Luqaasi 7 - Kafa Linguistics Project

Iraashoochi Aafee Bushoon Yesuusi Wodiyoo

¹ Yesuusi biin elleebeeti meeti asheenaꞌoyich bi yibbaatoon bi ciichitoyee gubb, Qifirinaahi katemooch giyiye.

² Aroochoo ikke Roomechi balle ginee iraashoo beehe; bi shunniibeeti bi aafee bushoo biiyeꞌi qitooch beddiye.

³ Yesuusichi shuunoon waayeꞌi Ayihudee geeneenaꞌon, “Yesuusi ta aafee bushoon waaree bi wodiyemmoyich hamiree taach qollebote” iꞌi wochehe.

^4-5 Hini are wocheeti geeneenaꞌoo Yesuus waan hammii shaggiꞌi, “No aagetoon shunniꞌi no kiceebeeti kexon nooch haggiitone; ebich bi qolloon waayi ne bede uroone” iꞌi kupphii qolleheete.

⁶ Yesuusiyoo deꞌa iꞌi boonoshina tookkii hammiye. Yesuusi hammiꞌi balle ginee iraashoo kexooch bi katinnimmona, hini are iraashoo bi shunechinaꞌon ishichiꞌi wochehe; “Ta Doonocho, ta waan waaree iriteyaahine; ta kexooch ne giyi bede uro toono taane.

⁷ Ebi qayaa ne waan womoyichona bedaani uro taane. Tunebaani ikke qaaroon baach gete; ta aafee bushoo wodemmone.

⁸ Ta wotta tayee dambeenaꞌoyich hajjeebeeto taane; tayee desh beeti ginee naayinaꞌo wotta taach hajjee beetinaꞌone. Ikkoon ‘Hambe’ ta getigaata, hammii beetone; baroon wotta ‘Wobe’ ta getigaata, waa beetone; ta guunonoo ‘Ebin tuniibe’ ta getigaata, tunii beetone” iye.

⁹ Yesuusi ishin waayeꞌi uroon worganehe; gubb wotteꞌi biin dabbiibeeti dofee asheenaꞌoyich “Ittoshich gettoye: Ta toommooch ebiyoommi mullee tooꞌiyoon Israꞌeelee showoocheenolla daneyaano taane” iye.

¹⁰ Wocheeti asheenaꞌo hini are balle ginee iraashoo kexooch wotteꞌi, bi aafee bushoo wodiꞌi bi beetaa daneheete.

Ikke Xuumeechi Bushoon Yesuusi Qitoochee Wodiyoo

¹¹ Dechara Yesuusi Naayini getteebeeti katemooch hammiye; bi dabbeenaꞌonaa dofee asheenaꞌona biinna tookkii hammiyeete.

¹² Are katemee kellooch bi katinnimmona, asheenaꞌo dubenoon shaageꞌi kechiyeete; qititi gurimaashoo bi indeech ikke mixxoone; bi indeyoo xuumeene. Are katemeexi dofee asheenaꞌo biinna tookkii beetinaꞌone.

¹³ Doono Yesuusiyoo ureen ciinniꞌi ayiniye; biinoo eeppaahine iꞌi goggiihe.

¹⁴ Giddeꞌi shaaꞌoon yechiye. Shaaggitinaꞌoo neexeheete. Yesuusiyoo qititi gurimaashoon “Hini gurimaashoocho, neen tibe ii beeto taane” iye.

¹⁵ Qititi gurimaashoo bekkech motekkimii tiyii koteꞌi yibbaatehe. Areegaata Yesuusi bushoochi indeech “Ebeege ne bushoo” iꞌi immiye.

¹⁶ Asheenaꞌo bulli oogichii shattiꞌi boonoshinaa boonoshina “Yeeri ooge keemechon no daggoochee kaacciꞌi neechitone” iyeete. Wotta “Yeeri bi asheenaꞌon ciinnitone” iibee Yeerin galleteheete.

¹⁷ Ebich Yesuusichi shigo Yihudee showoonaa bi guudeexi showoo bullinooch waayeehe.

Aacona Afaallechi Yowannis Waanee Wocheeti Wocheyechinaꞌo Womo

¹⁸ Yowannisi dabbeenaꞌo ebi bullin Yowannisich gettiyeete. Biyoo bi dabbeenaꞌoochee gutteenaꞌon ceeggiꞌi,

¹⁹ “ ‘Woyemmone’ getteeti Kiristoosi neenee, baroon quyebona? getiree echebote” iꞌi Doono Yesuus waan daachiihe.

²⁰ Wocheetinaꞌoo bi waan hammiꞌi, “Aacona Afaallechi Yowannisi ‘ “Woyemmone” getteeti Kiristoosi neenee, baroon quyebona?’ iꞌi ne waan noon wochehe” iyeete.

²¹ Arooba Yesuusi meeti asheenaꞌon iritiibeeti biiyoonaa naxo bullinoochee wodiihe; yinneenaꞌonoo meetinaꞌo toommoochee yookkiye; meeti aaf doogeenaꞌo aafoonoo ciichiihe.

²² Yesuusi are wocheetinaꞌoyich wochiꞌi, “Hamiree ittoshi beeggiton, ittoshi waayetonoo Yowannisich getote. Aaf doogeenaꞌo ciinnii beetinaꞌone; baata yesheenaꞌo shaꞌee beetinaꞌone; qeddee shaddee biiyoona biiyetinaꞌo wodii beetinaꞌone; ulleenaꞌo waayee beetinaꞌone; qititinaꞌo tiyii beetinaꞌone; girechinaꞌoyichoo Yeerichi mishiraachee qaaro gettee beetone.

²³ Ta mooyona axiraacheyaano bulli diireetone” iye.

²⁴ Yowannis waanee wocheetinaꞌo wotteꞌi boonoshi hammii beetaa, Yesuusi Yowannisi mooyon dofee asheenaꞌoyich getooch giyiye; boonoshichoo ishichiye: “Amoon beegga barahooch hammiyote? Yongoona koho shuuroommon shuuriibeeti ashoon beeggane?

²⁵ Woyee amoon beegga hammiyote? Deꞌe tahoon taheti urooniye? Macacikkiti tahoon taheꞌi mashaamiti beemon beetinaꞌo beeto taateenaꞌo kexoochiye.

²⁶ Ishigaata amoon beegga hammiyote? Keemechoniye? Eeha, ittoshich gettoye; keemechoyee beshooniye.

²⁷ “ ‘Yeeriyoo “Ebiyoche, ne gommon qaxxemmi ta wocheyechon neyee shiichiree daachiyemmo taane” itone’ getaa kooreeto ebine.

²⁸ Ittoshich gettoye: Showee toommooch shiijjetinaꞌo daggoochee Aacona Afaallechi Yowannisiyee beshe asho koniyoona aalloone; tunebaani Yeerichi taatittineechaa bulliyee desho tuneto biyee beshoone” iye.

²⁹ Ebin waayeti asheenaꞌo bulli, Yowannis waan waaꞌi aacona afaalleeti gabiyee guudeenaꞌolla echeyaanoon, Yeeri cadiqo bi tunoon miixeheete.

³⁰ Tunebaani Fariseenaꞌonaa Muusichi Sheeree dojjechinaꞌona “Ebi nooch toonoone” iꞌi Yeerichi daaggoon hoxeꞌi Yowannisina afaalleyoon qajjiyeete.

³¹ Aree hillooch Yesuusi ishichiye: “Hini yemeenooch beeti asheenaꞌon amoona shaahiibote? Koniniye boonoshi shaahiibeeto?

³² Gabiyee godooch koteebeeti bushiisheenaꞌoniye boonoshi shaahiibeeto; boonoshinaa boonoshina ceegeebee, ‘Emiree shumburoon ittoshich huggehone; tunebaani ittoshi duubaachote; muushenee shooshoon shooshehone; tunebaani ittoshi eefaachote’ ii beeti bushiishoomminaꞌone.

³³ Aacona Afaallechi Yowannisi koshon maataanoon, woyinee uyoon uyaanoon bi waataa, ittoshi ‘Hini yinnechone’ iyote.

³⁴ Ashi Bushoo maabee, uchiibeenoo bi waataa, ‘Hini maayoonaa uyoonochi buujjoone; wotta gabiyee guudeenaꞌonaa axaaxechinaꞌonochi shunechone’ iyote.

³⁵ Tunetaa shalligoo tato bi tuno bi bushiisheenaꞌona arichehe” iye.

Yesuusi Farisoochi Kexooch Ataalleyoo

³⁶ Fariseenaꞌo daggoochee ikkoo Yesuusin “Ta kexooch ne waataa, tookki maayoon mamone” iꞌi ataalliye. Yesuusiyoo hini are Farisoo kexooch giyiꞌi kotehe; madoo giddehe.

³⁷ Arooch bi beetaa, are katemooch beeti axaaxechi ikke ure Yesuusi Farisoo kexooch giyii madee toommooch bi beemon waayaꞌa, alibaxiroosi firiqaadee ceeni gaawe cinnechi shittoon yechaꞌa bi waan waahan.

³⁸ Waa bi gubbaa Yesuusichi baatee gaꞌooch yittaachaa eeppaabee acimoon bi baatooch ukkiyan; bi qelli eexonoo Yesuusichi baatoon hidiyan; hidaꞌa shummahan; are cinnechi shittoonoo bi baatooch huuttahan.

³⁹ Yesuusin ataalliti Farisoo ebin beeggiꞌi, bi mulloona “Hini keemecho bi gaata, hini bi baatoon yechaabeeti ure koni bi gaata, bi shuunoo amoommo gaata ariyeshone; biyoo axaaxechine” iꞌi gabiye.

⁴⁰ Yesuusiyoo hini are Farisoon “Simoono, neech ta gettemmi mooyo beete” iye. Biyoo “Dojjechocho, gete” iye.

⁴¹ Yesuusi ishichiye: “Ikke koyitiyechoyich gutte koyitechinaꞌo beeheete. Ikkoo toommooch uuche balle diinaaro, guttinnoo toommoochoo aache diinaaro beehe.

⁴² Gutteenaꞌolla qoccemmon boonoshi mawiitaa, are gijjoon boonoshich maariye. Eke taach gete! Hini gutte asheenaꞌo daggoochee oogichiree are koyitiyechon shunemmo aabine?” iꞌi echehe.

⁴³ Simooni wochiꞌi, “Wodde gijjoon bi qajjiti hiishecho shaahiye” iye. Yesuusiyoo “Iberoon nallitine” iye.

⁴⁴ Aroochee ure waan guuddiꞌi Simoonich ishichiye: “Hini ureen beeggaa beetine? Ne kexooch iibboo tunaꞌa ta waataa, aaconona ta baatoyich giddiyaano neene; tunebaani hini ure bi acimoon ta baatee toommooch ukkitine; bi qelli eexonoo hiditine.

⁴⁵ Ne taan shumaano neene; tunebaani hini ure batti batt ta giyahaa, bi shummeti ta baatoon and beddaahaa qayaaneene.

⁴⁶ Zayitoon ta qellooch ne huutaano neene; tunebaani hini ure ta baatooch shittoon ukkitine.

⁴⁷ Ebich neech gettoye: Ceeni bi mulloona taan shunnetine; ebina bi toommooch beeti meeti axaaxoyich maaroon danetine; tunebaani giisheche axaaxoyich maaroon daneti asho giishechooniye bi shunniibeeto” iye.

⁴⁸ Ureyichoo “Ne axaaxoo maareetone” iye.

⁴⁹ Arooba Yesuusina tookkiꞌi madooch kotetinaꞌo boonoshi mulloona “Ashi axaaxoonolla maariibeeto, hini konine?” iꞌi gabiyeete.

⁵⁰ Tunebaani Yesuusi ureen “Ta toommooch mulloon ne tooꞌiyoo neen wodiitone. Diggoona hambe” iye.