Luqaasi 23 - Kafa Linguistics Project

Phelaaxoosi Aafooch Yesuusi Neexo

¹ Hini are nallechinaꞌo bulli tiyii Phelaaxoos waan Yesuusin daammiꞌi,

² “Hini uro no aagetoon hukkecho tuniiya koccii bi beetaa, daneto noone. Wotta no macceenaꞌon ‘Qesaarich qaraxoon qoccaahote’ iꞌi bajjitone; ebichi toommooch ‘Ta Kiristoosi, taatoo taane’ ii beetone” iꞌi taggoon yaaqqiyeete.

³ Phelaaxoosiyoo Yesuusin “Ne Ayihudeenaꞌo taatoo neene?” iꞌi echehe. Yesuusi wochiꞌi, “Newolla gettaa beetine” iye.

⁴ Phelaaxoosiyoo qeeshee ukkireenaꞌonaa dofee asheenaꞌonoyich “Hini uro toommoochee ikke gondoonona daneyaano taane” iye.

⁵ Tunebaani boonoshi mooyon manjiiꞌi, “Galiilee showoochee tiijjiꞌi Yihudee showoo bullinaa hini Yerusaaleminooch beddaahaa no macceenaꞌoyich hukkee gommoniye bi koccii beeto” iyeete.

Taatoo Heroodisi Aafooch Yesuusi Neexo

⁶ Tunebaani Phelaaxoosi hini are taggechinaꞌo “Galiilee showoo” boonoshi getaa waayeꞌi, boonoshin “Hini uro Galiilee ashoone?” iꞌi echehe.

⁷ Yesuusi waato Heroodisichi taatee showoochee bi tunoon ariiꞌi biin Heroodis waan daachiihe. Arooba Heroodisi bi beeto Yerusaalemiye.

⁸ Heroodisi ebiyee aaf asheenaꞌo Yesuusichi mooyon tiijjiꞌi boonoshi yibbaatetaa bi waayetoyich, meeti aaboon Yesuusin beegga iꞌi qaatiibee, worganikkimmi malletoonoo bi tuniitaa beegoyich gibenee bi beetoyich, and Yesuusin beeggiꞌi oogichii emiriye.

⁹ Ebich Yesuusin meeti mooyon echehe; tunebaani Yesuusi minnakanna getaanoone.

¹⁰ Qeeshee ukkireenaꞌonaa Muusichi Sheeree dojjechinaꞌona mooyon manjiiꞌi taggeebee neexeheete.

¹¹ Wotta Heroodisi bi ginee naayinaꞌona tookkii Yesuusin qallayii coonehe. Malletechi tahoon tajjiꞌi Phelaaxoos waan wochii daachiihe.

¹² Ebiyee aaf Heroodisinaa Phelaaxoosina kaarechinaꞌone; tunebaani arooba shuneheete.

Qitee Nalloo Yesuusi Toommooch Nalleyoo

¹³ Arooba Phelaaxoosi qeeshee ukkireenaꞌon, bare nallechinaꞌonaa asheenaꞌonon ikkooch ceekkiiꞌi

¹⁴ boonoshich ishichiye: “ ‘No aagetoon hukkecho tuniiya koccii beetone’ iꞌi hini uroon ta waan deebiyote. Ebiyoche, ittoshi aafoochaa wochaa wochaꞌa ta echetaa, biin ittoshi taggeti mooyoyich hini uro toommoochee ikke gondoonona danetaano taane.

¹⁵ Heroodisiyoo bi toommoochee amee gondoonona mucceꞌi no waan wochitone. Illa qitooch biin bechemmi amee gondoonona hallaanoone.

¹⁶ Ebich sheeriree biichemmo taane” iye.

¹⁷ [Ebiyoo Beshee Baaree aabooba, cucheti ashoochee ikkoon boonoshich biisho biich doyoo bi tunetoyichiye.]

¹⁸ Tunebaani boonoshi bulli ikkooch “Hini uroon no aafoochee wokkiibe! Barbaanin nooch biishe!” iibee cookiyeete.

¹⁹ Ebi Barbaani katemee daggooch hukkoon tiijjii ashoon bi wuxitoyich, cuyee kexooch cucheti uroone.

²⁰ Phelaaxoosiyoo Yesuusin biicha qaawiꞌi wochii asheenaꞌon echehe.

²¹ Tunebaani boonoshi “Yoode! Yoode!” iꞌi cookiyeete.

²² Keejjinnoon “Amoyichiye? Bi gondochi amoone? ‘Qitibe’ getiree ta nallemmoyich bi toommoochee ta daneti gondo aalloone. Ebich sheeriree biichemmo taane” iye.

²³ Tunebaani Yesuusin bi yooddiyemmoyich manjiiꞌi, “Yoode! Yoode!” iibee boonoshi qaaroon oogichiꞌi cookiyeete. Boonoshi cookee naboona Phelaaxoosichi mullo doojjiye.

²⁴ Phelaaxoosi asheenaꞌo echeti mooyon ceechoyich Yesuusi toommooch nalliye.

²⁵ Hukkee bi tiijjoonaa ashoon bi wuxoonoyich cucheti, are boonoshi echeti Barbaanin biichiihe; tunebaani Yesuusin boonoshi qaawitoommon beshiiꞌi immiye.

Yesuusi Yooddeyoo

²⁶ Yesuusin daammii boonoshi beetaa, Qerenechi Simooni goyechi gafoochee Yerusaalem waa bi beetaa daneꞌi, Yesuusichi masqaloon shaagiree bi hillooch bi dabbemmoyich tuniiheete.

²⁷ Dofee asheenaꞌoo Yesuusin dabbii beeheete; eboshi daggooch wotta “Woowo!” iibee shooshee eefeebeeti genneenaꞌoo beetinaꞌone.

²⁸ Yesuusi gubb wottee ciinniꞌi boonoshich ishichiye: “Hini Yerusaalemi genneenaꞌote, ittoshi qelloyich, ittoshi bushiishoyichoo eefotalli, taach eeppaahote.

²⁹ Ebiyoche, asheenaꞌo ‘Shiyii xaachii ariyaani xaafeenaꞌo diireetinaꞌone’ boonoshi gettemmi aabo woyemmone.

³⁰ Arooba asheenaꞌo, ‘Guudinaꞌote, no toommooch dihibote! Hini geppeenaꞌote, noon qeribote’ gettemminaꞌone.

³¹ Gaare michi toommooch ebin boonoshi tuniitoyee, shuuꞌi michi toommooch aabicheheete?” iye.

³² Bokkeenaꞌo tuneti bare gutte asheenaꞌon wotta biinna tookkii yoodoyich daammiyeete.

³³ “Qellee Koofee Xaaꞌoo” getteebeeti xaaꞌooch shaggiꞌi Yesuusin yooddiyeete; wotta bokkeenaꞌonon ikkoon Yesuusichi qanne badd, ikkoonoo bi yooche badd geddiꞌi yooddiyeete.

³⁴ Yesuusiyoo “Ta Nihoocho, boonoshin maaribe; ebi boonoshi shuunee beeton ariyaaneenaꞌone” iye. Ebiyee gubb, bi tahoon ixoo kuxxiꞌi qoodeeheete.

³⁵ Aroochaa meeti asheenaꞌo neexeꞌi ciinnii beeheete. Ayihudee nallechinaꞌo wotta “Bareenaꞌon wodiihe; eke Yeeri kacciti Kiristoosi bi gaata, bi qelloon wodiibe” iibee cooqqiriyeete.

³⁶ Ginee naayinaꞌo wotta bi waan katinniꞌi kiikkere woyinee uyoon daammii, “Uye” iꞌi biich giddiichii,

³⁷ “Ayihudeenaꞌochi taatoo ne gaata, ne qelloon wodiibe” iꞌi cooneheete.

³⁸ Wotta “Hini Ayihudeenaꞌochi Taatoone” ii beeto kooraa biyee tookk xogeetone.

³⁹ Biinna tookkii yooddeti hukkechinaꞌo daggoochee ikkoo “Ne Kiristoosi toono neene? Amoyich neennaa noonnon wodiyaachine?” iibee naagehe.

⁴⁰ Tunebaani bare ikkoo tiyiꞌi, “Bi toommooch nalleeti qitee nalloo ne toommooch wotta nalleetone. Illa amoyich Yeerin shataachine?

⁴¹ No, no shuunooniye no deqqaabeeto; ebich no toommooch nalleeti nalloo tatoone; tunebaani hini uro bi shuuneti gonde mooyo amolla aalloone” iꞌi noggehe.

⁴² Aree hillooch Yesuusin “Yesuuso, ne taatittineech ne giyiyooba, taan batteyaahine” iye.

⁴³ Yesuusiyoo wochiꞌi, “Neech iberoon gettoye, hanaach yannetooch giyiree taanna tookki kotemmo neene” iye.

Yesuusi Qitoo

^44-45 Haree shiritte saati bedoone; areegaata aabee bekko manderehe; yiixiye saatee wottoon are showoo bulli toommoochee bekko aallehe. Arooba yaafee kexooch tippeeti maccillaatoo gutte daggoochaa kappheeꞌi keexee kechiye.

⁴⁶ Yesuusiyoo oogichii cookiꞌi, “Ta Nihoocho, ta kasheen ne kishooch beshii immeto taane” iye. Ebin bi gettimmona, bi kasho abbetehe.

⁴⁷ Areegaata balle ginee iraashoo ebi tuneti mooyon beeggiꞌi, “Hini uro iberoon cadiqoone” iꞌi Yeerin oogiihe.

⁴⁸ Tunemmi mooyon beegoyich dofee asheenaꞌo kiceeꞌi neexee beeheete; are asheenaꞌo bulli ebi mooyon beeggiꞌi boonoshi getoon qicciibee kexooch wotteheete.

⁴⁹ Tunebaani Yesuusin ariibeeti asheenaꞌo bullinaa Galiilee showoochee biin dabbiꞌi waati genneenaꞌona ebi mooyon ciinniibee wohooch neexee beeheete.

Yesuusi Duukko

⁵⁰ Arooba Ayihudee nallechinaꞌochi daggeexi ikkoo, Yooseefi getteebeeti deꞌe cadiqe uro beehe.

⁵¹ Are uro nallechinaꞌochi koceyoonaa boonoshi shuunoonooch bacceyaani ashoone; biyoo Arimaati getteebeeti Ayihudeenaꞌochi katemeexi ashoone; aroo Yeerichi taatittinoon quyeebeeti uroone.

⁵² Biyoo Phelaaxoosi aafooch giddeꞌi, “Yesuusichi cahoon taach imbe” ii qolleꞌi daaggiihe.

⁵³ Aroochee hammii Yesuusichi cahoon kindiiꞌi kaafenoona kaappiye; koniyoona batt duukkeyaani, xaqqee guudoochee gooshaa shuuneeti oppooch daammiye.

^54-56 Daammii bi beetaa, Galiilee showoochee Yesuusina tookkii waati genneenaꞌo Yooseefin dabbii hammiꞌi maashoon beeggiyeete; wotta cahoo aabichaa bi duukketo gaata beeggiyeete. Wotteꞌi boonoshi qeyiibeeti kexooch hammiꞌi qimaamoonaa huutoonon qanniiheete. Are aabo Ayihudeenaꞌochi Qanniyee aabo bi tunetoyich, boonoshi shambetoo giyi beddiye. Muusichi Sheeroochaa bi getteetoommon shambetooba kasheꞌi heechiyeete.