‘Ebich asho bi nihoonaa bi indeenon qayiichi bi mecheena tookki ikkoo tunemmone;

⁸ gutteenaꞌoo ikke meeno tunemminaꞌone.’ Ebich are aaboochee tiijjiꞌi ikkeenaꞌoani gubbich gutteenaꞌo tooneenaꞌone.

⁹ Illa Yeeri xaaqqiton asho bariyaaye” iye.

¹⁰ Yesuusinaa bi dabbeenaꞌona kexooch wottemmona, bi dabbeenaꞌo ebi mooyon biin echeheete.

¹¹ Biyoo “Bi mecheen gawukkiꞌi bareen shaaggiibeeto bulli bi mechee toommooch shunoon maatone.

¹² Areyoo bi kenoon gawukkaꞌa baroon bi shaagigaata, bi toommooch shunoon maatine” iye.

Gishiishi Bushiisheenaꞌon Yesuusi Diiroo

¹³ Aree hillooch asheenaꞌo “Yesuusi bi kishoon boonoshi toommooch kotiibe” iꞌi gishiishi bushiisheenaꞌon bi waan deebiyeete. Tunetaa Yesuusichi dabbeenaꞌo bushiishoon deebiti asheenaꞌon noggeheete.

¹⁴ Yesuusi ebin beeggii kaareꞌi bi dabbeenaꞌoyich ishichiye: “Qayote! Yeerichi taatittine eboshiyoomminaꞌochine. Ebich gishiishi bushiisheenaꞌo ta waan wobeete; bajjaahote.

¹⁵ Iberoon ittoshich gettoye: Yeerichi taatittinoon giisheche bushoochoommon deꞌaano arooch cir giyaachemmone” iye.

¹⁶ Aroochee, gishiishi bushiisheenaꞌon tiqqee bi kishoon boonoshi toommooch kotiiꞌi diiriye.

Gaannechon Iritiibeeti Mooyo

¹⁷ Yesuusi aroochee tiyiꞌi bi hammii beetaa, ikke uro bi waan woccii waaꞌi bi baatooch goyinneechii, “Deꞌe Dojjechocho, bulli yemeenee kashoon ta danemmoyich amoon hallibote?” iꞌi echehe.

¹⁸ Yesuusi wochiꞌi, “Amoyich taan deꞌo ii beetine? Ikke Yeeriyee damba deꞌo koniyoona aalloone.

¹⁹ Muusichi Sheeroon arii beetine: ‘Ashoon wuxiyaahine; shunoon maayaahine; gaajjaahine; kootoon miixeyaahine; ashi gijjoon tuushiiree maayaahine; ne nihoonaa ne indeenon oogiibe’” iye.

²⁰ Uroo wochiꞌi, “Dojjechocho, Ta bushittinoochee tiijjaꞌa ebiich ta beddemmi wottoon ebi bullin ceechito taane” iye.

²¹ Yesuusiyoo hini are uroon ciinniꞌi biin shunniye. “Illa ikke mooyo neech shappitone; hamiree neech beeto bullin kemiree iriteetinaꞌoyich imbe; neech shimaajji kexooch kiceeree beeyemmone. Aroyee gubb waaree taan dabbibe” iye.

²² Tunebaani hini are uro wodde gijjoo biich beeto bi tunetoyich, ebi mooyon waayeꞌi oogichii ayiniibee wotteꞌi hammiye.

²³ Aree hillooch Yesuusi guuddii wottee ciinniꞌi bi dabbeenaꞌoyich “Gaannechinaꞌoyich Yeerichi taatittineech gimo am shaahe maggoone!” iye.

²⁴ Ebina bi dabbeenaꞌo worganeheete. Tunetaa Yesuusi wotta ishichiye: “Ta bushiisheenaꞌote, [boonoshi gaannoon gibenee beetinaꞌoyich] Yeerichi taatittineech gimo am shaahe maggoone!

²⁵ Gaaleyich nappee aahoona besho maggoone; tunebaani gaannechi uroyich Yeerichi taatittineech gimo ebiyee beshoon maggoone” iye.

²⁶ Bi dabbeenaꞌo oogichii worganeebee, “Ishigaata, wodoon hakkemmo konine?” iꞌi boonoshinaa boonoshina yibbaateheete.

²⁷ Wotta Yesuusi boonoshin ciinniꞌi, “Hini mooyon tuniyoyich hakkemmo Yeeriyalli asho hakkaache. Yeeri bulli mooyon tuniyoyich hakkechone” iye.

²⁸ Pheexiroosi tiyiꞌi, “Ebiyoche, bullin qajjaꞌa neen dabbito noone” iye.

²⁹ Yesuusi wochiꞌi ishichiye: “Iberoon ittoshich gettoye: Taannaa ta mishiraachee qaaroonoyicha iꞌi bi kexon woyee bi anaami maneenaꞌon woyee bi maache maneenaꞌon woyee bi indeen woyee bi nihoon woyee bi bushiishoon woyee bi gochiibeeti showoon qajjito koniyoona beshoon danemmone.

³⁰ And hini yemeenooch duꞌeree beebee, kexinaꞌon, anaami maneenaꞌon, maache maneenaꞌon, indeenaꞌon, bushiisheenaꞌon, bi gochiibeeti showoon balle kishoon daakkaa danemmone; wotta woyemmi yemeenoochoo bulli yemeenee kashoon danemmone.

³¹ Tunebaani shiichitinaꞌo getteeti meetinaꞌo gubbemminaꞌone; gubbetinaꞌo getteeti meetinaꞌo shiichemminaꞌone” iye.

Bi Qitemmon Keejjinnoon Yesuusi Geto

³² Yesuusinaa biinna tookkii beetinaꞌona Yerusaalem kichiibeeti gommona hammii boonoshi beetaa, Yesuusi boonoshiyee aaf beshee shiichiꞌi hammiye. Bi dabbeenaꞌo worganeheete; biin dabbiibeeti bare asheenaꞌo wotta shattiyeete. Aaraa gutte bi dabbeenaꞌon bi waan kiciꞌi bi toommooch woyemmi mooyon wochinnoon ishichiꞌi gettiye:

³³ “Ebiyoche, and Yerusaalem hammaabeeto noone. Aroochaa Ashi Bushoon qeeshee ukkireenaꞌonaa Muusichi Sheeree dojjechinaꞌonoyich beshiiree immemminaꞌone. Boonoshiyoo ‘Qitibe’ getiree bi toommooch nallemminaꞌone; Aageteenaꞌoyichoo beshiiree immemminaꞌone.

³⁴ Boonoshiyoo biin coonemminaꞌone; bi toommooch cuddemminaꞌone; arengoona xoobbemminaꞌone; aroyee gubb wuxemminaꞌone; tunebaani keejje qemooba qitoochee tiyemmone” iye.

Yaaqobinaa Yowannisinochi Qollo

³⁵ Ebiyee gubb, Zebidiyoosi bushiisheenaꞌo Yaaqobinaa Yowannisina Yesuus waan giddeꞌi, “Dojjechocho, neen no qollemmo bullin nooch ne tuniyemmoyich qaawiibeeto noone” iyeete.

³⁶ Biyoo wochiꞌi, “Ittoshich amo ta tuniyemmoyichiye ittoshi qaawiibeeto?” iꞌi echehe.

³⁷ Boonoshiyoo wochiꞌi, “Ne taatehooba, no guttoochee ikkoo ne qanne badd, ikkoo ne yooche badd tuneree no kotemmoyich daaggibe” iyeete.

³⁸ Tunebaani Yesuusi ishichiye: “Ittoshi qollee beeton ariyaachote. Ta uchemmi xuuxee xoofoochee uyon, ta afaalleyemmi afaalleyoon afaalleyoo hakkehote?” iꞌi echehe.

³⁹ Boonoshi wochiꞌi, “Eeha, hakkemmo noone” iyeete. Yesuusi wotta “Ta uchemmi xoofoochee uchemmo ittoshine; ta afaalleyemmi afaalleyoon afaalleyemmo ittoshine.

⁴⁰ Tunebaani ta qanne baddinaa ta yooche baddinooch ittoshi kotemmoyich immemmo ta toono taane. Ebi are xaaꞌeenaꞌon Yeeri qanniiree bi immemmo, bi kaacciti asheenaꞌoyichiye” iye.

⁴¹ Aree hillooch eche aashire bi dabbeenaꞌo waayeꞌi Yaaqobinaa Yowannisinon kaareheete.

⁴² Aroochee Yesuusi boonoshi bullin bi waan ceeggiꞌi ishichiye: “Aageteenaꞌo daggooch ‘Taateenaꞌo’ getaa ceekkee beetinaꞌo, asheenaꞌon hajjii beetinaꞌo boonoshi tunoon arii beetote; wotta eboshi bullich toommooch iraasheenaꞌo doono boonoshi tunoon tuushaachote.

⁴³ Tunetaa ittoshi daggooch ebiyoommon tunaaye; ittoshi daggoochee koniyoona ‘Oogoo tunebona’ ito, ittoshi wochee bushoo tunebe.

⁴⁴ Ittoshi daggoochee koniyoona ‘Ukkirebona’ ito, shiichiree bullichi guuno tunebe.

⁴⁵ Ashi Busholla wocheyoonaa bi kashoon meetinaꞌochi keroyich deejjoonoyich waahalli, boonoshi biich wocheyemmoyich waataanoone” iye.

Qolleebeeti Aaf Doogoon Yesuusi Wodiyoo

⁴⁶ Ebiyee gubb, Yesuusinaa bi dabbeenaꞌona Yaariki katemooch shaggiyeete. Wotta boonoshi dofee asheenaꞌona tookkii Yaariki katemoochee kechii boonoshi beetaa, Xemeyoosichi bushoo aaf dooge Barixemeyoosi, gijjoon qolleebee gommi gashooch kotee beehe.

⁴⁷ Aroo Naazireetechi Yesuusi aroona beshoon waayeꞌi, “Daawiti Bushoo Yesuuso, taach ariqqebe!” iꞌi cookooch giyiye.

⁴⁸ Meeti asheenaꞌo cikkibe iꞌi noggeheete. Tunebaani aaf doogo “Daawiti Bushoochoo, taach ariqqebe!” iibee beshoon cookiye.

⁴⁹ Areegaata Yesuusi neexeechii asheenaꞌon “Ebi uroon taach ceegote” iye. Bekkech hini are asheenaꞌo aaf doogoon “Kupphebe! Tibe! Yesuusi neen ‘Wobe’ itone” iꞌi ceeggiyeete.

⁵⁰ Biyoo capphii tiyiꞌi bi qoreddoon duppiichii Yesuus waan hammiye.

⁵¹ Yesuusiyoo aaf doogoon “Amoon neech ta tuniyemmoyichiye ne qaawaabeeto?” iꞌi echehe. Aaf doogo wochiꞌi, “Dojjechocho, ta aafoon ne ciichiyemmoyichiye” iye.

⁵² Yesuusiyoo “Hambe; ta toommooch mulloon ne tooꞌiyoo neen wodiitone” iye. Hini are aaf doogo bekkech ciinniꞌi gommona Yesuusin dabbii hammiye.