Luqaasi 24 - Kafa Linguistics Project

Qitoochee Yesuusi Timo

¹ Shabaattee batti batti aaboobee maaddee yaaꞌooch genneenaꞌo boonoshi qanniiti qimaamoon yechiꞌi Yesuusi duukketi maashooch hammiyeete.

² Hammii shaggiꞌi, oppee kellooch keppheeti xaqqee qeroo oppee kellee noonoochee ikke badd gedireꞌi bi wottoon beeggiyeete.

³ Tunebaani maac giyii ciinniꞌi, Doono Yesuusichi cahoon daneyaaneenaꞌone.

⁴ Ebichi naboyich boonoshi shaammii beetaa, diqqich gutte asheenaꞌo phaqqiibeeti tahoon taheꞌi boonoshi gaꞌooch neexeheete.

⁵ Hini are genneenaꞌo keqqoona shateꞌi showooch boonoshi ciinnii beetaa, are asheenaꞌo boonoshich ishichiyeete: “Kashechon qititinaꞌo daggoochee amoyichiye ittoshi qaawiibeeto?

^6-7 Aroo hiniich aalloone; tiyitone! Aaf Galiilee showooch beebee, ittoshich ‘Ashi Bushoo axaaxechi asheenaꞌo kishooch beshiitaa imaa, yoodderee keejje qemooba qitoochee bi timo echeyaani mooyone’ iꞌi bi gettiton shalligibote” iyeete.

⁸ Ishin boonoshi gettimmona, hini are genneenaꞌo Yesuusi gettiton shalligiyeete.

⁹ Are maashoochee wottee hammiꞌi, ebi boonoshi beeggitonaa boonoshi waayeto bullinon aaraa ikke Yesuusichi dabbeenaꞌonaa biin dabbiibeeti bareenaꞌo bullinoyich gettiyeete.

¹⁰ Ebin mishiraachechinaꞌoyich hammiꞌi gettitinaꞌo, Magidalechi Maariyami, Yowani, Yaaqobichi indee Maariyaminaa boonoshina tookkii beeti bare genneenaꞌonane.

¹¹ Hini mooyo boonoshich daayino bi shaahitoyich, are genneenaꞌochi yibbaatoon iberiyaaneenaꞌone.

¹² Tunebaani Pheexiroosi tiyiꞌi maashooch wocciye; hammii shaggiꞌi yittii bi ciinnimmona, kaafeno baach beehe. Hini tuneti mooyoyich shaammiibee kexooch wottee hammiye.

Yesuusi Emahuus Baatoona Hamo

¹³ Arooba Yesuusin dabbii beetinaꞌoochee gutteenaꞌo Yerusaalemee, aaraa ikke kiilo meetiroon wokkiꞌi beeti, Emahuusi getteebeeti gafooch hammii beeheete.

¹⁴ Hammiibee ebi tuneti mooyo bullin tiijjiꞌi boonoshinaa boonoshina yibbaatee beeheete.

¹⁵ Yibbaateebee echee boonoshi beetaa, Yesuusi bi qelloona boonoshi waan katinniꞌi boonoshina tookkii gommon hammii beehe.

¹⁶ Tunebaani boonoshich bi tuusheetoyich, koni bi gaata ariyaaneenaꞌone.

¹⁷ Yesuusi tiyiꞌi “Gommon hammiibee hini ittoshi yibbaateebeeti mooyo amoone?” iꞌi echehe. Ishichiꞌi bi echemmona, ayinoona boonoshi aafo maggee beetaa, neexeheete.

¹⁸ Boonoshi daggoochee Qaleyoophi getteebeeti ikkoo “Yerusaalem waabeeti iibbeenaꞌoochee katinoon arooch tuneti mooyoyich dallaawoo ne ikkeeto baachiye?” iye.

¹⁹ Yesuusiyoo “Arochi amoone?” iꞌi echehe. Boonoshiyoo wochiꞌi ishichiyeete: “Yeerinaa asho bullinochi aafooch qaaroonaa shuunoona giidechi keemechi Naazireetechi Yesuusichi mooyone.

²⁰ Qeesheenaꞌonaa bare no nallechinaꞌona qitee nalloo bi toommooch bi nalleyemmoyich, beshii immiꞌi yooddiiheete.

²¹ Tunebaani ‘Israꞌeeleenaꞌon biisheree wodiiya wocheetone’ iyaꞌaniye no gibeneto. Wotta ebi mooyo bulli tuneto hanaachi keejje qemoobane.

²² Wotta no daggooch beeti ikkikke genneenaꞌo gettiti mooyo noon worganikkiye; boonoshiyoo maaddee kafee qaadooch are maashooch hammiꞌi

²³ bi cahoon mucceheete. Aroochee wottee waaꞌi, ‘ “Yesuusi wochinnoon kashecho tunetone” iꞌi gettiti maraakeenaꞌo yaaꞌoona beeggeto noone’ iyeete.

²⁴ Wotta noonna tookkii beetinaꞌo daggoochee ikkikkeenaꞌo maashooch hammiꞌi, genneenaꞌo gettito iberoo bi tunoon beeggitinaꞌone; tunebaani Yesuusin daneyaaneenaꞌone” iyeete.

²⁵ Yesuusiyoo “Hini mullaalleenaꞌote, keemechinaꞌo gettito bullin iberiyaanoon amoyichiye ittoshi yagii beeto?

²⁶ Kiristoosich hini xuuxoon beego, oogee yiiree xaaꞌoochoo gimo qaawiyaache?” iye.

²⁷ Aroyee gubb Muusichi macaafoo bulliichee tiijjiꞌi keemechinaꞌochi macaafoo bulliich beddaahaa kooreeti bi hajjee mooyon biichiꞌi boonoshich gettiye.

²⁸ Hini gutte asheenaꞌo boonoshi hammiibeeti gafooch katinniyeete; Yesuusi are gafoon besheree hammemmo boonoshich bi shaahaa,

²⁹ “Noonna tookkiree qebe; showoo beshee, xumetone” iꞌi manjii ataalliyeete. Ebich boonoshina tookkii qeya giyiye.

³⁰ Boonoshina tookkii maayoon maaya madooch koteebee, koshon tiijjiꞌi Yeerin galletehe; tiichiꞌinoo boonoshich immiye.

³¹ Areegaata boonoshi aafo qecheetaa, Yesuusi bi tunoon ariiheete; biyoo bekkech boonoshi aafoochee shiwirimiye.

³² Boonoshinaa boonoshina ishichiyeete: “Gommona tookkaꞌa no waa beetaa, Yaafe Macaafooch kooreeton biichii nooch bi gettimmona, no mullo oogichiꞌi qeeccito toone!” iyeete.

³³ Bekkech areegaata hini are gutte asheenaꞌo tiyii Yerusaalem wotteꞌi, ikkooch kiceeꞌi beeti aaraa ikke Yesuusichi dabbeenaꞌonaa boonoshina tookkii beetinaꞌonon ikkooch daneheete.

³⁴ Hini kiceeti asheenaꞌo “Iberoon Doono qitoochee tiyitone! Simoonich bekketone” iyeete.

³⁵ Wotta ohe gutteenaꞌoo gommona hammii boonoshi beetaa tuneti mooyon, wotta koshon tiichii bi immimmona, bekkech biin boonoshi ariyoon gettiyeete.

Bi Dabbeenaꞌoyich Yesuusi Bekko

³⁶ Ebin yibbaatee boonoshi beetaa, diqqoona Yesuusi boonoshi daggooch neexehe. Boonoshich “Diggoo ittoshich tunebe” iye.

³⁷ Tunebaani yoogo boonoshich bekketon shaahaa keqqoona shattiyeete.

³⁸ Biyoo “Ittoshi keqqiibeeto amoyichiye? Ittoshi mullo axiraacheebeeto amoyichiye?

³⁹ Ta kishoonaa ta baatoonon beegote; taalli baroo toonoone; taan yeshi beegote; taach meenonaa shaawushoona beetone; tunebaani yoogoyich meenonaa shaawushoona aalloone” iye.

⁴⁰ Ishin boonoshich gettiichii bi kishoonaa bi baatoonon bekkiihe.

⁴¹ Boonoshiyoo emiroochee tiyitona bi gettiti mooyon iberiyoon hakkaaneenaꞌone. Ebich worganee boonoshi beetaa, “Manjeyemmi maayo ittoshi waan aalle?” iꞌi echehe.

⁴² Boonoshiyoo micheeti haashee qaton immiyeete.

⁴³ Aroon yechiꞌi boonoshi aafoochaa maahe.

⁴⁴ Boonoshichoo “Ittoshina tookkaa beebee, ‘Muusichi Sheeroonaa keemechinaꞌochi macaafoonooch, Shoddee macaafoochoo kooreeti ta mooyo bulli ceeno echeyaachemmi mooyone’ ta ito ebiniye” iye.

⁴⁵ Areegaata Yaafe Macaafooch kooreeton boonoshi xiishemmoyich, boonoshi mulloon qechiye.

⁴⁶ Boonoshich ishichiye: “ ‘Kiristoosi xuuxoon beeggemmone; bi keejje qemooba qitoochee tiyemmone.

⁴⁷ Yerusaalemee tiijjiree aageteenaꞌo bulliich beddaahaa axaaxoochee Yeer waan wottoonaa maaroon danoonochi wochoo bi shigoona getteyemmone’ getaa kooreetone.

⁴⁸ Ittoshiyoo ebi mooyo bullich miixoo ittoshine.

⁴⁹ Illa ebiyoche, ta Nihoo Yeeri gibenikkiti gibenoon ta ittoshich deejjemmo taane; ebich damba Yeer waanee giidoo ittoshi toommooch bi kindimmi wottoon Yerusaalem quyebote” iye.

Shimaajj Yesuusi Hamo

⁵⁰ Ebiyee gubb, Yerusaalemee Bitaaniyi katinooch beddaahaa boonoshin dabbiiꞌi daammiye; aroochaanoo bi kishoon tiijjiꞌi boonoshin diiriibee,

⁵¹ boonoshiyee bariꞌi shimaajj hammiye.

⁵² Boonoshiyoo aroochaa biich goyinneechii, woddoon emiriibee Yerusaalem wotteheete.

⁵³ Kuxaanoon Yeerin galleteebee, yaafee kexooch heechii beeheete.