Luqaasi 21 - Kafa Linguistics Project

Ikke Girechi Xuumee Immeti Gijjoo

¹ Yesuusi yaafee kexooch gijjoo kiceebeeti qiicee daggooch gijjoon duppiibeeti gaannechinaꞌon xiishiꞌi ciinnii beehe.

² Wotta ikke girechi xuume ure waaꞌa gutte duuden bi dufon beeggiꞌi,

^3-4 “Iberoon ittoshich gettoye: Eboshi bulli boonoshich beddii echeti gijjoocheeniye deebii boonoshi duppito; tunebaani hini girechi bi tunetaanoona maaree bi qeyemmon echiyaanoon biich beeti bullinoo deebaa duppetine. Ebich asheenaꞌo bulliyee beshoon duppeti hini girechi xuumeene” iye.

Yaafee Kechi Happeyoon Yesuusi Geto

⁵ Ikkikke asheenaꞌo yaafee kechi mooyon tiijjiꞌi, “Yeerich giddeti wojjoonaa aaxxe xaqqeenaꞌona hakketi hini yaafee kechi malleto am shaahoon gaawehe” iꞌi yibbaatee boonoshi beetaa,

⁶ Yesuusi “Hini ittoshi beeggiibeeti mooyo bulli happeyaanoon xaqqo xaqqee toommooch keddeeree ebina bi beetaachemmi yemeeno woyemmone” iye.

Yemeenee Ciiree Malletoo

⁷ Arooba Yesuusin bi dabbeenaꞌo “Dojjechocho, illa hini mooyo bi tunemmo aatane? Hini mooyo ceenn bedon bekkiyemmi malletoo amoone?” iꞌi echeheete.

⁸ Yesuusi wochiꞌi boonoshich ishichiye: “Koniyoona ittoshin bi muriciyaachemmoyich ittoshi qelloon quyebote. Meetinaꞌo ‘Ta aroo taane’ wotta ‘Kiristoosi woyemmi yemeeno shaggitone’ getibee ta shigoona woyemminaꞌone; ebiyooba ishichimminaꞌon dabbiyaahote.

⁹ Ginee woroonaa hukkee woroonon ittoshi waayehooba keqqiyaahote. Ebi bulli shiichii tuno echeyaachemmone; tunebaani yemeenee ciiro bekkech tuneyaachemmone” iye.

¹⁰ Wotta Yesuusi daakkiꞌi ishichiye: “Ikke aagetoo bare aagetoona, ikke showee taatoo bare showee taatoona koyemmone.

¹¹ Baribare xaaꞌoochoo oogeti showee qewo tunemmone; kaatee wuxiibeeti biiyoonaa shaacoona giyemmone; keqqichemmi mooyinaꞌonaa shimaayoochaa ogooge malleteenaꞌona bekkemminaꞌone.

¹² “Tunebaani ebi bulliyee shiichiree, ta naboyich ittoshin yechemminaꞌone; duuꞌiyemminaꞌone; Ayihudeenaꞌo kiceebeeti kechi nallechinaꞌoyich ittoshin beshiiree immemminaꞌone; boonoshiyoo ittoshin cuchiyemminaꞌone; taateenaꞌonaa iraasheenaꞌonochi aafoochoo ittoshin neechemminaꞌone.

¹³ Ebiyoo ta mishiraachee qaaroon ittoshi miixemmoyich gommon qechemmone.

^14-15 Arooba ittoshi taggechinaꞌo bulli ittoshin bayonaa ittoshi yibbaatoon nookkoonon boonoshi hakkaachemmi ariyoonaa noonoonon ittoshich immemmo taane. Ebich ‘No taggemmi taggoon shiichi gabaayone’ getiree kuxote.

¹⁶ Ittoshi nihoonaa indeena, maneenaꞌo, xibeenaꞌo ittoshi shunechinaꞌolla ittoshi toommooch nallemminaꞌoyich beshiiree ittoshin immemminaꞌone; boonoshiyoo ittoshi daggoochee ikkikkeenaꞌon wuxiyemminaꞌone.

¹⁷ Asheenaꞌo bulli ta naboyich ittoshin shixxemminaꞌone.

¹⁸ Tunebaani ittoshi qelli eexoochee ikkeyona aalleyaachemmine.

¹⁹ Kuppheꞌi ittoshi neexegaata, bulli yemeenee kashoon danemmo ittoshine” iye.

Yerusaalemi Happeyeechon Yesuusi Geto

²⁰ Yesuusi daakkiꞌi ishichiye: “Yerusaalemin ginee naayinaꞌo guuddii boonoshi giishaa ittoshi beegiyooba, arooba biich aallee shagon ariibote.

^21-22 Yaafe Macaafooch kooreeto bi ceennemmoyich eboshi Yeeri Israꞌeeleenaꞌo toommooch nichoon bi kichemmi aabeenaꞌone. Ebich arooba Yihudee showooch beetinaꞌo geppoo beetooch maxxebeete. Are Yerusaalem beetinaꞌo tiyi bara keyeete. Bi guudeexi goyechi gafooch beetinaꞌo are Yerusaalem giyaayeete.

²³ Arooba yeqqefechinaꞌonaa bushoon xaachii beetinaꞌonoyich woowo! Hini showee toommooch ooge xuuxo, hini aagetee toommoochoo ooge naxo kindemmone.

²⁴ Goraadoona qitemminaꞌone; kecceree aagetoo bulliichoo shacemminaꞌone; ebi are boonoshin kecciti Aageteenaꞌochi yemeeno ciiremmi wottoonoo Yerusaalemin yiikkeree neexi hajjemminaꞌone” iye.

Guttinnoon Yesuusichi Womo

²⁵ Wotta Yesuusi daakkiꞌi ishichiye: “Are yemeeno ciirehooba aabeenaa ageneenochi toommooch, xojjeno toommoochoo malletoo bekkemmone. Showoo bulli toommoochoo baharoonaa aachi aayonochi cookoochee tiyitona aageteenaꞌo gaabbibee xuuxemminaꞌone.

²⁶ Shimaajji giideenaꞌo shuuritoyich, showoo bulli toommooch kindemmi mooyon quyebee ashi kashoo keqqoona muujjemmone.

²⁷ Arooba Ashi Bushoo wodde giidoonaa oogee yiiroona qubee daggoona bi waataa beeggemminaꞌone.

²⁸ Ebi mooyinaꞌo tiyiyooba, Yeeri ittoshin biisheree bi wodiyemmi aabo bi katinnitoyich, kaama neexeechi damba wochiree ciinote” iye.

Balaasee Mixo Bekkiibeeti Mooyo

²⁹ Ebichi hillooch Yesuusi bi dabbeenaꞌoyich ishichiꞌi shaahiyoona gettiye: “Balaasee mixonaa bare mixinaꞌo bullinon ciinote.

³⁰ Quummiꞌi boonoshi atee waajjegaata, arooba ebin beeggiꞌi qaawoo womon ittoshi qelloona ariibeeto ittoshine.

³¹ Ebiyoommon wotta hini mooyo bulli tunoon ittoshi beegiyooba, Yeerichi taatittine katinneti bi tunoon ariibote.

³² “Iberoon ittoshich gettoye: Hini mooyo bulli tuneyaanoon hini shiijjeroo besheyaachemmone.

³³ Showoonaa shimaayoona beshemmone; tunebaani ta qaaro besheyaachemmone” iye.

Qanniree Boonoshi Quyemmoyich Yesuusi Gettiti Naboo

³⁴ “Tunebaani ittoshi mullo miyona, mashoonaa mashaamiti beemi qaatoona dingiraate bi beetaa, Ashi Bushoochi aabo diqqoona shaachoochoommon ittoshin bi yeshaachemmoyich, ittoshi qelloon quyebote.

³⁵ Are aabo showooch beetinaꞌo bulli toommooch diqqoona shaggemmone.

³⁶ Illa hini shagg bedditi mooyoochee ittoshi muriccemmonaa Ashi Bushoo aafooch ittoshin neechemmi hakkoon ittoshi danemmonoyich corootibee, bulli aaboon qanniree quyebote” iye.

³⁷ Areddi areddoon Yesuusi yaafee kexoochaa asheenaꞌoyich dojjiibee, showoo xumemmona Yerusaalemee maach kechiꞌi, Zayitee Michi guudo getteebeeti xaaꞌooch hammii qeyii beehe.

³⁸ Asheenaꞌo bulliyoo bi dojjoon waayeya maaddi maaddoona yaafee kexooch bi waan waa beeheete.