Maariqoosi 1 - Kafa Linguistics Project

Aacona Afaallechi Yowannisi Gettiti Wocho

¹ Yeerichi Bushoo Yesuus Kiristoosichon miixeebeeti mishiraachee qaaro hinine.

² Shiichiꞌi Yeeri wocheti keemechi Isiyaasi ishichiye: “Yeeri ‘Ebiyoche, ne gommon qaxxemmi ta wocheyechon neyee shiichiree daachiyemmo taane’ itone.

³ ‘Doonochi gommon qanniibote; bi woretoonoo kaachi qaxxebote’ iibee barahoochaa cookiibeeti ashi qaaro” iꞌi kooritone.

⁴ Ebich Aacona Afaallechi Yowannisi barahoochaa aacona afaalliibee, “Ittoshi axaaxee gommoochee Yeer waan wotteree aacona afaalleebote; Yeeriyoo ittoshi axaaxoon maaremmone” iꞌi dojjiibee waahe.

⁵ Arooba Yihudee showoonaa Yerusaaleminoochee dofee asheenaꞌo bi waan waa beeheete; boonoshi axaaxoon aannii boonoshi miixetaa, Yowannisi boonoshin Yoordaanoosi aacona afaallii beehe.

⁶ Biyoo gaalee eexoochee shippeti qoreddoon taheꞌi gooqqoochee shuuneeti shachoon cuyee beehe; gecheenaa bobbiyee eeyonon maa beehe.

⁷ Wotta arooba “Yittaꞌa bi caammee cuyoon biich ta bedaani tayee besho ta hillooch waa beetone.

⁸ Ta ittoshin aacona afaalliyoye; tunebaani aroo ittoshin Yaafe Ayaanoona afaallemmone” ii gettii beehe.

Yesuusi Aacona Afaalleyoonaa Sheexaanoo Biin Gondoon Shuuniiya Qiiccoona

⁹ Arooba Yesuusi Galiilee showooch beeti Naazireetee waaꞌi, Yowannisina Yoordaanoosi aacoochaa afaalleehe.

¹⁰ Bekkech Yesuusi aacoochee bi kechimmona, shimaayoo qecheeꞌi Yaafe Ayaano bi ashittinee halloo uggechoommon tuneꞌi Yesuusi toommooch bi kindoon Yowannisi beeggiye.

¹¹ Wotta shimaayoochee “Ta shuni bushoo neene; neenna emirito taane” ii beeti qaaro waayeehe.

¹² Bekkech Yaafe Ayaano Yesuusi barahooch hammemmoyich tuniihe. Yesuusiyoo hammiꞌi,

¹³ cooxinaꞌo beeti barahoochaa Sheexaanoo gondoon biin shuuniiya qiiccee bi beetaa, aabbe qemon kotehe. Maraakeenaꞌoo waaꞌi biin gaachee beeheete.

Haashe Yeshe Awudde Asheenaꞌon Yesuusi Ceego

^14-15 Yowannisi yeshaa cucheetoyee gubb, Yesuusi Yeerichi mishiraachee qaaroon gettiibee, “Yemeeno katinnitone; Yeerichi taatittine ittoshi kellooch shaggetine; ebich ittoshi axaaxee gommoochee Yeer waan wotteree, Yeerichi wocho tuneti mishiraachee qaaroon iberiibote” iibee Galiilee showooch waahe.

¹⁶ Yesuusi Galiilee baharee gashoona besheebee, haashoon yechiibeeti gutte maneenaꞌo Simooninaa Indiriyaasina haashe yeshe dabboon baharooch boonoshi duppii beetaa ciinniye.

¹⁷ Arooba Yesuusi “Ta hillooch wobote; haashoon ittoshi yeshoommon ashoon yeshiree ta waan ittoshi deebemmoyich tuniyemmo taane” iye.

¹⁸ Boonoshiyoo bekkech dabboon duppiichii biin dabbiyeete.

¹⁹ Wotta aroochee giishechoon besheꞌi Zebidiyoosi bushiisheenaꞌo gutte maneenaꞌo Yaaqobinaa Yowannisina giishi markabee toommoochaa, keexeti boonoshi dabboon boonoshi shippii beetaa ciinniye.

²⁰ Bekkech “Ta hillooch wobote” iꞌi ceeggiye. Boonoshiyoo boonoshi nihoo Zebidiyoosin gijjoo qocaa shuuneebeeti asheenaꞌona tookkii are markabeech duppiichii biin dabbiyeete.

Yinneenaꞌon Ikke Uroo Toommoochee Yesuusi Yooho

²¹ Yesuusinaa biin dabbii beetinaꞌona Qifirinaahi katemooch shaggiyeete. Aroyee gubb shambetoo shagaa, Yesuusi Ayihudeenaꞌo kiceebeeti kexooch giyiꞌi dojjiye.

²² Boonoshich bi dojjito sheeroon immiibeeti taatoochoommonalli, Muusichi Sheeree dojjechinaꞌo dojjii beetoommon toonoone. Ebinoo waayetinaꞌo bi dojjiti doyoona worganeheete.

²³ Arooba Ayihudeenaꞌo kiceebeeti kexooch yinno bi toommooch beeti uro beehe.

²⁴ Biyoo “Naazireetechi Yesuuso, no mooyooch neen amo geddiye? Noon goochiiya waanne? Koni ne gaata ariibeeto taane; Yeerichi yaafoo neene” iꞌi cookiye.

²⁵ Yesuusi tiyiꞌi, “Ne noonoon yeshe; uro toommoochee tibe” iꞌi noggehe.

²⁶ Yinnoo nagixiiꞌi oogichii cookii bi itoyee gubb uro toommoochee tiyiye.

²⁷ Ebin beeggiti asheenaꞌo bulli “Ebi amoone? Doonjittinoona yinneenaꞌon noggehe; boonoshiyoo biich deꞌa iyeete. Hini bi dojjiibeeto andire doyoone” iꞌi boonoshi echeemmi wottoon oogichiꞌi worganeheete.

²⁸ Bekkech bi shigo aree guudoona beeti Galiilee showoo bulliich waayeehe.

Meeti Biiyechinaꞌon Yesuusi Wodiyoo

²⁹ Yesuusi wotta Ayihudeenaꞌo kiceebeeti kexoochee kechiꞌi Yaaqobi, Yowannisinaa bare asheenaꞌona tookkii gutte maneenaꞌo Simooninaa Indiriyaasinochi kexooch giyiye.

³⁰ Simoonichi amaatee achee gaamee biiyoona biiyaꞌa qeyaa bi beemon bekkech Yesuusich gettiyeete.

³¹ Ebich Yesuusi qeyaa bi beetooch hammii ureen kishoona yechii tiijjiꞌi kotiihe; bi achee gaamoo bekkech aqqehe; tiyaa maayoon boonoshich giddiihan.

³² Xumee aabi-gimooch biiyechinaꞌonaa yinno boonoshi toommooch beeti asheenaꞌo bullinon Yesuus waan deebiyeete.

³³ Are katemooch beeti asheenaꞌo bulli waaꞌi Yesuusi beeti kechi kellooch ceenniyeete.

³⁴ Baribare giidechi biiyoona biiyeti meeti asheenaꞌon wodiihe; wotta meeti yinneenaꞌon asheenaꞌo toommoochee yookkiye. Yinneenaꞌoo biin arii beetinaꞌo boonoshi tunetoyich, amoonolla boonoshi yibbaatemmoyich daaggaanoone.

Barahoochaa Yesuusi Corootoo

³⁵ Maaddoona, showoo batt haraan beetaa, Yesuusi tiyii ikke qere xaaꞌooch hammiꞌi aroochaa corootiye.

³⁶ Aree hillooch Simooninaa biinna tookkii beetinaꞌona tiyiꞌi biin qaawiibee bi beetooch shaggiyeete.

³⁷ Yesuusin daneꞌi, “Asheenaꞌo bulli neen qaawii beetinaꞌone” iyeete.

³⁸ Yesuusi wochiꞌi, “Ta waato Yeerichi mishiraachee qaaroon bechoyich bi tunetoyich, katinooch beeti bare katemooch hambone” iye.

³⁹ Aroyee gubb Ayihudeenaꞌo kiceebeeti kexooch Yeerichi qaaroon gettiibee, yinnoon ashi toommoochee yookkiibee Galiilee showoo bulliich beddiye.

Qeddee Shaddee Biiyechi Uroon Yesuusi Wodiyoo

⁴⁰ Ebichi hillooch qeddee shaddee biiyechi uro Yesuus waan waa guteneꞌi, “Ne daaggigaata, taan wodiyoon hakkihine” iꞌi qollehe.

⁴¹ Yesuusi ariqqeꞌi bi kishoon yaggii yechiichii, “Daaggiyoye, wodibe” iye.

⁴² Bi ishichimmona, uro bekkech qeddee shaddee biiyoochee wodiye.

^43-44 Are woditi uroon Yesuusi “Ebin konichona kachaahine; ne qelloon ariibe! And hamiree ne aahittinoon qeeshoyich bekkiibe; ne wodoon asheenaꞌo bulli xiishemmoyich, Muusi bi sheerooch deejjibote iꞌi bi kooriti deejjoon Yeerich deejjibe” ii kupphii gettiꞌi daachiihe.

⁴⁵ Tunetaa hini are uro hammiꞌi xalla yibbaatoonaa woroonooch giyiye. Ebichi naboona Yesuusi xalla bekkeꞌi katemee daggooch gimo biich iritoo tunehe; tunebaani katemoyee maach barahooch beehe; arooch bi beetaa, bulli xaaꞌoochee asheenaꞌo bi waan waa beeheete.