Luqaasi 2 - Kafa Linguistics Project

Yesuusichi Shiijjo

¹ Aroobee yemeenooch Awugisixoosi Qesaari bi taateebeeti aagetoo bulliich beeti asho haddaa bi kobereyemmoyich awaajjiye.

² Ebiyoo Qerenoosi Sooriyee showooch iraashoo tunee bi beehooba, batti batt ashi shigo haddeeꞌi kobereehe.

³ Ebich asho bulli haddeyoyich bi katemi katemooch hammiye.

⁴ Yooseefi wotta Daawitichi yaroonaa yoodoona bi tunetoyich, Galiilee showooch beeti Naazireetee tiyiꞌi, Yihudee showooch beeti Beetilehemi getteebeeti Daawiti Katemooch,

⁵ bi shigo kobereyemmoyich, shaagga bi maakkiiti Maariyamina tookkii hammiye; areyoo gutte kashechine.

⁶ Boonoshiyoo Beetilehem shaggiꞌi arooch boonoshi beetaa, Maariyami bi shiyemmi aabo shaggiye.

⁷ Aroochaa bi qaabbe bushoonoo shiyahan. Arooba iibbeenaꞌoch kexooch boonoshi qeyemmi xaaꞌoo aalletoyich, gaggeroon buroommi qoreddoona caaccaꞌa yegillooch tokketiihan.

Yesuusichi Shiijjoon Qiddeenaꞌoyich Maraakeenaꞌo Geto

⁸ Arooba are showooch xumoona bagoon quyeebee gaddooch qeyiibeeti qiddeenaꞌo beetinaꞌone.

⁹ Doonochi maraakoo ebi qiddeenaꞌoyich bekkehe; Doonochi oogee yiiree bekko boonoshi guudoona waccii bekkehe; boonoshiyoo oogichii shattiyeete.

¹⁰ Are Yeerichi maraakoo boonoshich ishichiye: “Shattaahote! Asho bullich oogeti emiroo tunemmi mishiraachoon ittoshich and gettemmo taane.

¹¹ Hanaach Daawiti Katemooch Wodiyecho ittoshich shiijjetone; biyoo Kiristoosi getteeti Doonone.

¹² Ebi ittoshich malletoo tunemmone: Gaggeroo buroommi qoreddoona caaccee yegillooch tokketeꞌi beeton danemmo ittoshine” iye.

¹³ Bekkech meeti mattiqutte shimaajji maraakeenaꞌo are maraakoona tookkii bekkeheete; Yeerin galleteebee ishichiyeete:

¹⁴ “Shimaajji shimaayooch beeti Yeerich oogee yiiroo tunebe! Showoochoo Yeeri boonoshina emiriti asheenaꞌoyich diggoo tunebe” iyeete.

¹⁵ Hini are maraakeenaꞌo qiddeenaꞌo waanee shimaayooch boonoshi hammiichaa, qiddeenaꞌo boonoshinaa boonoshina “Eke illa Beetilehem beddaahaa hambone; Doono nooch arichiiti hini tuneti mooyon beegone” iyeete.

¹⁶ Ebina qiddeenaꞌo bekkech tiyii afaafinoona hammiꞌi Maariyaminaa Yooseefinon, yegillooch tokketee beeti gaggeroonoo daneheete.

¹⁷ Beeggiꞌi, boonoshich getteti hini gaggeroochi mooyon asheenaꞌoyich arichiiheete.

¹⁸ Waayetinaꞌo bulliyoo are qiddeenaꞌo boonoshich gettiti mooyon worganeheete.

¹⁹ Tunetaa Maariyami hini mooyo bullin bi mullooch kotiichaa kichaa kindii beehan.

²⁰ Qiddeenaꞌoyich getteti mooyo ceenniye; ebich boonoshi waayetonaa boonoshi beeggito bullinoyich Yeerin oogiibee, galleteebeenoo wotteheete.

Yesuusi Shigeyoo

²¹ Gaggeroo shiijjeti shimitte qemo ceenaa bi dokireehooba, bi indee maacooch yeqqefeyaan bi beetaa maraakoo gettitoommon, bi shigoon Yesuusi iꞌi shigiiheete.

Yooseefinaa Maariyamina Yesuusin Yeerich Diiriyoo

^22-24 Ebiyee gubb, Muusichi Sheeree doyoommon xallittinee aabo ceennimmona, “Bi indee maacoochee shiichii shiijjeti anaamo bulli Doonoyich yaafeeto tunemmone” getaa Doonochi Sheeree Macaafooch bi kooreetoommon Yooseefinaa Maariyamina bushoon Doonochi aafooch giddiyoyich, wotta boonoshi giddiihooba Doonochi sheeree doyoommon, ebiyoo, “Gutte daabbicho woyee gutte uggee cobbelloo” bi getteetoommon, deejjoon deejjoyich bushoon Yerusaalem daammiyeete.

²⁵ Arooba are Yerusaalem Simooni getteebeeti ikke uro beehe; aroo Yeeri Israꞌeeleenaꞌon bi goggiyemmi aaboon quyee beehe; biyoo cadiqo tuneꞌi Yeerich qeyiibeeti uroone; wotta Yaafe Ayaanechone.

²⁶ Yaafe Ayaano “Doono Yeerichi Masihin beegaanoon qitaachemmo neene” iꞌi biich gettiye.

²⁷ Arooba Yaafe Ayaano malletetaa, tiyii hammiꞌi yaafee kexooch giyiye. Aroyee gubb Yesuusichi indeenaa Yooseefina Muusichi Sheeree doyoon biich ceechiya gaggeroo Yesuusin boonoshi giijjimmona,

²⁸ bekkech Simooni yechiꞌi tiqqehe; Yeerinoo galleteebee ishichiye:

^29-32 “Doono Yeero, aageteenaꞌo bulli aafooch ne qanniiti ne wodiyoon, ta aafoona beeggeto taane. Ebiyoo Aageteenaꞌo bullich iberoon bekkiyemmi bekko, ne maccoo tuneti Israꞌeeleenaꞌoyich oogee yiiroone; taach ne gettetoommon and ne guuno taan diggoona kashiibe” iye.

³³ Arooba Yooseefinaa gaggeroochi indeena Simooni yibbaateti gaggeroochi mooyon waayeꞌi worganeheete.

^34-35 Simooniyoo boonoshin diiriye. Gaggeroochi indee Maariyamichoo ishichiye: “Hini bushoo meetinaꞌochi maaceexi mooyon bi gaxxemmoyich, Israꞌeelee showeexi meetinaꞌon Yeeri aafoochee wokkiyoonaa katichoonoyich, asheenaꞌo biin boonoshi coonemmi malletoo bi tunemmoyich, Yeeri biin kaaccitone; ne kasheyoo wotta goraadoona kocheyemmine” iye.

³⁶ Ebiyoommon wotta Aseeri yoodeexi Fanuꞌeeli bushee Haanni getteebeeti ikke keemechi ure beehan; biyoo gidiidittinoona bi shaakkeeti shabaatte nati wottoon bi kenoona tookkaa beehan.

³⁷ Ebiyee gubb, bi eeno shinnaa awudde nato beddimmi wottoon xuumee tunaꞌa beebee geenahan; xumoonaa areddoonon coomoonaa corootoona Yeerichi maddaabee, yaafee kexoochee baraa ariyaaneene.

³⁸ Bekkech areegaata Yooseefinaa Maariyamina waan waaꞌa Yeerin galletahan; aroochee Yeeri Yerusaalem beeti asheenaꞌon xuuxoochee biisheree bi wodiyemmi aaboon quyee beetinaꞌo bullich are gaggere bushoochi mooyon gettahan.

Naazireet Yooseefinaa Maariyamina Wotto

³⁹ Yooseefinaa Maariyamina Doonochi Sheeree Macaafooch kooreeto bullin boonoshi ceechitoyee gubb, Galiilee showooch beeti boonoshi katemoo Naazireet wotteheete.

⁴⁰ Aroochaa gaggeroo dicciye; ariyoo ceenniti mullecho tuneꞌi kupphehe; Yeerichi wojjoo bi toommooch beehe.

Ayihudee Dojjechinaꞌon Yesuusi Worganikkoo

⁴¹ Beshee Baarooba, Maariyaminaa Yooseefina boonoshi doyoommon Yerusaalem hammii beeheete.

⁴² Ebich Yesuusin bi shiijjeti aaraa gutte natooba yechiꞌi are baaree doyoommon Yerusaalem hammiyeete.

⁴³ Aroochaa baaree aabeenaꞌon boonoshi beshiitoyee gubb kexooch wottee boonoshi beetaa, bushoo Yesuusi Yerusaalem kuxee echehe; tunebaani bi indee Maariyaminaa Yooseefina bi echoon ariyaaneenaꞌone.

⁴⁴ Gommechinaꞌo daggooch beeto boonoshich bi shaahaa, ikke heeyi gommon hammiyeete. Aroochee boonoshi xibeenaꞌonaa boonoshi ariibeeti asho bullina daggooch qaawiyeete.

⁴⁵ Tunebaani mucceꞌi, qaawiibee Yerusaalem wotteheete.

⁴⁶ Keejje qemoyee gubb dojjechinaꞌo daggooch koteꞌi elleebee wochii boonoshin echee bi beetaa, yaafee kexoochaa daneheete.

⁴⁷ Bi yibbaatoon waayetinaꞌo bulli gaawe bi shalligoonaa tate bi wochoonoyich worganeheete.

⁴⁸ Yooseefinaa Maariyamina boonoshi bushoon beeggiꞌi worganeheete. Bi indeyoo “Ta bushoochoo, amoyich ebi shaahoon noon iritiinne? Ne nihoonaa taanna xuuxaꞌa neen qaawaan toone no beeto?” iyan.

⁴⁹ Biyoo boonoshich “Amoyichiye taan ittoshi qaawiibeeto? Ta Nihoo kexooch tun ta bedon ariyaachote?” iye.

⁵⁰ Boonoshiyoo boonoshich bi gettito amo gaata shalligaaneenaꞌone.

⁵¹ Aroochee boonoshina tookkii wotteꞌi Naazireet hammiye. Boonoshichoo deꞌa iꞌi wochee beehe. Bi indeyoo hini mooyo bullin bi mullooch kotii beehan.

⁵² Yesuusiyoo Yeerinaa asheenaꞌona naadeebee, ariyoonaa neexoonon daakkii beehe.