Luqaasi 3 - Kafa Linguistics Project

Aacona Afaallechi Yowannisi Mishiraachee Geto

¹ Xibaaroosi Qesaari taateti aaraa uuche natooba, Fantoosechi Phelaaxoosi Yihudee iraashoo tuneꞌi bi beehooba, Heroodisiyoo Galiilee iraashoo tuneꞌi bi beehooba, bi manoo Filipphoosiyoo Ixuriyaasee showoonaa Xirakonidoosee showoonochi iraashoo tuneꞌi bi beehooba, Lisanoosiyoo Abilaanee iraashoo tuneꞌi bi beehooba,

² Haanninaa Qeyaafina qeeshee guudeenaꞌo tuneꞌi boonoshi beehooba, Zakaariyaasichi bushoo Yowannisi barahooch bi beetaa, Yeerichi qaaro bi waan waahe.

³ Ebich Yowannisi tiyiꞌi asheenaꞌon “Axaaxee gommoochee Yeer waan wotteree aacona afaalleebote; Yeeri ittoshi axaaxoon maaremmone” iꞌi dojjiibee Yoordaanoosi aachi guudooch beeti showoo bulliich hammiye.

^4-6 Arooba keemechi Isiyaasichi macaafooch, “ ‘Doonochi gommon qanniibote; bi woretoonoo kaachi qaxxebote; bamboo bulli ceennemmone; guudoonaa geppoo bullina yitiree yimaanemmone; wotta wuuqqe gomminaꞌo tatemminaꞌone; iritiibeeti gommoo naqqo tunemmone; arooba asho bulli Yeerichi wodiyoon beeggemmone’ iibee barahoochaa cookiibeeti ashi qaaro” getaa kooreeti qaaro ceenniye.

⁷ Ebich Yowannisi aacona afaalleya bi waan waati dofee asheenaꞌoyich ishichii beehe: “Hini xekerechi bushiisheenaꞌote! Yeer waanee kindemmi kaaree shiixxoochee ittoshi muriccemmoyich, konine ittoshich gettito?

⁸ Illa ittoshi axaaxee gommoochee Yeer waan ittoshi wottoon bekkiibeeti shuunoon shuunebote. Wotta ittoshi mulloona ‘Abrahamichi bushiishoo noone’ getiree yebeneyaahote. Ittoshich gettoye: Hini xaqqeenaꞌoochee Yeeri Abrahamich bushiishoon halloon hakkiye.

⁹ And qofiyo mixinaꞌochi xepphooch kotetone; illa gaawe aafoon aafeyaani mixo bulli kucheree qaaqqooch duppeyemmone” iye.

¹⁰ Ishin waayeti dofee asheenaꞌo “Illa amoon hallibona?” iꞌi echeheete.

¹¹ Yowannisi wochiꞌi, “Gutte tahecho tubbetoyich ikkoon imbe. Maayecho maayaalloyich imbe” ii beehe.

¹² Arooba gabiyee guudeenaꞌo wotta aacona aafaalleya bi waan waaꞌi, “Dojjechocho, no wotta amoon hallibona?” iꞌi echeheete.

¹³ Biyoo “Ittoshich getteetoyee beshe qaraxoon ashi waanee echaayote” iye.

¹⁴ Ginee naayinaꞌo wotta “Nowochi amoon hallibona?” iꞌi echeheete. Yowannisiyoo “Bokkoochoommon guufichiree ashoon boggaahote; kootoon taggeree ashoon xuqqaahote; ittoshich icheebeeti shumaayoo ittoshich beddiye” iye.

¹⁵ Asheenaꞌo tunemmi mooyon quyeebee, bulliyona Yowannisi mooyon gajjiteebee, “Hini uro Kiristoosi tunehe?” iꞌi boonoshi mulloona yexiiheete.

¹⁶ Yowannisi tiyiꞌi bullich “Tawoo aacona ittoshin afaallaabeeto taane. Tunebaani bi caammee cuyoon biich ta bedaani tayee beshe kuppho waa beetone; aroo Yaafe Ayaanoonaa qaaqqoona ittoshin afaallemmone.

¹⁷ Maayoon yooppiibeeti qiico bi kishoochiye; maayo bullin yooppiree xalliyemmone; are yooppaa xalleti teepphoon bi gotooch geddemmone; tunebaani maaxxoon tahaani qaaqqoona michemmone” iye.

¹⁸ Ebich asheenaꞌon baribare wodde ciicoona ciicciibee mishiraachee qaaroon gettii beehe.

Aacona Yesuusi Afaalleyoo

^19-22 Asheenaꞌo aacona afaalleeheete; Yesuusi wotta aacona afaalleeꞌi kechii corootii bi beetaa, shimaayoo qecheehe; aroochee Yaafe Ayaano bi ashittinee halloo uggechoommon tuneꞌi Yesuusi toommooch kindiye. Wotta shimaayoochee “Ta shunnaabeeti ta bushoo neene; neenna emirito taane” ii beeti qaaro waayeehe. Galiilee iraashoo Heroodisi, bi manoochi mechee Heroodiyaadin bi shaaggitoyich, wotta bare meeti gonde mooyinaꞌon bi shuunetoyich, Yowannisi biin kaarehe; tunebaani Heroodisi ebi bulli gonde mooyinaꞌo toommooch daakkiꞌi Yowannisin yechii cuchiihe.

Yowannisin Iraashoo Heroodisi Cuchiyoo Yesuusichi Shiijjee Yoodo

²³ Yesuusi batti batt Yeerichi qaaroon dojjooch bi giyiyooba, bi eeno shaashe natt bedoone. Asheenaꞌoyich bi shaahito Yooseefichi bushoo, Eeli bushoo,

²⁴ Mataati bushoo, Lewi bushoo, Miliki bushoo, Yaani bushoo, Yooseefi bushoo,

²⁵ Matatiyaasi bushoo, Amootsi bushoo, Naahoomi bushoo, Esili bushoo, Nagaayi bushoo,

²⁶ Maati bushoo, Matatiyaasi bushoo, Semeeni bushoo, Yoseeki bushoo, Yoodi bushoo,

²⁷ Yowanaani bushoo, Reesi bushoo, Zerubabeeli bushoo, Shelateeli bushoo, Neeri bushoo,

²⁸ Miliki bushoo, Aaddi bushoo, Qosaami bushoo, Elimadaami bushoo, Eeri bushoo,

²⁹ Yaasi bushoo, Elezeeri bushoo, Yoraami bushoo, Mataati bushoo, Lewi bushoo,

³⁰ Simooni bushoo, Yihudi bushoo, Yooseefi bushoo, Yoonaami bushoo, Eliyaqimi bushoo,

³¹ Meeli bushoo, Mayinaani bushoo, Maaxaati bushoo, Naataani bushoo, Daawiti bushoo,

³² Iseyi bushoo, Obeedi bushoo, Boꞌaazi bushoo, Saalimooni bushoo, Nahishooni bushoo,

³³ Aminadaabi bushoo, Araami bushoo, Ariniyi bushoo, Hetsirooni bushoo, Feretsi bushoo, Yihudi bushoo,

³⁴ Yaaqobi bushoo, Yisaaqi bushoo, Abrahami bushoo, Taari bushoo, Nakoori bushoo,

³⁵ Seruugi bushoo, Reꞌi bushoo, Feleegi bushoo, Ebeeri bushoo, Seeli bushoo,

³⁶ Qayinaami bushoo, Arifakisaadi bushoo, Sheemi bushoo, Noohi bushoo, Lameeki bushoo,

³⁷ Matusaali bushoo, Henooki bushoo, Yaareedi bushoo, Mahaleeli bushoo, Qenaani bushoo,

³⁸ Henooshi bushoo, Seeti bushoo, Addaami bushoo, Yeeri bushoone.