Luqaasi 6 - Kafa Linguistics Project

Yesuusin Shambeteechon Fariseenaꞌo Echo

¹ Ikke areddoon, shambetee aabooba Yesuusi moocheti teepphee daggoona beshee beehe; bi dabbeenaꞌo hammiibee teepphee moochoon kuxxiꞌi boonoshi kishoona kachee maa beeheete.

² Fariseenaꞌo daggoochee ikkikkeenaꞌo “Amoyichiye shambetoona Muusichi Sheeroo bajjiton ittoshi shuuneebeeto?” iꞌi echeheete.

³ Yesuusiyoo boonoshich wochiꞌi ishichiye: “Daawitinaa biinna tookkii beetinaꞌona boonoshi shaacehooba, Daawiti tuniiton shemmeyaachote?

⁴ Yeerichi kexooch giyiꞌi qeesheenaꞌoyee damba bare asho koniyoona maataachemmoyich Muusichi Sheeroo bajjiti yaaree koshon tiijjiꞌi maahe; biinna tookkii beetinaꞌoyichoo wotta immiye” iye.

⁵ Aroochee Yesuusi, “Ashi Bushoo shambetoyich Doonone” iye.

Kishoo Qometi Uroon Yesuusi Wodiyoo

⁶ Bare shambetooba wotta Yesuusi Ayihudeenaꞌo kiceebeeti kexooch giyiꞌi asheenaꞌoyich dojjiye. Aroochoo qanne kishoo qometi uro beehe.

⁷ Muusichi Sheeree dojjechinaꞌonaa Fariseenaꞌona “Eke shambetooba bi wodiigaata beegone” iꞌi Yesuusin taggoyich quyee beeheete.

⁸ Yesuusiyoo boonoshi gaboon ariiꞌi kishoo qometi uroon “Tiyi hini gutte daggooch neexebe” iye. Uroo tiyiꞌi neexehe.

⁹ Yesuusiyoo ebin ciinniibeeti asheenaꞌon “Eke ittoshin ikke mooyon echebone. Muusichi Sheeroo shambetooba bi daaggito deꞌoon shuunooniyee gondoon shuunoon daaggiye? Kashee wodiyooniyee aalliyooniye?” iꞌi echehe.

¹⁰ Bi guudoona beetinaꞌo bullin ciinniꞌi, uroon “Ne kishoon yaggibe” iye. Biyoo yaggiye; bekkech wotteꞌi iiwoo tunehe.

¹¹ Ebi mooyo Muusichi Sheeree dojjechinaꞌonaa Fariseenaꞌonon ippii shiniihe; boonoshinaa boonoshina “Hini uro toommooch amoon hallibona?” iꞌi echeeheete.

Aaraa Gutte Mishiraachechinaꞌon Yesuusi Kaaco

¹² Arooba Yesuusi corootiya geppooch kechiye. Yeer waan corootiibee arooch qeyiye.

¹³ Showoo harimmona, biin dabbii beetinaꞌon bi waan ceeggiye; boonoshi daggoochee aaraa gutteenaꞌon kaacciye; boonoshinoo “Mishiraachechinaꞌo” iꞌi shigiihe.

¹⁴ Boonoshiyoo Pheexiroosi iꞌi bi shigiiti Simooni, bi manoo Indiriyaasi, Yaaqobi, Yowannisi, Filipphoosi, Baritelemoosi,

¹⁵ Maatiyoosi, Toomaasi, Ilfiyoosichi bushoo Yaaqobi, bi aagetoyich qanaatecho getteebeeti Simooni,

¹⁶ Yaaqobichi bushoo Yihudinaa Yesuusin beshiiꞌi immiti Asqorootechi Yihudina eboshine.

Biiyetinaꞌon Yesuusi Wodiyoo

¹⁷ Yesuusi aaraa gutte bi dabbeenaꞌona tookkii geppoochee kindiꞌi naqqe xaaꞌooch neexehe; arooch biin dabbiibeeti bare dofee asheenaꞌo beeheete; wotta bi waanee waayoonaa boonoshi biiyoochee wodoonoyich Yihudee showoo bulliichee, Yerusaalemee, baharee gaꞌooch beeti Xiroosinaa Sidooninoochee waati dofee asheenaꞌo beeheete.

¹⁸ Yesuusiyoo yinnoona yecheꞌi iritee beetinaꞌon wodiihe.

¹⁹ Bi waanee wodiyee giidoo kechiꞌi bullin bi wodii beetoyich, asheenaꞌo bulli Yesuusichi achoon yeshon qaawii beeheete.

Diireechon Yesuusi Dojjoo

²⁰ Yesuusi bi dabbeenaꞌon ciinniꞌi boonoshich ishichiye: “Hini girechinaꞌote, diireeto ittoshine; Yeerichi taatittine ittoshichine.

²¹ And shaacee beetinaꞌote, diireeto ittoshine; michemmo ittoshine. And eeppii beetinaꞌote, diireeto ittoshine; miiccemmo ittoshine.

²² Asheenaꞌo Ashi Bushoo naboyich ittoshin shixxiteenoo, boonoshi shiqqiiteenoo, boonoshi naaggiteenoo, ittoshi shigoon tiijjoo ciigeꞌi boonoshi sheeneteenoo, diireeto ittoshine.

²³ “Ebiyee aaf boonoshi qaabbechinaꞌo ebiyoommon keemechinaꞌon duꞌiitinaꞌone; ebich ooge wojjoon shimaayoochaa Yeeri ittoshich immemmo bi tunetoyich, ittoshin boonoshi duꞌiimmi aabooba emiroona wucwucote; caphebote.

²⁴ Wotta hini gaannechinaꞌote, and emiroon daneto ittoshi tunetoyich, ittoshich woowo!

²⁵ And michii beetinaꞌote, gubb shacemmo ittoshi tunetoyich, ittoshich woowo! And miiccii beetinaꞌote, gubb tuumi eeppemmoo ittoshi tunetoyich, ittoshich woowo!

²⁶ Asho bulli ittoshin gaawichiꞌi yibbaatetinaꞌote, boonoshi qaabbechinaꞌo ebiyoommon koote keemechinaꞌon gaawichiꞌi yibbaatetinaꞌone. Ebich ittoshich woowo!” iye.

Bi Shixechon Shuno

²⁷ “Taachon waayee beetinaꞌote, ittoshich gettoye: Ittoshi shixechinaꞌon shunote; ittoshin shixxii beetinaꞌoyich deꞌoon shuunebote;

²⁸ ittoshin uppii beetinaꞌon diiribote; ittoshin naaggii beetinaꞌoyich, corootibote.

²⁹ Ikke ne gaakkoon tappemmoyich guttinnee gaakkoon bajjaahine; ne kutoon daammimmoyich ne kootoon bajjaahine.

³⁰ Duꞌeꞌi neen qollemmo bullich imbe; ne gijjoon daammimmoo wochi neech bi immemmoyich echeyaahine.

³¹ ‘Asho taach tuniibe’ iꞌi ittoshi shunnii beetoommon, ittoshiyoo wotta ebiyoommon bare ashoyich tuniibote.

³² “Ittoshin shunnii beetinaꞌon baach ittoshi shunigaata, Yeer waanee amee galletoon danehote? Axaaxechinaꞌoo boonoshin shunnii beetinaꞌon shunnii beetinaꞌone.

³³ Ittoshich deꞌoon shuunee beetinaꞌoyich baach deꞌoon ittoshi shuunegaata, Yeer waanee amee galletoon danehote? Axaaxechinaꞌoo ebin tunii beetinaꞌone.

³⁴ ‘Qoccemmone’ iꞌi ittoshi gibenetoyich baach ittoshi erettiigaata, Yeer waanee amee galletoon danehote? Axaaxechinaꞌoo erettoon gaacceya boonoshiyoomminaꞌoyich erettii beetinaꞌone.

³⁵ Tunebaani ittoshin shixxii beetinaꞌon shunote; boonoshich deꞌoon shuunebote; ‘Amoonolla taach gaaccemmone’ getiree gibenaayi, boonoshich erettiibote. Ooge wojjoon danemmo ittoshine; Beshoo Yeerichi bushiishoonoo tunemmo ittoshine; ebiyoo Yeeri biin galleteyaaneenaꞌonaa gondeenaꞌonoyich maac deꞌo bi tunetoyichiye.

³⁶ Illa ittoshi Nihoo Yeeri ariqqecho bi tunetoommon ittoshiyoo wotta ariqqechon tunebote” iye.

Ashi Gondoon Haddeechon Yesuusi Dojjoo

³⁷ “Ashi gondoon hadiyaahote; Yeeri ittoshi gondoon haddaachemmone. Ashi toommooch nalliyaahote; Yeeri ittoshi toommooch nallaachemmone. Ashi xuꞌoon maaribote; Yeeri ittoshi xuꞌoon maaremmone.

³⁸ Imbote; ittoshi immitoyee beshoon ceennii beshiꞌi aphireton Yeeri ittoshich degi ceechiree immemmone. Ittoshi qeellee beetoommon Yeeri wochiree ittoshich qeellemmone” iye.

³⁹ Wotta Yesuusi ishichiꞌi shaahiyoon boonoshich gettiye: “Aaf doogo aaf doogoon yaaboon hakkehe? Gutteenaꞌo yesheree oppooch dihaacheheete?

⁴⁰ Doyiibeeto biin dojjii beetoyee beshaanoone; tunebaani bullin ariiꞌi bi ciichi gaata, biin dojjitona tookki tatemmone.

⁴¹ “Ne aafooch giyiti xuggoon shalligaanoon, amoyichiye ne manoo aafooch giyeti giisheche guudeen ne ciinnaabeeto?

⁴² Wotta ne aafooch giyiti xuggoon ciinaanoon, aabichiree ne manoon ‘Ta manoocho, eke ne aafeexi guudeen kichibona’ geton hakkenne? Hini ne maacoon xalloo shaahiibeeti uroocho, shiichiree ne aafeexi xuggoon kichibe. Ebiyee gubb ne manoo aafeexi guudeen kichoyich manjiiree ciinnemmo neene” iye.

Mixonaa Bi Aafeebeeti Aafoona

⁴³ “Gonde aafoon aafeebeeti deꞌe mixo aalloone; ebiyoommon wotta deꞌe aafoon aafeebeeti gonde mixo aalloone.

⁴⁴ Ebich mixo bulli bi aafoona arichehe. Angixoochee balaasee michi aafo maceyaache; ebiyoommon wotta garoochee woyinee aafo maceyaache.

⁴⁵ Asho bi gettiibeeto bi mullooch ceenniti mooyoocheeniye. Deꞌe asho bi mullooch bi kotiiti deꞌe mooyoochee kichiye; gonde ashoo bi mullooch bi kotiiti gonde mooyoochee kichiye” iye.

Kechi Haggichi Shaahiyoon Yesuusi Geto

⁴⁶ “Ta gettaa beeton ceechaachote. Illa amoyichiye ‘Ta Doonocho, ta Doonocho’ iꞌi taan ittoshi ceeggiibeeto?

⁴⁷ Ta waan waa hini ta qaaroon waayeꞌi ceechiibeeto koniyoona, konin bi shaahiibeeto gaata ittoshich bekkiibona.

⁴⁸ Biyoo oppoon genjii iijjiichii manje xaqqee toommooch manjiiꞌi bi kexon haggiti uroommone. Ambamboo waahooba, aaco are kexon xuqqiye; tunetaa gaawichaa bi hakketoyich, shuurikkoon cir hakkaache.

⁴⁹ Wotta hini ta qaaroon waayeꞌi ceechaano, oppoon genjiiꞌi iiyaanoon, cikkii toommooch bi kexon haggiti uroommone. Ambamboo waahooba, aaco are kexon bi xuqqimmona, bekkech are kexo gugummii dihiye” iye.